Soimacho ixtt : ( yeun ) vittoilem, samkem vittoilem. Pam-i ghaltolo zalear zago dourunkona hea monxeamni. Deva, poromexvora, tumchea dhortorechi vittmbona keli hea monxeamni. Kitli sobit, kitli nivll, nirmoll asli hi dhortori. Punn hea dhortorechi vatt laun uddoili. Hea-hea monxeamni…! to polloi koso ugddear bosla to. Are baba, matso addsak tori bos…! rosteachea kuxik oxe ugddear bostat he koruk. ( don botta dakvon ) loz koxi disna hankam. Monxan apli loz bhazun khal’li mhonnttat tem khore…! hamvem ken’na chintuk naslem, dhortorecher hi oxi poristhiti yetli mhonn. Dhortorechi hi poristhiti polloun mhojea kallzak khub dukh bhogta. Deva pormexvora, atam tuch kor kitem tori…! hea monxeanchea gineanak kitem zala? hea monxeanchi okkol khoim gelea? aplench auychi oxi hi vittmbona?
ballu : (hatan rikami tambeo gheun yeta. Taka pollovan ) ham ho ani konn? konnak sodta kai…? ye monxa. ( taka ulo korta )
soimacho ixtt : hamv monis nhoi.
Ballu : tum monis nhoi? konn tor tum? purannik nattkantolem patr?
soimacho ixtt : hamv nattkantolem patroi nhoi.
Ballu : monis nhoi, nattkantolem patroi nhoi. Konn tor tum? ani hanga konnak sodta?
soimacho ixtt : hamv soimacho ixtt. Him zhaddam, veli, fulam, nhoim, suknnim mhoji sangati. ( taka hant laita balluk zhottko lagleavori zata ) ani hamv ixtt tancho.
Ballu : tum soimacho ixtt? punn ho mhaka zhottko lagleasaroko…!?
soimacho ixtt : ho zhottko nhoi. Tujea ontoskornnak sporx kela hamvem.
Ballu : mhojea ontoskornnak tumi sporx kela? punn kiteak mhunn?
soimachi ixtt : hi tumchi korma dakhoun divpak.
Ballu : amchi korma? mhollear hamv somzunk na.
Soimacho ixtt : hoi tumi somzunk na. Punn, atam tori somzumn gheyat. Hi dhortori tumchi auy. Samballat tika, zotnai gheyat tichi, rakhonn korat tumchem auychi.
Ballu : dhortori… Auy…! kitem sanguk sodta tumi?
soimacho ixtt : to polloi… Koir hanga thoim uddoun garbejichi kelea ras. Duyemsank amontronn hevo, sosunk zaina ghamnnicho vams.
Ballu : hoi vams tor boroch yeta hanga.
Soimacho ixtt : hem tumchech upkar sogllem.
Ballu : amche upkar?
soim’ ixtt : hoi! tumchech, hatant tambeo gheun khoim gel’lo?
ballu : to hamv heka ( don botta dakoita ) gel’lo.
Soimacho ixtt : heuch tem. Oxem ugddear tumi xim koruk bosta. Magir ghanni poddchina tor kitem? duyesank amontronn nhoi hem?
ballu : maf korat chukle mhoje. Punn hamv eklo mhunn kitem kortolo, ani sonddas bi tor na amche. Magir upai nasun ugddear bosche pott’tta.
Soimacho ixtt : survat hi svotapasun korchi asta. Dorek monis svotach apnnak saf ani nitoll dourota, aple ghor nitoll dourota. Tosoch aplo gamv nitoll dourunk zai. Ghor nitoll aslear gamv nitoll zatlo, gamv nitoll zalear dex nitoll zatlo. Dorekan aplo svotacho sonddas banduk zai.
Ballu : punn sonddas bandpak amkam zago khoim asa?
soimacho ixtt : zago sorkar dita. Sorkari yeujennencho faido gheyat, sorkari mojticho faido gheyat. Oxem ugddear heka bosun apleach gamvchi obru ghalovo nakat. Oxem ugddear bostana konnuy porkea gamvcho lok polloun tumchea vixi kitem chint’tolem hem chintla tumi? tumchea vaddlelea choleank oxi ugddear bostana konnem-i polloit tor tumkam tem borem distolem?
ballu : hoi ixtta, tumi mhoje dolle ugddole, atam mhojea sogllem lokxant ailem ixtta. (tachea pamyar ghalun gheta )
soimacho ixtt : utt utt, ani lag kamak, vell hogddavo naka. Zagoi sogllea gamvak, atam pasun lagat kamak. Gõy sobit asa, tachi sobitokai samballat. Soimachi rakhonn korat, soimachi rakhonn korat. ( to vota)
ballu : ixtta… Ixtta, gele. Khoreanich he soimacho ixtt ayil’le hanga? kai hamv sopnant tor … ( tambeo polloita ani to sokoil uddoita ) na na! ixtta hamv tumkam soput dita. Amche gamvchi sobitokai rakhpa khatir hamv vavurotolo, soimachi rakhonn korchea khatir. Svotak pasun sompoitolo, ho hamv tumka soput dita.
( kallokh zaun dekhavo poilo sompta )
(dekhavo dusro. Ujvadd zaun machyer kaim ghoram distat, machyeche eke votten ek bail aidona dhuta, tor dusre votten ek monis udok nhata. Polloit thoim koirunch dista. Ek udkache pimp asta. Ek monis brox korit pimpamhoreant yeun tondd dhuta. Voir saun kaim garbejicheo poteo bhoril’leo poddtta. Ek monis pimpantlean udok kaddun gheun vota. Ek monis hantan tambeo gheun yeta ani pam-i dhuta. )
ballu : ( yeun ) xi xi xi xi khoreanich deva hich khori vittombona tumche sobit dhortorechi. Hoch khoro onyai, oteachar amche auycher. Je auyn amkam aplem vegent vaddoile, samballole, te auychi oxi ovostha? na deva hem anik hamv sosunk xokna. Amchi hi auy amkam samballchea khatir kitlem sosta. Svotach mhelli zaun amkam nitoll dourota, ani ami monis… Thu amcher!
nirmol : ( aidona dhuta ti bail lhovu-lhovu utthta, balluchea mhoreant yeun ) ballu bhavo, oxem ekloch kitem boddboddotta? aiz sokalli sokalli koslem bhaxonn patt korta?
ballu : tuje namv nirmol mogo?
nirmol : hoi, hamvuch nirmol. Oxem kitem?
ballu : nirmolacho orth zanna tum? ( kaim vell vogi ) ho zago aidona dhuvpacho? ani to nhatalo to konn go? hea zagear bhurgeamni khell khellpache, tea zagear tumi nhata, dhuta? hancho porinnam’ zanna tumi?
nirmol : punn bhavo…
Ballu : ek zap naka, osli hi hollxik korun tumi svotach duyesank apounne dita. Ddengyu, moleriya hea sarkea zorak apoun gheta. ( voir saun garbejichi poti poddtta ) he… He polloi, konnache parsol he?
nirmol : ( voir polloita ani ) xemvtuche, xemvtu akka!
ballu : xemvtuk kitem elompikan gullo xeuttuk bhangra podok mellil’lem? kai he khep melloupacho yotn chalu asa.
Nirmol : punn bhavo, havo kitem mhonntta…
Ballu : kainch mhonnpachi goroz na sangla hamvem ( brox korun thukil’lea kolgettak ) hoto chuno konnem kaddla thoim? festa lagi pauli ki khursank katt’tta toso. ( kaim vell vogi )
nirmol : xanno kaka, xemvtu akka, vhonibai. Yeyat ho… Matsi begin yeyat. Bhavo piso zala. ( fottafott soglli yeta, boroch lok puzouta ) polleat ge ho bhavo koso vagta to aiz vichitr koso zoso ki piso zala.
Xanno : kitem zalem go? bhavo piso zala mhonntta, are ballu bhavo kitem sangta re hem?
ballu : piso hamva nhoi, pixi tumi zalea sogllim…! xanno more tum? khoreanich xanno kai namvacho.
Xanno : he kitem uloita bhavo tumi?
ballu : ho zago nhaupacho? tum nhaun dhuvn chokchokit zalo more? hi hollxik zata ti disna re? tem reb… Khelltta-khelltta bhurgeancho bal tea rebant poddtta. Bhurge rebeantolo bal hant ghalun kaddtta ani bhuskottak pusta. Ani magir tankam zata rog, punn amkam hem khobor na he amcheach kormache bhog.
Xemvtu: punn bhavo tumi ochkit svochchh bharot mixnant paule xe… Jivak borem dista nhoi tumchea?
ballu : sodhea tori mhojea jivak kai zaunk na ha. Punn ami oxinch vagot rauli tor ek dis soglleancheach jivank khub vhodd dhopko lagum xokta.
Xemvtu : hem kitem uloita tumi bhavo aiz!
nirmol : hoi ge… Vodoll saun oxech uloita! pichcherant, nattkant bhaxonn uloil’lea vori.
Xanno : ( bhiet, bhiet ballu mhoreant yeun ) bhavo, he polloi bhavo, tumi bosat, suxegat bosat ani…
Ballu : ho vell suxegat bospacho nhoi xannea, ami kitem tori khottpott korunk zai… Amchea bhurgeanche bhovixy borem toren ghoddounk amkam zhujche poddttolem, ami soglleamni ekttham-i yeun, ekttham-i vavurochem poddttolem, gamv amcho nitoll dourunk, amchea gamvchi sobitokai vaddounk, soimachi rakhonn amkanch korchi poddttoli.
Xanno : atam ailem mhojea lokxant…! punn bhavo, tumchea lokxant he koxem ailem?
ballu : soimacho ixtt… Hoi tannench mhoje dolle ugddolem. Hea amchea sobit soimachi sobitokai koxi noxtt zata tem tanninch mhaka pottoun dilem. Aiz fatodder mhaka tea ixttache dorxon ghoddlem ani ten’nach mhojea gineanacher ujvadd poddlo…! chouthechea pustokamni mohatma gandhijicheo kanneo soglleamnich vachlea astoleo. Tanche sopon axil’lem amcho sogllo dex saf zaucho mhunn, angar ord kopdde ghalun to svotach rosto saf kortalo. Tannem hantant aplea zhaddu gheun rostoch nhoi tor bhrosttacharuy saf kel’lo. Atam tacheach paulamni ami cholpache. Tanchoch ardox gheun vavurochem. Dex saf korpak, gõy nitoll douropak bhaxnnachi goroz poddna. Tachea khatir gamvam- gamvamni ek tori gandhiji toyar korcho poddttolo… Toruch zatlo svochchh bharot, nitoll gõy.
Xanno : ttalleo ( soglli ttalleo marta ) vva! ballu bhavo vva!! aiz tumi tumchea kallzant gandhijik nirmann kelo. Ani ami-i bi aiz amchea kallzant komit komi tumkam tori nirmann korpacho yotn kortolem oso ami soput gheta.
Nirmol : ballu bhaucho…. ( soglli zoi mhonntta )
ballu : ravat… Ravat…. Zoi mhozo naka, zoi korat mohatma gandhijicho! mhonnat, mohatma gandhijicho ( soglli zoi mhonntta kallokh zaun dekhavo dusro sompta )
(dekhavo tisro )
( ujvadd zata, toch zago dusrea disa. Soglli saf sofai korta )
ballu : ( yeun ) vva! vva!! oxench dorekan aplea ghora pasun survat korop gorjeche… Oxem korumn amcho gamv tor saf zatloch, punn dexoi bi saf zatlo oxi as ami dhori yeta.
Xanno : hoi ballu bhavo, amcho gamv tor ami soglli gamvkorea mellun nitoll dourtali. Punn bakichea gamvanche kitem. Amcho ek gamv saf asun kitem faido.
Nirmol : ami dorek gamvan hi kobor dhadduk zai. Gamvatlea dorek monxak, gamv saf asleachem borem faide zata. Monxache mon, vichar taje zata, monis nirogi zata. He pottoun divonk zai.
Ballu : hoi sarke uloilem nirmol bain. He borem kam’ amkanch korche poddttolem ani ek… Khub mohotvachem, dorek ghorak aplo svotacho sonddas asunk zai. Sonddas svotach apleak zai toso bandun gheuk zai ani to vaprunk zai.
Xemvtu : punn bhavo, sonddas bandpak amche kodden zago khoim asa tor. Ho zago bhattkaracho ani bhattkar koslo, te tor tumi zannach.
Ballu : bhattkar koslo asu! sonddas boro asuk zai. Ugddear sonddas korun gamv ken’nach nitoll zamvcho na, duyesa pois zamvche na.
Punn he koxem xoky asa?
ballu : kelear kitem xoky na, korunoch soglle zata. Punn poili koruk tori zai.
Nirmol : punn bhavo, bhattkar…
Ballu : bhattkar gelo tel lait…! ami soglle gamvkar ek asot tor bhattkarachean kitem koru yeta?
xanno : bhattkar amkam sonddas bandpak zago ditlo…? aplea zagear to lokank gaddi douruk dina, bhurgeank khellpak dina. Zalear sonddas bandpak zago koso ditlo?
ballu : ditlo zago to…! taka divchoch poddttolo, atam kai vellan bholaike khateache monis yeupache asa. Je kitem korpache asa te tench kortolem atam, ami fokot amcho ekvott dakhoupacho.
Nirmol : hoi, voi hamv soglleak korta ekttai, age mauxem, akka, tai, mai . ( oxe mhonnit vota )
xemvte : bhavo, dusrea vaddeavoileak apovea! tankaim bi sonddasa vixi zannivo zatli.
Xanno : naka ham… Sonddasa vixi soglleakuch zannivo astat. Te konnak sanguk naka, te sogleachech sodche kam’.
Ballu : xanno more tum…? uloilo pixea sarko…? tachem mhonn’nne oxem ki sondda bandpache yeuzonne vixi tankam zannivo zatli. Sarkech uloilem tem. Hi ek sorkari yeuzonn. Ghora-ghorant sonddas. Ani sorkari yeuzonnecho soglleanich faido gheucho.
Xanno : xemvtu akka… Votat nhi dusrea vaddear… Punn rokddich yo ham, khobri marunk raunaka.
Xemvtu : at’ta vota ani rokddich yeta polloi… ( vota )
( bholaiki khateache dog monis, ek meddom’ yeta. Ekleachea hantant faili asta, to pivn asta. )
ballu : ( yeukar divn ) yeyat, yeyat ami tumchich vatt polloitalim.
Xanno : ( ek moddil’li kodel haddta) gheyat samballun bosat ham, matsi moddlea ti. ( somnddasak boslea vori apunn sokoil bosta)
sor : moddil’lem kodelir bosche nasta, bostat tor bore jetan bospache. Sonddasak legit bostolom zalear ek veglli poz asta, don fatracher boson tol samballona. ( xanno begi-begi utthta )
meddom’ : dekhun tor sorkaran hi yeuzonn chalik laila. Mhara bhoxen kam’ korpache ani raza bhoxen…
Xanno : ( tika modich tharoun ) koll’lle, koll’lle meddom’. Raza bhoxen kitem korpache te koll’lle.
Meddom’ : koll’lle nhoi? asu… Atam kamache ulovea, tor sorkaran… ( khub lok yeta ) soglli mon laun aikoyat, khobor khub gorjechi hi. Sorkaran hi yeuzonn handdla tumchea amchea faideachi, ami soglleani palon koruk zai monis ponnachea kaideachi.
Sor : ulhas tum soglleachi namvam boroun ghe.
Ulhas : bore sor…
Sar : tumi zagea voilean halnaka, ho ulhas, tumchi namvam sarki boroun ghetlo. Tumi sarki sangat taka. To amcho pivn…! ha ha soro pivn nhoi. _Aefisatolo pivn.
Ballu : ha… Meddom’, lokank sonddasache faide, luksann sangat nhi.
Meddom’ : tor tumkam sonddasacho faido khobor asa..? na te tumkam khobor na. Kai nozo hamv tumkam sangta…! sonddas zalear pott saf zata, to faido…. Ani sonddas zaina tor pottant ghann te lunksan.
Ballu : are meddom’ he kitem sangta tankam…?
meddom’ : khore tech sangta… Hoi dekhun ami sodach sonddasak vochuk zai… Ani sodach sonddasak vochchea khatir amkam ek saf, nitoll, niull sonddas zai. To amkam sorkar dita.
Ballu : ttalleo, ttalleo marat…( soglli ttalleo martat )
meddom’ : devan amkam monxachi zat favo kela. Amkam her zati poros chodd ginean dila. Punn amich amche ginean vapruk komi poddtta. Don xorirache mellop zata char vonnott’tti add, monis zolmota poddea add, aum-i aplea bhurgeak aplem hodd’ddoyatle dudh pivyta aplea podra add. Zalear ami sunnea manjra sarke ugddear sonddasak kateak boschem?
ballu : portun ek fautt ttalleo ( lok ttalleo marta )
sor : mogall bhavamno ani bhoinnimno, hea tumchea ballu bhaun amkam soglli favo ti mhaiti dilea. Tumi fokot tumkam sonddas khoim zai te sangche, zago bhattkora koddlean koso gheupache te kam’ amche ani te ami kortole. Tumkam he sorkari yeuzonnecho labh korun ditlem he utor dita. Fuddlea atthouddean sonddas bandpacho murhut kaddpacho ani bego beg tumkam tumcho svotacho sonddas vapruk mellttolo. Aichi hi boska hangach sompoita. Ani ami amchea fuddlea vaurak lagta. To poryont svotak samballat, nitllokai dourat ani ekvottan ravant.
( lok ttalleo marta, kallokh zata tisro dekhavo sompta. )
( dekhavo choutho ujvadd zaun )
bhattkar : ( yeun ) khoim asa re to malkiread! lokank budi dita. Aiz hamv tukach bud xikoita.
Nirmol : ( yeun ) arem bhattkar more, koso asa bhattkara?
bhattkar : hamvo asa boro, tum mhaka sang tumchem hem kitem chol’la?
nirmol : amche kitem chol’la tor! ham, te bhattkar, sorkar amkam sonddas bandun dita khoim.
Bhattkar : sonddas bandun dita…? sonddas bandpak zago konn dita?
nirmol : zago te tumche koddlean vikot ghetlem khoim.
Bhattkar : vikot ghetle khoim, hamv viklear vikot ghetlem nhoi?
nirmol : amchea sonddasak lagtolo zago tumi vikche nat?
bhattkar : na. Hamv vikchona!
nirmol : punn bhattkar, kiteak vikchena tom?
bhattkar : kiteakotor mhojekodden khub poixe asa. Ani anik mhaka chodd poixe naka dekhun.
Ballu : ( yeun ) tumchekodden khub poixe asa, tea poixamni thoddi okkol vikot gheyat bhattkara. Konn ti vikta zalear.
Bhattkar : tum…! tuji itli kapastad, mhaka sangnastona tum hea gamvkareank sonddas bandun dita khoim?
ballu : gamvkareank sonddas hamv bandun dina bhattkar, to sorkar bandun dita.
Bhattkar : bapaicho fat to? koxe bandtole sonddas polloita hamv… ( xanno yeta )
ballu : oxem kitem korta bhattkar, adim ek zalem te zalem. Atam-i ugddear bospachem sonddasak? somsar kitlo sudrola, hea sudrolelea somvsarant amich kiteak fatti raup.
Bhattkar : he teo budi mhaka xikovo naka tum! mhozo zago sonddas bandumn vapor korunk mellchona tumkam.
Xanno : punn bhattkar ami amchea ghora kuxik bandta nhoi sonddas, modi mekllea zagear tor bandina. Ani ho khachkonnecho zago. Tea bhair tujea zageachi favo ti kim’mot mellttoli mhonntat te.
Bhattkar : he xannea, tuji xanneponnam mhaka naka! ani dusrekhep mhojea mhorean tokli voir kaddun ulouchena tum, aikola more?
xanno : hoi bhattkar, chuk zali.
Xemvtu : ( yeun ) konn mel’lo mott-mottean arddotta! ( bhattkarak polloun ) are bhattkar! babu, tumi ken’na ailem babu?
ballu : xemvtu akka, babu- babu mhunn chodduy launaka xabu… Adlem poder melem ani te dis gelem. Hachea poili khub lailo xabu. Babu-babu mhonnun. Atam ho babu amchea mathear bosunk lagla.
Bhattkar : hey, ( balluchea angar vochun ) zotnai dour tum bhattkara kodden uloita. Hamv tumcho bhattkar he visrota tum!
ballu : hett’tt! koslo re tum bhattkar, munnkaranchi poristhiti somzun gheyna to koslo bhattkar. Aiz ami amcho gamv nitoll, nivll koruk polloita. Amchea gamvchea bhurgeache bhovixy borem koruk vavurotat. Hi ghann… Hi ghann pois korunk, duyesank pois dhamvddaupacho yotn kortat. Punn hem, tum bhattkar zaun tujea lokxat yena! heach gamvcho bhattkar zaun. Oxem poristhitin tuka bhattkar ami mhonnop koxem?
bhattkar : te tuje nean tum mhaka xikovo naka, sonddasa khatir mhozo zago mellchona. Ho mhozo xeuttocho nirnnoi. Vota hamv… Ani aik, vogich xoky na ti khottpott korpachi sodd ballu… Ani zomlear ratik mhojea ghorakodden yeun mhaka mell. ( bhattkar vochuk )
ballu : vota-vota mhoji-i bi don utram aik bhattkara. Tum bhattkar zait, punn ami munnkar asa hea gamvche ani bhattkara poros munnkarank chodd vhoddvik aplea gamvchi. Tum yotn kor gamvkareank vibaddopacho, ho gamv vibaddopacho. Punn ami-i bi yotn kortolem korpak ‘ sobit, sundor amcho gamv.’
( kallokh zaun dekhavo choutho sompta )
( dekhavo panchvo, ujvadd zata… Machyer ghoranchea kuxik kaim fulanchi zhaddam layil’li dista, xemvtu akka zhaddank udok ghalta ani nirmol saron marta. )
nirmol : atam amcho vaddo khub sobit dista nhoi ge. Poilim sarki ghann gutt’ttann na atam.
Xemvtu : hoi go bai… Atam koxem polloi thondd varem yeta, jivak legit khub borem dista.
Nirmol : ani atam sonddas zalem ki ek husko mekllo zatlo nhi ge xemvtu akka.
Xemvtu : hoi go…! punn to bhattkar mel’lo… Dollddiro koso. Amche svotache sonddas zalear taka go kosli addkholl?
nirmol : hoi… Amkam hanga koxe lipcheani khellche poddtta te amich zanna, konn yetlo kai, konn polloita kai. Hea bhomyan samkem zaina legit.
Xemvtu : hoi tor…! punn kai nozo… Yetlem amchey bi borem dis. Ballu bhavo asat nhi? ghaltolo to zagear sogllem.
Nirmol : hoi ham, ballu bhavo samko devo monis koso hea gamvcho, tache he upkar ami ken’na visruk zata ge?
ballu : ( yeun ) kosleo gozali choleat ge?
xemvtu : anik kosleo? tumcheach upkaracheo, sodhea tori heoch gozali soglleak.
Ballu : na ha… Kosle mhoje upkar te. Hamv kitem porko? heach gamvcho ani aplea gamvcher konn upkar korina. Tumi korunk na hea gamva khatir?
nirmol : na bhavo, hech tumche mottemponn. Sogllech monis oxe nastat. Nator to bhattkar mel’lo…
Ballu : asu…. Bhattkarachem soddat, aiz bholaike khateache monis yeupache asat zanna nhoi tumi? aiz soglle zagear poddttolem sangla tanni. Soglleank sangun dourolam nhoi?
xemvtu : hoi bhavo, sogllim asat ami. Tanchich vatt polloitat. (bholaiki khateatlean tiga zanna yeta poili ayil’lim tich )
ballu : yeyat, yeyat sor bosat…! meddom’ bosat…
Sor : vva ballu, atth disamnich tumi tumchea gamvchem rupuch bodl’lem. Valor ha tumkam ( sor bosta, meddom’ hanga thoim zhaddam polloita. Khub lok zomta )
ballu : hoi sor … Ho valor gamvkareank fauta, tancheach koxttache foll tem. Atam urlam tem ekoch kam’.
Meddom’ : sari ballu bhavo, hem kam’ zaupak matxem kotthinn. (xant vatauronn zata)
ballu : kotthinn kam’, meddom’ kitem mhonnpache asa tumkam?
meddom’ : ballu, sangpak khub vaitt dista, tumchea sonddasachi fail oddkun urlea.
Ballu : punn meddom’, aiz yeupache aslem nhoi ddairekttor sorve korpak?
sor : ballu (tache fattir hat dourun ) ddairekttorak vikot ghetlo so dista.
Ballu : mhonnlear?
sor : ddairekttorak khobor axil’li ki aiz hanga sorvek vochpache asa mhonnun, punn azoch ddairekttor suttyer. Itlech nhoi, tor doguy sorve korpi ddivttemr na, na mhonnlear tanchom tigaichom fon bond… Atam kitem korop tuch sang.
Ballu : atam kitem kortolem, je modtogar asa tanninch zor fatt keli tor ami sadaronn monxamni kitem korop? aikol’le, sopnam khori zaina mhonnun. Tori legit sobit sundor gamvche sopon polloilem, hamvem polloilem te polloilem punn hea bhollea-bauddea gamvkareankkuy dakhoilem, oxem korun hamvem mhojea gamvkareanche mon dukhoilem…. Mhojea gamvkareamno mhaka maf korat, maf korat mhaka. ( gaukar soglle dukhkhi zata, kaim zann roddtai bi )
meddom’ : ballu, oso dukhkhi zaumnaka. Ani monantlean visvas kaddun uddounaka. Ami tuka utor dilam hea gamvkareank utor dilam, sonddas bandun ditle mhonnun as dakhoila. Ami amche utor rakhtolim, gamvkareanchi as purai kortolim.
Sor : hoi ballu ami voir magnni kortoli. Hi fokot gõychea gamvchich kanni nhoi, akhkhea dexachi kotha hi. Sorkarachi yeuzonn hi, svochchh bharot obhian hem… Ek minitt, tumche kodden konnakodden mobail asa tor viddivo rekedding korat… Tachi goroz amkam fuddarak poddttoli. ( dog tig zann rekordding kortat )
ponch : ( yeun ) ballu bab ek xekemndd hanga yeyat…! ( ball tachea mhoreant vota, ponch tachea kanant kitem tori sangta ani vota )
ballu : ha atam somzolo!
meddom’ : kitem somzolo ballu tum? ani to konn, tujea kanant sangtalo to? kitem sanglem tujea kanant tannem?
ballu : zacho bhom-i aslo, tech zalem meddom’.
Meddom’ : koslo bhom-i ballu, zalem kitem?
ballu : ( ballu meddmichea kanant sangta, meddom’ sorachea kanant sangta )
sor : ham oxi bhangodd tor…! hem polleat gamvkoramno, ami yeujil’lea promann tumkam tumcho sonddas mellttolo. Atam tor khori moza yetli kam’ korunk.
Xanno : punn sor tannem kanant kitem sanglem te…
Sor : konnachea kanant konnem kitem sanglem te tumkam naka. Tumi fokot sonddasant bindas ken’na bospak mellttole tem polleat. Aik ballu… Dogam tigam gamvkareank gheun falea mhaka efisant yeun mell, ani ham te rikeddik handdpak visronaka… Atam vota ami. Pollovea sonddas koxem banduk dinat te… ( tim vota )
ballu : gamvkareamno… Borea rostear chol’lear khub addmelli yetat, soteacho rosto ho khub kotthinn asta. Punn ekvott monxak ghottai dita. Ami ekvottan fudde sorea. Rosto ho kitloi kotthinn aslo tori ekcharachi paulam konn addounk xokna. Ghora-ghorant sonddas hi amchi goroz, to amcho hokk, ani amcho hokk, amcho odhikar amkam mellttoloch.
( kallokh zata’ dekhavo panchvo sompta )
( dekhavo sovo. Ujvadd zata, soglle lok zom’mil’le astat. Meddom’ ani sor boxil’li asa, ballu ek votten ubo. Dusre votten xannu. )
meddom’ : bhattkarak apounne dhaddlam, pollovea to yeta zalear.
Sor : yeta zalear nhoi, taka yeuchoch poddttolo ani zageacho prosn soddouchoch poddttolo.
Bhattkar : ( yeun ) hem kitem choloila tumi? mhaka so afoila! mhaka kama nat? tumchea sarko bekar asa hamv?
sor : bekar tum nhoi, bekar asa ami nhoi re, portun-portun hanga yeupak. Atam kitem zalem? orddor aili nhoi tuka, zago divpachi. Chol atam vell naka. Hea kagdacher soi kor.
Bhattkar : ( ragan kagda gheta, pen hatant gheun soi koruk ) hamv tumkam soddchona.
Meddom’ : bhattkar, soddchona mhonntta tem sodd…! poili kagod bore toren vachun ghe ani magir soi kor. Vachuk tori yeta nhoi?
bhattkar : ( soi korta ) tumi zoborodostin ghetla mhozo zago. Hamv tumkam soddchona…!
meddom’ : portun soddchona, are bhattkar hott’tt sodd atam ani tuzo zago mhollear kitem? yetana zago gheun ayilalo tum hea somvsarant? ( lok hamstat )
ballu : xe! konnuch hamsu naka. Dusreachem poristhitir konnem haschem nhoi. Poristhiti hi sangun konnacher yena.
Meddom’ : na, hamsat tumi! hasundi tankam, te tache poristhitir nhoi, tachea gineanar hamsta. Ho okkol naxil’lo bhattkar, taka mantuy kollna. Ki zago ken’na ektteakodden urnat mhunn. Aplo zago, aplo zago korta to. Khoinchean handdil’lo ho zago tuvem?
bhattkar : ho zago mhaka mhojea purvojea koddlean mell’lla.
Meddom’ : mell’lla… Ha fukott mell’lla nhoi? ani he gamvkar tumche koddlean zago vikot gheupak polloita tori tum vikpak toyar na. Kiteak? poixe chodd zaleat? tankam hea zageachi goroz asa he tum zanna tori, zanna zaunuy him nattkam kiteak. Khobor asa nhoi tuka, nitt bottan tup yena zalear bott vakdde korche poddtta. Ani jea rostean cholun tem kam’ zaina to rossoch vakddo korpi-i monis asa hea gamvant. Aplo gamv sobit zal’lo tuka naka. Gamvchi udrogot zal’li tuka naka. Bhattkar zalo mhonnun kitem zalem. Bhatt hodd’ddear gheun tor voichom na nhoi tum.
Sor : meddom’, asu atam. Amche kam’ zalem nhoi vochudi taka. He polloi bhattkar, tuvem atam vochu yeta, tuzo hixob rokddoch zatlo… ( bhattkar vota, votana balluk ragan polloita ) tor gamvkareamno aiz amche chodd xe kam’ zalem… Ani kaim disamni urla te kam’ somptolem. Magir tumi tumchea kamak survat korpachi ti mhollear sonddas vapropachi. Falea saun sonddas bandpache kam’ suru zatlem. Kulokornni namvacho ek kontrador taka he kam’ dila. Tumi tumkam zai te pori bandun ghevo yeta. Taka tumi mozot korat. Mhonnje to kam’ bore kortolo ani begin kortolo. Koll’le tumkam
soglli : hoi sor…..! ( kallokh zata ani dekhavo sovo sompta )
dekhavo satvo
( ujvandd zata, sonddas bandun toyar asa. Lok ap aplea kamant mogn, konn foleo laita, konn kor kaddtta. Tambdde fit bi bandil’le asta. )
ballu : ( yeun ) ha zali nhoi soglli toyari? atam amcho mukhel montri yeupacho asa. Amchea sonddasache uktaunn korpak, te nirmol khoim gelem?
nirmol : ( yeun ) bhavo ailem hamv.
Ballu : ailem… Are vva! sobit nhesla mogo tum saddi.
Nirmol : hoi bhavo, sogllech sobit, sundor zala. Gamvkareanchi monam-i bi ani kallzam-i
ballu : hoi ha, hoi. Distat te. Punn te borem asa… Kator go.
Nirmol : kitem katrum bhavo?
ballu : ago hamv tuka kator mhonntta, kator khoim asa kai vicharota.
Nirmol : ha ti kator, katrota ti… Ha ti tattant asa.
Ballu : khoinchea tattant?
nirmol : tea… Kator asa tea tattant
ballu : hoi go punn te tatt khoim?
nirmol : bhitor asa bhavo!
ballu : asa mogo bhitor..! tor hadd nhoi. Montri yeucho zalo.
Nirmol : atanch gheun yeta bhavo. ( te vota )
xanno : ( ek udka bhoril’lo ddobo gheun yeta ) bhavo mukhel montri amchea sonddasache uktaunn kortole nhoi, hamvem ho ddobo bhorun handdla ha.
Ballu : are ho ddobo so kiteak haddla?
xanno : na uktaunna uprant to hem korchona tor.
Ballu : xanno more tum. Uktaunna uprant to he kortoloch mhonnun asa? taka zalear kortolo nhoi to. Ani zalem-i zalear hachi kosli goroz, sonddasant hi soglli veustha asa.
Xanno : hoi nhoi bhavo, hamv aplo adlech gheun bosla… ( sairon vajta ) bhavo mukhel motri aile dista ha.
Ballu : hoi voi aile aile. Ye nirmol yo go begin kator gheun. ( motri ani anik dog zann yeta, nirmol kator gheun yeta. ) nomskar bhai…
Montri : nomskar, nomskar…! ( soglleak nodor bhouddaita ) akko gamv boroch nitoll kela ha…! okhkhea gamvar pasoi marun polloila hamvem. Gamvche dorek ghor, ghora kuxicho vatthar ekdom’ saf. Dorek gamvan tumchea gamvcho ardox gheucho.
Ballu : he soglle tumchech upkar bhai. Tumche mojti bogar hem xokkoch naslem.
Montri : amchi mozot tor dorek gamva khatir asa, punn dorek gamv tumchea gamva sarko na, ani zor dorek gamv tumchea gamva sarko sobit sundor zait tor gõy hem sorgache dusre namv zatlem.
Ballu : hoi bhai, gõy sorga sarke korpak ami yotn kortolem, amchea gamva sarkech dusrey bi gamv zauche hachea khatir gamva gamvani zagrutokai kortolem, gõy amche khub sundor asa tachi sundrotai tigoun dourchea khatir ami hem kotthin kam’ kortole.
Montri : hoi hem tumich koruk xoktat. Tumche mon khub saf asa ani mon saf tor soglle saf. Atam fit kapun uktaunn koruya. ( kator gheun fit kapta, soglli talleo marta. Kallokh zaun dekhavo satvo sompta )
dekhavo atthvo
( ujvadd zata, meddom’ ani sor yeun soglleak polloita. Apleatunch sobit kayechi tokunnai korta )
ballu : ( yeun ) are meddom’, sor tumi amchea gamvant?
meddom’ : tumchea gamvant ami yeup na re ballu.
Ballu : na na meddom’ toxem nhoi, tumi mostt velkom’ asa. Punn ochkit oxi.
Sor : ochkit yeupache karonn asa, tumcho gamvch toso sobit asa, tumchea gamvant portun-portun yevo oxe dista ani ailem ki portun vochu noye xem dista.
Xanno : ( yeun ) meddom’, sor tumi amchea gamvant yeup mhonnlear hi devachi denngi, ken’na ami amchea gamvak tor ken’na tumchea pamyank polloita.
Meddom’ : are oxem kiteak mhonntta ho.
Ballu : ap aye homare ghor ye khuda ki kudrot hoi … Te asa nhoi te to aple toren mhonntta.
Meddom’ : ha borem borem ( ti hasta )
nirmol : ( yeun)paus poddchea poili zoglaunni, goddgodd marta. Vadoll zauchea poili… Dorea xant poddtta punn tumi yeuchea poilinchi khunna kainch koll na meddom’… Poili kollil’lem zalear, chea nasteachi tori veustha kortolim asli.
Sor : tumche vichar borech fudde pauleat ham kolltta te.
Xemvtu : ( yeun ) ho sogllo nitllosannecho osor, amchea gamva vangdda amche ton mon soglle saf zalem sor.
Meddom’ : vva vva vva oxem he bhagy soglleank khoim melltta. Tumchea hea bhageacho bhagidar ballu bab… Ani ek tumchea khatir bhageachi khobor asa.
Ballu : bhageachi khobor, amchea khatir, amchea gamva khatir.
Meddom’ : hoi, tumchea gamva khatir. Sor… ( sangpak khunnoita )
sor : tor khobor oxi asa… Tumcho gamv sogllea gamva poros ‘ sobit sundor gamv ‘ mhonnun venchun kaddla. Ani te khatir sorkara koddlean tumchea gamva khatir inam’ favo zala… Hem gheyat promann potr ani ho ponchvis lakhancho chek inamachea rupan. ( ballu chek ani promann potr gheta tachea dolleamni dukam yeta sogllim khux zata )
ballu : polloilem nhoi. Koxttache foll sodanch godd asta, bolla poros bud’d vhodd asta. Somvsar ho kitloi vojnodar aslo tori mog ho soglleamn zodd asta. Oso ho ‘ sobit sundor amcho gamv ‘ kitem? tumchoi gamv oso sobit sundor zaunk zai tor aiz pasun nitllosannek survat korat. Svotak saf dourat, gamv saf dourat. Ghora ghorant sonddas bandat ani tacho vapor korat. Toroch zatlo ‘ sobit sundor amcho gamv ‘
।। sompta ।।
