“ಆಮ್ಚೊ ಪಿತೃಪ್ರದಾನ್ ಸಮಾಜ್ ಜಾವ್ನಾಸೊನ್ ಸಮಾಜಾಂತ್ ರೊಂಬ್ಲೆಲಿಂ ಪಿತೃಪ್ರದಾನ್ ವಾ ದಾದ್ಲೊ ಕೇಂದ್ರಿತ್‌ ಸಿದ್ಧಾಂತಾಂ, ದಾದ್ಲೆ ಆನಿ ಬಾಯ್ಲಾಂ ಮದ್ಲೊ ಸಂಬಂಧ್ ಆನಿ ಸ್ಥಾನ್‌ಮಾನ್ ನಿಯಂತ್ರಣ್ ದವರ್ಚೆ ಖಾತಿರ್ ವಾಪ್ರ್ತಾತ್. ದೇಶೀಯ್‌ ಸಿದ್ಧಾಂತಾಂ, ಲೈಂಗಿಕ್‌ ಸಿದ್ಧಾಂತಾಂ, ತಶೆಂಚ್‌ ರಾಜಕೀಯ್‌ ಸಿದ್ಧಾಂತಾಂ ಬಾಯ್ಲಾಂಕ್ ದಾದ್ಲ್ಯಾಖಾಲ್‌ ದವರ್ಚಿಂ ಮ್ಹಳ್ಳೆಂ ರುಜು ಕರ್ತಾತ್. ಪಿತೃಪ್ರದಾನ್ ಸಿದ್ಧಾಂತಾಂ ಸ್ತ್ರೀಯಾಂಚ್ಯಾ ಸಾರ್ವಜನಿಕ್‌ ಆನಿ ಖಾಸ್ಗಿ ಶೆತಾಂನಿ ಕೂಡ್‌, ಲೈಂಗಿಕತಾ ಆನಿ ಸಂತಾನ್‌ ಉತ್ಪತ್ತಿ ನಿಯಂತ್ರಣಾರ್ ದವರ್ಚ್ಯಾಕ್‌ ಉಪೇಗ್‌ ಕರ್ತಾತ್. ಸ್ತ್ರಿಯೆಚಿ ಸೊಭಾಯ್‌ ಚಡಂವ್ಚೆಂ ಖಾತಿರ್ ವಾಪರ್ಚೆಂ ನಗ್‌ಯಿ ವ್ಯಕ್ತಿತ್ವ್‌, ಲೈಂಗಿಕತಾ ಆನಿ ಫಳಾದಿಕ್ಪಣಾಚೆರ್‌ ಧನಿಪಣ್‌ ವ್ಯಕ್ತ್‌ಕರ್ಚ್ಯಾ ಸಂಪ್ರದಾಯಾಂ ಮಾರಿಫಾತ್‌ ಸ್ತ್ರೀಯೆಚೆಂ ಸ್ವಾತಂತ್ರ್‌ ನಿಯಂತ್ರಣ್ ಕರ್ಚಿಂ ಸಾಧನಾಂ ಜಾವ್ನ್‌ ಕಾಮ್‌ ಕರ್ತಾತ್. ಹೆಂ ಹರ್‌ ನಾಗರೀಕತೆಂಚ್ಯಾ ಸಂಸ್ಕೃತಾಯೆಂತ್ಲ್ಯಾನ್ ಆನಿ ಪಿಳ್ಗ್ಯಾಂಥಾವ್ನ್‌ ಘಡೊನ್‌ ಆಯ್ಲಾಂ. ಸ್ತ್ರೀಯಾಂಚ್ಯಾ ಸಾದ್ಯಾ ಜಿವಿತಾಕ್‌ ಹಿ ಏಕ್ ಅಡ್ಕಳ್‌ ತರೀ ಸ್ತ್ರೀಯೊ ಸವಾಲಾಂವಿಣೆ ಹ್ಯೊ ಚಾಲಿರೆಗ್ರೊ ಪಾಳುನ್‌ ಆಯ್ಲ್ಯಾಂತ್. ಸ್ತ್ರಿಯೆಚ್ಯಾ ಕುಡಿಚೆರ್‌ ತಶೆಂಚ್‌ ತಿಣೆ ಕಾಜರಾ ವೆಳಿಂ ಕುಳಾರಾ ಥಾವ್ನ್ ನ್ಹೆಸೊನ್‌ ಯೆಂವ್ಚ್ಯಾ ನಗಾಂಚೆರ್‌ಯಿ ತಿಕಾ ಅಧಿಕಾರ್‌ ಆಸಾನಾ. ಆಪ್ಣಾಕ್‌ ಹರ್‌ ರಿತಿನ್‌ ನಿಯಂತ್ರಣಾರ್ ದವರುಂಕ್‌ ಪಳೆಂವ್ಚ್ಯಾ ದಾದ್ಲ್ಯಾ ಪ್ರಧಾನ್‌ ಸಮಾಜೆ ವಿರೋಧ್‌ ಸೂಕ್ಷ್‌ ರಿತಿನ್‌ ದಾಕಂವ್ಚೆಂ ಪ್ರತಿಭಟನ್‌ಚ್‌ ʼಕಮ್ರಾಬಾಂದ್‌ʼ ಆನಿ ʼಮಮಾತಾʼ ಕಾಣಿಯೆಚೊ ತೀರ್ಲ್‌” ಅಶೆಂ ಮ್ಹಣಾಲಿ ಕೊಂಕಣಿ ಲೇಖಕಿ, ಶಿಕ್ಪಾ ತಜ್ಞ್‌ ಪ್ರೊ| ದೊ| ಝೀಟಾ ಲೋಬೊ. ತಿ ನವೆಂಬರ್‌ 9ವೆರ್ ಸಾಂ ಲುವಿಸ್‌ ಪರಿಗಣಿತ್‌ ವಿಶ್ವ್‌ವಿದ್ಯಾಲಯಾಚ್ಯಾ ಕೊಂಕಣಿ ಸಂಸ್ಥ್ಯಾನ್‌ ಮ್ಹಯ್ನ್ಯಾವಾರ್‌ ಚಲಂವ್ಚ್ಯಾ ಬೊಲ್ಕಾಂವ್‌ ಕಾರ್ಯಾಂತ್‌ ಆಪ್ಲ್ಯಾ ಕಮ್ರಾಬಾಂದ್‌ ಆನಿ ಮಮಾತಾ ಕಾಣಿಯೆಚೆರ್‌ ವಿಶ್ಲೇಷಣಾತ್ಮಕ್‌ ಉಲೊವ್ಪ್‌ ದಿತಾಲಿ.
ತ್ಯಾ ಉಪ್ರಾಂತ್‌ ಲಗ್ಬಗ್‌ 20 ಮಿನುಟಾಂ ಸಂವಾದ್‌ ಚಲ್ಲೊ. ಸುಮಾರ್‌ 30 ಸಾಹಿತಿಂನಿ ಹಾಂತುಂ ವಾಂಟೊ ಘೆತ್ಲೊ.
ಕಾರ್ಯಾಚ್ಯಾ ಸುರ್ವೆರ್‌ ಸಾಂ ಲುವಿಸ್‌ ಕೊಲೆಜ್ (ಸ್ವಾಯತ್ತ್) ಹಾಚೊ ರೆಜಿಸ್ಟ್ರಾರ್‌ ದೊ| ಆಲ್ವಿನ್‌ ಡೆಸಾ ಹಾಣಿಂ ಬೊಲ್ಕಾಂವ್‌ ನೋಟ್‌ಪ್ಯಾಡ್‌ ಉಗ್ತಾವ್ಣ್ ಪಯ್ಲಿ ಪ್ರತಿ ಪ್ರೊ| ದೊ| ಝೀಟಾ ಲೋಬೊ ಹಿಕಾ ದೀವ್ನ್ ಗೌರವ್ ಪಾಟಯ್ಲೊ. ಉಪ್ರಾಂತ್‌ ಹಾಜರ್‌ ಜಾಲ್ಲ್ಯಾ ಸರ್ವಾಂಕ್ ಹೆ ನೋಟ್ ಪ್ಯಾಡ್‌ ವಾಂಟ್ಲೆ.
ಕೊಫಿ –ಫ್ಹಳಾರಾ ಸಂಗಿಂ ಕಾರ್ಯೆಂ ಆಕೇರ್‌ ಜಾಲೆಂ.
