AI ಸಂಸಾರಾಚ್ಯಾ ಭಿರಾಂತೆ ಮದೆಂ ಭಾಶೆಚೊ ಫುಡಾರ್; ಲುವಿಸ್ ಮಸ್ಕರೇನ್ಹಸಾಚ್ಯಾ ಸಾಹಿತ್ಯಾಚಿ ಜವಾಬ್ದಾರಿ

ಮೆಲ್ವಿನ್ ಎಸ್. ಪಿಂಟೊ

Scopus Author ID: 57189887469 
https://orcid.org/0000-0001-8797-1288

ಥೊಡ್ಯಾ ತೆಂಪಾ ಆದಿಂ ಸಂಸಾರಾಚೊ ಅತ್ಯಂತ್ ಗಿರೇಸ್ತ್ ಬಿಸ್ನೆಸ್‍ಮೆನ್ ಆಲನ್ ಮಸ್ಕ್ ಹಾಣೆಂ, 2027 ಭಿತರ್ ಡ್ರೈವರ್ ನಾತ್‍ಲ್ಲೆಂ ಕಾರ್ ತಯಾರ್ ಕರ್ತಲೊಂ ಮ್ಹಣ್ ಪರ್ಗಟ್ ಸಾಂಗ್ಲೆಂ (“Elon Musk unveils”, 2024). ತಿತ್ಲೆಂ ಮಾತ್ರ್ ನ್ಹಯ್, ತ್ಯಾ ಕಾರಾಚೆಂ ಏಕ್ ಪ್ರೊಟೊಟೈಪ್‍ಯೀ ತಾಣೆಂ ಪ್ರದರ್ಶನ್ ಕೆಲೆಂ. ಹ್ಯಾ ಕಾರಾಂತ್ ಆಲನ್ ಮಸ್ಕ್ ಸ್ವತ: ಬಸೊನ್ ಆಸ್‍ಲ್ಲೊ ಮಾತ್ರ್ ನ್ಹಯ್, ಕಾರ್ ಆಪ್ಲ್ಯಾ ಇತ್ಲ್ಯಾಕ್ ಮುಕಾರ್ ವಚುನ್‍ಂಚ್ ಆಸ್ತಾನಾ ಮಸ್ಕ್ ಆಪ್ಲ್ಯಾ ಕಾಮಾರ್ ಬೆಫಿಕಿರಾಯೆನ್ ಮಗ್ನ್ ಆಸ್ಚೆಂಯೀ ಸಗ್ಳ್ಯಾಂನಿ ಪಳಯ್ಲೆಂ. ಹ್ಯಾ ಕಾರಾಚೆಂ ವಿಶೇಸ್ ಕಿತೆಂಗೀ ಮ್ಹಳ್ಯಾರ್, ತ್ಯಾ ಕಾರಾಚಿ ಸರ್ವ್ ಟೆಕ್ನೊಲೊಜಿ ಕೃತಕ್ ಜಾಣ್ವಾಯೆನ್ (artificial intelligence) ವಾ AI ದ್ವಾರಿಂ ಸಾಂಬಾಳ್‍ಲ್ಲಿ ಆಸ್‍ಲ್ಲಿ.

ಆಯ್ಚೊ ಕಾಳ್ AI ಕಾಳ್ ಜಾವ್ನಾಸಾ. ದೋನ್ ವರ್ಸಾಂ ಆದಿಂ ಚಾಟ್‍ಜಿಪಿಟಿ (ChatGPT) ಉಗ್ತಾಡಾಕ್ ಆಯ್ಲಿ ಆನಿ ಸಂಸಾರ್‍ಭರ್ ಎಕಾ ರಿತಿಚೆಂ ವಾದಾಳ್‍ಚ್ ಉಟ್ಲೆಂ ಮ್ಹಣ್ಯೆತ್. ಚಾಟ್‍ಜಿಪಿಟಿ ದ್ವಾರಿಂ ಸಬಾರ್ ಸಂಗ್ತಿ ಬೋವ್ ಸಲೀಸ್ ಜಾಲ್ಯೊ. ಗೂಗ್‍ಲಾಪ್ರಾಸ್ ಚಡ್ ಕರ್ನ್ ಸ್ಪಷ್ಟ್ ಜಾಣ್ವಾಯ್ ಜೊಡುಂಕ್ ಚಾಟ್‍ಜಿಪಿಟಿ ಸಬಾರಾಂಕ್ ಬೋವ್ ಗರ್ಜೆಚಿ ಜಾಲಿ. ಪುಣ್ ತಿತ್ಲೊಚ್ ತಾಚೊ ಮಾರೆಕಾರ್ ವಾಯ್ಟ್ ಪರಿಣಾಮ್‍ಯೀ ದಿಸೊನ್ ಆಯ್ಲೊ. ಆಜ್ ಅಕೆಡೆಮಿಕ್ ವರ್ತುಲಾಂತ್ ಚಾಟ್‍ಜಿಪಿಟಿ ವಿದ್ಯಾರ್ಥಿಂಕ್ ಮಾತ್ರ್ ನ್ಹಯ್ ಸಂಸೊಧಾಕಾಂಕ್‍ಯೀ ಏಕ್ ತೆಂತೆಸಾಂವ್ ಜಾಲಾಂ. ಮಟ್ವಿ ವಾಟ್ ಧರ್ನ್ ‘ಜಾಣ್ವಾಯ್’ ಸ್ವಾಧೀನ್ ಕರ್ಚಿ ಗಿರಾಂತ್ ಉಟ್‍ಲ್ಲ್ಯಾನ್ ಆಜ್ ಚಾಟ್‍ಜಿಪಿಟಿ ತಸಲೆಂ AI ಸೊಫ್ಟ್‍ವೇರ್ ಮನ್ಶ್ಯಾ ಕ್ರಿಯಾಶೀಲತೆಕ್ ಕಠೀಣ್ ಸವಾಲಾಂ ಉಬ್ಜಾಂವ್ಚೆಂ ನಕ್ಕಿ ಜಾಲಾಂ.

ಲೊಕಾಮೊಗಾಳ್ ಆನಿ ಕ್ರಿಯಾಶೀಲ್ ಚರಿತ್ರೆಗಾರ್ ಯುವಲ್ ನೋಹಾ ಹರಾರಿ ಹಾಚೊ ನವೊ ಗ್ರಂಥ್ ಂI ವಿಶಿಂ ಚಡಿತ್ ಗಿನ್ಯಾನಾಕ್ ಇಂಬು ಕರ್ನ್ ದಿತಾ (Harari, 2024). ಹರಾರಿನ್ ಸಾಂಗ್ಚೆಬರಿ, ಕೆದಾಳಾ ಮನಿಸ್ ಅಧಿಕಾರಾಚ್ಯಾ ಗಿರಾಂತೆಕ್ ಲಾಗೊನ್ ನವೆಸಾಂವ್ ಕರುಂಕ್ ಯೆವ್ಜಿತಾ ಆನಿ ಕೆದಾಳಾ ತ್ಯಾ ನವೆಸಾಂವಾ ವಯ್ರ್ ತಾಚೆಂ ಲಗಾಮ್ ಚುಕ್ತಾ, ತೆಂ ನವೆಸಾಂವ್ ತಾಕಾ ಖಂಡಿತ್ ಘ್ರಾಸಿತಾ. ಹರಾರಿ ಪ್ರಕಾರ್ ಂI ಏಕ್ ಮನ್ಶಾನ್ ರಚ್‍ಲ್ಲೆಂ ನವೆಸಾಂವ್ ಆನಿ ಎದೊಳ್‍ಚ್ ಮನ್ಶಾಕ್ ತಾಚೆರ್ ಆಪ್ಲೆಂ ಲಗಾಮ್ ಚುಕ್ಲಾಂ ಮ್ಹಳ್ಳೆಂ ಸ್ಪಷ್ಟ್ ಆಸಾ.

ಹ್ಯಾ ವರ್ಸಾ ಭೌತಶಾಸ್ತ್ರಾಂತ್ ನೊಬೆಲ್ ಬಹುಮಾನ್ ಜಿಕ್ಪಿ ಕೆನಡಾಚೊ ವಿಜ್ಞಾನಿ ಜೆಫ್ರಿ ಹಿಂಟನ್ ಂI ಪಿತಾಮಹ ಮ್ಹಣ್‍ಂಚ್ ನಾಂವಾಡ್ದಿಕ್. ಪುಣ್ ನೊಬೆಲ್ ಮೆಳ್‍ಲ್ಲ್ಯಾ ತಕ್ಷಣ್ ತಾಣೆಂ ದಿಲ್ಲಿ ಚೆತಾವ್ಣಿ ಭಿರಾಂತೆಚಿ. ತೊ ಮ್ಹಣ್ತಾ, ಂI ಸಾಧಾರಣ್ ಏಕ್ ಕೈಗಾರಿಕ್ ಕ್ರಾಂತಿ. ಪುಣ್ ಮನ್ಶಾಂಚ್ಯಾ ಭೌತಿಕ್ ಸಕ್ತೆಪ್ರಾಸ್ ಬಳ್ವಂತ್ ಜಾಂವ್ಚ್ಯಾಕೀ ಂI ಮನ್ಶಾಂಚ್ಯಾ ಜಾಣ್ವಾಯೆಚ್ಯಾ ಒಟ್ಟಾರೆ ಸಕ್ತೆಕ್ ಮಿಕ್ವೊನ್ ವಾಡ್ತ್ತಲೆಂ. ಆಮ್ಕಾಂ ಆಮ್ಚ್ಯಾಕೀ ಚಡಿತ್ ಬುದ್ವಂತ್ ಸಕ್ತೆಕ್ ಕಶೆಂ ಆಟಾಪುಂಚೆಂ ಮ್ಹಳ್ಳೆ ವಿಶಿಂ ಅನ್ಭೊಗ್ ನಾ (Kapoor, 2024).

ತಶೆಂ ಮ್ಹಳ್ಯಾ ಉಪ್ರಾಂತ್, ರಾಜಾಂವಿಕ್ ರಿತಿ ವಾಪಾರ್ತಾನಾ AI ದ್ವಾರಿಂ ಮನ್ಶಾಕುಳಾಕ್ ಜಾಲ್ಲ್ಯಾ ಆನಿ ಜಾಂವ್ಕ್ ಸಾಧ್ಯ್ ಆಸ್ಚ್ಯಾ ಬರೆಪಣಾ ವಿಶಿಂ ಕೊಣೆಂಯೀ ನೆಗಾರುಂಕ್ ಜಾಯ್ನಾ. ವಯ್ಜಾಕೀಯ್ ಶೆತಾಂತ್ AI ಆಜ್ ವ್ಹಡ್ ಏಕ್ ಬೆಸಾಂವ್ ಜಾಲಾಂ. ಜೊಕ್ತ್ಯಾ ವೆಳಾರ್ ಪಿಡೆಚಿಂ ಸೊದ್ನಾಂ ಕರುಂಕ್, ಪಿಡೆಕ್ ಜೊಕ್ತಿಂ ವಕ್ತಾಂ ಸೊದುನ್ ಕಾಡುಂಕ್ ಂI ಖಂಡಿತ್ ವಿಶೇಸ್ ರಿತಿನ್ ಉಪ್ಕಾರಾಕ್ ಪಡ್ಲಾಂ. ಇತರ್ ಸಬಾರ್ ಶೆತಾಂನಿ AIಚೊ ವಾಪಾರ್ ಖಂಡಿತ್ ಮೆಚ್ವಾಜೆ ಜಾಲ್ಲೊ. ಭಿರಾಂತ್ ಮ್ಹಳ್ಯಾರ್ ಹೊ ವಾಪಾರ್ ಖಂಯ್ ಪುಣೀ ಮೀತ್ ಮಿರ್ವೊನ್ ವೆತಲೊಗೀ ಮ್ಹಳ್ಳಿ. ಆನಿ ತಶೆಂ ಜಾಯ್ತ್ ತರ್ ಮನ್ಶಾಕ್ ತಾಚೆರ್ ನಿಯಂತ್ರಣ್ ಚುಕ್ತಲೆಂ ಆನಿ ಹ್ಯಾ ದ್ವಾರಿಂ ಮನ್ಶಾಕುಳಾಚೆಂ ನಾಸ್‍ಚ್ ಚಡಿತ್ ಲಾಗಿಂ ಜಾತಲೆಂ ಮ್ಹಣ್ ಸಬಾರಾಂನಿ ಉಚಾರ್‍ಲ್ಲೆಂ ಆಸಾ.

ಭಾಶೆ ಆನಿ ಸಾಹಿತ್ಯಾ ದಿಶಿಂ AIಚೊ ವಾಪಾರ್ ಕಸಲೊ ಆನಿ ಕಸಲಿ ಸಾಧ್ಯತಾ ಆಸಾ? AI ದ್ವಾರಿಂ ಭಾಶೆಕ್ ಖಂಡಿತ್ ಚಡಿತ್ ಲಾಭ್ ಆಸಾ. ಆಜ್ AI ವಾಪಾರುನ್ ನವಿಚ್ ಭಾಸ್ ಶಿಕೊಂಕ್ ಸಾಧ್ಯ್ ಆಸಾ. ಹಾಂಗಾ ಫಕತ್ ಕಾಂಯ್ ಥೊಡೆಂ ಬರಪ್ ನ್ಹಂಯ್ ಆಸ್ತಾಂ AI ಸಂಗಿಂ ಸಂವಾದ್ ಕರ್ಚೆ ಸಂಗಿಂ ಉಚ್ಛಾರ್, ವ್ಯಾಕರಣ್ ಆನಿ ಸಂಭಾಷಣ್ ಶಿಕ್ಚೆಂಯೀ ಸಾಧ್ಯ್ ಜಾಲಾಂ ಆನಿ ಹಾಚೊ ವಾಪಾರ್ ಸಬಾರ್ ಲೋಕ್ ಕರ್ನ್ ಆಸಾ. ಸಾಹಿತ್ಯಾಚ್ಯಾ ಮಾಳಾರ್‍ಯೀ AI ದ್ವಾರಿಂ ಸಾಹಿತ್ಯ್ ಚಡಿತ್ ಲೊಕಾಕ್ ಪಾವಂವ್ಚೆಂ, ಭಾಶಾಂತರ್ ಕರ್ಚೆಂ, ಆನಿ ಡಿಜಿಟಲ್ ರುಪಾರ್ ಪುಂಜಾವ್ನ್ ದವರ್ಚೆಂ ಸರ್ವ್ ಆಜ್ ಸಾಧ್ಯ್ ಆಸಾ.

ಆಜ್ AI ಸರ್ವ್ ವಿಭಾಗಾಂನಿ ಆನಿ ವರ್ತುಲಾಂನಿ ಘುಸ್ಲಾಂ ಆಸೊನ್, ಕೊಣೆಂಯೀ ಹೆಂ ನೆಗಾರುಂಕ್ ವಾ ಆಪುಣ್ ಹಾಚೊ ವಾಪಾರ್ ಕರಿನಾ ಮ್ಹಣ್ ಸಾಂಗುಂಕ್ ಸಾಧ್ಯ್ ನಾ. ವ್ಯಕ್ತಿಗತ್ ಕೋಣ್ ತರೀ ಆಪುಣ್ ಹಾಚೊ ವಾಪಾರ್ ಖಂಡಿತ್ ಕರಿನಾ ಮ್ಹಣ್ ಬಸಾತ್ ತರೀ, AI ಲಾಭ್ ತಾಕಾ/ತಿಕಾ ಪ್ರತ್ಯಕ್ಷ್ ವಾ ಪರೋಕ್ಷ್ ರಿತಿಂ ಖಂಡಿತ್ ಜಾತಾ. ತಶೆಂ ಆಸ್ತಾಂ, ಮುಕ್ಲೆ ದೀಸ್ ಆನಿಕೀ ಚಡಿತ್ ಸಂಕೀರ್ಣ್ ಜಾಂವ್ಚ್ಯಾಂತ್ ನವಾಲ್ ನಾ. ಪುಣ್ AI ವಯ್ರ್ ಮನ್ಶಾಚೆಂ ಲಗಾಮ್ ಚುಕಾನಾತ್‍ಲ್ಲ್ಯೆಬರಿ ವಾಟ್ ಸೊದ್ಚೆಂ ಆಯ್ಚ್ಯಾ ಸಂದರ್ಭಿಂ ಖಂಡಿತ್ ಮಹತ್ವಾಚೆಂ ಜಾಲಾಂ.
ಹೊ ಅಂಕೊ

ಹ್ಯಾ ಅಂಕ್ಯಾಚಿ ವಿಶೇಶತಾ ಮ್ಹಳ್ಯಾರ್ ಪಯ್ಲೆ ಪಾವ್ಟಿಂ ISSN ನಂಬರ್ ಘೆವ್ನ್ ಹೊ ಅಂಕೊ ಭಾಯ್ರ್ ಯೆತಾ. ಹಾಚೆ ದ್ವಾರಿಂ ಸಂಸಾರ್‍ಭರ್ ‘ಅಮರ್ ಕೊಂಕ್ಣಿ’ ಜರ್ನಲಾಕೀ ಏಕ್ ಡಿಜಿಟಲ್ ಸ್ಥಾನ್‍ಮಾನ್ ಫಾವೊ ಜಾಲಾಂ ಮ್ಹಳ್ಳೆಂ ನಕ್ಕಿ ಜಾತಾ. ಲೇಖನಾಂಕ್ DOI ನಂಬರ್ ಪ್ರಾಪ್ತ್ ಕರ್ನ್ ಆಮಿ ಎದೊಳ್‍ಚ್ ಡಿಜಿಟಲ್ ಸ್ಥಾನ್‍ಮಾನ್ ಆಪ್ಣಾಯ್ಲಾಂ. ಪುಣ್ ಎಕಾ ಜರ್ನಲಾಕ್ ಹೆಂ ವಿಶೇಸ್ ಸ್ಥಾನ್ ಲಾಬ್ತಾನಾ ಖಂಡಿತ್ ಸಂತೊಸ್ ಜಾತಾ. ಅಶೆಂ ಕೊಂಕ್ಣೆಚ್ಯಾ ಹ್ಯಾ ವಿಶಿಷ್ಟ್ ಸಂಸೊಧ್ ಪತ್ರಾಕ್ ಅನಿಕೀ ಚಡಿತ್ ಬಳ್ವಂತ್ ಕರ್ಚಿ ಜವಾಬ್ದಾರಿ ಆಮ್ಕಾಂ ಆಸಾ.

ಕೊಂಕ್ಣೆಚೊ ವರಕವಿ ಮ್ಹಣ್‍ಂಚ್ ನಾಂವಾಡ್‍ಲ್ಲೊ ಲುವಿಸ್ ಮಸ್ಕರೇನ್ಹÀಸ್ (ಲುಮ) ಕೊಂಕ್ಣಿ ಸಾಹಿತ್ಯಾಕ್ ತಾಚ್ಯಾ ಸಾಹಿತ್ಯಾ ದ್ವಾರಿಂ ಆನಿಕೀ ಚಡಿತ್ ವಳ್ಕಿಚೊ ಜಾಯ್ಜಯ್ ಮ್ಹಳ್ಳ್ಯಾ ಉದ್ದೇಶಾನ್ ಹ್ಯಾ ಅಂಕ್ಯಾಂತ್ ತಾಚ್ಯಾ ಸಾಹಿತ್ಯ್ ಆನಿ ಪತ್ರಿಕೋದ್ಯಮಾ ವಿಶಿಂ ಆಟಾಪ್‍ಲ್ಲಿಂ ಚಾರ್ ಲೇಖನಾಂ ಆಸಾತ್. ಲುಮ ನಿಜಾಕೀ ಏಕ್ ವಿಶೇಸ್ ತಾಲೆಂತಾಂಚೊ ಕ್ರಿಯಾಶೀಲ್ ಬರವ್ಪಿ ಜಾವ್ನಾಸ್‍ಲ್ಲೊ. ತೊ ಕಸೊ ಏಕ್ ಪತ್ರಿಕೋದ್ಯಮಿಗೀ, ತಿತ್ಲೊಚ್ ಸಂಯ್ಬಾನ್ ಕವಿ ಆನಿ ನಾಟಕಿಸ್ತ್. ತಾಚೊ ‘ಅಬ್ರಾಂವ್ಚೆಂ ಯಜ್ಞ್‍ದಾನ್’ ಗಿತಾಂ ನಾಟಕ್ ಸಾಹಿತ್ಯಿಕ್ ದಿಷ್ಟಿನ್ ಖಂಡಿತ್ ಏಕ್ ಅವ್ವಲ್ ಕೃತಿ. ಹಾಂಗಾಚ್ಯಾ ಲೇಖನಾಂನಿ, ತ್ಯೆ ಕೃತಿಯೆರ್ ಖೊಲಾಯೆನ್ ಕೆಲ್ಲೊ ವಿಮರ್ಸೊ ವಾಚ್ಯೆತ್. ಹಾಂಗಾ ಸಮ್ಜೊಂಚೊ ಏಕ್ ಮುಖೆಲ್ ವಿಚಾರ್ ಕಸಲೊಗೀ ಮ್ಹಳ್ಯಾರ್, ಸಾಹಿತ್ಯ್ ಲುಮಕ್ ನ್ಹಯ್ ಫಕತ್ ಏಕ್ ಅಭಿವ್ಯಕ್ತಿ, ತಿ ಹೆರಾಂಕ್ ಶಿಕ್ಷಿತ್ ಕರ್ಚಿ ಏಕ್ ಪ್ರಕ್ರಿಯಾಯೀ ಜಾವ್ನಾಸ್‍ಲ್ಲಿ. ಪತ್ರ್‍ಕಾರ್ ಜಾವ್ನ್‍ಯೀ ಲುಮನ್ ಹೆಂಚ್ ಕೆಲೆಂ. ಚಡಿತ್ ಬರಪ್ ನಾತ್‍ಲ್ಲ್ಯಾ ತಾಚ್ಯಾ ಕಾಳಾರ್ ಸಾದ್ಯಾ ಪುಣ್ ಕ್ರಿಯಾಳ್ ಬರ್ಪಾಂ ದ್ವಾರಿಂ ತಾಣೆಂ ಲೊಕಾಕ್ ಶಿಕ್ಷಿತ್ ಕರ್ಚೆಂ ಪ್ರೇತನ್ ಕೆಲೆಂ. ಕೊಂಕ್ಣೆಚೆಂ ಪ್ರಥಮ್ ಪತ್ರ್ ‘ಕೊಂಕ್ಣಿ ದಿರ್ವೆಂ’ ಫಕತ್ ಪಯ್ಲೆಂ ಪತ್ರ್ ಮಾತ್ರ್ ನ್ಹಯ್, ಬಗಾರ್ ಕೊಂಕ್ಣೆಚ್ಯಾ ಸಂದರ್ಭಿಂ ಏಕ್ ವೃತ್ತಿಪರ್ ಆನಿ ಸಂಪೂರ್ಣ್ ಪತ್ರ್ ಜಾವ್ನ್ ರೂಪಿತ್ ಕರುಂಕ್ ತಾಣೆಂ ಮ್ಹಿನತ್ ಕಾಡ್ಲಿ. ಆಜ್‍ಯೀ, ತೆ ಅಂಕೆ ವಾಚ್ತಾನಾ, ತಾಂತ್ಲಿ ಕೊಂಕ್ಣಿ ಭಾಸ್ ಆನಿ ಸಾದಾರ್ ಕೆಲ್ಲೆ ವಿಷಯ್ ಖಂಡಿತ್ ಕೊಂಕ್ಣೆಚಿ ಗಿರೇಸ್ತ್‍ಕಾಯ್ ಕಿತ್ಲಿ ಮ್ಹಳ್ಳಿ ಜಾಹೀರ್ ಕರ್ತಾತ್.

ಸಾಹಿತ್ಯ್ ಆನಿ ಪತ್ರಿಕೋದ್ಯಮಾಕ್ ಖಂಡಿತ್ ತಾಂಚೊಚ್ ಮ್ಹಳ್ಳೊ ಸುರೂಪ್ ಆನಿ ಉದ್ದೇಶ್ ಆಸಾ. ಸಾಹಿತ್ಯ್ ಫಕತ್ ಎಕ್ಲ್ಯಾಚಿ ಅಭಿವ್ಯಕ್ತಿ ಮ್ಹಣುಂಕ್ ಜಾಯ್ನಾ. ಸಾಹಿತ್ಯ್ ಉಬ್ಜಾತಾ ಎಕಾ ಪ್ರತ್ಯೇಕ್ ವರ್ತುಲ್ (context) ಆನಿ ಪಾಠ್‍ಥಳಾರ್. ಅಶೆಂ ಆಸ್ತಾಂ ಸಾಹಿತ್ಯಾಚೆಂ ವರ್ತುಲ್, ಸಾಹಿತಿ ತಿತ್ಲೆಂಚ್ ಗರ್ಜೆಚೆಂ. ಸಾಹಿತ್ಯಾ ದ್ವಾರಿಂ ಸರ್ವ್ ಬರೆಂಚ್ ಜಾಯ್ಜೆ ಮ್ಹಣ್ ನಾ. ಪೆÇ್ರಪಗಾಂಡಾ ಸಾಹಿತ್ಯ್ ಖಂಡಿತ್ ಸಮಾಜೆಕ್ ಮಾರೆಕಾರ್. ಥೊಡೆ ಪಾವ್ಟಿಂ ರಾಷ್ಟ್ರ್‌ವಾದ್ ಮ್ಹಣ್ ವೊಲಾಯಿಲ್ಲೆಂ ಸಾಹಿತ್ಯ್ ಕ್ರಮೇಣ್ ಹೆರ್ ರಾಷ್ಟ್ರಾಂಚ್ಯಾ ನಾಸಾಕ್ ಕಾರಣ್ ಜಾಯ್ತ್. ದಾಖ್ಲ್ಯಾಕ್ ಇಸ್ರಾಯೆಲಾಚೊ ರಾಷ್ಟ್ರ್‍ಕವಿ ಹಯೀಮ್ ನಹಮಾನ್ ಬಿಯಾಲಿಕ್. ತಾಣೆಂ ಜುದೆವ್ ಲೊಕಾಕ್ ಸಂಗ್ರಾಮ್ ಕರ್ನ್ ರಾಷ್ಟ್ರ್ ಬಾಂದ್ಚ್ಯಾಕ್ ಆಪ್ಲ್ಯಾ ಕವಿತೆಂನಿ ಆನಿ ಕಾಣಿಯಾಂನಿ ಉತ್ತೇಜನ್ ದಿಲೆಂ (Harari, 2024). ತೆಂ ಉತ್ತೇಜನ್ ಆನಿ ಸ್ಪೂರ್ತಿ ಆಜ್ ಖಂಯ್ ಪಾವ್ಲ್ಯಾ ಮ್ಹಳ್ಳೆಂ ಸಂಸಾರ್ ಪಳೆವ್ನ್ ಆಸಾ. ಇಸ್ರಾಯೆಲಾನ್ ಕರ್ಚ್ಯಾ ಸರ್ವ್ ಕರ್ತುಬಾಂಕ್ ಬಿಯಾಲಿಕ್ ಕಾರಣ್ ಮ್ಹಳ್ಳೆಂ ವಾಕ್ಮೂಲ್ ಹೆಂ ನ್ಹಯ್. ಪುಣ್ ಆಜ್ ತೊ ಇಸ್ರಾಯೆಲಾಚೊ ರಾಷ್ಟ್ರ್‍ಕವಿ ಆನಿ ತಾಚಿಂ ಕವಿತಾ ಭುರ್ಗಿಂ ಶಿಕ್ತಾತ್ ತರ್, ಆಪ್ಲ್ಯಾ ರಾಷ್ಟ್ರಾನ್ ಆದಾರ್ಚ್ಯಾ ಸರ್ವ್ ಕರ್ಮಿ ಕಾಮಾಂಕ್ ಎಕಾ ರಿತಿಚೊ ಸಹಮತ್ ಲೊಕಾ ಥಂಯ್ ಉದೆತಾ ತರ್, ಬಿಯಾಲಿಕ್ ತಸಲ್ಯಾಂಚ್ಯಾ ಸಾಹಿತ್ಯಾಚೊ ಮಾರೆಕಾರ್ ಪ್ರಭಾವ್ ಹಾಂತುಂ ಆಸಾ ಮ್ಹಳ್ಳೆಂ ಕೊಣೆಂಯೀ ನೆಗಾರುಂಕ್ ಜಾಯ್ನಾ.

ಹ್ಯೆ ದಿಷ್ಟಿನ್ ಪಳೆತಾನಾ, ಲುಮಚೆಂ ಸಾಹಿತ್ಯ್ ಆನಿ ತಾಚ್ಯಾ ಪತ್ರಿಕೋದ್ಯಮಾಕ್ ಕೊಂಕ್ಣಿ ಲೊಕಾನ್ ಪರತ್ ಏಕ್ ಪಾವ್ಟಿಂ ಭೆಟ್ ದಿಂವ್ಚೆಂ ಅಧಿಕ್ ಗರ್ಜ್ ಮ್ಹಣ್ ದಿಸ್ತಾ. ತಾಚ್ಯಾ ಸಾಹಿತಿಕ್ ಆನಿ ಪತ್ರಿಕೋದ್ಯಮಿ ವರ್ತುಲಾಕ್ ಸಹಜ್ ಜಾಲ್ಲಿ ಬೋವ್ ವ್ಹಡ್ ಜವಾಬ್ದಾರೆಚಿ ಲಿಕ್ಣಿ ತಾಚಿ ಜಾವ್ನಾಸ್‍ಲ್ಲಿ. ತಾಣೆಂ ಕೊಂಕ್ಣಿ ಪತ್ರಿಕೋದ್ಯಮಾಕ್ ಘಾಲ್ಲಿ ಬುನ್ಯಾದ್ ಆಜ್ ಮ್ಹಣಾಸರ್, ಸಬಾರ್ ಆಡ್ಕಳಿ ಮಧೆಂಯೀ, ಸಾಧಾರಣ್ ಘಟ್ ಉರ್ಲ್ಯಾ. ಹ್ಯೆ ವಿಶಿಂ ಫಾ. ಫ್ರಾನ್ಸಿಸ್ ರೊಡ್ರಿಗಾಸಾಚೆಂ ಲೇಖನ್ ಚಡಿತ್ ಉಜ್ವಾಡ್ ಫಾಂಕಯ್ತಾ. ತಾಚಿ ಸಾಹಿತಿಕ್ ವೃತ್ತಿಪರತಾಯ್, ಜಿ ಹ್ಯಾ ಅಂಕ್ಯಾಚ್ಯಾ ಮೆಲ್ವಿನ್ ರೊಡ್ರಿಗಸಾಚ್ಯಾ ಲೇಖನಾಂತ್ ಪ್ರಸ್ತುತ್ ಕೆಲ್ಯಾ ತಿ, ನಿಜಾಕೀ ಹರ್ ಏಕ್ ಕೊಂಕ್ಣಿ ಸಾಹಿತಿಕ್ ಸ್ಪೂರ್ತಿ ಮಾತ್ರ್ ನ್ಹಯ್ ಏಕ್ ಪಠ್ಯ್ ಸಯ್ತ್. ಹೆಂ ನ್ಹಯ್ ಆಸ್ತಾಂ, ಏಕ್ ನಾಟಕಿಸ್ತ್ ಜಾವ್ನ್ ಲುಮಚೊ ಗಿತಾಂ ನಾಟಕ್,

ಫಾ. ಆಲ್ವಿನ್ ಸೆರಾವೊನ್ ಸಾಂಗ್ಚ್ಯೆಬರಿ, ಕಾಂಯ್ ಥೊಡಿಂ ಸವಾಲಾಂ ಉಟಯ್ತಾ. ಡೊಲ್ಫಿ ಕಾಸ್ಸಿಯಾಚೆಂ ಲೇಖನ್ ಲುಮಚ್ಯಾ ಜಿಣ್ಯೆಚೆರ್ ನಿಷ್ಪಕ್ಷ್‍ಪಣಿಂ ನದರ್ ಘಾಲ್ತಾ.

ಹಾಚೆ ಮಧೆಂ ಬಾಯ್ ಪ್ರೀತಾ ಲಿನೆಟ್ ಹಿಚೆಂ ಕಥೊಲಿಕ್ ಲಗ್ನಾವಿಶಿಂ ಲಿಖ್‍ಲ್ಲೆಂ ಸಂಸೊಧ್ ಲೇಖನ್, ಕೊಂಕ್ಣಿ ಲೊಕಾಚಿಂ ಲಗ್ನಾಂ ಆನಿ ಲಗ್ನಾ ಸಾಹಿತ್ಯಾ ವಿಶಿಂ ‘ಅಮರ್ ಕೊಂಕಣಿ’ ಜರ್ನಾಲಾರ್ ಪ್ರಕಟ್ ಜಾವ್ನ್‍ಂಚ್ ಆಸ್ಚ್ಯಾ ಲೇಖನಾಂಕ್ ಆನ್ಯೇಕ್ ಮೆಳಪ್. ಮುಕ್ಲ್ಯಾ ದಿಸಾಂನಿ ‘ಅಮರ್ ಕೊಂಕಣಿ’ ಚಡಿತ್ ಸಂಸೊಧ್ ಮೊಗಿಂಕ್ ನ್ಹಯ್ ಆಸ್ತಾಂ ಕೊಂಕ್ಣಿ ಭಾಸ್, ಸಾಹಿತ್ಯ್ ಆನಿ ಸಂಸ್ಕೃತಿಚೆರ್ ಉರ್ಬಾ ಆಸ್ಚ್ಯಾ ಸರ್ವಾಂಕ್ ಪಾವೊಂವ್ಚೆಂ, ಮಾತ್ರ್ ನ್ಹಯ್ ಸಂಸೊಧಾಚ್ಯಾ ಮಾಳಾರ್ ಆನಿಕೀ ಉಂಚಾಯೆಕ್ ಚಡಂವ್ಚೆಂ ಆಮ್ಚೆಂ ಪ್ರೇತನ್ ಜ್ಯಾರಿ ಆಸ್ತಲೆಂ.

ಆಧಾರಾವಳ್

Elon Musk unveils Tesla cybercab self-driving robotaxi. (2024). The Guardian. https://www.theguardian.com/technology/2024/oct/11/elon-musk-unveils-tesla-cybercab-self-driving-robotaxi

Harari, Y. N. (2024). Nexus: A brief history of information networks from the stone age to AI. Fern Press.

Kapoor, S. (2024, October 9). Nobel physics winner’s big AI worry: These things could eventually. NDTV World. https://www.ndtv.com/world-news/what-the-nobel-prize-for-physics-co-winner-fears-6744406