Lampeamvacho orso futt’tana

By

Tea sanjer

dhamvchea zorleak dhorunk

mazar mezak uddtana

lampeamv lokon orso futtol’lo

 

tea ratim

lampeavacho ujvadd

ekdom’ mukt zaun  vhalltana

oltari kuddant bhorun vomtoncho prokas!

lhan lhan pisolleank pixem korcho ul’las!!

 

tea porzollant…

Mojea pokriponnacha khellan, kopo usllon ghayel’lea

vonnodiche matie konn motiam porim hasche distana…

Jezucha povitr kallzacha painela pattlean

kouyil’lea rama chuddeticha khursa bhomvtim

festacha tornnam porim sumrgarun raul’lo

goir ujvaddak disanatol’lo goirem’

mukt prokasant dholon hastana…

 

Tersa vellar hamv haslom

kednam-i hasonatol’li gombhir mhoji mam-i soit

toddvanastam kusk korn hastana

bab haslo

magnneavellim-i biddio bandun asol’lem

bai vhoddlean haslem

dott’ttui haslo

mamacha vorsacha misak

apounko ayil’li mamiy hasli

mosk prokasant kuskal’lim muskoram

az fulol’lim, hastalim.

Khursar umkallcho krist

ani boglent dukhi matecha mukhomollar

haseacho prokas porzolltana

vanjelantle sobd soit

ugte zaun hascheporim disle!

hea hasean vhoddlean gaileli kontig

onzank zagomvn hasounko lagli!

 

sokddam haslim bexttem bexttem

vichitr sontosan

mukt ujvaddant  porzollchea tea  kuddant

mendu mond korchim dhampnnim

tutton futton gel’lyeporim!

Leave a Comment

Your email address will not be published.

You may also like

Latest Posts