ಕನ್ನಡ್ ಲಿಪಿಯೆಂತ್ ಭುಗ್ರ್ಯಾಂಚೆಂ ಸಾಹಿತ್ಯ್ – ಪ್ರೇತನಾಂ – ಪಂಥಾಹ್ವನಾಂ

ಎಚ್ಚೆಮ್ ಪೆರ್ನಾಲ್

ಸಾರಾಂಶ್

ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚ್ಯಾ 2019ವ್ಯಾ ವರ್ಸಾಚಿ ಭುಗ್ರ್ಯಾಂಚ್ಯಾ ಸಾಹಿತ್ಯಾಚಿ ಪ್ರಶಸ್ತಿ ವಿಜೇತ್ ಶಿಕ್ಷಕ್, ಭುಗ್ರ್ಯಾಂ ಖಾತಿರ್ 25-ಚ್ಯಾಕೀ ಚಡ್ ಬೂಕ್ ಬರಯಿಲ್ಲೊ ಚಂದ್ರಕಾಂತ ಕರದಳ್ಳಿ ಪರ್ಮಾಣೆಂ- `ಆಮ್ಚೆ ಭಂವ್ತಿಚೆಂ ಪರಿಸರ್ ವೇಗಾನ್ ವಾಯ್ಟ್ ಜಾತೆಚ್ ಆಸಾ. ರಾನ್, ರಾನ್ ಜಾವ್ನ್ ಉರೊಂಕ್ ನಾ. ಬಾಂಯೊ ಸುಕ್ಲ್ಯಾತ್. ಝಡಾಂ ಬಾವ್ಲ್ಯಾಂತ್, ಸುಕ್ಣಿಂ ಸರ್ಲ್ಯಾಂತ್. ಅಶೆಂ ಆಸ್ತಾಂ ಹಾಚೆವಿಶಿಂ ಸಮ್ಜಣಿ ದಿಂವ್ಚೆಂ ಭುಗ್ರ್ಯಾಂಚೆಂ ಸಾಹಿತ್ಯ್ ರಚ್ಚೆಂ ಕಶೆಂ? ದುಸ್ರ್ಯಾನ್, ಭುರ್ಗ್ಯಾಂಕ್ ಮ್ಹಣ್ ರಚ್‍ಲ್ಲೆಂ ಸಾಹಿತ್ಯ್ ಆಯ್ಚಿಂ ಭುರ್ಗಿಂ ವಾಚಿನಾಂತ್. ದೆಕುನ್ ಭುಗ್ರ್ಯಾಂಥಂಯ್ ಪಯ್ಲೆಂ ಸಾಹಿತ್ಯಾಚಿ ಬರಿ ರೂಚ್ ರಚಿಜೆ. ಭುಗ್ರ್ಯಾಂಲಾಗಿಂ ವಚೊನ್ ತಾಂಕಾಂ ಆಸಕ್ತ್ ಉಬ್ಜಂವ್ಚೆ ರಿತಿನ್ ಕಾಣಿಯೊ ಸಾಂಗಾಜೆ… (Bhat, 2019). ಚಂದ್ರಕಾಂತ ಕರದಳ್ಳಿನ್ ಕಾನಡಿ ಭುಗ್ರ್ಯಾಂಚ್ಯಾ ಸಾಹಿತ್ಯಾಚ್ಯಾ ಪಾಟ್‍ಥಳಾರ್ ಉಚಾರ್‍ಲ್ಲಿಂ ಹಿಂ ಉತ್ರಾಂ ಕೊಂಕ್ಣೆಚ್ಯಾ ಭುಗ್ರ್ಯಾಂಚ್ಯಾ ಸಾಹಿತ್ಯಾಕ್‍ಯಿ ತಿತ್ಲಿಂಚ್ ಲಾಗು ಜಾತಾತ್.

ಆಯ್ಲೆವಾರ್ ಪರ್ಗಟ್ಲೆಲ್ಯಾ `ರೊಶು, ಬಜ್ಪೆ’ ಹಾಚ್ಯಾ `ಗಿರ್ಬುಜಿ’ ಭುಗ್ರ್ಯಾಂಚ್ಯಾ ಕೊಂಕ್ಣಿ ಕವಿತಾ ಸಂಗ್ರಹಾಕ್, ಕವಿ-ವಿಮರ್ಶಕ್ ಎಚ್ಚೆಮ್ ಪೆರ್ನಾಲಾನ್ ಬರಯಿಲ್ಲ್ಯಾ ಪ್ರಸ್ತಾವನಾಚೆಂ ವಿಸ್ತರಾಯಿಲ್ಲೆಂ ರೂಪ್ ಹೆಂ.