2023 ಜೂನ್ 11ವೆರ್ ಮಂಗ್ಳುರ್ ಶಕ್ತಿನಗರಾಂತ್ಲ್ಯಾ ವಿಶ್ವ್ ಕೊಂಕಣಿ ಕೆಂದ್ರಾಂತ್ ಕನ್ನಡಾಚೊ ಫಾಮಾದ್ ಲೇಖಕ್ ದೆವಾಧೀನ್ ಯಶವಂತ ಚಿತ್ತಾಲ ಹಾಚ್ಯಾ ಸಾಹಿತ್ಯಾಚಿ ಆನಿ ಜಿಣ್ಯೆಚಿ ಝಳಕ್ ದಿಂವ್ಚೆಂ `ಚಿತ್ತಾಲ ಚಿತ್ತ’ ಮ್ಹಳ್ಳೆಂ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲೆಂ. ಹ್ಯಾ ವೆಳಾರ್ ಫಾಮದ್ ಕನ್ನಡ ಲೇಖಕ್ ಶ್ರೀ ಜಯಂತ್ ಕಾಯ್ಕಿಣಿ ಹಾಣಿಂ ತಾಂಚೊ ಆನಿ ಯಶವಂತ್ ಚಿತ್ತಾಲ ಮಧ್ಲೊ ಸಂಬಂಧ್, ಚಿತ್ತಾಲಾಚ್ಯಾ ಸಾಹಿತ್ಯಾಚೊ ಪ್ರಭಾವ್, ತಾಚಿ ಬರ್ಪಾ ಶೈಲಿ ಆನಿ ತಾಚ್ಯಾ ಗಿನ್ಯಾನಾಚ್ಯಾ ಸಕ್ತ್ಯೆವಿಶಿಂ ವಿಸ್ತಾರ್ ವಿವರ್ ದಿಲೊ. `ಚಿತ್ತಾಲಾಚೆಂ ಸಾಹಿತ್ಯ್ ಮನ್ಶ್ಯಾಪಣಾಚೊ ಘಡ್ಯೊ ಬಾಂಧುನ್ ದವರ್ಚೆಂ’ ಮ್ಹಳ್ಳ್ಯಾ ತಾಣೆಂ, ತಾಚೆಂ ಸಾಹಿತ್ಯ್ ವಾಚ್ಚೆ ಮಾರಿಫಾತ್ ಮಾತ್ರ್ ಆಮಿ ತಾಕಾ ಸೂಕ್ತ್ ಮಾನ್ ದಿವ್ಯೆತ್ ಮ್ಹಳೆಂ.
ಅನ್ಯೇಕ್ ನಾಮ್ಣೆಚೊ ಸಾಹಿತಿ, ಪರ್ತ್ಕರ್ತ್ ಶ್ರೀ ವಿವೇಕ್ ಶಾನ್‍ಭೊಗ್ ಹಾಣಿಂ ಚಿತ್ತಾಲಾಚ್ಯಾ ಸಾಹಿತ್ಯಾಚಿ ವಿಸ್ತಾರ್ ಮಾಹೆತ್ ದಿಲಿ. ತಾಚ್ಯಾ ಲೇಖನ್ ಶೈಲೆಚೆರ್, ಭಾಸ್ ಆನಿ ಉತ್ರಾಂ ವಾಪಾರ್ಚ್ಯಾ ತಾಚ್ಯಾ ಸಮರ್ಥೆಚೆರ್ ಶಾನ್‍ಭೊಗ್ ಹಾಣಿಂ ಉಜ್ವಾಡ್ ಫಾಂಕ್ಲೊ.
ಹ್ಯಾ ಕಾರ್ಯಾಚ್ಯಾ ಸುರ್ವೆರ್ ವಿಶ್ವ್ ಕೊಂಕಣಿ ಕೆಂದ್ರಾಂತ್ಲ್ಯಾ `ಹೊಲ್ ಆಫ್ ಫೇಮ್’ ಹಾಂಗಾಸರ್ ಯಶವಂತ ಚಿತ್ತಾಲಾಚಿ ತಸ್ವಿರ್ ಅನಾವರಣ್ ಕೆಲಿ. ವಿಶ್ವ್ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ್ ಶ್ರೀ ನಂದಗೋಪಾಲ ಶೆಣೈ ಕಾರ್ಯಾಚೊ ಅಧ್ಯಕ್ಷ್ ಜಾವ್ನಾಸೊನ್ ಜಮ್‍ಲ್ಲ್ಯಾಂಕ್ ಬರೊ ಸ್ವಾಗತ್ ಮಾಗ್ಲೊ. ಸಿಇಒ ಗುರು ಬಾಳಿಗ ಹಾಣೆ ಧನ್ಯವಾದ್ ಪಾಟಯ್ಲೆ. ಶ್ರೀಮತಿ ಶಕುಂತಲಾ ಆರ್. ಕಿಣಿ ಹಿಣೆಂ ಕಾರ್ಯೆಂ ಚಲಯ್ಲೆಂ.
