കെങ്കാൺ

ലാണ്ഡ്രി ഥാവ്ന് ഇസ്ത്രി കെല്ലെം വസ്തുർ കബാടാന്ത് ജമയ്താനാ, കാൽ ആഫിസാക് രജാ മാഗ്താനാ ബൊസാൻ സാംഗ്ല്ലിം ഉത്രാം ഉഗ്ഡാസ് കരിലാഗ്ലൊ ഗുരുദാസ്. പൂൺ പെÇർച്യെ പ്രാസ് കാൽ താംബ്ഡെ ജാല്ലെ ദൊളെ താണെം ഘാല്ല്യാ വൊതാച്യാ ഗ്ലാസാംനി സയ്ത് പാർകിയെത് ആസ്ലെ. പൂൺ ആജ് മാത്സൊ സുശെഗ് ഭൊഗ്ല്ലൊ, ത്യാ കബാടാച്യാ ആശ്ര്യാന്ത് ആപ്ലെ ദൊളെ ചഡുണെം ബരെ ജാല്ല്യെ പരിം ദിസ്ലെ. ദെകുൻ വെഗിം വെഗിം ആഫിസാക് വെചി തയാരായ് കർച്യാർ പഡ്ലൊ തൊ.

കാൽ അർധൊ ദീസ് രജാ കാഡുൻ യെതാനാ സാംഗാത്യാംനി മ്ഹാകാ ദൊളെ മൊഡുൻ `മജാ മാർ’ മ്ഹള്ളെം പൂൺ ഹാംഗാസർ മജാ ജാംവ്ച്യാ ബദ്ലാക് സജാ. പെÇയ്ർച് ഗോകുൽ അഷ്ടമി പർബെ വെളാർ ഗല്ലെക് രിഗ്ച്യാ രസ്ത്യാർച് ദഹി ഹാണ്ഡി ഘാല്ലി. വർസാൻ വരസ് ഹാംഗാച് ഘാൽതാത് ആനി ഖംയ് ഖംയ് ഥാവ്ന് തർനാടെ യെവ്ന് തി ഹാണ്ഡി ഫുടൊവ്ന് വെതാത് ദെകുൻ ഹ്യെ പാവ്ടിം കൊപെർÇരേടർ വാഗ് മോരെൻ പന്നാസ് ഹജാർ രുപ്യാഞ്ചെം ഇനാം ദവർല്ലെം ദെകുൻ ദബാജൊ ദൊഡ്തൊ. മുംബംയ്ത് ദബാജൊ മ്ഹള്യാർ ആവാജ്. പൂൺ ഹ്യാ ദബാജാച്യാ നിബാൻ ഗല്ലെച്യാ ദൊന്യി കുശിംനി ബ്യാനരാംനി സൊബ്ച്യൊ കൊപെർÇരേടരാച്യൊ തസ്വിര്യൊ, തശെഞ്ച് നവെഞ്ച് ഹാഡ്ല്ല്യാ ഡി.ജെ. മായ്കാംനി പദാം ആയ്കുൻ കാനാചെ കാൻപെ ബസ്ല്ലെ.

പൂൺ ആതാം ത്യെച് ഗല്ലെക് രിഗ്ച്യെ കഡെ ദെഗെൻ ഗണപതി പണ്ഡൽ ഉബെം കെലാം. വർസാൻ വരസ് ജാംവ്ച്യാക്യി ഹ്യെ പാവ്ടിം ചഡിത് ഉബാർ. ദെകുൻ സകാളിം ഥാവ്ന് സാഞ്ജെർ പര്യാന്ത് മായ്കാംനി പദാം. സാഞ്ജെർ ആരതി ആനി പ്രസാദ് മ്ഹണുൻ ഗല്ലെച്യാ സർവ് ചാലി, ആംഗ്ഡിഗാരാം ലാഗിം ചന്ദാ എക്ടാംയ് കെല്ലെം. രാതിം ഇക്രാ വരാം ഉപ്രാന്ത് ഇസ്പിട് ഖെൾതാലെ. ചന്ദാ ദിനാത്ല്യാഞ്ച്യാ കാരാം, ബായ്കാഞ്ച്യാ ടയരാഞ്ചെം വാരെം കാഡ്താലെ.

ഗുരുദാസാച്യെ ദിസ്പഡ്തെന്ത് ഹെം സർവ് ചിന്തുങ്ക് വേൾച് നാത്ലൊ. എകാ ൽഹാൻ കുഡാക് മധെം ബാരിക് വണദ് ബാന്ദുൻ ഏക് ഖാട് ആനി കബാട് ആനി ഏക് കദെൽ മാത്ര് ആസ്ച്യാ ത്യാ ൽഹാൻ അധ്ര്യാ കുഡാക് മഹിന്യാക് അഡെജ് ഹജാർ ഭാഡെം ദിവ്ന് തൊ രാവ്താ. ബഗ്ലെൻ ഏക് ൽഹാൻ ഗ്യാസ് സ്ടവ് ആനി ദോൻ ൽഹാൻ ഹാണ്ഡിയൊ, തീൻ ബൊശിയൊ, ഗ്ലാസ് ആനി ബഗ്ലെൻ മൊരി, മൊരിയെന്ത് ഏക് ഹാത് മൊഡ്ല്ലി പ്ലാസ്ടികാചി ബാൽദി ആനി ഏക് മഗ്ഗ്. ഹിച് ഗുരുദാസാചി ആസ്ത് ആനി വസ്ത്. എകാ ഫാന്ത്യാച്യാ പാഞ്ചാങ്ക് ഉടുൻ ഗല്ലെച്യാ കൊൻശാർ ആസ്ച്യാ പബ്ലിക് കാകുസാക് വചുൻ കുഡിചി ഗർജ് സൊംപയ്താനാഞ്ച് ദാന്ത് ഘാസ്ചി സവയ് കെല്ലി താണെം. പാടിം യെതാനാ സാഡെ പാഞ്ച് ഥാവ്ന് സാഡെ സ വരാം പര്യാന്ത് മുൻസിപാലിടിച്യാ നളാന്ത് യെംവ്ച്യാ ഉദ്കാന്ത് ഖാഡ് താസുൻ, ൻഹാവ്ന് തശെഞ്ച് ഏക് ബാൽദി ആനി ദോൻ ഹാണ്ഡിയാംനി ഭരുൻ ദവർചി സവയ് കെല്ലി. സകാളിം ഗൊംവാം പിടാന്ത് കെല്ലെ പെÇളെ ഖാവ്ന് പാവ്ണെം സാതാങ്ക് സുട്ലൊം തർ സാത് വിസാഞ്ചി ഗാഡി മെൾതാലി. സദാഞ്ചി ഗാഡി, ബൊഗി, ഡബ്ബൊ ആനി ചഡ്താവ് തൊണ്ഡാം വൾകെചെം ജാല്ലെം.

ഹഫ്ത്യാക് ഏക് ദീസ് രജാ മെൾതാനാ കാകുസാച്യെ ദെഗെൻ ആസ്ച്യാ ബോർവെൽ ബാംയ്ച്യാ കാട്യാർ ലായ്നിർ ഉബൊ രാവുൻ വസ്തുർ ധുവ്ന് യെതാനാ അർധൊ ദീസ് സൊംപ്താലൊ. ഉപ്രാന്ത് കുഡാചി നിതളായ്, ബജാരാക് വചുൻ രാന്ദ്വയ് ഹാഡ്ന്, രാന്ദുൻ ജെവ്താനാ ദൊൻപാർ ഉതർതാലൊ. എക്യെ സാഞ്ജെർ സുക്ല്ലിം വസ്തുരാം കാഡ്ന് ഗല്ലെച്യെ ലാണ്ഡ്രിക് ദിലിം തർ, ദുസ്ര്യെ സകാളിം തിം തൊ ഇസ്ത്രി കരുൻ ദിതാലൊ. പയ്ലെം താകാ ദോൻ ഗല്ല്യൊ ഉത്രൊൻ ലാണ്ഡ്രിക് ദിംവ്ക് പഡ്താലെം, പൂൺ ആയ്ലെവാർ എകാ ഭയ്യാൻ ഹാച്യെച് ഗല്ലെന്ത് ലാണ്ഡ്രി ഘാല്ലി, ബഗ്ലെൻ താച്യാ ഭാവാൻ സെലൂൻ ഘാലാം മ്ഹൺതച് ഗല്ലെന്ത് ആതാം പദാം ദീസ്-രാത് ആയ്കതാലിം.

***

കാൽചി സജാ വാ മജാ സൊംപൊവ്ന് ആജ് ഉടാഉടിം കാമാക് ആയ്തൊ ജാംവ്ക് ൻഹാവ്ന് ഗഡി കെല്ല്യാ വസ്തുരാം ഥാവ്ന് ഏക് ബുസ്കൊട് കാഡ്ന് ൻഹെസ്താനാ താന്തും വ്ഹഡ് സയ്ത് ബുരാക് ആസ്ചൊ ഗുരുദാസാൻ പളെലൊ. വെഗിം വെഗിം ബുസ്കൊട് കാഡ്ന് പളെതാനാ വ്ഹയ്, മുക്ല്യാ ദെഗെൻച് വ്ഹഡ് ബുരാക്; ഉന്ദ്രാൻ ഖാന്തയില്ലൊ ബുരാക്. ഖണ്ഡിത് ഹെം ലാണ്ഡ്രിവാല്യാചിം കാമാം മ്ഹണുൻ തൊ ശിണ്ലൊ.

ആദ്ല്യെ പാവ്ടിം തൊ പേജർ പപ്പുക് സയ്ത് അശെഞ്ച് ജാല്ലെം മ്ഹണുൻ രയ്ലാർ ഗപ്പെ മാർച്യാ വെളാർ തൊ സാംഗ്താലൊ. `ലാതൊം കെ ഭൂത് ബാതൊം സെ നഹി മാന്തെ’ മ്ഹള്ള്യെ പരിം താണെം വചുൻ ലാണ്ഡ്രിവാല്യാക് ദഡിയൊ ഘാലുൻ ഉലയ്താനാഞ്ച് ലാണ്ഡ്രിവാലൊ മാന്വല്ലൊ ഖംയ്. ആപ്ണാൻ സയ്ത് ആതാം തശെഞ്ച് കരിജെ മ്ഹണുൻ ചിന്തുൻ പയ്ലെഞ്ച് കെങ്കാൺ ജാവ്ന് താംബ്ഡെ ജാല്ലെ ദൊളെ ഘഷ്ടുൻ ആനിക്യി താംബ്ഡെ കരിത് ഗുരുദാസ് ലാണ്ഡ്രി ലാഗിം ആയ്ലൊ. ഏക് ൽഹാൻ ഭുർഗൊ വസ്തുരാക് ഇസ്ത്രി കരുൻ ആസ്ലൊ. ഗുരുദാസ് രാഗാൻ വിചാരിലാഗ്ലൊ: “കിദർ ഹൈ തുമ്ഹാരാ ബാപ്?”

ഭുർഗൊ മാത്സൊ കാവ്ജെവ്ന് മ്ഹണാലൊ: “വസ്തുർ ഹാഡുങ്ക് ഗെലാ, ആതാം യെതലൊ”.

തിത്ല്യാർ ലാണ്ഡ്രിചൊ ഭയ്യാ ആയ്ലൊ. ഗുരുദാസാൻ വേൾ കാഡിനാസ്താനാ ദഡിയൊ ഘാലുങ്ക് ധർലെം; “തുമ്കാം കസ്ലിച് ഫികിർ നാ, ആമ്ചിം വസ്തുരാം കിതെം കബാഡിഗി? ഹൊ നവൊച് ബുസ്കൊട് പെÇയ്ര് ദില്ലൊ, ആതാം ഉന്ദ്രാൻ വാ കൊളിന്ദ്രാൻ വ്ഹഡ് ബുരാക് കെലാ, കിതെം മ്ഹൺതായ്?”

ഭയ്യാ സമാധാൻ കരുങ്ക് സൊദ്താലൊ, മാത്ശെം ഹളൂ താള്യാൻ മ്ഹണാലൊ: “സർ, ആമി കിതെഞ്ച് കരുങ്ക് നാ.”

ആയ്കുൻ രാഗ് ദൊഡ്തൊ കരുൻ ഗുരുദാസാൻ പാടിം സവാൽ കെലെം: “തുകാ കിതെം ഭൊഗ്താ? ഹാംവെം മ്ഹജൊ ബുസ്കൊട് ചാബുൻ തുജ്യെ ലാഗിം ഹാഡ്ലാ?, തീൻ വർസാം ഥാവ്ന് ഹാംവ് ത്യാ ലാണ്ഡ്രിക് വസ്തുരാം ദിതാലൊം, കെദിഞ്ച് മ്ഹാകാ ഹെ ത്രാസ് ജാംവ്ക് നാന്ത്. പൂൺ ദോൻ മഹിന്യാംനി തുവെം മ്ഹജൊ നവൊച് ബുസ്കൊട് വിബാഡ്ലൊയ്…”

ഭയ്യാ കിതെഞ്ച് ഉലയ്ലൊ നാ. ലോക് എക്ടാംയ് ജാല്യാർ നാംവ് പാഡ് ജായ്ത് ആനി ഗിരായ്കി സയ്ത് വതിത് മ്ഹള്ള്യെ ഭിരാന്തെൻ. “സർ, തും നവെം ശർട് ഘെ സർ താചെ പയ്ശെ ഹാംവ് ദിതാം” മ്ഹണത് ഭയ്യാൻ ഡ്രാവർ ഉഗഡ്ന് താന്ത്ലെ “പന്നാസാഞ്ചെ ദോൻ” നോട് കാഡ്ന് ദിലെ. ഗുരുദാസാൻ തെ ഘെത്ലെ നാന്ത് ബഗർ ആനിക്യി രാഗാൻ വിചാരുങ്ക് ലാഗ്ലൊ: “തുകാ കിതെം ഭഗ്താ, ഹൊ ബുസ്കൊട് ഫുട്പാതി ഥാവ്ന് ഉക്ലുൻ ഹാഡ്ലലൊ? ഹൊ ബ്രാണ്ഡെഡ് ബുസ്കൊട്, മ്ഹാകാ ഹൊച് ബുസ്കൊട് ഹാഡ്ന് ദി”.

ഭയ്യാ അപ്രാധി ജിൻസാർ ലൊവ് താള്യാൻ മ്ഹണാലൊ: “സർ, ആതാം മ്ഹജ്യെ ലാഗിം ഇത്ലെച് ആസാത്, തും ശർട് ഘെവ്ന് യെ, ബാകിചെ ഹാംവ് പാട്ല്യാൻ ദിതാം.”

ഇത്ലെം ആയ്കുൻ ഗുരുദാസാചി മത് മാത്ശി ശാന്ത് ജാലി. ഭിതർല്യെ ഭിതർ തൊ ഹാസ്ലൊ ആനി സന്തൊസ്ലൊ. സത് സാംഗ്ചെം തർ തൊ ബുസ്കൊട് ഗുരുദാസാക് കൊണെംഗി ബർഥ്ഡെ ഗിഫ്ട് ദില്ലൊ. പൂൺ ആതാം ആപ്ണാക് ജായ് ജാല്ലൊ ബുസ്കൊട് ഘെവ്യെത് മ്ഹണുൻ മതിന്ത് ലേക് ഘാലിത് തൊ ആപ്ല്യാ കുഡാക് ആയ്ലൊ.

ബാൽദെന്ത് ഭർൻ ദവർല്ല്യാ ഉദ്കാന്ത് താണെം ആപ്ലെം തൊണ്ഡ് ധുവ്ന്, ചാ കർതാനാ ഭായ്ര് ചാലിന്ത് കൊൺഗി വ്ഹഡാ താള്യാൻ ഉലൊംവ്ചെം ആയ്കുൻ താണെം ആപ്ലെ കാൻ നീട് കെലെ. എക്ലി കാമ്വാലി ബായ് ആപ്ല്യാ പിംവ്ഡ്യാ ഘൊവാചെർ ശിൺതാലി. “സഗ്ളൊ ദീസ് ഹാംവ് കൊണാ കൊണാച്യാ ഘർചൊ ഗശ്ടൊ കാഡ്താം, ഘരാന്ത് ശിതാക് ഗത് നാ ആനി തും മ്ഹജ്യാ ഘാമാചെ പയ്ശെ വ്ഹരുൻ കിത്യാക് വിബാഡ്തായ്? ആതാം ഏക് ടിവി ഹാഡ്യാം മ്ഹണുൻ ഹാംവ് സബാർ തെംപാം ഥാവ്ന് ഥൊഡെ ലിപൊവ്ന് ദവർല്ലെ സയ്ത് ഉസ്തുൻ തും വ്ഹർൻ ഗെലായ്, തുകാ തെ കിത്തുൻ പാവ്തലെ?, കിത്യാക് ചിന്തിനാംയ് തും?”

കാമ്വാലി ബായെച്യാ താള്യാന്ത് രുദാൻ ആസ്ലെം. കിത്യാക്ഗി ഗുരുദാസാക് കാന്തയ്ലെം. സ്ടവാന്ത് ചാ ഹുൻ ജാല്ല്യെ പരിഞ്ച് ഗുരുദാസാചെ മതിന്ത്ലിം ചിന്ത്നാം സയ്ത് ഖത്കതുങ്ക് ലാഗ്ലിം. ഗുരുദാസാക് ചിന്തുങ്ക് വേൾ നാത്ലൊ. പൂൺ വെഗിം വെഗിഞ്ച് ൻഹെസുൻ ഭായ്ര് സർതാനാ പരത് തിഞ്ച് ഉത്രാം താച്യാ കാനാന്ത് ഗാജ്ലിം: “കിത്യാക് ചിന്തിനാംയ് തും? തുകാ കിത്തുൻ പാവ്തലെ?”.

കബാടാച്യാ ആശ്ര്യാ സമൊർ രാവുൻ വസ്തുർ സാർകെം കർതാനാ ഗുരുദാസാക് ആപ്ല്യാ കാൾജാന്ത് കസ്ലിഗി കാന്തൊവ്ണി സുരു ജാലി. തൊ പന്നാസാഞ്ചെ ദോൻ നോട് ബൊൽസാന്ത് ദവ്രുൻ പരത് ലാണ്ഡ്രി ലാഗിം പാവ്താനാ ലാണ്ഡ്രിവാലൊ കൊണാക്ഗി ഇസ്ത്രിചെം വസ്തുർ ദിംവ്ക് ഗെല്ലൊ പാടിം യെതാലൊ. പരത് ആയില്ല്യാ ഗുരുദാസാക് പളെതച് തൊ ചുർചുരുൻ മ്ഹണാലൊ: “സർ, ഹെ ആന്യെക് പന്നാസ്, മ്ഹജ്യെ ലാഗിം ഇത്ലെച് ആസ്ചെ സർ, പൂൺ വിശ്വാസ് ദവർ, ഹാംവ് തുജ്യാ ബൊസ്കൊടാചെ പയ്ശെ ഫാരിക് കർതാം.”

ആയ്കുൻ ഗുരുദാസാചെം ഖഡ്പി കാളിജ് മൊവ് ജാലെം. താണെം ആപ്ല്യാ ബൊൽസാക് ഹാത് ഘാലൊ ആനി താന്ത്ലെ പന്നാസാഞ്ചെ ദോൻ നോട് കാഡ്ന് ഭയ്യാക് ദിവ്ന് മ്ഹളെം: “ആസുന്ദി, സൊഡ്. ചുകി സഗ്ള്യാം ഥാവ്ന് ജാതാത്. മ്ഹജെ ഥാവ്ന്യി, മ്ഹാകാ ഭഗ്ശി”

ഗുരുദാസ് ആഫിസാക് പാവ്ലൊ ആനി ആഫിസാക് രിഗ്താനാ ബഗ്ലെച്യാ ആശ്ര്യാന്ത് ആപ്ലെ കെങ്കാണാചെ ദൊളെ പളെലാഗ്ലൊ: `വ്ഹയ്, തെ സാഫ് ആസ്ലെ’.