ಕುಡ್ಮಿ, ಗೌಡ್ ಸಾರಸ್ವತ್ ಆನಿ ಕಥೊಲಿಕ್ ಕಾಜಾರಾಂನಿ ಸಮಾನ್ ರಿತಿ ರಿವಾಜಿ: ಏಕ್ ಅಧ್ಯಯನ್

ಮೆಲ್ವಿನ್ ಪಿಂಟೊ

ಸಾರ್ ಸಬ್ದ್: ಕುಡ್ಮಿ, ಗೌಡ್ ಸಾರಸ್ವತ್, ಕಥೊಲಿಕ್ ಕೊಂಕಣಿ, ವೊವ್ಯೊ

ಸಾರಾಂಶ್

ಭಾರತಾಂತ್ ಲಗ್ನಾಬಾಂಧ್ ಮ್ಹಳ್ಯಾರ್ ಫಕತ್ ದಾದ್ಲ್ಯಾ ಆನಿ ಸ್ತ್ರೀಯೆ ಮದ್ಲೊ ಕಾನೂನ್‍ಬದ್ಧ್ ಲೈಂಗಿಕ್ ಎಕ್ವಟ್ ಮಾತ್ರ್ ನ್ಹಯ್, ಬಗಾರ್ ಸಮಾಜೆನ್ ಒಪುನ್ ಘೆತ್‍ಲ್ಲೊ ಏಕ್ ಸಾಮಾಜಿಕ್ ಬಾಂಧ್. ದೆಕುನ್ ಭಾರತಾಂತ್ ಲಗ್ನ್ ದೊಗಾಂ ವೆಕ್ತಿಮಧೆಂ ನ್ಹಯ್, ಕಾಜಾರ್ ಜಾತೆಲ್ಯಾ ದೊಗಾಂ ವ್ಯಕ್ತಿಚ್ಯಾ ಕುಟ್ಮಾಂಚೆಂ ಮಿಲನ್ ಅಶೆಂ ಲೆಕ್ತಾತ್. ಹಾಕಾ ಲಾಗೊನ್ ಕಾಜಾರಾ ಕಾರ್ಯಾಂತ್ ಸಯ್ರಿಂ, ಸೆಜಾರ್ ಆನಿ ಸಮಾಜ್‍ಚ್ ಮೆತೆರ್ ಜಾತಾ.

ಸಾಮಾನ್ಯ್ ಜಾವ್ನ್ ಎಕಾ ಧರ್ಮಾಚ್ಯಾ ವಿವಿದ್ ಜಾತಿಂ ಮಧೆಂ ಕಾಜಾರಾ ಕಾರ್ಯಾಚ್ಯಾ ರಿತಿ-ರಿವಾಜಿಂನಿ ಚಡ್ ಫರಕ್ ದಿಸಾನಾ ತರೀ ವಿವಿಧ್ ಧರ್ಮಾಂ ಮಧೆಂ ಸಮಾನ್ ರಿತಿ ರಿವಾಜಿ ಆಸ್ಚ್ಯೊ ಅಪ್ರೂಬ್. ಪುಣ್ ಕುಡ್ಮಿ ಆನಿ ಜಿಎಸ್‍ಬಿ ಲೋಕ್ ಹಿಂದು ಜಾವ್ನಾಸ್ಲ್ಯಾರೀ ಕ್ರಿಸ್ತಾಂವಾಂಚ್ಯಾ ಕಾಜಾರಾಂನಿ ಪಳೆಂವ್ಚ್ಯೊ ಜಾಯ್ತ್ಯೊ ರಿವಾಜಿ ತಾಂಚೆ ಥಂಯ್ ಪಳೆಂವ್ಕ್ ಮೆಳ್ತಾತ್. ಮೂಳ್ ಉಸ್ತುಂಕ್ ಗೆಲ್ಯಾರ್ ಹ್ಯೊ ಸರ್ವ್ ರಿವಾಜಿ ಕ್ರಿಸ್ತಾಂವಾಂನಿ ಆಪ್ಲ್ಯಾ ಹಿಂದು ಭಾಂವಾಂಥಾವ್ನ್ ಘೆತ್ಲ್ಯಾತ್ ತೆಂ ರುಜು ಜಾತಾ. ಹ್ಯಾ ಲೇಖನಾಂತ್ ಕುಡ್ಮಿ, ಗೌಡ್ ಸಾರಸ್ವತ್ ಆನಿ ಕಥೊಲಿಕ್ ಕಾಜಾರಾಂನಿ ಆಸ್ಚ್ಯಾ ಸಮಾನ್ ರಿತಿ ರಿವಾಜಿಂಚೆಂ ತುಲನಾತ್ಮಕ್ ಅಧ್ಯಯನ್ ಕೆಲಾಂ.