ಸಪ್ಟೆಂಬರ್ 15 ವೆರ್ ಆಯ್ತಾರಾ ಸಕಾಳಿಂ 10 ವರಾಂಚೆರ್ ಕೊಂಕಣಿ ಲೇಖಕ್ ಸಂಘ್ ಕರ್ನಾಟಕ ಹಾಚಿ ವಾರ್ಷಿಕ್ ಜೆರಾಲ್ ಸಭಾ ಸಂದೇಶ ಸಭಾಸಲಾಂತ್ ಜಮ್ಲಿ. ಮಿಲಾಗ್ರಿಸ್ ಕೊಲೆಜಿಚೊ ಪ್ರಿನ್ಸಿಪಾಲ್ ಮಾ. ಬಾ. ಮೈಕಲ್ ಸಾಂತುಮಾಯೊರ್ ಹಾಣಿಂ ಅಧ್ಯಕ್ಷ್‌ಪಣ್ ಘೆತ್‌ಲ್ಲೆಂ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ್ ಶ್ರೀ ಸ್ಟ್ಯಾನಿ ಅಲ್ವಾರಿಸ್ ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್‌ಲ್ಲೆ. ಸವೆಂ ಕೆ.ಎಲ್.ಎಸ್. ಸುಂಕಾಣ್ ಸಮಿತಿಚೊ ಸಂಚಾಲಕ್ ಮಾನೆಸ್ತ್ ರಿಚರ್ಡ್ ಮೋರಸ್, ಸುಂಕಾಣ್ ಸಮಿತಿಚೆ ಸಾಂದೆ ಶ್ರೀ ಡೊಲ್ಫಿ ಲೋಬೊ, ಡಾ. ಎಡ್ವರ್ಡ್ ನಜ್ರೆತ್, ಶ್ರೀ ಹೆನ್ರಿ ಮಸ್ಕರೇನ್ಹಸ್ ವೆದಿರ್ ಆಸ್‌ಲ್ಲೆ. ಶ್ರೀ ರಿಚರ್ಡ್ ಮೋರಸ್ ಹಾಣಿಂ ವಾರ್ಷಿಕ್ ಲೇಕ್‌ಪಾಕ್ (ಆಡಿಟ್ ಕೆಲ್ಲೆಂ) ಮಂಡನ್ ಕೆಲೆಂ. ತ್ಯಾ ನಂತರ್ ಕೊಂಕ್ಣಿ ಸಾಹಿತಿ ಶ್ರೀಮತಿ ಫ್ಲಾವಿಯ ಅಲ್ಬುಕರ್ಕ್ ಹಿಚೊ, ಸೊಮಾಲಿಯಾಚ್ಯಾ ವಾರಿಸ್ ಡಿರಿ ಹಿಣೆಂ ಬರಯ್ಲಲಿ ಆಪ್ಲಿ ಜೀವನ್ ಚರಿತ್ರಾ “The Desert Flower” ಹಾಚೆಂ ಕೊಂಕಣಿ ತರ್ಜಣ್ ಪುಸ್ತಕ್ “ರೆಗಿಸ್ಥಾನಾಂತ್ಲೆಂ ಫುಲ್” ಶ್ರೀಮತಿ ಫ್ಲಾವಿಯ ಅಲ್ಬುಕರ್ಕಾಚಿ ಆವಯ್ ಶ್ರೀಮತಿ ರೀಟಾ ತೋರಸ್ ಹಿಣೆಂ ವೆದಿರ್ ಆಸ್‌ಲ್ಲ್ಯಾ ಮಾನಾಚ್ಯಾ ಸಯ್ರ್ಯಾಂಸವೆಂ ಉಗ್ತಾವಣ್ ಕೆಲೆಂ. ಲೇಖಕಿಚೆ ಪೂತ್ ಕೆಲ್ವಿನ್ ಆನಿ ವಿಯಾನ್ ವೆದಿರ್ ಆಸ್‌ಲ್ಲೆ. ಸಾಹಿತಿ ದೊತೊರ್ ಜೊಯೆರ್ ನೊರೋನ್ಹಾನ್ ಪುಸ್ತಕಾಚಿ ಪರಿಚಯ್ ದಿಲಿ. ಕಾರ್ಯಾವೆಳಿಂ ಶ್ರೀ ಸ್ಟ್ಯಾನಿ ಅಲ್ವಾರಿಸ್ ಹಾಂಕಾ ಸನ್ಮಾನ್ ಕೆಲೊ. ತಶೆಂಚ್ ಅಕಾಡೆಮಿ ಸಾಂದೆ ಶ್ರೀ ರೊನಿ ಕ್ರಾಸ್ತಾ, ಶ್ರೀ ನವೀನ್ ಲೋಬೊ, ಶ್ರೀಮತಿ ಸಪ್ನಾ ಕ್ರಾಸ್ತಾ ಹಾಂಕಾಂ ಗೌರವ್ ಅರ್ಪಿಲೊ. ಸೈಂಟ್ ಅಲೋಶಿಯಸ್ ಕೊಲೆಜಿಥಾವ್ನ್ ಕೊಂಕಣಿ ಪಿ.ಜಿ. ಡಿಪ್ಲೊಮಾಂತ್ ಚವ್ತೆಂ rank ಆಪ್ಣಾಯ್ಲೆಲ್ಯಾ ಕೆ.ಎಲ್.ಎಸ್. ಸಾಂದೊ ಶ್ರೀಮತಿ ಪ್ರೀತ ಮಿರಾಂದಾಕ್ ಮಾನ್ ಕೆಲೊ. ಶ್ರೀ ಸ್ಟ್ಯಾನಿ ಅಲ್ವಾರಿಸಾನ್ ಸರ್ವಾಂ ಸಾಂಗಾತಾ ಮೆಳುನ್ ಕೊಂಕ್ಣೆಚೊ ವಾವ್ರ್ ಕರ್ಯಾಂ ಮ್ಹಣ್ ಉಲೊ ದಿಲೊ.
ಕಾರ್ಯಕ್ರಮಾಚೊ ಫುಡ್ಲೊ ವಾಂಟೊ ಜಾವ್ನ್, ಡಾ. ಎಡ್ವರ್ಡ್ ನಜ್ರೆತಾನ್ ಸಾಹಿತ್ಯ್ ಪಯ್ಣಾಚಿಂ ಪನ್ನಾಸ್ ವರ್ಸಾಂ ಸಂಪಂವ್ಚ್ಯಾ ವಗ್ತಾ, ತಾಕಾ ಸನ್ಮಾನ್ ಆಸಾಕೆಲ್ಲೊ. ಮಾಲ್ಘಡೊ ಸಾಹಿತಿ ಶ್ರೀ ಡೊಲ್ಫಿ ಕಾಸ್ಸಿಯಾನ್ ಡೊ. ಎಡ್ವರ್ಡಾಚಿ ವ್ಯಕ್ತಿಗತ್ ಪರಿಚಯ್ ದಿಲಿ. ತಶೆಂಚ್ ಲವಿ ಗಂಜಿಮಠ ಹಿಣೆಂ ತಾಚ್ಯಾ ಪನ್ನಾಸ್ ವರ್ಸಾಂಚ್ಯಾ ಸಾಹಿತ್ಯಾಚ್ಯಾ ಪಾಟ್‌ಭುಂಯ್ಚೆರ್ “ಡಾ. ನಜ್ರೆತಾಚ್ಯೊ ಮಟ್ವ್ಯೊ ಕಾಣಿಯೊ ಆನಿ ಸಮಾಜಿಕ್ ಸ್ಥಿತ್ಯಂತರಾಚೆಂ ಚಿತ್ರಣ್” ಹ್ಯಾ ವಿಷಯಾಚೆರ್ ಉಲವ್ಪ್ ಚಲಯ್ಲೆಂ. ಆಶೆಂ ಸವಿಸ್ತಾರಾಯೆನ್ ಡೊ. ನಜ್ರೆತಾಚ್ಯಾ ಸಾಹಿತ್ ದೆಣ್ಗೆಚಿ ಝಳಕ್ ಆನಿ ವಳಕ್ ದಿಲಿ.
ಕೆ.ಎಲ್.ಎಸ್. ಸುಂಕಾಣ್ ಸಮಿತಿ ಸಾಂದ್ಯಾಂಸವೆಂ ವೆದಿರ್ ಆಸ್‌ಲ್ಲ್ಯಾ ಮಾನಾಚ್ಯಾ ಸಯ್ರ್ಯಾಂನಿ ಡೊ. ನಜ್ರೆತಾಕ್ ಶೆಲೊ, ಫುಲಾಂ, ಫಳಾಂ, ಝೆಲೊ ಅರ್ಪುನ್ ಮಾನ್ ಕೆಲೊ. ತಾಚಿ ಪತಿಣ್ ಡೊ. ನೆಲ್ಲಿ ನಜ್ರೆತ್ ತಶೆಂಚ್ ಕುಟ್ಮಾದಾರಾಂ ಹ್ಯಾ ವಗ್ತಾ ವೆದಿರ್ ಹಾಜರ್ ಆಸ್‌ಲ್ಲಿಂ. ಸನ್ಮಾನ್ ಸ್ವೀಕಾರ್ ಕೆಲ್ಲ್ಯಾ ಡಾ. ಎಡ್ವರ್ಡ್ ನಜ್ರೆತಾನ್, ಆಪ್ಲ್ಯಾ ಸಾಹಿತ್ ಸೆವೆಕ್ ತೆಂಕೊ ದಿಲ್ಲ್ಯಾ ಸರ್ವ್ ಪತ್ರಾಂಚ್ಯಾ ಸಂಪಾದಕಾಂಚೊ, ಸಾಹಿತಿಂಚೊ, ಯಾಜಕಾಂಚೊ, ಕುಟ್ಮಾದಾರಾಂಚೊ ತಶೆಂಚ್ ವಾಚ್ಪ್ಯಾಂಚೊ ಉಪ್ಕಾರ್ ಆಟಯ್ಲೊ. ಅಧ್ಯಕ್ಷ್ ಸ್ಥಾನ್ ಘೆತ್‌ಲ್ಲ್ಯಾ ಮಾ.ಬಾ.ಮೈಕಲ್ ಸಾಂತುಮಾಯೊರ್ ಹಾಣಿಂ ಪನ್ನಾಸ್ ವರ್ಸಾಂಚ್ಯಾ ಸಾಹಿತ್ ಸೆವೆಕ್ ಡಾ. ಎಡ್ವರ್ಡ್ ನಜ್ರೆತಾಕ್ ಬರೆಂ ಮಾಗ್ಚ್ಯೆಸವೆಂ ಕೊಂಕ್ಣೆಚ್ಯಾ ಸೆವೆಂತ್ ಕೆ.ಎಲ್.ಎಸ್.ನ್ ಕರ್ಚ್ಯಾ ವಾವ್ರಾಕ್ ಶಾಭಾಸ್ಕಿ ಪಾಟಯ್ಲಿ. ಕೆ.ಎಲ್.ಎಸ್. ಸಲಹಾ ಸಮಿತಿಚೊ ಸಾಂದೊ ಶ್ರೀ ಎಡ್ಮಂಡ್ ನೊರೋನ್ಹಾನ್ ಧನ್ಯವಾದ್ ಪಾಟಯ್ಲೆ. ಸುಂಕಾಣ್ ಸಮಿತಿ ಸಾಂದೊ ಶ್ರೀ ಹೆನ್ರಿ ಮಸ್ಕರೇನ್ಹಸಾನ್ ಕಾರ್ಯೆಂ ಚಲಯ್ಲೆಂ. ಕೊಂಕಣಿ ಸಾಹಿತಿ, ಪತ್ರಾಂಚೆ ಸಂಪಾದಕ್, ಹಿತೈಶಿ ಆನಿ ಕೊಂಕ್ಣೆಚೆ ಆನಿ ಡೊ. ನಜ್ರೆತಾಚೆ ಅಭಿಮಾನಿ ಹಾಜರ್ ಆಸ್‌ಲ್ಲೆ. ಸಹಭೋಜನಾಸವೆಂ ಕಾರ್ಯಕ್ರಮ್ ಸಂಪ್ಲೆಂ.
