തും ധുംപാകൺ,
ഹാംവ് ഇംഗ്ളൊ.
തും പെടുങ്ക്
ഹാംവെം ജളജെ.
ആമി ബദ്ലുൻ
വാര്യാർ ഉബ്താനാ
ഹാംവ് ജാതാം ധുംവർ
തും പർമൾ.
———-
ഭാഗെവന്ത് ധുംപാക് മാത്ര്
കരുങ്ക് ജാതാ
മോഗ് ഉജ്യാചൊ.
———-
ധുംവർ ദീംവ്ക്
ഖംയ്ചൊ രൂക്യി ജാതാ.
പർമൾ ദീംവ്ക്
ധുംപാരൂക്ച് ജായ്..!
———-
ധുംപാരുകാചെം ലാങ്കുഡ്
ആപ്ണാക് ജളൊവ്ന്
ദുബ്ള്യാഞ്ചി പേജ്
ശിജൊവ്ന് ആസാ.
ഗാംവ്ഭർ
മാഗ്ണ്യാചൊച് പർമൾ.
———-
ധുംപയ്തല്യാങ്ക്
ധുംപാചൊ
സാക്രിഫിസ്
കളനാ!
——–
സംസാരാന്ത്
ക്രിസ്താ ജാതിചൊ
ധുംപ് മാത്ര് ഉർലാ.
ആളൊൻ തരീ
പർമൾച് ദിതാ.
———
ധുംപാസവെം കവിതാ ഉഡ്ലി
തുരിബലാന്ത്.
ത്യാ ദിസാ
പർമൾ മാത്ര് ൻഹയ്,
ആമാൽയീ ഭരുൻ ഗെലെം
ഇഗർജെന്ത്!
———
കൊഡ്യാൾ ഥാവ്ന്
ഹാഡ്ല്ലൊ ധുംപ്
പെടുൻ പർമൾ ജാലൊ.
‘ഹോലി ല്യാണ്ഡാ’ ഥാവ്ന്
ഹാഡ്ല്ലൊ ധുംപ്
ശോകെജിന്ത് ഭദ്ര് ഉർലൊ
———-
മാംയ്ന് പർനെം പക്കാസ് മൊഡുൻ
രാന്ദ്ണിർ പേജ് ശിജൊംവ്ക് ദവർലി!
ജൾല്ല്യാ ശിവായ്
ലാങ്കുഡ് ധുംപാരുകാചെം മ്ഹൺ
കളുങ്ക്ച് നാ!
———
ജീവ് ആസ്താനാ
തൊ സിഗ്രെടിംനി
ധുംപയ്താലൊ!
ഉപ്രാന്ത് താകാച്
ധുംപയ്ലെം.
———-
പർനൊ ധുംപ് മ്ഹൺ
മാംയ്ന് ഉഡയ്ലൊ
ഉദക് താപൊംവ്ചെ രാന്ദ്ണിക്!
ത്യെ രാതിം സക്ഡാങ്ക്
പവിത്ര് ൻഹാൺ?
———
ദൊഗാം സുനാം മദെം
ധാക്ടെ സുനെചെം
ജെവൺ ചഡ് രുച്താലെം!
കാരൺ,
രാന്ദ്ണിക് ഇല്ലൊ ‘ധുംപയ്താലെം!”
———-
സർഗാക് ധാഡുങ്ക്
സാം പെദ്രു ആപയ്താലൊ.
പയ്ലെം: ധുംപ്
ദുസ്രെം: വാത്
മനിസ് അഖേരിക്!
———-
ഹ്യാ പാവ്ടിം
ഇംഗ്ള്യാക്ച് സല്വയ്ജെ മ്ഹൺ
ധുംപാകണാംനി
പംഗഡ് കെലൊ
ഇംഗ്ള്യാചെർ ദാഢ് ഘാലി…
ഇംഗ്ള്യാചൊ ദംബു നാ!
