രയ്താഞ്ചെം മാസ് കിസ്പർജെതിത്ലെം മാർൻ പുരൊ ജാല്ലൊ പൊലിസ്
ബസക്ക് കർൻ വൊങ്ക്ലൊ.
ജിരനാസ്താം തശിന്ദ് രസ്ത്യാർ പഡ്ല്ലിം ശിതാം മ്ഹണാലി –
“തുജ്യാ പൊടാന്ത് ജെവൺ ജാംവ്ച്യാക്യീ
മ്ഹാകാ ഉത്പത് കെല്ല്യാച്യാ പാംയാമുളാ സാരെം ജാംവ്ചെം ബരെം!”
————————————————–
താണെം ധമ്കി ദിലി –
“ആനി ഏക് ഉതർ തും ചഡ് ഉലയ്ശി തർ
മ്ഹജെ പാംയ് ധുല്ലെം ഉദക് തുവെം പിയെജെ പഡത്”
രയ്താൻ ശാന്ത്പണിം ജാപ് ദിലി –
“ഹാംവെം ഗുഡ്ഡായില്ല്യെ മാതിയെന്ത് കിർലല്ലെഞ്ച്
തും ബൊശിയെന്ത് ഘാൽൻ ജേവ്ന് ആസായ്!”
————————————————-
ചർബെല്ലൊ ഗ്രേസ്ത് ദന്ദ്യാവാലൊ ജെംവ്ചൊ വേൾ.
‘ഫളാർ’ മ്ഹൺ എകാച്ചാണെം ജനെലാചൊ ആർസൊ ഫുടവ്ന്
ഭിതർ രിഗ്ല്ലൊ ഫാതർ
രുപ്യാച്യാ ബൊശിയെന്ത്ച് പഡ്ലൊ!
ഘാബ്രെല്ല്യാ ദന്ദ്യാവാല്യാൻ ബോബ് ഘാലി –
“രയ്ത് മ്ഹജ്യെ ബൊശിയെക് ഫാതർ ഉഡയ്താ, താകാ ഗഡിപാർ കരാ”
ഫാത്രാക് ഹുങ്ക്ല്ല്യാ ശിതാംനി ജാപ് ദിലി –
“രയ്താൻ ഉഡവ്ന് തുജ്യെ ബൊശിയെന്ത് പഡ്ല്ലൊ ഫാതർ ൻഹയ് ആമി.
സാധ് തർ തുജ്യെ ബൊശിയെഥാവ്ന് ആമ്കാം ഭായ്ര് ഘാൽ!”
———————————————–
കഠീൺ പിഡെൻ വള്വളൊൻ ആസ്ച്യാ
എകാ മ്ഹാതാര്യാ ഫുഡാര്യാക് ഭുക് ലാഗ്ലി.
വ്ഹളൂ ഖാട്ല്യാഥാവ്ന് ബൊശിയെക് ഹാത് വൊഡ്ഡായ്ലൊ താണെം.
ആദിം രയ്താവിരോധി കാനൂനാക് സലീസായെൻ ദസ്കത് ഘാല്ലിം ബൊടാം
ആജ് കാംപ്താലിം.
ബൊശി ചുകൊൻ സക്ലാ പഡ്ലിച്.
ധർണിർ ശിംപ്ഡല്ലി ശിതാം താകാം അശിം ദിസ്ലിം –
ആദി രസ്ത്യാർ പ്രതിഭടനാക് ബസ്ല്ല്യാ രയ്താംബരി!
————————————————
പ്രതിഭടൻ കർതല്യാ രയ്താചെം
ഏക് ഥംബൊ ദൂക് ധർണിർ പഡ്ലെം.
ത്യാ ഥെംബ്യാന്ത് പുർതൊ ഭിജ്ല്ലൊ ഏക് ഫാതർ മ്ഹണാലൊ –
“ഹാംവ് താന്ദു ജാല്ലൊം തർ
ഹ്യാ ദുകാഥെംബ്യാന്ത്ല്യാ ഉജ്യാക്ച് ഉകഡ്ന് ശിത് ജാതൊം!”
———————————————–
ച്യാനെലാച്യാ സ്ടൂഡിയോന്ത് ബസൊൻ
വൊരാംഗാട്ല്യാൻ രയ്താവിരോധ് ബൊബൊ ഘാല്ലൊ നിരൂപക്
കാര്യെം സംപ്തച് ജെവ്ണാക് ബസ്ലൊ.
ജേംവ്ക് മ്ഹൺ ഹാത് ഘാൽതാനാ കിതെം ദെക്തലൊ…
ബൊശിഭർ ബന്ദൂകെച്യൊ ഗുളിയൊ!
താചി ബൊശി പുർപുരിലാഗ്ലി –
“ഥൊഡ്യാ വെളാ ആദിം
രയ്താങ്ക് ടെരരിസ്ട് മ്ഹൺ വൊലായില്ലെംയ് തുവെഞ്ച് നെ…
ബൊവ്ശാ തുജിം ഉത്രാം തുജ്യെച് ബുതിയെന്ത്ല്യാ ശിതാംനി ആയ്കലിം ജായ്ജെ…”
————————————————–
പ്രഭുത്വാക് ഹൊഗൊൾസുൻ കവിതാ ബരയില്ലൊ കവി
സന്മാൻ സംപൊൻ ഗത്താൻ ഘരാ രിഗ്ലൊ.
വെദിർ മെൾല്ലെം എവാർഡ് മെജാവയ്ര് ദവരുൻ
താചി സൊഭായ് ചാകിത്ത് ജേംവ്ക് തയാർ ജാലൊ.
പുൺ ഹാത് ഘാൽതാനാ ബൊശി ഖാലി!
“ശിത് ഖംയ് ആസാ?” ബൊബാട്ല്ല്യാ താകാ
രിത്യെ ബൊശിയെർ ശിതാംനി ലിഖ്ല്ലൊ സന്ദേശ് ദിസ്ലൊ –
“ആമ്കാം വ്ഹയ് കെല്ല്യാഞ്ച്യാ കശ്ടാങ്ക്
തുവെം സ്പന്ദൻ കരുങ്ക് നാംയ് ദെകുൻ
ആമിഞ്ച് രസ്ത്യാക് ദെംവജെ പഡ്ലാം.
സദ്ദ്യാക് എവാർഡ് ലെംവൊൻച് തുജി ഭുക് ഥാംബയ്!”
————————————————