‘ಅಮರ್ ಕೊಂಕಣಿ’ ಷಣ್ಮಾಸಿಕ್ ಸರ್ವ್ ಕೊಂಕ್ಣಿ ಬೊಲಿ ಆನಿ ಸಂಸ್ಕೃತೆಂಚೆಂ ಪತ್ರ್

ಬಾ| ದೊ| ಮೆಲ್ವಿನ್ ಪಿಂಟೊ, ಜೆ.ಸ.

Scopus Author ID: 57189887469 
https://orcid.org/0000-0001-8797-1288

ಹೊ ಅಂಕೊ ಮಾತ್ಸೊ ತಡವ್ ಕರ್ನ್ ತುಮ್ಚೆ ಹಾತಿಂ ಪಾವ್ತಾ. ತುಮಿ   ಸಮ್ಜಾತೆಲ್ಯಾತ್ ಮ್ಹಣ್ ಪಾತ್ಯೆತಾಂ. ಕೊರೋನಾ ಆಜೂನ್ ಸಂಪೊಂಕ್ ನಾ. ತಶೆಂ ಸರ್ವ್ ಕಾಮಾಂಚೆರ್ ತಾಚೊ ಪರಿಣಾಮ್ ಪಡ್ಲಾ ಮ್ಹಳ್ಳೆಂ ಎದೊಳ್‍ಚ್ ಜಾಹೀರ್ ಜಾಲ್ಲೊ ವಿಷಯ್. ಸಂಪಾದನ್ ಆನಿ ಪ್ರಕಾಶನಾಚೆರ್‍ಯೀ ತಾಚೊ ಪ್ರಭಾವ್ ತಿತ್ಲೊಚ್ ಪಡ್ಲಾ ಮ್ಹಳ್ಳೆಂ ಪಳೆವ್ಯೆತ್. ಕೊಂಕ್ಣೆಚ್ಯಾ ಸಂದರ್ಭಿಂ ಕೊರೊನಾ ಉಪ್ರಾಂತ್ ನೆಮಾಳಿಂ ಉಸ್ವಾಸ್ ಕಾಡುಂಕ್ ಕಷ್ಟೊನ್ ಆಸಾತ್.

ತಶೆಂ ಮ್ಹಣ್ ‘ಅಮರ್ ಕೊಂಕಣಿ’ಚೊ ಸಮಸ್ಸೊ ತಸಲೊ ನ್ಹಂಯ್. ಹಾಂಗಾಸರ್ ಉತ್ತೀಮ್ ಸಂಶೋಧಾನಾತ್ಮಕ್ ಬರ್ಪಾಂ ತಯಾರ್ ಕರ್ಚಿಂ, ಯಾ ಹಾಡಂವ್ಚೆಂ ಏಕ್ ವ್ಹಡ್ ಸವಾಲ್ ಆಮ್ಕಾಂ ಆಸಾ. ಪರಿಗತ್ ಖಂಡಿತ್ ಬರ್ಯಾ ದಿಶೆನ್ ಚಲೊನ್ ಆಸಾ ಮ್ಹಳ್ಳೊ ವಿಚಾರ್ ದಾದೊಸ್ಕಾಯೆಚೊ.

ಹ್ಯಾ ಅಂಕ್ಯಾಂತ್ ಮೌಲ್ಯ್‍ಭರಿತ್ ಚಾರ್ ಸಂಶೋಧಾನಾತ್ಮಕ್ ಲೇಕನಾಂ ಆಮಿ ಫಾಯ್ಸ್ ಕರ್ತಾಂವ್. ‘ಅಮರ್ ಕೊಂಕಣಿ’ ಷಣ್ಮಾಸಿಕ್ ಸರ್ವ್ ಕೊಂಕ್ಣಿ ಬೊಲಿ ಆನಿ ಸಂಸ್ಕೃತೆಂಚೆಂ ಪತ್ರ್. ತ್ಯಾ ದಿಶೆನ್ ಸಾರಸ್ವತ್ ಬ್ರಾಹ್ಯಣಾಂಚ್ಯಾ ಲೋಕ್‍ವೇದಾ ವಿಶಿಂ ಏಕ್ ಲೇಕನ್ ಹ್ಯಾ ಅಂಕ್ಯಾಂತ್ ಆಸಾ. ಸಾರಸ್ವತ್ ಬ್ರಾಹ್ಮಣಾಂಚ್ಯಾ ಸಂಸ್ಕೃತೆಂತ್ ಗಿರೇಸ್ತ್ ಲೋಕ್‍ವೇದ್ ಆಸಾ ತೆಂ ಹ್ಯಾ ಲೇಕನಾ ದ್ವಾರಿಂ ಆಮಿ ಸಮ್ಜವ್ಯೆತ್.

ಕೊಂಕ್ಣಿ ಭಾಶೆ ವಿಶಿಂ ಆನಿ ಆಮಿ ಕಶಿ ತಿ ಚಡಿತ್ ವಾಪಾರಾಕ್ ಯೋಗ್ಯ್ ಕರ್ಯೆತ್ ಹ್ಯಾ ವಿಶಿಂ ಚಡ್ ಆನಿ ಚಡ್ ಆಟವ್ ಗರ್ಜೆಚೊ. ಹ್ಯಾ ಸಂದರ್ಭಿಂ `ಕೊಂಕ್ಣಿ ಕಾಲ್, ಆಜ್ ಆನಿ ಫಾಲ್ಯಾಂ: ಏಕ್ ಚಿಂತಪ್’ ಲೇಕನ್ ಕಾಂಯ್ ಥೊಡೊ ದಿಶ್ಟಾವೊ ದೀಂವ್ಕ್ ಸಕಾತ್.

ಮೊಂತಿ ಫೆಸ್ತ್ ಆಮ್ಕಾಂ ಪಡ್ಲಾ ಕರಾವಳೆಚ್ಯಾ ಕ್ರಿಸ್ತಾವಾಂಕ್ ಏಕ್ ಪ್ರಮುಕ್ ಫೆಸ್ತ್. ಹ್ಯಾ ಫೆಸ್ತಾಕ್ ತಾಚಿಚ್ ಮ್ಹಳ್ಳಿ ಚರಿತ್ರಾ ಆಸಾ ತರೀ ತ್ಯಾ ಚರಿತ್ರೆ ವಿಶಿಂ, ವಿಶೇಸ್ ಕರ್ನ್ ಮೊಂತಿ ಫೆಸ್ತಾಚ್ಯಾ ಸುರ್ವಾತೆ ವಿಶಿಂ, ಸ್ಪಷ್ಟತಾ ದಿಸಾನಾ. ಹ್ಯಾ ಅಂಕ್ಯಾಂತ್ ಫಾಯ್ಸ್ ಜಾಲ್ಲೆಂ ಲೇಕನ್ `ಮೊಂತಿ ಫೆಸ್ತಾಚ್ಯಾ ಭೊಂವಾರಿಂ..’ ಹ್ಯಾ ಫೆಸ್ತಾಚ್ಯಾ ಚರಿತ್ರೆ ವಿಶಿಂ ಚಡಿತ್ ಉಜ್ವಾಡ್ ಫಾಂಕಂವ್ಕ್ ಸಕ್ತೆಲೆಂ ಮಾತ್ರ್ ನ್ಹಂಯ್ ಜಾಣ್ಕಾರ್ಯಾಂಕ್ ಆನಿಕೀ ಚಡಿತ್ ಚರ್ಚಾ ಕರುಂಕ್ ಪ್ರೇರಣ್ ದಿತೆಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ.

`ಸಾಯ್ಬಾ ಭೊಗೊಸ್’ ಆನಿ `ವ್ಹಡ್ಲೆಂ ಘರ್’ ಹ್ಯಾ ದೋನ್ ಕಾದಂಬರಿಂಚೊ ತುಲನಾತ್ಮಕ್ ಅಧ್ಯಯನ್‍ಯೀ ಹ್ಯಾ ಅಂಕ್ಯಾಂತ್ ಫಾಯ್ಸ್ ಜಾಲಾ. ಏಕ್ ಮಂಗ್ಳುರಿ ಕಥೊಲಿಕ್ ಬೊಲಿಂತ್ ಆನಿ ದುಸ್ರಿ ಗೊಂಯ್ಚ್ಯಾ ಬೊಲಿಂತ್ ಫಾಯ್ಸ್ ಜಾಲ್ಲಿ ಕಾದಂಬರಿ. ತರಿಕೀ ದೊನೀ ಚಾರಿತ್ರಿಕ್ ವಿಷಯಾಕ್ ಲಗ್ತಿ ಕಾದಂಬರಿ. ಅಸಲೆಂ ಅಧ್ಯಯನ್ ಏಕ್ ಬರಿ ವಾಡಾವಳ್ ಮ್ಹಣ್ ಆಮಿ ಲೆಕ್ತಾಂವ್. ಎಕಾ ಬೊಲಿಂತ್ಲೆಂ ವಾಚಪ್ ಥೊಡೆ ಪಾವ್ಟಿಂ ಹೆರ್ ಬೊಲಿಂತ್ಲ್ಯಾ ಲೊಕಾಕ್ ವಿವಿಧ್ ಕಾರಣಾಂ ನಿಮ್ತಿಂ ಪಾವಾನಾ ಮ್ಹಳ್ಳೆಂ ಆಮ್ಕಾಂ ಕಳಿತ್ ಆಸ್ಚೊಚ್ ವಿಷಯ್. ಪುಣ್ ತಸಲೆಂ ಪ್ರೇತನ್ ಆಮಿ ಕೆಲ್ಯಾರ್ ಮಾತ್ರ್ ಬೊಲಿ ಬೊಲಿ ಮದೆಂ ಚಡಿತ್ ಸಂಬಂಧ್ ಹಾಡುಂಕ್ ಸಾದ್ಯ್. ಮುಕಾರಿಂಯೀ ಅಸಲಿಂ ಲೇಕನಾ ಪ್ರಕಟ್ ಕರ್ಚೆಂ ಪ್ರೇತನ್ `ಅಮರ್ ಕೊಂಕಣಿ’ ಕರ್ತೆಲೆಂ.

ಕೊರೊನಾಚಿ ಇಜಾ ಮಾತ್ಸಿ ಉಣಿ ಜಾಲ್ಯಾ ತರೀ, ಸಂಪೂರ್ಣ್ ಸಂಪ್ತೆಲಿ ಕೆದ್ನಾಂ ಮ್ಹಳ್ಳೆ ವಿಶಿಂ ಆಜೂನ್ ನಕ್ಕಿ ಸಾಂಗುಂಕ್ ಸಾದ್ಯ್ ನಾ. ತರಿಪುಣ್, ಸಾಹಿತ್ಯ್ ಆನಿ ಸಂಸೊದ್ ರಚ್ಣೆಕ್ ಕೊರೊನಾನ್ ತಿತ್ಲೊ ವ್ಹಡ್ಲೊ ಧಖೊ ದೀಂವ್ಕ್ ನಾ. ಚಡಿತ್ ಮೌಲ್ಯಾಧಾರಿತ್ ಬರ್ಪಾಂ ಮುಕಾರಿಂಯೀ ಯೇಂವ್ದಿತ್.