“sotyomevo zoite ”hem brid vaky soglleanche somvkallichem zaun asa .Punn soteachoch vizoi zatlo hem grihit dhorop hachi ttokkevari samki komi asa. Hea somvsarant ken’na kitem zait hem sanguk zaina . Konn konnacho opman korot hachi xasvoti na . Ritu bodlota toso monis bodlot rauta . Taka bhidd murout mhonnta ti atam urunk na . Kitem uloita tem aikun ghenastona monis monxak utrak dhorta .Apunn chukichem vagta hem khobor asun legit vadak hat ghalta . Magir prokronn khoinchem khoim pauyta hantutlean mansik chholl ,xaririk ,loingik hacho aspavo asa. Xabdik bachabachi zaup hannem monxeachea monacher khub vaitt porinnam’ zata . Ten’na monis ragachea bhorat pulisakodden dhamv gheta . Monasarokem kainch zaina mhunn sadem prokronn posun vhoddar pauyta .
Ekadri gozal kornaka mhonnli astona ti bollea korun dakhoup , xikxit astona oxikxitauri vagop . Ek sevanivrit’t xikxok legit addneayan cholpak fattifuddem sorna videadan kel’lo monis legit aplea choleak uzu vatt dakhoupachi soddun taka addvatten vochpakhatir sfurt dita . Xikun sourun legit zonaurachea paxtt vagunk lagta . Hea somvsarant monis ek oso ek pranni zaka soglleo suvidha zolmasaun tache bhomvtonni gomf vinnil’leuri vinnun douril’lo asta . Punn gomf veusthit koso vinnpacho hem zonneklean tharaupachem asta. Zonnekleachea bhomvtonni somskarachem ek vixixtt auronn ghal’lem asta tem taka zolmasaun posounn dita . Auy – bapain zor bore somskar ruzoile zalear tachem foll borem melltta . Punn kaivellam apnnem somskarak ek vixixtt ayam’ divpak zata . Srizonatmok akar divpachem kam’ svota apunn legit korunk xokta.
Hea dhokadhokichea jivitan monis aplea suvarthakhatir aplea faidea khatir mukhauylea vyoktik vaitt utramni pacharota . Hatabottar mejpi oxe xezari mellttat jem tumchem hit samballottat.Vaitt prosongar adorstombh koxe ube rautat . Aplea nateuaikaporos voilea dorzacho man ditat. Choddaut lok dusrea ghoracher kutri choddoupi dixtti poddttat . Ten’na tankam xikxonn lagna. Omki podvi lagna , uchch xikxit asun legit dusrealea kompauddabhair vidhi korpak haddttat .Oxea lokank kidem mhunn vicharopachem ! aplem vatthar nitoll dourun heranchea zageachi vatt laup . Man opmanachem hem chitr pitaropachem kam’ sokallosamvon sanjmeren sorras chalu asta . Jivit soroll anni sopem vota astona modinch gotirodhokachem kam’ monisuch korta . Jen’na suvarth add yeta.Ten’na monis monisoponn visrun zonaura bhaxen vagunk lagta. Eka tempar jivabhavache ixtt legit dusman zatat . Prokronn kaimvella khunameren legit pauta .Ek mhonn asa . Aplem ghor kanchechem astona dusrealea ghoracher fator marcho nhoim. Punn bhienastona tem kam’ legit korta . Apli loz zalear legit zata . Punn dusreank tras divn kainzonnank ratchi nhid besbori poddtta. “ konnalea bapaicho zago asa to hamv polloun ghetam ” oxim subezoponnachim utram sohzotayen tanchea tonddatlean bhair sortat. Kagall nond pulis sttexnacher vochun keli zalear poilea poilim guneamvokar apunn pulis sttexnacher vochun zonnukai guneamvokar apunn nhim hem bhasoupacho yotn korta . Vhoddlea avazan uloun osteacher podd’ddo ghalpacho yotn korta . Kiteak konn zanna pulis guneamvokarak oxi sond kiteak dita ? oxe toren sotean cholpi monxacho visvas matyebhorounn korta . Soteacho adar gheun cholpi monxachi mansikotai bodlota . Zor aplea utrank ani sotean cholil’leank zor opmanachi vagnnuk melltta ani guneamvokar zor mekllemponnan bhomvta . Pulis zor guneamvokarak doxi tharaunk xokna. Ani taka kosloch dondd farik korpak laina . Oxevellar savo monxachi mansikotai bodlota ani to magir apli chal cholta hem prokronn vhoddar poddun magir dusmakayechem rup dharonn korta . Ani ekmekank polloun aplea toklechi xir tannun ghetat.
Mansik chholl hi omkeach voyogottat va omkeach zagear zata oxi na. Xikxonnik , somajik ,veusai , khellamollar, gorib – girest hacheruy zata . Xallet vochpi bhurgeasaun te zanntte pirayechea monxameren xikxonnik mollar tor paulam konnkonni chhollnnuk zait asta . Zonn eklo bhurgo apleak bore mark mellche ani apleak zaiti xikxonnik suvat mellchi oxem dista ani tachi dhakdhuk auy – bapaik chodd asta . Aplea tanki poros chodd poixe divn koching klasak provex melloitat. Ani aplea bhurgeachi ttokkevari vaddoupacho yotn kortat .Punn bhurgo tache takdi bhair vochna ani sorasoripromann sadharonn mark poddttat .Kaim koching klasan oxem-i disun yeta , auy -bapailo somajik dorzo polloun bhurgeacher bori dekhrekh dourotat tacheruch lokx kendrit kortat . Tangelea obheasacher chodd bhor ditat . Zor bhurgo chodd huxar asot zalear taka anik sfurt ditat . Vorgat takach proxn vicharop oxem kel’lean sadaronn xikpi bhurgeachi chhollnnuk zata . Ani tachebhitor nirxeunni yeta . Ekeka markak lagun videarthi mansik tonnava khala vavurota. Xikxonnik mollar zaupi spordhek lagun zonn ekleachi pillounnuk zata
bail zori xikli ani souroli tori dadleanchea vaitt nodrentlean ti suttli na . Kaimvella svota ti zallean sapddotta va kaimvella tijer bollzobori zata . Sadhea nokri saun te vhodd hud’deacher legit tichem xoxonn zata . Osurkxitayecho bautto tiche bhomvtonnim lagil’loch asta . Ghor-somvsar apli nokri samballun tatth manen zogpacho ti yotn korta . Punn vaitt nojro tiji fatt soddna . Bail monis ken’na surkxit jinn zogtoli kai !!!. Ho ek vhoddlo proxn somazat uprasota.
Atachea kallant omkeach voyogottatlea bailanchi chhollnnuk zata oxi na monxacheo nodro atam bodl’leat . Soxol middian soglleank huxar kelam . Ani bailomonoxekodden polloupachi nodor anikuy burxi zalea. Monis aplo yogy sondhicho faido gheun tichekodden ixttagot korunk sodta ani tichekodden somvad sadun tika apleutten oddpacho yotn korta.Protyek kamak hangam suvarth dolleamukhar yeta .
Xabdik chhollnnuk hi sogllea mollar prokhroponnan zannvun yeta. Monxachea bhaxecher challoup , xaririk vyongacher namva dourop kallo , mottvo , tirso – vorso anni ghantti mhunn cholloup he prokar chatte paulak disun yetat . Apleaporos komi dorzachea kamak axil’lea lokank hi chhollnnuk pramukhean zannouta. Ani protyokxan polloupak legit melltta . Xikxituch oxem nhoim , oxikxit lok legit oslea prokarak bolli poddttat . Protyek zann aplea podacho faido gheun aplea sokoil kam’ korotleak opmanaspodok vagnnuk dita.
Kainkodden nokri korotleank voi legit ek vhoddlo proxn zaunk xokta kam’ kortona zor kamacho veg komi zalo zalear tika “aji ” va “azo ” hea namvamnim ulo martat . Kainkodden opvad zaunk xokta . Zor ekadri voiskor vyokti tornnatteabhoxen kam’ korunk lagli zalear taka manacho dorzo mellpak xokta. Zatiuylean nokrank opmanaspodok vagnnuk melltta tonddar kainch mhonn’nat punn haubhavauylean taka tiddayil’lem kolltta zati-i vad ho sorsokott chaluch asta.
Bekaidexir kam’mam korun legit tondd vhodd korun uloupi lokanchi sonkhea hea somvsarak komi na . Korttacho nikal kosoi lagum ani taka kitloi vell lagum . Tankam korttan vochop mhonnlear ek manachi suvat koxi dista . Bekaidexir kamank atam oto aila soteachi tonddam bond korpachi protha halisoram chalik laglea . Monatlean tea vyoktik khobor asta , apunn chukicho marg apnnoita mhunn . Punn addvatten vochun dusreank sotaupachem tankam khub auddotta . Zollamollam bhomvn fottiche purave haddun sorkari odhikareachi legit dixabhul korpachi chal sorras chalu asta.
Khun – maramari , opman chori him prokronnam halimsora khub vaddleat . Amchim sorkari yontronnam hatunt oslim prokronnam hatallopak opexi thartat . Khuni konn hem khobor asun legit taka begin kheast mellna . Vorsamnim vorsam votat nyai melloupak . Aplo monis gelo hea poxchatapan apli jinn sarta , ani khuni kaimvella nirdox sutt’ta .
