ghorcheank hamv zodd ya chodd zal’lim tem hamv nenna. Punn mhaka purti vis vorsanchi prai zaizoi tor mhojem kazar hea jerilagim mhojea baban korn dil’lem. Mhojyelagim ek utor soit vicharunkna mholl’llo rag ya bezarai mhaka natl’lich. Ani asl’li tor, mhojye obhiprayechi konn porva korta mhonn?
“baye, mhaka goblleant il’lem udok haddn di” mhonn baban mhonnje mhojea mamvan mhaka ulo ditana mhoji sasu challvali.
“kitea? hamve haddn dilear tujea talleant tem udok demvanangi? ya hamv kaim tantum vik khiroun ditam mhonn bhietai?”
`khokk….. Khokk….’ korn baban sopeachea ponta voilea tea kosro ani gujiri bhorn dourl’lea oxir, bhuxrea kuddant konxeak nidun khonkli kaddtana mhaka tachi bhirmot disli.
Dhonparachim voram don utorleant. Amchem sokddanchem jeunn zaun tem jirunk laglam. Punn babachea pottantle dont azun bhukhen uchamboll asat mholl’llem tachi ti upasachi khonkli sangun asa. Mhojye sasuche kan keppe zaunkonant tori tichem kalliz tichea potithoim azun kiteakgi movo poddunk na. Teach dekun taka tinne atam poreant upaxinch dourla.
Mhaka babachi bhirmot dista tori hamv osohaik zaleam. Kaim hamv taka khonchyey ritichi kumok korunk gelim tor ti mhaka ani mamvak bandhun dita. Tichye jibethaun usallchim tim zolltea kenddam tosolim utram mhojem kalliz matr nhoi xintidyi hulpaitat, udkakyi uzo laitat.
Bab porot tanen pimrgatana hamve mhojye sasu kuxin pollelem. Tika hachi porvach na mholl’llyeporim sopeachea anyeka pontar bosun ti tonddantli pan-fodd chabun, komrgottaun asa.
Mhojem kalliz az kiteakgi aikana. Mamvachi mhaka odhik bhirmot dista. Sottokk korn utthun randpa kuddak dhamvtam. Ghoddyen bhair yetana mhojea ujvea hatant babacho rong hogddayil’lo porno sttilacho gobllo udkan bhorun ascho polleun mhojea sasuchea angant ponzurli bhut rigloch.
“hanga hadd to gobllo alisa” tinne mhaka khoddokk takid dili. Tichi ti agonea pallunk hamv kobul na zalim dekun aikanatl’lyeporim korun xida gobllo vhorn babachea hatant hamve dila ya na mholl’llem mhaka kollchea poilench ghonniporim yeun tinne udkacho to gobllo zompoi marn oso voddn ghetlo ki, goblleantlem udok sogllem nidun aslelea babachea angar poddlem.
Sukl’lye katik reuddayil’lo haddancho ghudd zaun usvas soddn aschea baban ek oskot khillonch marli. Tea vellar ragan daddamam oddchun dhorn naka tonddantlean hunoni varem soddchea mamychem vidrup ani horamiponn uspun yemvchem tem tondd pollemvcheak mhakach kantthallo yeun bhirant disli.
“atam jeunnachea vellar tum itlem udok ghottxi tor thoim hun korn dourleli ti pez konne bhokamvchi lusifera?” mam-i futtlich.
Bab bhauddo angar poddlelea udka nimtim himvan ankuddtalo ek sarko. Thoddea disanthaun to tapan oso taptalo ki tachea tonddachem rupch bodlal’lem. Tachi hi poristhiti polletana to ani chodd disank jivont urchona mholl’llem mhaka spoxtt bhogtalem.
“tum kitea mhaka hea nomunear koxttitai eliza? mhaka tum morunkyi soddinam-i, vanchunkyi dinam-i. Hamve tuka kitem onyai kela?”
utram tachim spoxtt asl’lim tori oskot, kamperim ani pokllim zaun aikalim mhaka. Babachi khoros ani khonkli chodd zaun aili. Laginch ubhim asl’lea hamve babak `uloinaka’ mhonn dollo moddlo. Titlear tachye khonklen taka vollaunko suru kelem. Hordea bhitorlye dukhin ani hulopan gamydoll hullvullchyeporim dolle zata title bhair kaddun usvas soddcheak to koxttalo.
Tachi ti durgot polleun mhojea dolleamni duHkham bhorun ailim. Kitem korchem mholl’llem sustanastam hamv sontapan tea kudda thaun bhair ailim, mamyk ambaddea dolleamni polleun.
“tuka mhojer rag yetoloch alisa. Hanne mhaka koxttitana tum mhojye sangata hea ghorant natl’lem-i nhoigi? hanneÉ adharl’lea kormank ghorant nhoi tea gotteant legun haka zago hamve divonko favo nhoi. Az hamve haka fokot udok pieunko soddlemna. Hanne mhojea tonddantli xita unddi soit bolatkaran bhair voddn zalant bosun asl’lea sunneak uddoilea. Got’tasaye tuka? titlo kosappi, dolleant rogot natl’lo horami, yemkullo ho.”
“tum kitea naka zal’lem ghoddun sangun tea nennareachi mot vikar kortai eliza? tuka hea fottinchem sogllem lek devak divonko astolem.” ulomvcheak trann ani aspou na tori mhozo mamv koxttamni boddboddlo kamperea tallean.
“ham….Ham….. Titlem tum mhaka bhexttainaka ham, ghatki zudasa. Tea devache dolle kaim futtunknatl’le tumve mhojye thoim kel’lim oturvonnam kortana. Tanne mhojem kosolem lek ghemvchem? olle, tunch nhoigi atam zorkottun asai tujea on’naddponnachea horyek kortubachem lekh divonko.”
“e mhojea porask saiba, ek pauttim hea dolldir soitanachea hata thaun mhaka suttka di. Ani mhojean hi izha sosunk zaina.” gorgorea avazan bab nidhan kuddkea kuddkea utramni olkondlo uspun yemvchi khonkli bolatkaran dhambun dhorun.
“titlea vegim devan tuka koxem vhorchem-ya? hangachem sogllem kabar kornch vhochazoi nhoigi? tum titlo boro monis zal’loi tor tumve oxem vollvollazoi mhonn asl’lengi? to boro devo kitem mhaka onyai korit mhonn chintaigi tum lusifera?”
baban zap dinastam fokot suskar soddlo dhovea taddamni bhorlolim daddamachim sukim haddam haloun. Addosak ravun aikunchea mhojea kanank tache attevitte az chikke choddch disunk lagleat. Punn mam-i matr az aniki chodd dharunn zal’lyeporim mhaka dista.
Kazar zaun hea ghorant hamve pam-i dourn panch vorsam utorleant. Ayil’lye surver mam-i ani babacho to kazari mog polletana mhozo ghovo jerichoch mog oskot koso distalo. Sokallim guddeak palo ya lankudd haddunk tim dogam-i sangata vhetit tor dhonparam jeunnachea vellar matear ek vhodd sukea addarancho bhoro dourun ghora pattim yetalim mogachem tupem bhorun.
Bhari ek mog, ekvott ani sangat tancho. Ani mhozo eklo ghovo asa polle, to kasak proyozonak poddanatl’lo boji chappo monis. Kazar zaun panch vorsamni mhojye sasumamyk tegam bhurgim zal’lim kom-i. Mhojem kazar zaun panch vorsam utorleari panch mohineancho gorbh soit mhojea kusveant ravunk na. Titlo pokoll dadlo mhozo jeri.
Mhojea uprant kazar zal’lim mhojea sangatachim sorvam eka-dogam bhurgeancheo auyo zaleant. Mhaka matr devan tosolem bhag azun divonkoch na. Devak kitea dursazoi? tanne ditana gheunko mhojea ghovak tank asazoi nhoigi? hitlantlem tachem kamch mugdana. Ratim purasonnen yeun, nhaun, ters korun mamyn dil’lem il’lem kopachem ghottun jevann kortananch taka kumbhokornnachi nid lagta, vhechea kallachi. Mhojye kuddintlea tollmolleanchi, attevitteanchi taka khobor na dekun mhoje dolle nidek vengunk bilkul kobul zainant.
Mhoji auy horyeka mohineant `kaim bori khobor asayego?’ mhonn vichartana khori gozal sanglear tika bezar zamvchemna? ho khoddu ghott hamv mhojea patkanchem prachit mhonn sodam ghottun asam. Jerik matr hyevixim kaim khobor, ichchha, otreg ya khont asl’li mhaka azun disunk na. Tachem soimbh ani kastch thondd, gar mhonn dista.
Sadharonn chear, panch mohineam adim guddeak baba sangata sop haddunk gel’li mhoji sasu auchit horxenchea vella bodlak votachim sadde ikra vajchea adinch ragacho gol zaun ghorant bhitor sorl’li polleun hamve sot’tean bab khoim asa mhonn vicharl’lem. Titlench, hatantli koiti kaddn bhailye nhanniechea sopeachea konxeak uddoun, ujeachim kittallam utthoun ti `xivo tanddov’ nach korunk lagl’li. Ti kitem korta ani kitem uloita mholl’llem ekyi mhaka somzana zal’leÉm.
Hanchea, ghovo-bailechea jembarant modhem poddlear mhakach sonchikar mhonn chintun hamv randpant mogn zalim. Punn mam-i portean khonchean mayag zali mholl’llem mhaka koll’llem na. Hamvem-i tye dixim choddit guman kelemna.
Uprant mhaka koll’llem ki, tea dis mam-i khonchean bhairi zali mhonn bab tika sodhun gel’lea toull mhoji sasu ani sezarcho nikam’ sangatach pois thaun hasun-uloun yetana tanne pollelem kom-i. Mhojye sasumamycho purasonnecho jinos ani ghaman bhijl’li kudd polleun baban dubavachi dixtt mamycher ghal’lich ti bolcheli kom-i. Hich amchea baban kel’li moha chuk kom-i. Hi gozal mhaka babanch ghuttan sangl’li.
Titlench…Apnnachea ghovak mhollear mhojea mamvak burbuream voddnch ayil’li kom-i mhoji mam-i tichye jibechea pontathaun usallchea galli-soveanchye sankllin bandhun. Tea uprant hancho mog korpun poddcha zalogi ya gamv soddn piddcho zalogi konn zanna? mam-i tinga tor bab hinga. Hancho sangat, mog, sombondh tir tirkutt zal’lo. Mhaka matr hea ghoddita pattlo mister azun sarko sustonkna.
Punn hea uprant mhozo ghovo jeri sanjechem ghora vegim yeta. Ghorantlem tem, hem kam’ korn asta. Mhojyelagim ek sobd mogacho ulomvcheak taka bhirant ya lojgi ya ani kitem mat’tigi..Mhoji antorik axechi tan bhagomvcheak taka monch na koxem dista. Sanjer chikke vegim hitlantlo pattim ailo tor xida mamychea kuddant rigta. Ters suru kortana bhair yeta. Put ani auy kitem uloitat ya ghuttmoll kortat mholl’llem mhaka ekyi somzana.
Don dis zaizoi tor ratim nis-pez jeun nidl’lo amcho bab sokallim hamv utthtana gomtti kuxik korun dolle ugtech dourun ordhi jib bhair ghalun poddcha zal’lo. Jivo vhechea poilem boroch doddboddla ya hullvull’lla mholl’llyeporim distalem.
Hamv mhojim sokallinchim kamam sogllim korn mam-i sorxin vhetam tor ti mhaka tichye mandrer dislina. Horxem hamve vhochun tika utthoilea xivai ti mandri soddinatl’li. Tinne utthun nhannyek vhetana tichi mandri ani vol hamve fapuddn kovulln dourizoi asl’li. Tichim sokallinchim sogllim kamam korn tinne tichea kudda bhitor rigtana tichi kafi ani naxtto hamve thoimsor toyar dourizoi.
Punn aichim tichim kamam sogllim ullttim zal’lim. Ticho put, mhozo poti jeri mhaka zag zatastana ghorant na mholl’llem mhaka koll’llem. Ani mhoji sasu kosolyegi ghoddboddent misllalea koxem mhaka distalem.
Titlear ekachfora mamycheo arabayo aikunk lagleo. Hamv bhair sopeak dhamvlim kitem zalem tem pollemvcheak.
Babachi mel’li kudd aplea uskear dourun, davo hat babachye tokle ponda uxeaporim patllaun ujvo hat aplea hodreak boddoun, dolleamni konnkott sisrichim duHkham golloun hak-bob ti martali. Zalant dog dadle ubhe asche mhaka disle. Az voreg tankam hamve amchea vottharant ya sut’turant pollel’lench na.
“e alisa, tuzo bab amkam sokttank soddn gelo nhoyego… Mhojem ayaponn hamve hogddailem. E mhojye mai, kal ratim itlye apurbayen jeula, mhojyelagim uloila. Olle, sokallim utthtana oxem zalam nhoigi? e deva, hamv atam kitem korum? jeri khoim gela alisa?”
tinne mhojyelagim ekachfora hem soval kortana hamv kalubulim zalim. Modhean ratim mhojeach kuddant nidlolo, hollu utthun bhair gel’lo jeri uprant thoddea vellan bhitor yeun mhojye sorxin titlea lagsar yeun nidtana sogllo bhizun volo zal’lo matr nhoi, barik kamptalo.
Hacho ho othvo jinos polleun mhaka bhirant disli. Babachi pidda hakai lagligai mhonn chintun hamv tachyethaun pois sorun vonnodik oddchun nidlim, dolleank azun zage dourun.
Hea poreant mhozo jeri kednam mhojye sorxin yetolo mhonn hamv axeun asl’lim. Punn az tanne mhoji somipai zoddtana nizaun hamv bhian fanttrel’lim.
Punn sodanchea vellar mhaka nidentli zag zatana jeri mhojea lagsar natl’lo! toso mhaka chukun gel’lo to azun kitea pattim ailona mholl’llo mister mhaka sotaitalo.
Tea uprant, thoddea vellan sogllim kamam zalim. Sanjechea panch vorar babachem morn ghorathaun kaddlem. Ratim dukhichye peje-jeunnak vaddeantlim ani soirim-dhoirim mhonnun pon’nas zonnam asl’lim. Babachea auchit mornna nimtim ghorantlem kam’ korn mhojem noppott-nar zal’lem. Gurkara sangata souy asl’lea dadleank, tornatteank toxem thoddea striyank jerin soreacho glas dil’lo.
Babachea mornnadisa mam-i roddl’li ti azun bara dis zaleari roddunch asa, konn ghora yeun tika bhuzoitana. Her vellar ti tichim sodanchim kamam jivdalliporim sorosoro korn horkot nastam korta aplea dolleamni duHkhachi lom-i soit dakhoinastana.
Mhozo jeri atatam tika aniki chodd khalto zaun cholunk lagla. Tachea hatant kosolingi dostovezam mam-i divn khoingi sodam-i dhaddun asa. Sangatach nottanchi koulliy toulltoull dita.
Kalchye ratim hamv borye nident astam jeri yeun mhaka utthoilaglo. Hamve nidechea amalan toxench bhiranten sujl’lea dolleamni mhojea potirayak titlea lagsar thaun poyil’lye pauttim pollel’lo.
“alisa…. Tum kaim khont korinaka. Bab morun amkam kaim luksann zaunko na. Mamyn soglli ast mhojea namvar kortam mhollam. Tumve matr soi ghalizoi.”
hamv takach ajeap paulelea dolleamni atam polleunko poddlim. Ho kitem uloita tem mhaka kitench somzana zal’lem.
“tumve kitench korchi gorz na Alisa. Thoddea tempak tumve tujye auy sangata tumger raulear puro. Hangachim sogllim kamam zatoch hamv tuka pattim amger apoun haddtam. Tumve kosolich khont ya bezarai korchi gorz na.”
jeri khoingi nott dourun kitengi mhojyelagim sangtalo. Tacho irado ya hetu kitem mholl’llo to ugtean sangunk toyar natl’lo.
“hamve ghora gelim tor hanga ghorchem kam’ sogllem konn korta? mamyk….”
“ti soglli rattaull tuka naka. Tem sogllem ami polleun ghetamv. Chodd naka, thoddea mohineank ya eka vorsak tumve kullara raulear puro.”
“ek vorsak!?”
“vhoi.. Titlea bhitor amchim sogllim hangachim kamam ami korn mugditamv. Uprant tuka hanga apoddn haddtoleamv. Tum kaim bhienaka. Tuka dhoirak hamv asam nhoigi?”
jeri kitengi uloitalo konnengi sangun dil’lye bhaxen. Mhojem todd xida polleun ulomvchea titlem dhoir soit taka natl’lem.
“kosolim kamam korunk asat tumkam hamv hangasor natl’lea vellar?”
“tem sogllem mai korta kom-i. Tum hangasor aslear tika dhoir pavana kom-i. Tum huxear asai kom-i. Toxem…Toxem……”
mhaka pinteg nidhan choddun yetalo. Nid mhoji khoncheangi dhamvl’li. Hamve tyech ragachye nodren jerik pollelo, poyil’lye pauttim thoddea vellak. Tovi mhaka pollelaglo boro bhieun.
“hamv hanga thaun vhochana jeri. Tumvi mhojye sangata yexi tor matr…”
“Toxem mhonnanaka alisa. Magir hamve mamyn sangl’lyeporinch tukai korizoi poddat.”
“Mhollear…?”
“Naka. Tuka naka ti gozal. Tum hamve sangl’leaporim kor. Choddit sovalam korinastam tumger vhoch tum.” jeri kiteakgi dixtt dhornnik laun chikke pad’deun ulounko laglo.
Mhozo dubavo atam thir zalo. Tor babak heach tachea putan auyn sangl’lyeporim jivexim marla!!
`osolea khunigaram sangata hamve koxem ramvchenge e mhojye auy?’ mhojem kalliz bhian khillonch marunk laglem.
Punn mhaka kitea him auy ani put ghora thaun kullara dhaddtat mholl’llea sovalak zap mellanamu? mhoji sasu kosoli xirigunddi rochun asagai? tika iskolachem kaim xikop na zaleari osolim kutontram ti koxim zaryek haddta?
* * *
Atam hamv kullara asam. Mhojye auyk hamve soglli gozal suttavem sanglea uprant ti mhaka mamvaddea vhechench naka mhonnta. Konnengi sangl’lem aikalem hamve, mhojea sasun ghorachi oddi ek dourn url’lem bhum-i-bhatt sogllem viklam kom-i. Kitea mholl’llem konnyi nenna. Auy ani put matr sangata jietat. Jeri sodanch soro pieun yeun auylagim zogoddta kom-i. Ti bhauddi duHkham golloun puta mukhar aple hat udare korun apnnak nikaman ghatan bhuloun, fosoun, nagoun vattek layil’leak taka eksarko xirap dita kom-i.
Mhaka apoun vhorunk jeri don pauttim ayil’lo hea pasar zal’lea chouda mohineamni. Hamv tachye sangata pattim kullara vhochunkch na.
Punn khub sontosan bhorleam.
Hamv veginch auy zamvchear asam!!
