ಅಸ್ತಿತ್ವವಾದ್, ಆಯಿನ್ ರ್‍ಯಾಂಡ್ ಆನಿ ಹಾಂವ್ ಜಿಯೆತಾಂ

ಚಂದ್ರಲೇಖಾ ಡಿ’ಸೋಜಾ

ಸಾರ್ ಸಬ್ದ್: ಅಸ್ತಿತ್ವ್‌ವಾದ್, ಆಯಿನ್ ರ್‍ಯಾಂಡ್, ಹಾಂವ್ ಜಿಯೆತಾಂ, ಎಡ್ವಿನ್ ಜೆ. ಎಫ್. ಡಿ’ಸೋಜಾ

ಸಾರಾಂಶ್

ಅಸ್ತಿತ್ವವಾದ್ 1864 ವರ್ಸಾ ಫಾಯ್ಸ್ ಜಾಲ್ಲ್ಯಾ ಫ್ಯೊದೊರ್ ದೊಸ್ತೊಯ್ವ್ಹಸ್ಕಿ ಹಾಚ್ಯಾ “ನೊಟ್ಸ್ ಫ್ರೊಮ್ ಅಂಡರ್‌ಗ್ರೌಂಡ್” ಗ್ರಂಥಾಂತ್ ಉದೆವ್ನ್ ಆಯ್ಲೊ. ತ್ಯಾ ಉಪ್ರಾಂತ್ Jean-Paul Sartre, Albert Camus, Samuel Beckett, Jeanette Winterson, Iris Murdoch, ಹಾಣಿಂ ಆಪಾಪ್ಲ್ಯಾ ಸಾಹಿತ್ಯಾಂತ್ ಅಸ್ತಿತ್ವವಾದ್ ಪ್ರತಿಪಾದನ್ ಕೆಲ್ಲೊ ಆಸಾ.  ಅಸ್ತಿತ್ವವಾದ್ ವೆಯುಕ್ತಿಕ್ ಸ್ವಾತಂತ್ರ್, ಕರ್ತವ್ಯ್ ಆನಿ ಅರ್ಥಾಚೊ ಸೊದ್ ಹಾಂಚೆರ್ ಭರ್ ದಿತಾ. ಧರ್ಮ್ ವಾ ಸಾಮಾಜಿಕ್ ನೇಮಾಂಚ್ಯಾಕ್‌ಯಿ ಚಡ್ ವಿಂಚವ್ಣೆ ಮಾರಿಫಾತ್ ವೆಕ್ತಿ ಆಪ್ಲಿಂ ಮೊಲಾಂ ಆನಿ ಮಹತ್ವ್ ರಚುನ್ ಘೆತಾ – ಮ್ಹಳ್ಳೆಂ ಪ್ರತಿಪಾದನ್ ಕರ್‍ತಾ ಅಸ್ತಿತ್ವವಾದ್.

ಅಸ್ತಿತ್ವವಾದ್ ಪರ್ಕಿಪಣ್, ಆಕಾಂತ್, ಪ್ರಾಮಾಣಿಕ್ಪಣ್ ಆನಿ ಮನ್ಶಾಚ್ಯಾ ಅಸ್ತಿತ್ವಾಚ್ಯಾ ವಿಸಂಗತಿಂಕ್ ಖೊಲಾಯೆನ್ ವಿಶ್ಲೇಷಣ್ ಕರ್‍ಚೆಂ ಅಸ್ತಿತ್ವವಾದ್, ವ್ಯಕ್ತಿಂಚೆರ್ ಪೂರ್ವ್ ನಿರ್ಧರಿತ್ ಅರ್ಥ್ ಲಾವ್ಪಿ ಪಾರಂಪಾರೀಕ್ ವೆವಸ್ಥೆಚಿ ಟಿಕಾ ಕರ್‍ತಾ. ಕಾಂಯ್ ಜಾಣಾಂಕ್ ಹೊ ವಾದ್ ವ್ಯಕ್ತಿಂಕ್ ಅರ್ಥಾಭರಿತ್ ಜಿಣೆಂ ಜಿಯೆಂವ್ಕ್ ಸಶಕ್ತ್ ಕರ್‍ತಾ ತರ್ ಹೆರ್ ಥೊಡೆ ಅಸ್ತಿತ್ವವಾದ್ ಸಂಭಾವ್ಯ್ ಶೂನ್ಯವಾದ್ ವಾ ನೈತಿಕ್ ಸಾಪೆಕ್ಷತಾವಾದಾಕ್ ಕಾರಣ್ ಜಾತಾ ಮ್ಹಳ್ಳಿ ಜಾಗ್ವಣಿ ದಿತಾತ್.

ಎಡ್ವಿನ್ ಜೆ.ಎಫ್. ಡಿ’ಸೋಜಾ ಅಸ್ತಿತ್ವವಾದ್ ಪ್ರತಿಪಾದನ್ ಕರ್‍ಚ್ಯಾ ಆಯಿನ್ ರ್‍ಯಾಂಡಾಚ್ಯಾ ಸಾಹಿತ್ಯಾ ಥಾವ್ನ್ ಪ್ರೇರಿತ್ ಜಾಲ್ಲೊ. ಹ್ಯಾ ಲೇಖನಾಂತ್ ಎಡ್ವಿನ್ ಜೆ. ಎಫ್. ಡಿಸೋಜಾ ಹಾಂಚಿ ಹಾಂವ್ ಜಿಯೆತಾಂ ಕಾದಂಬರಿ ಆಯಿನ್ ರ್‍ಯಾಂಡಾಚ್ಯಾ ಸಾಹಿತ್ಯಾ ಸಂಗಿಂ ತುಲನ್ ಕೆಲ್ಲಿ ಪಳವ್ಯೆತಾ.