“സത്യമെവ് ജയതെ ” ഹെം ബ്രീദ് വാക്യ് സഗ്ള്യാഞ്ചെ സംവ്കാളീചെം ജാവ്ന് ആസാ. പൂൺ സത്യാചൊച് വിജയ് ജാതലൊ ഹെം ഗൃഹീത് ധരപ് ഹാചി ടക്കെവാരി സാമ്കി കമി ആസാ. ഹ്യാ സംവ്സാരാന്ത് കെന്നാ കിതെം ജായ്ത് ഹെം സാംഗൂക് ജായ്നാ . കൊൺ കൊണാചൊ അപ്മാൻ കരത് ഹാചി ശാസ്വതി നാ. ഋതു ബദ്ലതാ തസൊ മനീസ് ബദ്ലത് രാവ്താ. താകാ ഭീഡ് മുരവ്ത് മ്ഹൺതാ തി ആതാം ഉരൂങ്ക് നാ. കിതെം ഉലയ്താ തെം ആയ്കൂൻ ഘെനാസ്തനാ മനീസ് മൻശാക് ഉത്രാക് ധർതാ. ആപൂൺ ചുകീചെം വാഗ്താ ഹെം ഖബർ ആസൂൻ ലെഗീത് വാദാക് ഹാത് ഘാൽതാ. മാഗീർ പ്രകരൺ ഖംയ്ചെം ഖംയ് പാവയ്താ ഹാന്തൂത്ല്യാൻ മാനസിക് ഛൾ, ശാരീരിക്, ലൈംഗിക് ഹാചൊ ആസ്പാവ് ആസാ. ശാബ്ദിക് ബാചാബാചി ജാവ്പ് ഹാണെം മൻശ്യാച്യാ മനാചെർ ഖൂബ് വായ്ട് പരിണാം ജാതാ . തെന്നാ മനീസ് രാഗാച്യാ ഭരാത് പുലിസാകഡെൻ ധാംവ് ഘെതാ. മനാസാർകെം കാംയ്ച് ജായ്നാ മ്ഹൂൺ സാദെം പ്രകരൺ പസൂൻ വ്ഹഡാർ പാവയ്താ .
എകാദ്രി ഗജാൽ കർനാകാ മ്ഹണ്ലി ആസ്തനാ തി ബള്യാ കരൂൻ ദാഖൊവ്പ് , ശിക്ഷിത് ആസ്തനാ അശിക്ഷിതാവരി വാഗപ് . എക് സെവാ നിവൃത്ത് ശിക്ഷക് ലെഗീത് ആഡ്ന്യായാൻ ചൽപാക് ഫാടീഫുഡെം സരനാ വിദ്യാദാൻ കെല്ലൊ മനീസ് ലെഗീത് ആപ്ല്യാ ചല്യാക് ഉജു വാട് ദാഖൊവ്പാചി സൊഡൂൻ താകാ ആഡ് വാടെൻ വച്പാഖാതീർ സ്ഫുർത് ദിതാ. ശികൂൻ സവ്രൂൻ ലെഗീത് ജനാവരാച്യാ പാശ്ട് വാഗൂങ്ക് ലാഗ്താ . ഹ്യാ സംസാരാന്ത് മനീസ് എക് അസൊ എക് പ്രാണി ജാകാ സഗ്ള്യൊ സുവിധാ ജൽമാസാവൻ താചെ ഭൊംവ്തണി ഗൊംഫ് വിണീല്ലെവരി വിണൂൻ ദവ്രില്ലൊ ആസ്താ . പൂൺ ഗൊംഫ് വെവസ്ഥിത് കസൊ വിൺപാചൊ ഹെം ജൺ എക്ല്യാൻ ഥാരാവ്പാചെം ആസ്താ. ജൺ എക്ല്യാച്യാ ഭൊംവ്തണി സംസ്കാരാചെം എക് വിശിശ്ട് ആവരൺ ഘാല്ലെം ആസ്താ തെം താകാ ജൽമാസാവൻ പൊസവ്ണ് ദിതാ . ആവയ് – ബാപായ്ന് ജർ ബരെ സംസ്കാർ രുജയ്ലെ ജാല്യാർ താചെം ഫൾ ബരെം മെൾടാ . പൂൺ കായ്വെളാം ആപ്ണെം സംസ്കാരാക് എക് വിശിശ്ട് ആയാം ദിവ്പാക് ജാതാ . സൃജനാത്മക് ആകാർ ദിവ്പാചെം കാം സ്വതാ ആപൂൺ ലെഗീത് കരൂങ്ക് ശക്താ.
ഹ്യാ ധകാധകീച്യാ ജിവീതാൻ മനീസ് ആപ്ല്യാ സുവാർഥാഖാതീർ ആപ്ല്യാ ഫായ്ദ്യാ ഖാതീർ മുഖാവയ്ല്യാ വ്യക്തീക് വായ്ട് ഉത്രാംനി പാചാർതാ. ഹാതാബൊടാർ മെജ്പി അശെ ശെജാരി മെൾടാത് ജെം തുമ്ചെം ഹിത് സാംബാൾതാത്. വായ്ട് പ്രസംഗാർ ആദരസ്തംഭ് കശെ ഉബെ രാവ്താത് . ആപ്ല്യാ നാതെവായകാപരസ് വയ്ല്യാ ദർജാചൊ മാൻ ദിതാത്. ചഡാവ്ത് ലൊക് ദുസ്ര്യാ ഘരാചെർ കുത്രി ചഡൊവ്പി ദിശ്ടി പഡ്ടാത് . തെന്നാ താങ്കാം ശിക്ഷൺ ലാഗ്നാ. അമ്കി പദ്വി ലാഗ്നാ, ഉച്ച് ശിക്ഷിത് ആസൂൻ ലെഗീത് ദുസ്ര്യാല്യാ കംപാവ്ഡാ ഭായ്ര് വിധി കർപാക് ഹാഡ്ടാത്. അശ്യാ ലൊകാങ്ക് കിദെം മ്ഹൂൺ വിചാരപാചെം! ആപ്ലെം വാഠാർ നിതൾ ദവ്രൂൻ ഹെരാഞ്ച്യാ ജാഗ്യാചി വാട് ലാവ്പ്. മാൻ അപ്മാനാചെം ഹെം ചിത്ര് പിതാരപാചെം കാം സകാളസാംവൻ സാഞ്ജ്മെരെൻ സർരാസ് ചാലു ആസ്താ. ജിവീത് സരൾ ആണി സൊപെം വതാ ആസ്തനാ മദീഞ്ച് ഗതിരൊധകാചെം കാം മനീസൂച് കർതാ. ജെന്നാ സുവാർഥ് ആഡ് യെതാ. തെന്നാ മനീസ് മനീസപൺ വിസ്രൂൻ ജനാവരാ ഭാശെൻ വാഗൂങ്ക് ലാഗ്താ. എകാ തെംപാർ ജിവാഭാവാചെ ഇശ്ട് ലെഗീത് ദുസ്മാൻ ജാതാത് . പ്രകരൺ കാംയ്വെളാ ഖൂനാമെരെൻ ലെഗീത് പാവ്താ. എക് മ്ഹൺ ആസാ . ആപ്ലെം ഘർ കാഞ്ചെചെം ആസ്തനാ ദുസ്ര്യാല്യാ ഘരാചെർ ഫാതൊർ മാർചൊ ൻഹംയ്. പൂൺ ഭിയെനാസ്തനാ തെം കാം ലെഗീത് കർതാ . ആപ്ലി ലജ് ജാല്യാർ ലെഗീത് ജാതാ . പൂൺ ദുസ്ര്യാങ്ക് ത്രാസ് ദിവ്ന് കാംയ്ജണാങ്ക് രാത്ചി ൻഹിദ് ബെസ്ബരി പഡ്ടാ. “ കൊണാല്യാ ബാപായ്ചൊ ജാഗൊ ആസാ തൊ ഹാംവ് പളൊവ്ന് ഘെതാം ” അശിം സുബെജപണാചിം ഉത്രാം സഹ്ജതായെൻ താഞ്ച്യാ തൊണ്ഡാത്ല്യാൻ ഭായ്ര് സർതാത്. കാഗാൾ നൊന്ദ് പുലിസ് സ്ടെശ്നാചെർ വചൂൻ കെലി ജാല്യാർ പയ്ല്യാ പയ്ലിം ഗുന്യാംവകാർ ആപൂൺ പുലിസ് സ്ടെശ്നാചെർ വചൂൻ ജണൂകായ് ഗുന്യാംവകാർ ആപൂൺ ൻഹിം ഹെം ഭാസൊവ്പാചൊ യത്ന് കർതാ . വ്ഹഡ്ല്യാ ആവാജാൻ ഉലൊവ്ന് അസ്ത്യാചെർ പഡ്ഡൊ ഘാൽപാചൊ യത്ന് കർതാ . കിത്യാക് കൊൺ ജാണാ പുലിസ് ഗുന്യാംവകാരാക് അശി സന്ദ് കിത്യാക് ദിതാ ? അശെ തരെൻ സത്യാൻ ചൽപി മൻശാചൊ വിസ്വാസ് മാത്യെഭരവൺ കർതാ. സത്യാചൊ ആദാർ ഘെവ്ന് ചൽപി മൻശാചി മാൻസികതായ് ബദ്ലതാ . ജർ ആപ്ല്യാ ഉത്രാങ്ക് ആനി സത്യാൻ ചലീല്ല്യാങ്ക് ജർ അപ്മാനാചി വാഗ്ണൂക് മെൾടാ ആനി ഗുന്യാംവകാർ ജർ മെക്ളെംപണാൻ ഭൊംവ്താ . പുലിസ് ജർ ഗുന്യാംവകാരാക് ദൊശി ഥാരാവങ്ക് ശക്നാ. ആനി താകാ കസ്ലൊച് ദണ്ഡ് ഫാരീക് കർപാക് ലായ്നാ . അശെവെളാർ സാവ് മൻശാചി മാൻസികതായ് ബദ്ലതാ ആനി തൊ മാഗീർ ആപ്ലി ചാൽ ചൽതാ ഹെം പ്രകരൺ വ്ഹഡാർ പഡൂൻ മാഗീർ ദുസ്മാകായെചെം രൂപ് ധാരൺ കർതാ . ആനി എകമെകാങ്ക് പളൊവ്ന് ആപ്ല്യാ തക്ലെചി ശീർ താണൂൻ ഘെതാത്.
മാനസിക് ഛൾ ഹി അമ്ക്യാച് വയൊഗടാത് വാ അമ്ക്യാച് ജാഗ്യാർ ജാതാ അശി നാ. ശിക്ഷണിക്, സമാജിക്, വെവ്സായ് , ഖെളാമളാർ, ഗരീബ് – ഗിരെസ്ത് ഹാചെരൂയ് ജാതാ . ശാളെത് വച്പി ഭുർഗ്യാസാവൻ തെ ജാണ്ടെ പിരായെച്യാ മൻശാമെരെൻ ശിക്ഷണിക് മളാർ തർ പാവ്ലാം കൺകണി ഛൾണൂക് ജായ്ത് ആസ്താ . ജൺ എക്ലൊ ഭുർഗൊ ആപ്ല്യാക് ബരെ മാർക് മെൾചെ ആനി ആപ്ല്യാക് ജായ്തി ശിക്ഷണിക് സുവാത് മെൾചി അശെം ദിസ്താ ആനി താചി ധാക്ധൂക് ആവയ് – ബാപായ്ക് ചഡ് ആസ്താ. ആപ്ല്യാ താങ്കി പരസ് ചഡ് പയ്ശെ ദിവ്ന് കൊചിംഗ് ക്ലാസാക് പ്രവെശ് മെളയ്താത്. ആനി ആപ്ല്യാ ഭുർഗ്യാചി ടക്കെവാരി വാഡൊവ്പാചൊ യത്ന് കർതാത് .പൂൺ ഭുർഗൊ താചെ താക്ദി ഭായ്ര് വച്നാ ആനി സരാസരീപ്രമാൺ സാധാരൺ മാർക് പഡ്ടാത് . കാംയ് കൊചിംഗ് ക്ലാസാൻ അശെംയ് ദിസൂൻ യെതാ , ആവയ് -ബാപായ്ലൊ സമാജിക് ദർജൊ പളൊവ്ന് ഭുർഗ്യാചെർ ബരി ദെഖ്രെഖ് ദവ്രതാത് താചെരൂച് ലക്ഷ് കെന്ദ്രിത് കർതാത് . താംഗെല്യാ അഭ്യാസാചെർ ചഡ് ഭർ ദിതാത് . ജർ ഭുർഗൊ ചഡ് ഹുശാർ ആസത് ജാല്യാർ താകാ ആനീക് സ്ഫുർത് ദിതാത് . വർഗാത് താകാച് പ്രശ്ന് വിചാരപ് അശെം കെല്ല്യാൻ സാദാരൺ ശിക്പി ഭുർഗ്യാചി ഛൾണൂക് ജാതാ . ആനി താചെഭിതർ നിർശെവണി യെതാ . എകെകാ മാർകാക് ലാഗൂൻ വിദ്യാർഥി മാൻസിക് തണാവാ ഖാലാ വാവൂരതാ. ശിക്ഷണീക് മളാർ ജാവ്പി സ്പർധെക് ലാഗൂൻ ജൺ എക്ല്യാചി പിളവ്ണൂക് ജാതാ
ബായ്ല് ജരി ശിക്ലി ആനി സവ്രലി തരി ദാദ്ല്യാഞ്ച്യാ വായ്ട് നദ്രെന്ത്ല്യാൻ തി സുട്ലി നാ . കാംയ്വെളാ സ്വതാ തി ജാള്യാൻ സാപ്ഡടാ വാ കാംയ്വെളാ തിജെർ ബൾജബരി ജാതാ . സാധ്യാ നൊക്രി സാവ്ന് തെ വ്ഹഡ് ഹുദ്ദ്യാചെർ ലെഗീത് തിചെം ശൊശൺ ജാതാ . അസുർക്ഷിതായെചൊ ബാവ്ടൊ തിചെ ഭൊംവ്തണിം ലാഗില്ലൊച് ആസ്താ . ഘർ-സംവ്സാർ ആപ്ലി നൊക്രി സാംബാളൂൻ താഠ് മാനെൻ ജഗ്പാചൊ തി യത്ന് കർതാ. പൂൺ വായ്ട് നജ്രൊ തിജി ഫാട് സൊഡ്നാ . ബായ്ല് മനീസ് കെന്നാ സുരക്ഷിത് ജീൺ ജഗ്തലി കായ് !!!. ഹൊ എക് വ്ഹഡ്ലൊ പ്രശ്ന് സമാജാത് ഉപ്രാസതാ .
ആതാച്യാ കാളാന്ത് അമ്ക്യാച് വയൊഗടാത്ല്യാ ബായ്ലാഞ്ചി ഛൾണൂക് ജാതാ അശി നാ മൻശാച്യൊ നദ്രൊ ആതാം ബദല്ല്യാത് . സൊശൽ മിഡിയാൻ സഗ്ള്യാങ്ക് ഹുശാർ കെലാം . ആനി ബായ്ലമനശെകഡെൻ പളൊവ്പാചി നദർ ആനീകൂയ് ബുർശി ജാല്യാ. മനീസ് ആപ്ലൊ യൊഗ്യ് സന്ധീചൊ ഫായ്ദൊ ഘെവ്ന് തിചെകഡെൻ ഇശ്ടാഗത് കരൂങ്ക് സൊദ്താ ആനി തിചെകഡെൻ സംവാദ് സാദൂൻ തികാ ആപ്ലെവടെൻ ഒഡ്പാചൊ യത്ന് കർതാ. പ്രത്യെക് കാമാക് ഹാംഗാം സുവാർഥ് ദൊള്യാമുഖാർ യെതാ .
ശാബ്ദിക് ഛൾണൂക് ഹി സഗ്ള്യാ മളാർ പ്രഖ്രപണാൻ ജാണ്വൂൻ യെതാ. മൻശാച്യാ ഭാശെചെർ ചാളൊവ്പ് , ശാരീരിക് വ്യംഗാചെർ നാംവാ ദവ്രപ് കാളൊ , മൊട്വൊ , തിർസൊ – വർസൊ ആണി ഘാണ്ടി മ്ഹൂൺ ചളൊവ്പ് ഹെ പ്രകാർ ചാടെ പാവ്ലാക് ദിസൂൻ യെതാത് . ആപ്ല്യാപരസ് കമി ദർജാച്യാ കാമാക് ആശില്ല്യാ ലൊകാങ്ക് ഹി ഛൾണൂക് പ്രാമുഖ്യാൻ ജാണവ്താ. ആനി പ്രത്യക്ഷാൻ പളൊവ്പാക് ലെഗീത് മെൾടാ . ശിക്ഷിതൂച് അശെം ൻഹംയ് , അശിക്ഷിത് ലൊക് ലെഗീത് അസ്ല്യാ പ്രകാരാക് ബളി പഡ്ടാത് . പ്രത്യെക് ജാൺ ആപ്ല്യാ പദാചൊ ഫായ്ദൊ ഘെവ്ന് ആപ്ല്യാ സകയ്ല് കാം കരത്ല്യാക് അപ്മാനാസ്പദക് വാഗ്ണൂക് ദിതാ.
കാംയ്കഡെൻ നൊക്രി കരത്ല്യാങ്ക് വയ് ലെഗീത് എക് വ്ഹഡ്ലൊ പ്രശ്ന് ജാവങ്ക് ശക്താ കാം കർതനാ ജർ കാമാചൊ വെഗ് കമി ജാലൊ ജാല്യാർ തികാ “ആജി ” വാ “ആജൊ ” ഹ്യാ നാംവാംനിം ഉലൊ മാർതാത് . കാംയ്കഡെൻ അപ്വാദ് ജാവങ്ക് ശക്താ . ജർ എകാദ്രി വയ്സ്കർ വ്യക്തി തർണാട്യാ ഭശെൻ കാം കരൂങ്ക് ലാഗ്ലി ജാല്യാർ താകാ മാനാചൊ ദർജൊ മെൾപാക് ശക്താ. ജാതീവയ്ല്യാൻ നൊക്രാങ്ക് അപ്മാനാസ്പദക് വാഗ്ണൂക് മെൾടാ തൊണ്ഡാർ കാംയ്ച് മ്ഹൺനാത് പൂൺ ഹാവ്ഭാവാവയ്ല്യാൻ താകാ തിഡായില്ലെം കൾടാ ജാതീയ് വാദ് ഹൊ സർസകട് ചാലൂച് ആസ്താ.
ബെകായ്ദെശീർ കാംമാം കരൂൻ ലെഗീത് തൊണ്ഡ് വ്ഹഡ് കരൂൻ ഉലൊവ്പി ലൊകാഞ്ചി സംഖ്യാ ഹ്യാ സംസാരാക് കമി നാ. കൊർടാചൊ നികാൽ കസൊയ് ലാഗും ആനി താകാ കിത്ലൊയ് വെൾ ലാഗും . താങ്കാം കൊർടാൻ വചപ് മ്ഹണ്ല്യാർ എക് മാനാചി സുവാത് കശി ദിസ്താ . ബെകായ്ദെശീർ കാമാങ്ക് ആതാം ഒതൊ ആയ്ലാ സത്യാചി തൊണ്ഡാം ബന്ദ് കർപാചി പ്രഥാ ഹാലീസരാം ചാലീക് ലാഗ്ല്യാ . മനാത്ല്യാൻ ത്യാ വ്യക്തീക് ഖബർ ആസ്താ , ആപൂൺ ചൂകീചൊ മാർഗ് ആപ്ണയതാ മ്ഹൂൺ . പൂൺ ആഡ്വാടെൻ വചൂൻ ദുസ്ര്യാങ്ക് സതാവ്പാചെം താങ്കാം ഖൂബ് ആവ്ഡടാ . ജളാമളാം ഭൊംവ്ന് ഫടീചെ പുരാവെ ഹാഡൂൻ സർകാരി അധികാര്യാചി ലെഗീത് ദിശാഭൂൽ കർപാചി ചാൽ സർരാസ് ചാലു ആസ്താ.
ഖൂൻ – മാരാമാരി , അപ്മാൻ ചൊരി ഹിം പ്രകരണാം ഹാലീംസരാ ഖൂബ് വാഡ്ല്യാത് . ആമ്ചിം സർകാരി യന്ത്രണാം ഹാതൂന്ത് അസ്ലിം പ്രകരണാം ഹാതാൾപാക് അപെശി ഥാർതാത് . ഖൂനി കൊൺ ഹെം ഖബർ ആസൂൻ ലെഗീത് താകാ ബെഗീൻ ഖ്യാസ്ത് മെൾനാ . വർസാംനിം വർസാം വതാത് ന്യായ് മെളൊവ്പാക് . ആപ്ലൊ മനീസ് ഗെലൊ ഹ്യാ പശ്ചാതാപാൻ ആപ്ലി ജീൺ സാർതാ , ആനി ഖൂനി കാംയ്വെളാ നിർദൊശ് സുട്താ .
