ಎಡ್ವಿನಾಚ್ಯಾ ಸಾಹಿತ್ಯಾಂತ್ ವಿಗ್ಯಾನ್ ಆನಿ ತತ್ವಗ್ಯಾನ್

ಕಿಶೋರ್ ಗೊನ್ಸಾಲ್ವಿಸ್

ಸಾರ್ ಸಬ್ದ್: ಎಡ್ವಿನ್ ಜೆ. ಎಫ್. ಡಿ’ಸೋಜಾ, ವಿಗ್ಯಾನ್, ತಂತ್ರಗ್ಯಾನ್, ಕಾದಂಬರಿ

ಸಾರಾಂಶ್

ಆಪ್ಲ್ಯಾ ನಿರಂತರ್ ಅಧ್ಯಯನಾಚ್ಯಾ ತಾನೆನ್ ಆನಿ ಖಳ್ಮಿತ್ ನಾತ್‌ಲ್ಲ್ಯಾ ವಾಚ್ಪಾನ್, ನವ್ಯಾ ಸಂಗ್ತಿಂಕ್ ಪಟ್ಲುನ್ ಧರ್‍ಚ್ಯಾ ಉಗ್ತೆಪಣಾಂತ್, ಕೊಂಕ್ಣೆಂತ್ ದುಸ್ರ್ಯಾಂನಿ ಚಿಂತುಂಕ್ ಸಯ್ತ್ ನಾತ್‌ಲ್ಲ್ಯಾ ವಿಷಯಾಂಚೆರ್ ಕಾಣಿಯೊ, ಕಾದಂಬರಿ ಬರಯಿಲ್ಲೊ ಎಡ್ವಿನ್ ಜೆ.ಎಫ್. ಡಿಸೋಜ ಸ್ವತಾಚ್ಯಾ ಜಿಣ್ಯೆಂತ್ಲ್ಯಾನ್ ಆನಿ ಭಂವ್ತಣಿಂಚ್ಯಾ ಸಂಸಾರಾಕ್ ಸೂಕ್ಷಿಮ್ ನದ್ರೆನ್ ಪಳೆವ್ನ್ ಕಥಾನಕಾಂಕ್ ಪಿಂತ್ರಾಂವ್ಚೊ ಕಲಾಕಾರ್. ಆಪ್ಣೆಂ ಬರಯ್ಜೆ ಜಾಲ್ಲ್ಯಾ ವಿಷಯಾಚೆರ್ ಗೂಂಡ್ ಅಧ್ಯಯನ್ ಕರ್‍ನ್ ಸಾಹಿತ್ಯ್ ರಸ್ಚ್ಯಾ ತಾಣೆಂ ಆಪ್ಲ್ಯಾ ಸಾಹಿತ್ಯಾಂತ್ ತಾತ್ವಗ್ಯಾನಿಕ್ ಸವಾಲಾಂಕ್ ಕೊಂಕ್ಣಿ ಸಾಮಾಜಿಕ್ ಸಂದರ್ಭಾಂಕ್ ಮಿಸ್ಳುನ್, ವಾಚ್ಪ್ಯಾಂನಿ ತಾಂಚ್ಯಾ ಸ್ವತಾಚ್ಯಾ ಅಸ್ಥಿತ್ವಾ ಕಳ್ವಳ್ಯಾಂಕ್ ಫುಡ್ ಕರ್‍ನ್ ತಾಂಕಾಂ ತಾಂಚಿಂಚ್ ಸ್ವತಾಚಿಂ ಸೊದ್ನಾಂ ಕರ್‍ಚ್ಯಾ ಪ್ರಕ್ರಿಯೆಂಕ್ ವೊವ್ಳಿಗ್ ದಿಂವ್ಚೆ, ಮನ್ಶಾ ಅನ್ಭೋಗಾಂಚ್ಯಾ ಸಾರ್‍ವತ್ರಿಕ್ ಸಂಘರ್ಶ್ಯಾಂಚೆಂ ರುಪಾಂ ದಾಕಂವ್ಚೆ ಆರ್ಶೆ ಕಶೆ ವಾಪಾರ್‍ಲೆ. ಎಡ್ವಿನಾಚ್ಯಾ ಕಾದಂಬರಿಂನಿ ವಿಗ್ಯಾನ್ ಆನಿ ತತ್ವಗ್ಯಾನ್ ಕಾಳಾಚ್ಯಾ ಗರ್ಜೆ ತೆಕಿದ್ ಏಕ್ ವಾಂಟೊ ಜಾವ್ನ್ ಆಯ್ಲಾ ಮ್ಹಳ್ಳೆಂ ಹ್ಯಾ ಲೇಖನಾಚೆಂ ಧೋರಣ್.