ಕೊಂಕ್ಣಿ ಸಂಸ್ಥ್ಯಾಂತ್ ಸಂಸೊಧಾಚಿಂ ಸಭಾರ್ ಕಾಮಾಂ ಜಾವ್ನ್‍ಂಚ್ ಆಸಾತ್

ಬಾ| ದೊ| ಮೆಲ್ವಿನ್ ಪಿಂಟೊ, ಜೆ.ಸ.

Scopus Author ID: 57189887469 
https://orcid.org/0000-0001-8797-1288

ಕೊರೋನಾ ಆನಿ ಲೋಕ್‍ಡಾವ್ನಾ ನಿಮ್ತಿಂ ಜಾಯ್ ಪುರ್ತೆಂ ಲುಕ್ಸಾಣ್ ಜಾಲಾಂ ಆನಿ ಆಜೂನ್ ಪರಿಗತ್ ವಿಶೇಸ್ ಸುದ್ರೊಂಕ್ ನಾ ಮ್ಹಳ್ಳೆಂ ಸತ್. ತರಿಕೀ ಕೊಂಕ್ಣೆಚ್ಯಾ ಸಂದರ್ಭಿಂ, ಆನಿ ವಿಶೇಸ್ ಕರ್ನ್ ಕೊಂಕ್ಣಿ ಸಾಹಿತ್ಯ್ ಆನಿ ಲಿಕ್ಣೆಚ್ಯಾ ಸಂದರ್ಭಿಂ, ಕೊರೋನಾ ಆನಿ ಲೋಕ್ ಡಾವ್ನ್ ಎಕಾ ರಿತಿಂ ಬೆಸಾಂವಾಚೊ ಕಾಳ್ ಜಾಂವ್ಕ್ ಪಾವ್ಲೊ ಮ್ಹಣ್ ಸಾಂಗ್ಯೆತ್ ಕೊಣ್ಣಾ. ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂನಿ ಕೊಂಕ್ಣೆಂತ್ ವಿವಿಧ್ ಬೊಲಿಂನಿ ಫಾಯ್ಸ್ ಜಾಲ್ಲೆ ಬೂಕ್ ಪಳೆತಾನಾ ಅಸಲೆಂ ಏಕ್ ಚಿಂತಾಪ್ ಉದೆತಾ. ಹಿ ವಾಡಾವಳ್ ಮುಕಾರುನ್‍ಂಚ್ ವಚೊಂದಿ ಮ್ಹಳ್ಳಿ ಆಪೇಕ್ಷಾ ಆಮ್ಚಿ ಜಾವ್ನಾಸಾ.

ಪ್ರಸ್ತುತ್ ‘ಅಮರ್ ಕೊಂಕಣಿ’ ಅಂಕ್ಯಾಂತ್ ತೀನ್ ಉಂಚ್ಲಿಂ ಲೇಕನಾಂ ಆಸಾತ್. ಫಾ. ದೇವದತ್ತ ಕಾಮತ್ ಹಾಣಿಂ ಲಿಕ್‍ಲ್ಲೆಂ ಕೊಂಕಣಿ ಭಾಸ್ ಆನಿ ವ್ಯಾಕರಣಾ ಲಗ್ತಿ ಏಕ್ ಲೇಕನ್, ಲೇಕಕಾಚೊ ಕೊಂಕ್ಣೆ ವಿಶಿಂ ಏಕ್ ನಿರ್ದಿಷ್ಟ್ ವಾದ್ ಪ್ರಸ್ತುತ್ ಕರ್ತಾ. ಕೊಂಕ್ಣೆಕ್ ಏಕ್ ಪ್ರಾಮಾಣಿಕ್ ಲಿಪಿ ಆಜೂನ್ ನಾ ದೆಕುನ್ ಅಸಲೆ ವಿವಿದ್ ಸಂಸೊದಿತ್ ವಾದ್ ಆಮ್ಕಾಂ ಗರ್ಜೆಚೆ. ಹ್ಯಾ ದ್ವಾರಿಂ ಆಮ್ಕಾಂ ವೇದ್ಯ್ ಜಾಂವ್ಚೊ ವಿಷಯ್ ಮ್ಹಳ್ಯಾರ್ ಕೊಂಕ್ಣಿ ಭಾಷೆಚಿ ಗಿರೆಸ್ತ್‍ಕಾಯ್. ಕೊಂಕ್ಣಿ ಭಾಶೆಕ್ ಇತರ್ ಭಾರತೀಯ್ ಆನಿ ಪಾಶ್ಚ್ಯಾತ್ಯ್ ಶ್ರೇಶ್ಟ್ ಭಾಸಾಂ ಸಂಗಿಂ ತುಲನ್ ಕರ್ಯೆತ್ ತೆಂ ಫಾ. ಕಾಮತಾಚ್ಯಾ ಲೇಕನಾ ದ್ವಾರಿಂ ಸಮ್ಜುನ್ ಘೆವ್ಯೆತ್.

ದುಸ್ರೆಂ ಲೇಕನ್ ಮೆಲ್ವಿನ್ ರೊಡ್ರಿಗಸ್ ಹಾಣೆಂ ಲಿಕ್‍ಲ್ಲೆಂ ಕೊಂಕ್ಣಿ ಪತ್ರಿಕೋದ್ಯಮಾ ಲಗ್ತಿ ಲೇಕನ್. ಕೊಂಕ್ಣೆಂತ್ ಏಕ್ ಗಿರೇಸ್ತ್ ಪತ್ರಿಕೋದ್ಯಾಮಾಚಿ ಚರಿತ್ರಾ ಆಸಾ ತರೀ, ಪ್ರಸ್ತುತ್ ಕೊಂಕ್ಣಿ ಪತ್ರಿಕೋದ್ಯಾಮಾಚಿ ಪರಿಗತ್ ತಿತ್ಲಿ ಬರಿ ನಾ ತೆಂ ಲೇಕಕಾನ್ ಉಜಾರ್ ಕರ್ಚೊ ವಾದ್. ತಶೆಂ ಪಳೆಂವ್ಕ್ ಗೆಲ್ಯಾರ್ ಜೆರಾಲ್ ರಿತಿಂ ಹರ್ ಭಾಶೆಂತ್, ಆನಿ ವಿಶೇಸ್ ಕರ್ನ್ ಪ್ರಾದೇಶಿಕ್ ಭಾಸಾಂನಿ, ಪತ್ರಿಕೋದ್ಯಮಾಚಿ ಪರಿಗತ್ ಭಿಗ್ಡೊನ್‍ಂಚ್ ಆಸಾ ತೆಂ ಒಪುನ್ ಘೆಜಯ್. ಹಾಕಾ ಪ್ರಮುಕ್ ಕಾರಣ್ ಡಿಜಿಟಲ್ ಮಾಜ್ಯಾಚೆಂ ಆಗಮನ್. ಆಜ್ ಚಡ್ತಾವ್ ಹರ್ಯೆಕ್ ಸಂಗತ್ ಡಿಜಿಟಲೀಕರಣ್ ಜಾವ್ನ್ ಆಸ್ತಾನಾ, ಪತ್ರಿಕೋದ್ಯಮ್‍ಯೀ ಡಿಜಿಟಲೀಕರಣ್ ಜಾವ್ನ್ ಆಸಾ ಆನಿ ಹರ್ ಮಾದ್ಯಮಾಂತ್ಲೆಂ ಪತ್ರಿಕೋದ್ಯಮ್ ಆಳ್ವೊನ್ ಯೆಂವ್ಚೆಂ ಚಡೊನ್‍ಂಚ್ ಆಸಾ.

ತಿಸ್ರೆಂ ಲೇಕನ್ ಕೊಂಕ್ಣಿ ಬಾಳ್ ಸಾಹಿತ್ಯ್ ಯಾ ಭುರ್ಗ್ಯಾಂ ಸಾಹಿತ್ಯಾ ವಿಶಿಂ ಎಚ್ಚೆಮ್ ಪೆರ್ನಾಲ್ ಹಾಣೆಂ ಲಿಕ್‍ಲ್ಲೆಂ ಲೇಕನ್. ಕೊಂಕ್ಣೆಂತ್ ಎಕಾ ತೆಂಪಾರ್ ಭರ್ಪೂರ್ ಬಾಳ್ ಸಾಹಿತ್ಯ್ ಆನಿ ಬಾಳ್ ಸಾಹಿತ್ಯಾಕ್ ಲಗ್ತಿ ಪತ್ರಾಂಯೀ ಆಸ್‍ಲ್ಲಿಂ ತರೀ, ಕ್ರಮೇಣ್ ತಿಂ ಆಳ್ವೊನ್‍ಂಚ್ ಆಯ್ಲ್ಯಾಂತ್. ಒಟ್ಟಾರೆ ಪತ್ರಾಂಚಿ ಪರಿಗತ್ ಅಸ್ಕತ್ ಆಸ್ತಾನಾ ಬಾಳ್ ಸಾಹಿತ್ಯಾಚೊ ಖಾಯ್ಸ್ ಆಸಾಗೀ ಮ್ಹಳ್ಳೆಂ ಸವಾಲ್ ವಾಜ್ಬಿ. ತರಿಕೀ ಬಾಳ್ ಸಾಹಿತ್ಯಾಚೆಂ ಪೋಷಣ್ ಗರ್ಜೆಚೆಂ ಆನಿ ಆಯ್ಲೆವಾರ್ ಬಾಳ್ ಸಾಹಿತ್ಯಾಕ್ ಸಂಬಂಧಿತ್ ಕಾಂಯ್ ಥೊಡೆ ಬೂಕ್ ಫಾಯ್ಸ್ ಜಾಲ್ಯಾತ್ ತಿ ಗೋಷ್ಟಿ ಸಂತೊಸಾಚಿ.

ಕೊಂಕ್ಣಿ ಸಂಸ್ಥ್ಯಾಂತ್ ಸಂಸೊಧಾಚಿಂ ಸಭಾರ್ ಕಾಮಾಂ ಜಾವ್ನ್‍ಂಚ್ ಆಸಾತ್. ಆನಿಕೀ ಚಡಿತ್ ಸವಾಲಾಂಚಿಂ ಆನಿ ತಿತ್ಲಿಂಚ್ ಗರ್ಜೆಚಿಂ ಸಂಸೊದ್ ಕಾಮಾಂ ಹಾತಿಂ ಧರ್ಚೆಂ ಯೋಜನ್ ಆಮ್ಚೆಂ ಜಾವ್ನಾಸಾ. ಕೊಂಕ್ಣೆಂತ್ ಸಂಸೊದಿಕ್ ವಾವ್ರ್ ಆನಿಕೀ ಚಡಿತ್ ಬಳಾಧಿಕ್ ಕರ್ಚ್ಯಾ ವಾವ್ರಾಂತ್ ಸಂಸೊದ್ ಆಸಕ್ತಿತ್ ಕೊಂಕ್ಣಿ ಲೊಕಾಚೊ ಪಾಟಿಂಬೊ ಆಮಿ ಆಪೇಕ್ಶಿತಾಂವ್.

ಕೊಂಕ್ಣೆಚೆಂ ಬರೆಂ ಜಾಂವ್.