Vorsa adim gain rauyil’lo ʻKonkonn kalashriʼ birudankit Claud D’Souza hacho uddas kaddun ‘Hozar solam’ tuka omor Claud D’Souzaʼ mholl’lli tacheach podamni vinnleli vixixtt songit sanz mongllurchea St Agnes kolejichea xotomanotsou sobhasalant sal bhor loka somor prostut zali. Ogostache 15ver sador zal’lea hea songit sanjevellar Claud D’Souzachea podanchem pendrive ani tantlea podanchem pustok mokllik korn Claud D’Souzak man bhettoilo.
Mongllurantlem famad kola songhotton ʻKaravall Konkansʼ hamnni manddun haddlelea hea kareak onivasi bharoti-i udyomi Errol Samuel, Konkan Maina Meena Rebimbus; daijiworld somsthapok Walter Nandalike, songit guru Joel Pereira, St Agnes kolejichi prinsipal Sr Venessa, Claud D’Souzachi potinn xrimoti Mari, dhuvo Maushmi ani Melissa, ʻKaravall Konkansʼ hacho odhyokx Lesli Rego hazor ason, Claud D’Souzachea tosvirek fulam orpun nomon bhettoilo.
Vedi kareavellim Claud D’Souzachea sorv songit kareank songit dil’lea Pappan ani ʻKaravall Konkansʼ hanchea sorv vineas ani chhapea vaurant sohokar dimvchea Joachim Pinto, vamanjoor hankam fulam diun man kelo.Uprant Claudichea songit jinnye poinnar sangat, sohokar ani pattimbo dil’le Christopher (Christy), Jovin Pinto ani Leslie Rego hankam Claud D’Souzachea kuttma torfen xrimoti Mari, Maushmi ani Melissa songim Derebail firgojicho vigar Fr Joseph Martis, Bendur firgojicho vigar Fr Walter D’Souza toxench ʻsompodoʼ hacho nirdexok Fr Reginald Pinto hannim xol pangurn, uddasachi kannik orpun sonman kelo.
Hea vellar uloyil’lo vigar Fr Joseph Martis ʻaplea songit, notton toxench sahity denneam marifat Claud D’Souzan pon’nas vorsancheaki choddit kall konkonn mayechi seva keli ani konkonn lokathaun ʻkonkonn kolaxriʼ mholl’llem birud gheun omor zalo. Az to amche modhem tachea podam, sahity ani songita marifat hazor asa. Osolea mohan konknni kolakarak bhovo sohoz zal’li xrid’danzoli ayozon kel’lea ʻKaravall Konkansʼ hankam dinvasʼ oxem mhonnalo. Hem karyem famad karyem choloinnar Dolphy Salddanha hanne choloun vhelem. ʻKaravall Konkansʼ hacho adlo karyodorxi, atam sando Ransom’ Saldanhan dhonyovad somorponn kelem.
Tea uprant prostut zal’lea songit sanjechem sunkann famad karyem nirvahok toxench ʻKaravall Konkansʼ hacho odhyokx Lesli Regon ghetl’lem. Leslichea ghonnghonnit toxem monakorxik utram sovem songit sanz prostut zali. Hea songit kareavollint Claud D’Souzachea bhouch lokamogall 15 vinchnnar podam RonyD’Cunha, Ivan Sequeira, Galdin D’Souza, Babita Pinto, MunitaVeigas, Alwyn Noronha Bajpe, Joel D’Souza, Shalon Pinto, Dr. Musthafa, Kiran Menezes, Asha Menezes, Sharyl Tauro, Blossom Rego, Ransom Saldanha, Bindu Cutinha, and Shanthi Pinto hamnni, famad songit nirdexok zoddi ʻPappan-Joswinʼ hanchea monam dholomvchea songita songim prostut kelim. Bhangrallea talleacho gaupi Ivan D’Souza hanne gavun, famad nott Jossy Rego ani proxosti vijet nachpinn Remona Evett Pireran notton korn prostut kel’lem Claud D’Souzachem bhouch sintimentall pod ʻdhuve mhojyeʼ zomlelea songit preminchea dolleamni dukham haddunk paulem.
Songit pongddant Shabbir Das (Tabla and Dholak), Ganesh (Rhythm Pad), Ashith Pinto (Bass Guitar), Reuben Machado (Flute and Saxophone), Nizel (Trumpet), and Shaju (Violin) hamnni sangat dilo. Miss Remona Pirera hichea Show Snachers pongddacho akorxik nach, toxench Lesli Rego ani Dolla Mangllur hanchim fokonnam zoml’lea prekxokank sompurnn monoronzon diunko paulim.
Chris Electronics hancho avaz, Rose Arragers hanchi vedi ani Arun D’Souza hancho ujvadd hea songit sanjek voibhou diunko paulo.
Pics: Daya, Kukkaje
