ಎಡ್ವಿನ್ ಜೆ. ಎಫ್ ಡಿ ಸೋಜಾಚ್ಯಾ ಉಣ್ಯಾ ಭಾವಾಡ್ತಾಚೆ ದೊಳ್ಯಾಂನಿ ಕೊಡಿಯಾಳ್ ಪರಿಸರ್ ಆನಿ ಸಂಸ್ಕೃತಿ

ಜೊ. ಸಿ. ಸಿದ್ಧಕಟ್ಟೆ

ಸಾರ್ ಸಬ್ದ್: ಸಂಸ್ಕೃತಿ, ಪರಿಸರ್, ಉಣ್ಯಾ ಭಾವಾಡ್ತಾಚೆ

ಸಾರಾಂಶ್

ಖಾಣ್-ಜೆವಣ್, ನ್ಹೆಸಣ್ ಆನಿ ದಿಸ್ಪಡ್ತೆಂ ಜಿವಿತ್ – ಹೆ ಖಂಚ್ಯಾಯ್ ಸಂಸ್ಕೃತಿಚೆ ಮಹತ್ವಾಚೆ ಆನಿ ಮುಳಾವೆ ಘಟಕ್ ಜಾವ್ನಾಸೊನ್, ಸಾಹಿತ್ಯಾಂತ್ಲ್ಯಾ ಸಾಂಕೇತಿಕತಾ ಆನಿ ಅರ್ಥಾಚೆ ಗಿರೆಸ್ತ್ ಮೂಳ್ ಜಾವ್ನಾಸಾತ್. ಪಾತ್ರಾಂಚೆಂ ಪ್ರೇರಣ್, ಪಾತ್ರಾಂ ಮಧ್ಲೊ ಸಂಘರ್ಶ್, ವಿಶ್ವ್ ದಿಶ್ಟಿಕೋನ್ ರೂಪಿತ್ ಕರ್‍ಚ್ಯಾಕ್ ಧರ್ಮ್ ಆನಿ ಪಾತ್ಯೆಣಿ ಗೂಂಡ್ ಪಾತ್ರ್ ಖೆಳ್ತಾತ್.

ಹ್ಯಾ ಲೇಖನಾಂತ್ ಎಡ್ವಿನ್ ಜೆ. ಎಫ್ ಡಿ’ಸೋಜಾಚ್ಯಾ ಉಣ್ಯಾ ಭಾವಾಡ್ತಾಚೆ ಕಾದಂಬರಿಂತ್ ಕೊಡಿಯಾಳ್ ಆನಿ ಭೊಂವ್ತಿಚೆಂ ಪರಿಸರ್ ಆನಿ ಸಂಸ್ಕೃತಿ ಕಶಿ ಚಿತ್ರಿತ್ ಜಾಲ್ಯಾ, ಕಾದಂಬರಿಂತ್ ದಾಖಯಿಲ್ಲೊ ಧರ್ಮಿಕ್ ಆನಿ ಆಧ್ಯಾತ್ಮಿಕ್ ಅಂಶ್ ಪಾತ್ರಾಂಚ್ಯಾ ಬಳ್ವಂತ್ ಚಿತ್ರೀಕರಣಾಕ್ ಕಸೊ ಪೂರಕ್ ಆನಿ ಕಾದಂಬರಿಂತ್ಲ್ಯಾ ಪಾತ್ರಾಂನಿ ಸಂದರ್ಭಾಕ್ ಸರಿ ಜಾವ್ನ್ ಘೆಂವ್ಚ್ಯಾ ನಿರ್ಣಯಾಂಚೆರ್ ಆನಿ ಸಂವಾದಾಚೆರ್ ಕಸೊ ಪರಿಣಾಮ್ ಘಾಲ್ತಾ – ಹಾಚೊ ಖೊಲಾಯೆನ್ ವಿಚಾರ್ ಚಲಯ್ಲಾ.

ಕಥಾನಕಾಚೆಂ ಸೆಟ್ಟಿಂಗ್ ಆನಿ ಭೌಗೋಳಿಕತಾ ಸಮ್ಜೊನ್ ಘೆವ್ನ್ ಕಥಾನಕಾಚ್ಯಾ ಪಾತ್ರಾಂಚೆರ್ ಆನಿ ತಾಂಚ್ಯಾ ವಾಡಾವಳಿಚೆರ್ ಹಾಚೊ ಪರಿಣಾಮ್ ಕಸೊ ಜಾಲಾ ಮ್ಹಳ್ಳ್ಯಾಚೊ ಅಭ್ಯಾಸ್ ಹ್ಯಾ ಲೇಖನಾಂತ್ ಜಾಲಾ ಮಾತ್ರ್ ನ್ಹಯ್, ಹೆಂ ಉಣ್ಯಾ ಭಾವಾಡ್ತಾಚೆ ಕಾದಂಬರಿಚ್ಯಾ ಸಂಕೀರ್‍ಣತೆಕ್ ಆನಿ ಸಾಹಿತಿಕ್ ಗಿರೇಸ್ತ್‌ಕಾಯೆಕ್ ದಿಲ್ಲ್ಯಾ ಯೋಗ್‌ದಾನಾಚಿ ಗೂಂಡ್ ಸಮ್ಜಣಿ ವಾಚ್ಪ್ಯಾಕ್ ದಿತಾ.