സാഹിത്യ് ആനി വിമർസൊ – ഏക് നദർ

കാംയ് ഥൊഡ്യാ മഹിന്യാം ആദിം വാട്സാപാർ ആയില്ല്യാ എകാ ഹാസ്യ് സന്ദേശാചൊ ഉല്ലേക് കർച്യാ സവെം ഹെം ലേകൻ ആരംബ് കർതാം. വാട്സാപാർ ഏക് സന്ദേശ് ആയ്ലൊ. പാവ്സാച്യാ അഭാവാക് ഇംഗ്ലിഷ് മീഡിയം ഇസ്കൊലാം കാരൺ. കിത്യാക് ഇംഗ്ലിഷ് മീഡിയം ഇസ്കൊലാംനി ‘rain rain go away’ മ്ഹൺ ശികയ്താത്. പുൺ കന്നഡ മീഡിയം ഇസ്കൊലാംനി ‘`ബാരോ ബാരോ മളെരായ’ മ്ഹൺ ശികയ്താത്. അശെം ആസ്ല്ലൊ തൊ സന്ദേശ്.

ഹാസ്യ് സന്ദേശാചൊ ഉദ്ദേശ് കിതെംയീ ആസും. പുൺ പാവ്സാ വിശിം ഘഡ്ല്ല്യാ ഹ്യാ ദോൻ ബാൾ ഗിതാഞ്ചെ വിശ്ലേഷൺ കെല്യാർ, ഹർ ഏക് സാഹിത്യ് പ്രകാരാന്ത് വിമർശാചി ഗർജ് കിതെം തെം കൾതാ. ‘rain rain go away’ ഇംഗ്ലിഷ് ഗീത് ആനി ഹാചെം ഉഗം ഇംഗ്ലെണ്ഡാന്ത് ആസാ. ഥംയ്ച്യാ ലൊകാക് പാവ്സ് മ്ഹള്യാർ കസലിഗീ ഉബ്ഗൊൺ. കിത്യാക് ഇംഗ്ലെണ്ഡാന്ത് കെദാളാ പാവ്സ്, കെദാളാ വോത് മ്ഹൺ സാംഗുങ്ക് ജായ്നാ. ഥംയ്ചെം വാതാവരൺ അജീബ് രിതിചെം. ദെകുൻ ജൊനിൻ ‘rain rain go away’ മ്ഹൺ ഗാംവ്ച്യാന്ത് ചൂക് ദിസാനാ, കിത്യാക് പാവ്സാന്ത് ഖെളൊങ്ക് താകാ ജായ്നാ. പാവ്സ് യെതാ തർ താകാ ഖെൾ നാ.

പുൺ ആമ്ചൊ കന്നഡാചൊ രാമു `ബാരൊ ബാരൊ മളെരായ’ മ്ഹൺ ഗായ്താ, കിത്യാക്ഗീ മ്ഹള്യാർ വർസാച്യാ തീൻ-ചാർ മഹിനെ മാത്ര് യെംവ്ചൊ പാവ്സ് താകാ ലാഗ്ശിലൊ. ആനി അശെം താകാ പാവ്സാന്ത് ഖെളുങ്ക്യീ കളിത് ആസാ. പാവ്സാചെ മ്ഹള്ളെച് ഖെൾ താചെ ലാഗിം ആസാത്. തശെം ആസ്താം പാവ്സ് യേവ്ന്ഞ്ച് ആസുന്ദി മ്ഹള്ളെം ഭഗാപ് താചെം.

ഹർ എകാ സാഹിത്യ് ആനി സാഹിത്യ് പ്രകാരാന്ത് ഏക് സംസ്കൃതി ആസ്താ. ആമി ഏക് കലാ വിമർശ്യാക് ഒപ്സിതാനാ, ത്യാ കലെ പാട്ലി, സാഹിത്യാ പാട്ലി സംസ്കൃതി, ആചാർ-വിചാർ, text with context വിസ്രുൻ വിമർസൊ കരുങ്ക് ജായ്നാ. ആകേരിക് വിമർസൊ മ്ഹള്യാർ കിതെം? വിമർസൊ യാ ഇംഗ്ലിശ് ഭാശെന്ത് criticism   മ്ഹള്യാർ എകാ കലെചെം, സാഹിത്യാചെം ഒട്ടാരെ അവലോകൻ കർചെം. തശെം മ്ഹള്യാർ, ഖംയ്ച്യാ ആയാമാംനി തി കലാ ബളിശ്ട് ആനി ഖംയ്ച്യാ വിചാരാംനി തി അസ്കത് മ്ഹൺ വൊരൊംവ്ചെം വിഗ്യാൻ. ഹാംവെം വിഗ്യാൻ മ്ഹളെം. തശെം മ്ഹൺ വിമർസൊ വിഗ്യാന്ഞ്ച് ജായ്ജയ് മ്ഹൺ നാ. വിമർസൊ കലായീ വ്ഹയ്. പുൺ ഹർ എകാ വിമർശാക് ഏക് ആദാർ സൂത്ര് കാംയ് തര്യീ ആസ്താനാ മാത്ര് വിമർസൊ പാത്യെംവ്ച്യാ തസലൊ ജാതാ; നാ തർ വ്യക്തിഗത് ജാവ്ന് ഉർചൊ സംഭവ് ആസാ.

സാഹിത്യ് വിമർസൊ മ്ഹള്യാർ വാച്പ്യാൻ എകാ സാഹിത്യ് കൃതിയെ സവെം കർചൊ ഏക് സംവാദ്യീ വ്ഹയ്. ഹൊ സംവാദ് സാദ്യ് ജായ്ജയ് തർ വാച്പ്യാക് ത്യാ കൃതിയെചെം പാട്ഥൾ (context) കാംയ് ഥൊഡെം ആർഥ് ജായ്ജയ്. ദാക്ല്യാക് സൊളാവ്യാ ശതമാനാന്ത് ശേക്സ്പിയരാൻ ബരയില്ലെ നാടക് ആജ് ആമി ആർഥ് കരിജെ തർ, ത്യാ നാടക് രച്ണെചൊ സന്ദർഭ്, പരിസർ മാത്സെം സമ്ജൊൻ ഘെജയ് ജാല്ലി ഗർജ് ആസാ. എകാ സാദ്യാ വാച്പ്യാക് ഹെം കഷ്ട് ജായ്ത്. ദെകുന്ഞ്ച് ഏക് ഹെൾല്ലൊ വിമർശക് വാച്പ്യാക് ഹ്യാ ദിശിം കുമൊക് കരുങ്ക് സക്താ.

ഹർ ഏക് വ്യക്തി ഥംയ് ഏക് വിമർശാത്മക് ദീഷ്ട് ഖണ്ഡിത് ആസാ. തശെം മ്ഹൺ വിമർസൊ മ്ഹള്യാർ ഖൊഡി കാഡ്ചെം ൻഹംയ്, ജാംവ്ക് ഹർ എകാ വിമർശാന്ത് ഖൊഡി ജരൂർ ആസ്താത്. കശെം ഹർ എകാ കലാകാരാ ഥംയ്, സാഹിതി ഥംയ് വിമാർശാത്മക് ദീശ്ട് ആസ്താ, എകാ സഹൃദയി ഥംയ്, വാച്പ്യാ ഥംയ്യീ വിമർശാത്മക് ദീശ്ട് ആസ്താ, ആസാജെ പഡ്താ. `മാത്യാക് ഒത്ല്ലെം പാംയാക് ദെംവ്താ’ മ്ഹൺ എക്ലൊ കൊണായീ വിശിം ഉലയ്താ തർ, ഥംയ് താചി വിമർശാത്മക് ദീശ്ട് ആസാ. `ഹൊ താന്ത്യാന്ത്ച് സാദ് ഘാൽതാ’ മ്ഹൺ എക്ലൊ അന്യേക്ല്യാ വിശിം സാംഗ്താ തർ, ഥംയ്സര്യീ ഏക് വിമർശാത്മക് നദർ ആസാ. കോൺ ഖംയ്ച്യാ കാലെതിചൊ, ഖംയ്ച്യാ സംയ്ഭാചൊ മ്ഹൺ വിശ്ലേശൺ കർന്ഞ്ച് ഉലൊവ്പാക് ദെംവ്ചി രീത് ഹർ എക്ല്യാക് അപ്ലെസ്തകിം യെതാ. `തി ലായൊ ഫുട്ല്ലെ ബരി പുട്താ’ മ്ഹള്ളെ ഥംയ് ഏക് വിമാർശാത്മക് ദീഷ്ട് പളെവ്യെത്. ഹാകാ പൂരക് ജാവ്ന് ഹർ ഏക് ഭാസ്, ആനി ഭാശെചൊ പ്രയോഗ് ആമ്കാം ആമ്ച്യാ വിമർശാ നദ്രെക് ആദാർ ജാതാ. മാൽഘഡ്യാംനി തെദാളാ തെദാളാ മ്ഹൺചെം ഹാംവെം ആയ്കാലാം: ആമ്ച്യാ കാളാർ ആമി ഗാദ്യാങ്ക് ഉദാക് വാവവ്ന് സാഗൊളി കെല്യാ. മ്ഹള്യാർ ത്യാ കാളാർ കഷ്ട് ചഡ് ആസ്ല്ലെ. ആതാഞ്ച്യാ പിൾഗെക് കഷ്ട് കളിത് നാന്ത്, സർവ് സലീസ് ജാലാം മ്ഹള്ളെം വിമർശാത്മക് ചിന്താപ് ആമി ഥംയ്സർ പളെവ്യെത്.

തശെം മ്ഹൺ ഹർ ഏക് വിമർശാ നദർ സാഹിതിക് ജാതാ മ്ഹൺ ൻഹംയ്. പുൺ ഹർ ഏക് സാഹിതിക് വിമർശാക്, മൻശാചി വിമർശാ കാലെത് ആദാർ ജാതാ മ്ഹള്ളെം മാത്ര് സത്.

`കലെ ഖാതിർ കലാ’ (Art for Art’s Sake)

സാഹിത്യ് യാ ഖംയ്ച്യായീ പ്രകാരാച്യാ കലെ ഥാവ്ന് കാംയ് സാമാജിക് ബരെപൺ യാ സമാജെ ഥംയ് ജവാബ്ദാരി ആസാഗീ? എക്നിസാവ്യാ ശെക്ഡ്യാ ലാഗായ്ത് ഹ്യാ ലഗ്തി കാംയ് ഥൊഡൊ വാദ് വിവാദ് വിമർശാ ശെതാന്ത് ജാവ്ന്ഞ്ച് ആസാ. `കലെ ഖാതിർ (Art for Art’s Sake) മ്ഹള്ളെം വ്യാഖ്യാൻ പയ്ലെം ഫ്രെഞ്ച് കലാ സംസ്കൃതെന്ത് ഉദെല്ലെം തെം ഉപ്രാന്ത് ഇംഗ്ലിഷാന്ത് ആനി ഇതർ ഭാശെംനിംയീ ലൊകാമൊഗാൾ ജാലെം. ബെൻജമിൻ കൊൻസ്ടാണ്ട്, എഡ്ഗർ അലൻ പെÇീ ഹാഞ്ച്യാ സാഹിതിക് ദിഷ്ടിന്ത് കലാ, യാ സാഹിത്യാക് ഹെർ കസലൊയീ ഉദ്ദേശ് നാ, കലാച് താചൊ ഉദ്ദേശ് മ്ഹള്ളൊ വാദ് ദിഷ്ടിക് പഡ്താ. ഏക് കലാ കേവൽ ഏക് അഭിവ്യക്തി ജാവ്നാസ്താം, ത്യാ കലെക് നൈതികതെചൊ ലേപ് ദീവ്ന് സാമാജിക് ജവാബ്ദാരി ദീജയ് മ്ഹൺ നാ മ്ഹള്ളൊ താഞ്ചൊ വാദ്.

പുൺ ഹൊ വാദ് ക്രമേൺ മാർക്സിസ്ട് ചിന്ത്പ്യാം ഥാവ്ന് ആനി ഇതർ തത്വ്ശാസ്ത്രിം ഥാവ്ന് വിരോദാക് ഒളഗ് ജാല്ലൊ ദിസൊൻ യെതാ. തത്വ്ശാസ്ത്രി നീചെൻ സാംഗ്ചെ പ്രകാർ, ഏക് കലാകാർ ആപ്ല്യാ കലെന്ത് ‘അപ്ലെംപൺ’ വ്യക്ത് കർതാ(Being). തശെം അസ്താം ഏക് കലാ കലാകാരാ ഥാവ്ന് മെക്ളി ൻഹംയ് മ്ഹള്ളൊ വാദ് താചൊ.

മാർക്സിസ്ട് ചിന്ത്പ്യാംനിംയീ കലെ ഖാതിർ കലാ മ്ഹള്ളൊ വാദ് ഒപുൻ ഘെംവ്ക് നാ. താഞ്ചെ പ്രകാർ, ഖംയ്ച്യാ സാഹിത്യാന്ത് കാംയ് ഥൊഡെം സാമാജിക്, തശെഞ്ച് കാമെല്യാങ്ക്, ദൺസതെല്യാങ്ക് ആദാർ ജാംവ്ചെ തസലെം കിതെംയീ നാംഗീ, തസലെം സാഹിത്യ് പൊകൊൾ. തിത്ലെം മാത്ര് ൻഹംയ് കലെ ഖാതിർ കലാ മ്ഹള്ള്യാ തത്വാചെർ ഘഡ്ല്ലെം സാഹിത്യ് ക്രമേൺ ഗിരെസ്താം ആനി ദുബ്ള്യാം മദെം ചഡിത് അന്തർ രച്താ മാത്ര് ൻഹംയ് താങ്കാം പയ്സാ പയ്സ് കർതാ.

ചാരിത്രിക് ദിശ്ടിൻ പളെല്യാർ, കലാ യാ സാഹിത്യാൻ ഥംയ് ഹാംഗാ സാമാജിക് ബദ്ലാവൺ ഹാഡ്ച്യാന്ത് ഖെൾല്ലൊ പാത്ര് ജരൂർ ദിസൊൻ യെതാ. രഷ്യാച്യാ ക്രാന്തി സന്ദർബിം, മ്യാക്സിം ഗോർകി തസല്യാഞ്ചെം സാഹിത്യ് നിജാകീ നിർഗതിക് ലൊകാക് ചഡിത് സ്പൂർതെചെം ജാവ്നാസ്ല്ലെം. പി.ബി. ശെല്ലിച്യൊ കവിതാ ഫ്രെഞ്ച് ക്രാന്തെക് സ്പൂർതി ജാല്യൊ മ്ഹള്ളൊ വാദ്യീ ആസാ. ഇണ്ഡസ്ട്രിയൽ രെവെല്യൂശനാച്യാ സന്ദർബിം ഇംഗ്ലെണ്ഡാന്ത് ദുബ്ള്യാ ലൊകാംനി ഭൊഗ്ല്ലി ഇജാ ചാർൽസ് ഡികൻസാച്യാ കാദംബരിംനി ആമി വാച്യെത്. ആമ്ച്യാച് കന്നഡ ദലിത് ബണ്ഡായ സാഹിത്യാന്ത്യീ സമാജെച്യാ അനീതെ വിശിം, അത്യാചാരാ വിശിം നിശ്ടുർ ഠീകാ ദിസുൻ യെതാ. പുൺ ഹെം സമാജിക് സുദ്രാപാ ഖാതിർ ലിക്ല്ലെം സാഹിത്യ്ഗീ, യാ കേവൽ കലാകാരാചി അഭിവ്യക്തി മാത്ർഗീ തെം സാംഗ്ചെം കഷ്ട്. ആമ്ച്യാച് കൊങ്ക്ണി സമാജെച്യാ ആചരണാഞ്ചി, ഥൊഡ്യാ ഥൊഡ്യാ ഉണെപണാചി വിമർശാത്മക് നദർ ആമ്ച്യാ മാൽഘഡ്യാ ലേകകാഞ്ച്യാ സാഹിത്യാന്ത് ആസ്ല്ലി. ക്രിസ്താംവാചെർ ജാല്ല്യാ ജുലുമാ വിശിം വി.ജെ.പി.ച്യാ ചാരിത്രിക് കാദംബരിംനി വാചുങ്ക് മെൾതാ. തശെം മ്ഹൺ ഹ്യാ ദ്വാരിം സാമാജിക് ബദ്ലാവൺ ജാല്യാഗീ മ്ഹൺ നക്കി കരുങ്ക് ജായ്നാ.

ബഹുഷ ഹർ എകാ സാമാജിക് സമസ്യാങ്ക് ജവാബ് ദിംവ്ചൊ എകാ കലെചൊ, സാഹിത്യാചൊ ഉദ്ദേശ് ഖണ്ഡിത് ൻഹംയ്. പുൺ സാഹിത്യാൻ യാ കലെൻ ജാപി ദീനാം തരീ, സവാലാം ഖണ്ഡിത് ഉടയ്ജയ്. സഹൃദയിങ്ക് ചിന്ത്പാക് ലായ്ജയ്. തെദാളാ മാത്ര് സാഹിത്യ് യാ ഖംയ്ച്യായീ കലെചൊ ഉദ്ദേശ് സാർഥക് ജാതാ. ആനി അസല്യാ സവാലാഞ്ചി ഒളൊക് കർൻ ദിംവ്ചി ജവാബ്ദാരി വിമർശാചി ജാവ്നാസാ.

വിമർശാ ഫൊർമലിസം

വിമർശ്യാചൊ അന്യേക് പ്രകാർ ഫൊർമലിസം. തശെം മ്ഹള്യാർ കലെച്യാ വസ്തുക് ൻഹംയ് ബഗാർ താച്യാ രൂപാക് ചഡിത് ഗുമാൻ ദീവ്ന് കർചൊ വിമർസൊ. സാഹിത്യ് തർ, ഥംയ്സർ വാപാർല്ലി ഭാസ്, സബ്ദ്, വ്യാകരൺ, ഉത്രാംവൊൾ ഇത്യാദിക് ഗുമാൻ ദീവ്ന് ഹൊ വിമർസൊ ചൽതാ. പാവ്ലോ പികാസൊ തസല്യാ കലാകാരാംനി ക്യൂബിസം കലാ ലൊകാമൊഗാൾ കർതാനാ, യാ രശ്യാന്ത് ഐസൻസ്ടൈൻ തസല്യാ ചലൻചിത്ര് ദിരൊക്തൊരാംനി നിർമില്ലിം മൊണ്ടാജ് ആദാരിത് ഫിൽമാം ഉദെവ്ന് യെതാനാ ഫൊർമലിസം ചഡിത് പ്രചലിത് ജാലെം.

കേവൽ എകാ കലെച്യാ രൂപാച്യാ ആദാരാചെർ എകാ കലെചെം വിശ്ലേഷൺ കർചെം സാർകെംഗീ? കേവൽ രൂപാച്യാ ആദാരാർ ഏക് കലാ സംപൂർൺ ജാതാഗീ? കലെചി വസ്ത് (subject) നാസ്താനാ ഏക് കലാകൃതി ഉദെംവ്ക് സാദ്യ് ആസാഗീ? ഹിം സർവ് സവാലാം വാജ്ബി. തശെം മ്ഹൺ ഹാംഗാസർ കലെചി വസ്ത് നഗണ്യ് മ്ഹൺ ൻഹയ്; പുൺ തി വസ്ത് അഭിവ്യക്ത് ജാല്ലെം രൂപ് ആനി ത്യാ രൂപാൻ സഹൃദയിഞ്ചെർ ഉബ്ജാംവ്ചൊ പരിണാം പ്രമുക് ജാതാ. തശെം ജാല്ല്യാൻ ഹാംഗാ പാത്ര് കോൺ മ്ഹള്ളെം പ്രമുക് ൻഹംയ്, പുൺ തെ പാത്ര് കസലെം സാഹിതിക് രൂപ് ഘെവ്ന് ഉഗ്താഡാക് യെതാത് മ്ഹള്ളെം പ്രമുക് ജാതാ. അശെം ത്യാ ആദാരാചെർ വിമർസൊ ചൽതാ.

നവ്യോതർ വിമർശാ സംസാർ

നവ്യോത്തർ സാഹിത്യ് വിമർശാ സന്ദർബിം ഫാമാദ് ഫ്രെഞ്ച് നവ്യോത്തർ ചിന്ത്പി രൊലണ്ഡ് ബാർത്സ് ഹാചെം `ഡെത് ആഫ് ദി ആഥർ’ വാദ് ഗർജെചൊ. താണെം സാംഗ്ച്യാ പ്രകാർ, കെദാളാ ഏക് കലാ യാ ഏക് സാഹിത്യ് സൃഷ്ടി ജാലാം, ത്യാ ഉപ്രാന്ത് തെം വാച്പ്യാച്യാ ആനി വിമർശാകാഞ്ച്യാ താബെക് വെതാ, ആനി താണിം ദില്ല്യാ വിവിദ് വിശ്ലേഷണാക് ഒളഗ് ജാതാ. തശെം മ്ഹള്യാർ ഏക് കലാ രചിത് ജാല്യാ ഉപ്രാന്ത് വാച്പ്യാംനി ആനി വിമർശാകാംനി ത്യാ കലെചെർ താഞ്ച്യാ ഖാശെലെപണാൻ തർക് തീർപ് ദിവ്യെത്. രൊലണ്ഡ് ബാർത്സ് ഹാണെം അസലെം വിമാർശാ ചിന്താപ് ഹാഡ്ലെം തരീ കിത്യാക്? തെദൊൾ മ്ഹണാസർ വിമർസൊ literary criticism മ്ഹൺ ഫാമാദ് ജാല്ലൊ. മ്ഹള്യാർ എകാ സാഹിതി/കലാകാരാൻ കലാകൃതി രചിത് കെല്ലൊ ഉദ്ദേശ് ആനി തെം പരിസർ (context) ഗർജെചെം മ്ഹള്ള്യാ അർഥാർ വിമർസൊ ചൽതാലൊ.

ബാർത്സ് ഹാണെം സാംഗ്ച്യാ പ്രകാർ, കലാകാരാചൊ ഉദ്ദേശ് യാ പരിസർ സംപൂർൺ രിതിൻ സമ്ജുൻ ത്യാ തെകിദ് വിമർസൊ കർചെം അസാദ്യ്. ഏക് കലാ യാ കൃതി രചിത് ജാല്യാർ തി അമർ. ആതാം മാത്ര് ൻഹംയ് ശെംബൊരൊ വർസാം ഉപ്രാന്ത്യീ തി കൃതി കൊണെം തരീ വാചുൻ/പളെവ്ന് അർഥ് കരുങ്ക് സാദ്യ് ജായ്ജെ. ത്യാ വക്താ കലാകാർ യാ സാഹിതി ഥംയ്സർ പ്രമുക് ജായ്നാ, ബഗാർ തി കലാ യാ തെം സാഹിത്യ് പ്രമുക് ജാതാ, അശെം ആസ്ല്ലൊ ബാർത്സാചൊ വാദ്. കിത്യാക്, കലാകാരാലാഗിം സവാലാങ്ക് ജാപി സൊദുൻ വചുങ്ക് ജായ്നാ; ആനി കലാകാരാചെം പരിസർ, പാട്പഡ്ദൊ സംപ്ലാ. ആതാഞ്ച്യാ പരിസരാക് തെം സാഹിത്യ് കശെം ലാഗു ജാതാ തെം മാത്ര് ഗർജെചെം ജാതാ.

ദാക്ല്യാക് ഘെംവ്ചെം തർ ശിവരാമ കാരന്തചി `മൂകജ്ജിയ കനസുഗളു’ കാദംബരി. ഹാംഗാചി മൂകജ്ജി ശെംബൊരാം വർസാം ആദ്ലി. പുൺ തിണെം ആപ്ല്യാ നാത്വാലാഗിം പാത്ളാംവ്ചെ തിച്യാ സന്ദർഭാചെ ആടെവിടെ ആജികീ പ്രസ്തുത്. ത്യാ ദെകുൻ, ആജ് തി കാദംബരി വാച്താനാ, കാദംബരിചൊ ലേഖക് പ്രമുക് ജായ്നാ, പുൺ മൂകജ്ജി ആനി തിചെ ആടെവിടെ ആജികീ പ്രസ്തുത്. കിത്യാക് തസലെ ആടെവിടെ ആജികീ ആസാത്. രൂപ് മാത്ര് വെഗ്ളെഞ്ച് ജാലാം. കൊങ്ക്ണെച്യാ സന്ദർബിം ആമി ആമ്ച്യാ അവ്വൽ സാഹിത്യാ വിശിംയീ ഹെഞ്ച് സാംഗ്യെത്. ചാഫ്രാചൊ `സുണെം മാജാർ ഹാസ്താ’, `ഭാംഗാർ മനിസ്’ ഇത്യാദി നാടക് ദശകാം ആദിം ലിക്ല്ലെ തരീ, താന്ത്ലൊ വിശയ് ആജൂനീ പ്രസ്തുത്. കിത്യാക് മ്ഹള്യാർ, ആജ് സഹൃദയി തെ നാടക് ദെക്താനാ ആപ്ല്യാ സന്ദർബാച്യാ പാട്പഡ്ദ്യാൻ തെ പളെതാ.

വാച്പ്യാ കേന്ദ്രിത് വിമർസൊ

`ഡെത് ആഫ് ദി ആഥർ’ വാദാക് പൂരക് ജാവ്ന് അസല്യാ വിമർശാകാംനി (Roland Barthes, Norman Holland, C. S. Lewis) അന്യേക് രിതിചെം വിമർശാ സാഹിത്യ് ലൊകാമൊഗാൾ കെലെം. തെം ജാവ്നാസാ Reader Response Theory യാ വാച്പ്യാ-കേന്ദ്രിത് വിമർസൊ. തശെം മ്ഹള്യാർ ഹാംഗാ സാഹിത്യ് ആനി സാഹിതിക് സാണ്ഡുൻ വാച്പ്യാച്യാ പരിസരാ ഥാവ്ന്, പാട് പഡ്ദ്യാ ഥാവ്ന്, ആപ്ല്യാ ജിണ്യെ അൻബൊഗാച്യാ നദ്രെൻ വാച്പ്യാൻ ദിംവ്ചി പ്രതിക്രിയാ. ഏക് കൃതി വാച്ല്യാ ഉപ്രാന്ത്, യാ ഏക് കലാ ആപ്ണെം ദെക്ല്യാ ഉപ്രാന്ത് സഹൃദയി തി കൃതി ആപ്ല്യാച് നദ്രെൻ പളെതാ ആനി ആപ്ല്യാ ജിണ്യെക്, ആപ്ല്യാ അൻബൊഗാങ്ക് സരി കരുങ്ക് പളെതാ.

ഹാംഗാ ഏക് സവാൽ ജരൂർ ഉട്താ. എകാ വാച്പ്യാൻ യാ സഹൃദയിൻ ആപ്ല്യാ അൻബൊഗാ നദ്രെൻ ദില്ലൊ വിമർസൊ കിത്ലൊ വസ്തുനിശ്ട്? ഹ്യാ വാദാക് വിരോദ് കർച്യാ ഥൊഡ്യാ ചിന്ത്പ്യാംനി മ്ഹൺചെ പ്രകാർ അസലൊ വാച്പ്യാ കേന്ദ്രിത് വിമർസൊ anarchic subjectivism യാ വ്യക്തിനിശ്ട് അരാജകതാ ജാതാ. ഹാകാ ജവാബ് ജാവ്ന് വാച്പ്യാ കേന്ദ്രിത് വിമാർശാകാംനി മ്ഹൺചെം, ഹൊ വിമർസൊ വസ്തുനിശ്ട്യീ വ്ഹയ്, വ്യക്തിനിശ്ട്യീ വ്ഹയ്.

തശെം പളെംവ്ക് ഗെല്യാർ ഖംയ്ചൊ വിമർസൊയീ സംപൂർൺ വസ്തുനിശ്ട് ഉർതാ മ്ഹൺ സാംഗ്ചെം കഷ്ട്.  ഹർ എകാ വിമർശാന്ത്, ജശെം സാഹിത്യാന്ത്, വാച്പ്യാചെം ധോരൺ കാംയ് ഥൊഡെം ഖണ്ഡിത് മെളുൻ ആസ്താ തെം നെഗാരുങ്ക് ജായ്നാ.

`ഡെത് ആഫ് ദി ആഥർ’ വാദാചെ സകാരാത്മക് ആനി നകാരാത്മക് വിഷയ് കിതെംയീ ആസും. പുൺ എക് കലാകാർ യാ സാഹിതി, ഏക് കൃതി യാ ഏക് സാഹിത്യ് രച്താനാ, ഇല്ലൊ ഇല്ലൊച് മെല്യാ ശിവായ് ഏക് പ്രാമാണിക് കൃതി ഉദെംവ്ക് സാദ്യ്ഗീ മ്ഹള്ളെം സവാൽ ഹാംഗാ ഗർജെചെം. ജശെം ഏക് പത്ർകർത്, ആപ്ലെം ധോരൺ കിതെംയീ ആസും, ജാല്ലെ ഘഡിത് വസ്തുനിശ്ട് രിതിം പളെവ്ന് ത്യാ ഘഡിതാക് നീത് ദിംവ്ചെം പ്രേതൻ കർതാനാ മാത്ര് ഏക് പ്രാമാണിക് പത്ർകർത് ജാതാഗീ, തശെഞ്ച് സാഹിതിൻ ഏക് സാഹിത്യ് ലിക്താനാ, ആപ്ല്യാ പാത്രാഞ്ച്യാ ഭിതർ ഘുസൊൻ താഞ്ചെബരി ചിന്തുങ്ക്, താഞ്ചെബരി ഉലംവ്ക് സുരു കരിജെ പഡ്താ. ഹെം കെദാളാ ജായ്നാ, സാഹിത്യ് അപൂർൺ ജാതാ.

ഏക് ദാക്ലൊ ദിതാം. ആലനഹള്ളി കൃഷ്ണ ഹാചി ഏക് അപൂർവ് കാദംബരി `പരസംഗദ ഗെണ്ഡെതിമ്മ’ ഹാംഗാസർ ഗെണ്ഡിതിമ്മ നാഡ്കാർ, അവിദ്യാവന്ത്. പുൺ താകാ മെൾല്ലി ബായ്ല് ആധുനിക് – പൌഡർ ഘാൽചി, ബാഡി (ബ്രേസിയർ) ഘാൽചി. ആതാം, ആലനഹള്ളിൻ ഹെ പാത്ര് ലിക്താനാ, ഗെണ്ഡെതിമ്മ ജാംവ്ക് ആസാ, മരങ്കി (ഗെണ്ഡെതിമ്മചി ബായ്ല്) ജാംവ്ക് ആസാ. ആനി ആലനഹള്ളിൻ ഹെം ബോവ്ച് നാജൂക് രിതിൻ കെലാം.

കൊങ്ക്ണെന്ത് എട്യെലാച്യാ `വേൾ ഘഡി’ കാദംബരിന്ത്ലെ പാത്ര് – ലുജെ ആനി ദുജെ. ഹാംഗാസർ എട്യെൽ ലുജെബരി ഉചാംബളിയീ ജാതാ, ദുജെബരി രാജാംവിക് ആനി പ്രശാന്ത്യീ ജാതാ. `അമാസ എംബുദു അമാസന ഹെസരു’ മ്ഹൺ ദേവനൂരു മഹാദേവ ആപ്ലി `അമാസ’ കാണി ആരംബ് കർതാ. അമാസ മ്ഹള്ള്യാ നിമ്ന് വർഗാച്യാ ചെർക്യാച്യാ പാത്രാ ഭിതർ മഹാദേവ പരകായ പ്രവേശ കർതാ.

സാഹിത്യാക് വിമർസൊ കിത്ല്യാ ഗർജെചൊ?

വിമർശാന്ത് സബാർ പാവ്ടിം വ്യക്തിനിശ്ടതാ യെതാ വ്ഹയ്. പുൺ ചഡ്താവ് രാജകീയ്യീ ഘുസ്താ. കന്നഡാന്ത് നവോദയാ സാഹിത്യ് ഉദെവ്ന് ആയില്ല്യാ സന്ദർബിം ലിക്ചെ ചഡ്താവ് കവി ഭാമ്ണാഞ്ചെ ജാവ്നാസ്ല്ലെ. കുവെംപു എക്ലൊ മാത്ര് ശൂദ്ര കുളിയെചൊ. ദെകുൻ പരോക്ഷ് രിതിം കുവെംപുക് ഹെ ഭാമുൺ കവി ആനി വിമർശക് ഹിൺസിതാലെ. താങ്കാം ജവാബ് ദീംവ്ക് മ്ഹള്ള്യാബരി കുവെംപുൻ സംസ്കൃത് കാവ്യ് ശൈലെർ `ശ്രീ രാമായണ ദർശനം’ ബരയ്ലെം. താച്യാ എകാ കവിതെന്ത് കുവെംപു ആപ്ല്യാ വിമർശകാങ്ക് ആനി വിരോദ്യാങ്ക് വിചാർതാ: `നാനേരുവെത്തരകെ നീനേരബല്ലെയാ?’ കുവെംപുൻ താച്യാ കാളാച്യാ വിമർശാ രാജകീയാക് ഹ്യാ പരിം ജാപ് ദില്ലി.

സബാർ പാവ്ടിം ആമ്കാം കളിത് ആസുൻഗീ, കളിത് നാസ്താനാംഗീ, ആമ്ച്യാ സർവ് വിമർശാംനി രാജകീയ് മിസ്ളൊൻ ആസ്താ. ഖംയ്ച്യാ പരിസരാന്ത്യീ ആമി രാജകീയാ ഥാവ്ന് മുക്തി ജൊഡ്ചെം ബോവ് കഷ്ടാഞ്ചെം. തശെം മ്ഹൺ സാഹിത്യ് യാ ഇതർ കലാ വിമർശാന്ത് ജർ രാജകീയ് മിസ്ളാത്, ത്യാ വിമർശാചി ദിശാച് ചുക്താ ആനി ബരെപണാച്യാകീ ചഡ് ദെസ്വാട് ജാതാ തെം ആമി സമ്ജാജയ്. നിഷ്ടുർ വിമർസൊ ഖണ്ഡിത് ജായ്ജയ്. പുൺ വിമർശാകാൻ രാജകീയാ ഥാവ്ന് യാ രാജകീയ് ലഗ്തി ധോരണാം ഥാവ്ന് ഏക് വൃത്തിപർ അന്തർ (professional distance) ദവർചെം ഗർജെചെം.

ആയ്ച്യാ സന്ദർബിം വിമർശാചി ഗർജ് കിതെം? ആയ്ച്യാ ആദുനിക് കാളാർ, വിമർശാചി ഗർജ് ഹർ കാളാച്യാകീ ചഡിത് ആസാ തെം ആമി ഒപുൻ ഘെജയ്. ആയ്ചൊ കാൾ ജാവ്നാസാ സാമാജിക് അന്തർജാളിചൊ, വാട്സാപ് ആനി ഫേസ് ബുകാചൊ കാൾ. ആജ് ഫട് ഗജാലി സത് മ്ഹള്ള്യാ രിതിം ഹർ എകാ മാദ്യമാന്ത് ഫായ്സ് ജാവ്ന്ഞ്ച് ആസാത്. ഫട് ധാ പാവ്ടിം ഉചാർതാനാ തെം സത് ജാതാ മ്ഹള്ളെം ധോരൺ ആജ് ദിസുൻ യെതാ. അയ്ചൊ കാൾ post truth കാൾ മ്ഹൺ ഥൊഡെ വൊലാവ്ന് ആസാത്. തശെം മ്ഹള്യാർ ഏക് വിഷയ് താച്യാ വസ്തുനിശ്ട് ജാവ്ന് പളെംവ്ച്യാകീ ചഡ്, ഭൊഗ്ണാങ്ക്, സിന്തിമെന്താങ്ക് ജാഗ്രത് കർച്യാ ദിശെൻ ഉലൊംവ്ചി സംസ്കൃതിച് ഹി post truth സംസ്കൃതി. സത്യീ ആജ് സാന്ദർബിക് ശിവായ് സംപൂർൺ (absolute)

ൻഹംയ് മ്ഹള്ളെം ആമ്ച്യാ രാജകീയ് മുകെല്യാം ഥാവ്ന് ആമി സമ്ജൊങ്ക് സക്താംവ്. വസ്തുനിശ്ട് ജാവ്ന് സമ്ജൊഞ്ച്യാകീ, ആർഥ് കർൻ ഘെംവ്ച്യാകീ ആപ്ണാക് കിതെം ദൃഢ് ഭൊഗ്താ തെഞ്ച് സത് മ്ഹൺ ഒപുൻ ഘെംവ്ചൊ കാൾ ആയ്ചൊ. ഹാകാ പൂരക് ജാവ്ന് ആയ്ചിം സാമാജിക് മാദ്യമാം സമാജെക് ചഡ് ആനി ചഡ് പൊകൊൾ ആനി തിത്ലിഞ്ച് സമാജ് വിരോദി മൌല്യാംനി ഭരുൻ ആസാത്. അസല്യാ ആയിന്ന് ഘഡ്യെ ഹര്യെക്ല്യാൻ ആപ്ലി വിമർശാത്മക് ദീശ്ട് ആനികീ ചഡിത് തേജ് കരിജയ് ജാല്ലി ഗർജ് ആസാ. പളെല്ലെം സക്കഡ്, വാച്ല്ലെം സക്കഡ് എകാച് ഉസ്വാസാൻ ഒപുൻ ഘെംവ്ച്യാകീ തജ്വീജ് കരിജയ് തെം ആയ്ച്യാ സന്ദർബിം ചഡിത് ഫായ്ദ്യാചെം മാത്ര് ൻഹംയ് അനിവാര്യ്യീ വ്ഹയ്.

സാഹിത്യാച്യാ സന്ദർബിംയീ അസലി തീക്ഷ്ണ് ദീഷ്ട് നാ തർ സാഹിത്യ് പ്രൊപഗാണ്ഡാ ജാംവ്ചി സാദ്യതാ ആസാ. തശെം ആസ്താം സാഹിത്യാചി ഖൊഡ് കാഡ്ചി ജവാബ്ദാരി എകാ വിമർശാകാചി. ദാക്ല്യാക് `ഡ വിഞ്ചി കോഡ്’ ബരയില്ലൊ ഡ്യാൻ ബ്രൌൻ സബാർ ഫടി സതാം മ്ഹള്ള്യാ രിതിൻ വ്യാഖ്യാൻ ദിതാ. എസ്. എൽ. ഭൈരപ്പാൻ `ആവരണ’ കൃതി ബരയ്താനാ താകാ ആസ്ല്ലൊ ഉദ്ദേശ് കസലൊ? കിത്യാ ഖാതിർ താണെം മുസ്ലിമാം വിരോദി കൃതി ബരയ്ലി തെം രുജു കരുങ്ക് അസാദ്യ്. പുൺ താച്യാ കൃതിയെന്ത് താണെം വാപാർല്ല്യാ വസ്തുച്യാ ആദാരാചെർ ആനി രൂപാച്യാ ആദാരാചെർ വിമർശാകാൻ വിശ്ലേശൺ കര്യെത്. പുണ്യാക് ഹ്യാ ദൊന്യീ കൃതിയാം വയ്ര് വിമർശാകാംനി നിശ്ടുർ വിശ്ലേഷൺ കെല്ലെം പളെവ്യെത്.

സമാരോപ്

ആകേർ കർച്യാ പയ്ലെം, കൊങ്ക്ണെച്യാ സന്ദർബിം വിമർശാ പ്രബേദ് ആനികീ വാഡാജെ ജാല്ലി ഗർജ് ആസാ മ്ഹള്ളെം ഹാംവെം ഖണ്ഡിത് സാംഗാജയ്. വിമർസൊ എകാ രിതിം പളെല്യാർ സാഹിത്യാചൊ സംഭ്രമ്യീ വ്ഹയ്. തസലൊ സംഭ്രം കർച്യാന്ത് കൊങ്ക്ണി സാഹിതി ആനി വാച്പി ഭാരിച് സുരാതി. വ്യക്തിഗത് ഠീകാ കർച്യാ താൾണെ ഥാവ്ന് ആമി പയ്സ് സരാജയ്. വിൻസ്ടൻ ചർചിൽ ഹാണെം മ്ഹള്ളെം ഏക് ഉതാർ ആസാ:

“Criticism may not be agreeable, but it is necessary. It fulfils the same function as pain in the human body.  It calls attention to an unhealthy state of things.”

(വിമർസൊ എകാ രിതിചെം അസമാധാൻ ഹാഡ്താ ജാംവ്ക് പുരൊ. പുൺ കൂഡിന്ത് ആസ്ച്യാ ദൂകിബരി, താചി ഗർജ് ഹർ എകാ കലെക് ആസാ. കൂഡിന്ത് ഭലായ്കി പാടിം ഹാഡുങ്ക് കശെം ദൂക് ആദാർ ജാതാഗീ, വിമർസൊ യാ ഠീകാ സാഹിത്യാന്ത് തസലെഞ്ച് കാം കർതാ.)

ഹർ എകാ വിമർശാക് ഭാസ്, സാഹിത്യ്, സംസ്കൃതെചെം ബരെംപണ്ഞ്ച് മാൻ ദണ്ഡ് ജായ്ജയ് ശിവായ് ഹെർ കിതെഞ്ച് ൻഹംയ്. ത്യാ ദിശിം ഹർ വിമർശാകാൻ ആപ്ലെം ധോരൺ സ്പഷ്ട് കർചി ഗർജ് ആസാ. സർവ് വിമർശാചെം, വിമർശാകാഞ്ചെം ബരെം ജാംവ്. v

***

(ഹെം ലേകൻ, ജൂൻ 30, 2019 വെർ കർനാടക കൊങ്ക്ണി ലേകകാഞ്ചൊ എക്താർ ഹാണിം മാണ്ഡുൻ ഹാഡ്ല്ല്യാ കാര്യാഗാരാന്ത് മണ്ഡൻ കെല്ല്യാ ഉലൊവ്പാചൊ വിസ്തൃത് ഭാഗ്)

(ലേകക് കൊങ്ക്ണി സാഹിതി ആനി പ്രസ്തുത് സാം. ലുവിസ് കൊങ്ക്ണി സംസ്ഥ്യാചൊ നിർദേശക്)

– മെല്വിൻ പിണ്ടൊ, നീരുഡെ