ಭಾಶೆ ವಾಡಾವಳೆಂತ್ ಸಂಸೊದಾಚಿ ಗರ್ಜ್

ಬಾ| ದೊ| ಮೆಲ್ವಿನ್ ಪಿಂಟೊ, ಜೆ.ಸ.

Scopus Author ID: 57189887469 
https://orcid.org/0000-0001-8797-1288

ಎಕ್ಯೆ ಭಾಶೆಚ್ಯೆ ವಾಡಾವಳೆಂತ್ ಸಂಸೊಧಾಚೊ ಮಹತ್ವ್ ಆನಿ ಪಾತ್ರಾ ವಿಶಿಂ ಸಬಾರ್ ಪಾವ್ಟಿಂ ಸವಾಲಾಂ ಉಬ್ಜಾಲ್ಲಿಂ ಆಸಾತ್. ಎಕ್ಯೆ ಭಾಶೆಚ್ಯಾ ವಾಡಾವಳೆಕ್ ಪ್ರಮುಕ್ ಜಾವ್ನ್ ತಿ ಭಾಸ್ ಉಲೊಂವ್ಚೆ ಮನಿಸ್, ತ್ಯೆ ಭಾಶೆಂತ್ ಸಾಹಿತ್ಯ್ ರಚ್ಚೆ ವ್ಯಕ್ತಿ ಆನಿ ತ್ಯೆ ಭಾಶೆಚ್ಯಾ ವಿವಿಧ್ ಸ್ತರಾಂಚೆರ್ ಸಂಸೊಧ್ ಕರ್ಚೆ ಸಂಸೊಧ್‍ಕಾರ್ ಆಸ್ಲ್ಯಾರ್ ಮಾತ್ರ್ ತಿ ಭಾಸ್ ಜಿವಾಳ್ ಉರ್ತಾ ಮ್ಹಣ್ ಸಾಂಗ್ಯೆತ್. ಹ್ಯಾ ತೀನ್ ಆಯಾಮಾಂಕ್ ಆನ್ಯೇಕ್ ಆಧುನಿಕ್ ಆಯಾಮ್ ಆಮಿ ಸೆರ್ಸಿಜೆ ಪಡ್ತಾ: ಆಜ್ ಏಕ್ ಭಾಸ್ ಡಿಜಿಟಲ್ ಮಾದ್ಯಮಾಂತ್‍ಯೀ ಆಸಾಜೆ ಜಾಲ್ಲಿ ಅನಿವಾರ್ಯತಾ ಆಸಾ ಆನಿ ಅಶೆಂ ಆಸ್ಲ್ಯಾರ್ ಮಾತ್ರ್ ತಿ ಜಿವಾಳ್ ಉರೊಂಕ್ ಸಾಧ್ಯ್. ಆಯ್ಚೆ ಪರಿಸ್ಥಿತೆಂತ್ ಇಂಗ್ಲಿಷಾ ತಸಲಿ ಭಾಸ್ ಸಬಾರ್ ಇತರ್ ಲ್ಹಾನ್ ಲ್ಹಾನ್ ಭಾಸಾಂಕ್ ಗಿಳುನ್ ಆಸಾ ಮ್ಹಳ್ಳೆಂ ಸರ್ವಾಂಕ್ ಕಳಿತ್ ಆಸೊಂಕ್ ಜಾಯ್ ಜಾಲ್ಲಿ ಸಂಗತ್. ಇತರ್ ಭಾಶೆಂಕ್ ನಾತ್‍ಲ್ಲಿ ಅನ್ಕೂಲತಾ ಇಂಗ್ಲಿಶಾ ತಸಲ್ಯಾ ಥೊಡ್ಯಾಚ್ ಭಾಸಾಂಕ್ ಆಸಾ ಮ್ಹಳ್ಳೆಂಯೀ ಸತ್.

ಮನ್ಶಾ ಸಂತತ್ ಹ್ಯೆ ಭುಮಿರ್ ಜಲ್ಮೊನ್ ವಾಡೊನ್ ಯೆತಾನಾ, ಮನಿಸ್ ವಿವಿಧ್ ಸಂಕೇತಾಂ ದ್ವಾರಿಂ ಸಂವಹನ್ ಕರುಂಕ್‍ಲಾಗ್ಲೊ. ಮನ್ಶಾನ್ ರಚ್‍ಲ್ಲೆಂ ಸಂಕೀರ್ಣ್ ಸಂಕೇತಾ ಸಂವಹನ್ ಮ್ಹಳ್ಯಾರ್ ಭಾಸ್. ತೆಂಯೀ ವಿವಿಧ್ ವ್ಯಕ್ತಿಂನಿ ವಿವಿಧ್ ರಿತಿಂಚಿ ಭಾಸ್ ರಚ್ಲಿ. ಮುಳಾನ್ ಭಾಸ್ ಏಕ್ ಸಂಕೇತ್ ಸಂವಹನ್‍ಂಚ್ ಸಯ್. ತರಿಪುಣ್ ಸಬಾರ್ ಲೋಕ್ ಅಸಲಿ ಸಂಕೀರ್ಣ್ ಸಂಕೇತ್ ಸಂವಹನ್ ಶಿಕೊನ್‍ಂಚ್ ವೆತಾನಾ ತೆಂ ಸಂಕೇತ್ ಸಂವಹನ್ ವಿಕಸಿತ್ ಜಾವ್ನ್‍ಂಚ್ ವೆತಾ. ಅಶೆಂ ವಿಕಸಿತ್ ಜಾಂವ್ಕ್ ಪಾಟಿಂ ಪಡ್ಚಿ ಭಾಸ್ ಚಡ್ ಕಾಳ್ ಬಾಳ್ವಾನಾ ಮ್ಹಳ್ಳೆಂಯೀ ಇತಿಹಾಸ್ ಆಮ್ಕಾಂ ಸಾಂಗೊನ್ ದಿತಾ.

ಸುರ್ವೆರ್ ಮನ್ಶಾನ್ ಭಾಸ್ ಫಕತ್ ಉಲೊಂವ್ಚಿ ಆಸ್‍ಲ್ಲಿ. ತಶೆಂ ಮ್ಹಳ್ಯಾರ್ ಉಲೊವ್ಪಾ ದ್ವಾರಿಂ ಉಲಯಿಲ್ಲೆಂ, ಆನಿ ವಿಶೇಸ್ ಕರ್ನ್ ಅನ್ಮೋಲ್ ಮ್ಹಣ್ಚೆ ತಸಲೆಂ ಉಲೊವ್ಪ್, ಸಾಂಗ್ಣಿ ಇತ್ಯಾದಿ ತಾಣೆಂ/ತಿಣೆಂ ಜಿಕುನ್ ಧರುಂಕ್ ಆಸ್‍ಲ್ಲೆಂ. ಅಶೆಂ ಉದೆವ್ನ್ ಆಯ್ಲೆಂ ಜಾನ್‍ಪದ್ ವಾ ಲೋಕ್‍ವೇದ್. ಬರ್ಪಾ ಸಂವಹನ್ ಆರಂಭ್ ಜಾಂವ್ಚೆ ಆದಿಂ ಮನ್ಶಾನ್ ಚಿಂತುಂಕ್ ಜಾಯ್ನಾ ತಿತ್ಲೆಂ ಅಪೂರ್ವ್ ಭಾಶೆ ಗಿನ್ಯಾನ್ ತಶೆಂಚ್ ಭಾಶೆ ವಾಪಾರ್ ಆನಿ ಕ್ರಮೇಣ್ ಲೋಕ್‍ವೇದ್ ಜಿಕುನ್ ಧರ್ಲೆಂ ಮಾತ್ರ್ ನ್ಹಯ್ ಶೆಂಭರಾಂನಿ ವರ್ಸಾಂ ತೆಂ ಎಕಾ ಸಂತತೆ ಥಾವ್ನ್ ಆನ್ಯೇಕಾ ಸಂತತೆಕ್ ವರ್ಗಾಂತರ್ ಕರ್ನ್‍ಂಚ್ ಮನಿಸ್ ಆಯ್ಲೊ.

ಬರ್ಪಾ ಸಂವಹನ್ ಸುರು ಜಾಲ್ಯಾ ಉಪ್ರಾಂತ್, ಉಲಯಿಲ್ಲೆಂ ಮಾತ್ರ್ ನ್ಹಯ್ ಆಸ್ತಾಂ, ಕ್ರಿಯಾತ್ಮಕ್ ರಿತಿಂ ರಚ್‍ಲ್ಲೆಂ ಸಂವಹನ್ ಆತಾಂ ಬರ್ಪಾಂತ್ ಹಾಡ್ನ್ ಖಂಯ್ಸರ್ ಪುಣೀ ಜೊಗಾಸಣೆನ್ ಪುಂಜೊಂವ್ಚೆಂ ಸಾಧ್ಯ್ ಜಾಲೆಂ. ಹ್ಯೆ ದ್ವಾರಿಂ ಭಾಶೆಕ್ ಆನಿ ಭಾಶೆ ವಾಡಾವಳೆಕ್ ಚಡಿತ್ ಘಟಾಯ್ ಮೆಳ್ಳಿ. ಪುಣ್ ಮನ್ಶಾಚ್ಯಾ ಉಡಾಸಾಕ್ ವಾ ಜಿಕುನ್ ಧರ್ಚ್ಯೆ ಕಾಲೆತಿಕ್ ಕಾಂಯ್ ಥೊಡೆಂ ಬಾದಕ್ ಜಾಲೆಂ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ.

ತ್ಯಾ ಉಪ್ರಾಂತ್ ಸುಮಾರ್ 15ವ್ಯಾ ಶತಮಾನಾಂತ್ ಆವಿಷ್ಕಾರ್ ಜಾಲೆಂ ಪ್ರಿಂಟಿಂಗ್ ಪ್ರೆಸ್. ಪ್ರೆಸ್ ಆಯ್ಲ್ಯಾ ಉಪ್ರಾಂತ್ ಸಂವಹನಾಕ್ ಆನಿಕೀ ಚಡಿತ್ ಬಳ್ ಮೆಳ್ಳೆಂ. ಆತಾಂ ಚಡಿತ್ ಮಾಪಾನ್ ಭಾಶೆ ಸಂವಹನ್ ಉಬ್ಜಂವ್ಕ್ ಸಾಧ್ಯ್ ಜಾಲೆಂ ಮಾತ್ರ್ ನ್ಹಯ್ ತೆಂ ವಿವಿಧ್ ಜಾಗ್ಯಾಂನಿ ಸಂಗ್ರಹ್ ಕರ್ನ್ ದವರ್ಚೆಂ ಆನಿ ತ್ಯಾಚ್ ಮಾಪಾನ್ ದೆಶಾಂಕ್ ಆನಿ ವಿದೆಶಾಂಕ್ ಪಾವಿತ್ ಕರ್ಚೆಂಯೀ ಸಾಧ್ಯ್ ಜಾಲೆಂ. ಭಾಶೆ ಸಂವಹನಾ ಲಗ್ತಿ ಹೆಂ ತೆದೊಳ್ಚ್ಯಾ ಕಾಳಾ ಮ್ಹಣಾಸರ್ ಏಕ್ ವ್ಹಡ್ ಕ್ರಾಂತಿಚ್ ಮ್ಹಣ್ ಲೆಕಿಜಯ್. ಪುಣ್ ಹಾಚ್ಯೆ ದ್ವಾರಿಂ ಮನ್ಶಾ ಗಿನ್ಯಾನಾಕ್ ಆನಿ ಜಿಕುನ್ ದವರ್ಚೆ ಸಕ್ತೆಕ್ ಆನಿಕೀ ಚಡಿತ್ ಮಾರ್ ಪಡ್ಲೊ ಖಂಡಿತ್. ಬೂಕ್ ಪ್ರಿಂಟ್ ಕರ್ನ್ ತೆ ಕಾಂಯ್ ಥೊಡೊ ತೇಂಪ್ ಸಾಂಬಾಳ್ನ್ ದವ್ರುಂಕ್ ಸಾಧ್ಯ್ ತರ್, ಕಿತ್ಯಾ ಖಾತಿರ್ ತಾಂತ್ಲೆಂ ಸರ್ವ್ ಆಪ್ಣಾನ್ ಉಡಾಸಾಂತ್ ದವರಿಜೆ, ಜಿಕುನ್ ಧರಿಜೆ ಮ್ಹಳ್ಳಿ ಬೇಫಿಕಿರಾಯ್ ಮನ್ಶಾ ಥಂಯ್ ಆಯ್ಲಿ ತರ್ ತಿ ತ್ಯಾ ಸಂದರ್ಭಾಚ್ಯಾ ವಿಗ್ಯಾನಾಚ್ಯಾ ಆವಿಷ್ಕಾರಾಚೊ ಏಕ್ ವಾಯ್ಟ್ ಪರಿಣಾಮ್ ಮ್ಹಣ್‍ಂಚ್ ಸಾಂಗ್ಯೆತ್.

ಪುಣ್ ಮುಕಾರ್ ವಿಸಾವ್ಯಾ ಶತಮಾನಾಂತ್ ಹಾಚ್ಯಾಕೀ ಮಾರೆಕಾರ್ ಪರಿಣಾಮ್ ಪಡ್ಚೆ ತಸಲೆಂ ವಿಗ್ಯಾನ್ ಆನಿ ತಂತ್ರ್‍ಗ್ಯಾನ್ ಯೆತಲೆಂ ಮ್ಹಣ್ 15-16ವ್ಯಾ ಶತಮಾನಾಂತ್ ಕೊಣೆಂಯೀ ಚಿಂತ್‍ಲ್ಲೆಂ ಆಸ್ಚೆಂನಾ. ಕಂಪ್ಯೂಟರ್ ತಂತ್ರ್‍ಗ್ಯಾನ್ ಆಯ್ಲ್ಯಾ ಉಪ್ರಾಂತ್ ಮನ್ಶಾಚಿ ಒಟ್ಟಾರೆ ಗಿನ್ಯಾನಾ ಕಾಲೆತ್‍ಚ್ ಬದ್ಲುನ್ ಆಯ್ಲ್ಯಾ. ಆತಾಂ ಉಡಾಸಾಂತ್ ದವರ್ಚೆಂ ಬೋವ್‍ಚ್ ಉಣೆಂ ಜಾವ್ನ್ ಯೆವ್ನ್ ಆಸಾ. ತಾಂತ್ಲ್ಯಾ ತಾಂತುಂಯೀ, ಮೊಬಾಯ್ಲ್ ಆಯ್ಲ್ಯಾ ಉಪ್ರಾಂತ್ ಮೆಜೂನ್ ಪಾಂಚ್ ಫೊನ್ ನಂಬ್ರಾಂಯೀ ಆಮಿ ಉಡಾಸಾಂತ್ ದವರಿನಾಂವ್. ಥೊಡೆ ಪಾವ್ಟಿಂ ಹೆಂ ಇತ್ಲೆಂ ಅತಿರೇಕಾಕ್ ಪಾವ್ತಾಗೀ, ಸ್ವತ: ಆಪ್ಣಾಚೆಂಚ್ ಮೊಬಾಯ್ಲ್ ನಂಬರ್ ಥೊಡ್ಯಾಂಕ್ ಉಡಾಸಾಂತ್ ಉರಾನಾ. ತಶೆಂ ಮ್ಹಳ್ಯಾರ್ ಆಜ್ ಕಾಲ್ ಉಡಾಸಾಂಕ್ ಚಡಿತ್ ಮೋಲ್ ನಾ ಮ್ಹಣ್ ಜಾಲೆಂ. ಆಜ್ ಸರ್ವ್ ಕ್ಷಣಿಕ್ ಆನಿ ಥೊಡೊಚ್ ತೇಂಪ್ ಉರ್ಚ್ಯೆ ತಸಲೆಂ ಮಾತ್ರ್ ಮನ್ಶಾಕ್ ಖಾಯ್ಸ್‍ಗೀ ಮ್ಹಳ್ಳೊ ದುಬಾವ್ ಯೆತಾ. ತ್ಯಾ ತೆಕಿದ್ ಮನ್ಶಾನ್ ಎಕಾ ತೆಂಪಾರ್ ಆಮೊಲಿಕ್ ಮ್ಹಣ್ ಚಿಂತ್‍ಲ್ಲಿಂ ಮೌಲ್ಯಾಂ ಆಜ್ ಸುಮಾರ್ ಮ್ಹಣ್ ದಿಸ್ತಿತ್. ತ್ಯೆ ದಿಶೆನ್ ನೈತಿಕತಾ ಆಜ್ ಫಕತ್ ವೈಯುಕ್ತಿಕ್ ಜಾಲ್ಯಾ ಆಸ್ತಾಂ ಎಕಾ ಜನಾಂಗಾಕ್ ಬಾಂದ್ಚಿ ನೈತಿಕತಾ ಕ್ರಮೇಣ್ ಆಕೇರ್ ಜಾವ್ನ್ ಯೇವ್ನ್‍ಂಚ್ ಆಸಾ.

ತಶೆಂ ಮ್ಹಣ್ ಹ್ಯಾ ಸರ್ವಾ ದ್ವಾರಿಂ ಭಾಶೆಚ್ಯೆ ವಾಡಾವಳೆಕ್ ಆನಿ ಉದರ್ಗತೆಕ್ ಬರೆಂ ಜಾಂವ್ಕ್ ನಾ ಮ್ಹಣ್ ನ್ಹಯ್. ಖಂಡಿತ್ ಬರೆಂ ಜಾಲಾಂ. ಆಜ್ ಏಕ್ ಭಾಸ್ ಡಿಜಿಟಲ್ ಮಾಧ್ಯಮಾಂತ್ ನಾ ತರ್ ಖಂಡಿತ್ ತ್ಯಾ ಭಾಶೆಚಿ ವಾಡಾವಳ್ ಸಾಧ್ಯ್ ನಾ. ಪಾಟ್ಲ್ಯಾ ವರ್ಸಾ ಕೊಂಕಣಿಯೀ ಗೂಗಲ್ ಡಿಜಿಟಲ್ ಮಾಧ್ಯಮಾಕ್ ಪಾವ್ಲಿ ತಿ ಧಾದೊಸ್ಕಾಯ್ ಸರ್ವ್ ಕೊಂಕಣಿ ಲೊಕಾಚಿ. ತಶೆಂ ಮ್ಹಣ್ ಕೊಂಕಣಿ ಉಲೊಂವ್ಚೊ ಆನಿ ಕೊಂಕಣಿಂತ್ ಸಾಹಿತ್ಯ್ ರಚ್ಚಾಂಚೊ ಸಂಖೊ ಉಣೊ ಜಾವ್ನ್ ಯೆತಾ ತಿ ವಾಡಾವಳ್ ಕೊಂಕಣಿ ಭಾಶೆಚ್ಯಾ ಫುಡಾರಾ ಲಗ್ತಿ ಖಂಡಿತ್ ಹುಸ್ಕ್ಯಾಚಿ.

ಹ್ಯಾ ಸರ್ವಾ ಮಧೆಂ ಭಾಸ್ ಆನಿ ಸಂಸ್ಕೃತೆ ಲಗ್ತಿ ಸಂಸೊಧ್ ಕಿತ್ಲ್ಯಾ ಗರ್ಜೆಚೊ ಆನಿ ಕೋಣ್ ತೊ ಖಾಯ್ಸ್ ಕರ್ತಾ ಆನಿ ಕೊಣಾಕ್ ತೊ ಉಪ್ಕಾರ್ತಾ – ಇತ್ಯಾದಿ ಸಬಾರ್ ಸವಾಲಾಂ ಉಟ್‌ಲ್ಲ್ಯಾಂತ್ ಕಾಂಯ್ ಮಿಸ್ತೆರ್ ನಾ. ಆಸ್ಟ್ರೀಯಾಚಿ ಸಮಾಜ್ ಶಾಸ್ತ್ರಜ್ಞ್ ರೋಯ್ನ್ ಕೊರ್ನೆಲ್ ಹಿಣೆಂ ಸಂಸೊಧಾ ವಿಶಿಂ ಸಾಂಗ್‍ಲ್ಲೆಂ ಹಾಂಗಾ ವಾಸ್ತವಿಕ್ ಮ್ಹಣ್ ಭೊಗ್ತಾ:  “Research is something that everyone can do, and everyone ought to do. It is simply collecting information and thinking systematically about it.”  (ಸಂಸೊಧ್ ಕೊಣೆಂಯೀ ಕರ್ಯೆತ್ ಆನಿ ಸಕ್ಟಾಂನಿ ಕರಿಜೆ. ಸಂಸೊಧ್ ಮ್ಹಳ್ಯಾರ್ ಮಾಹೆತ್ ಸಾಂಗಾತಾ ಘಾಲ್ಚಿ ಆನಿ ವ್ಯವಸ್ಥಿತ್ ರಿತಿಂ ಸಾಂಗಾತಾ ಘಾಲ್ಲ್ಯಾ ಮಾಹೆತಿ ವಿಶಿಂ ಚಿಂತ್ಚೆಂ). ತಶೆಂ ಮ್ಹಳ್ಯಾರ್ ಸಂಸೊಧ್ ಹರ್ ಎಕಾ ಸಂಗ್ತಿ ವಿಶಿಂ ಕರಿಜೆ ಜಾಲ್ಲೆಂ ಕಾಮ್. ಎಕ್ಯೆ ರಿತಿಂ ಪಳೆಂವ್ಚೆಂ ತರ್, ಆಮಿ ಕರ್ಚ್ಯಾ ಪ್ರತಿ ಕಾಮಾ ವಿಶಿಂ ಕಾಂಯ್ ಇಲ್ಲಿ ಪಾಟ್‍ಪಡ್ದ್ಯಾಚಿ ಮಾಹೆತ್ ಆರಾಂವ್ಚೆಂ ಕಾಮ್ ಆಮಿ ಜರೂರ್ ಕರಿಜೆ. ಎಕಾದವೆಳಾ ಆಮಿ ಖಂಯ್ಚಿಯೀ ಖಬರ್ ಆಯ್ಕಾಲಿ, ತಿ ಸತ್‍ಗೀ ಫಟ್‍ಗೀ ಮ್ಹಣ್ ಸಮ್ಜೊಂಕ್ ಕಾಂಯ್ ಇಲ್ಲೊ ಸಂಸೊಧ್ ಕರಿಜೆ ಜಾಲ್ಲಿ ಅನಿವಾರ್ಯತಾ ಆಜ್ ಜರೂರ್ ಆಸಾ. ಆಯ್ಚ್ಯಾ ಹ್ಯಾ ಫಟ್ಕಿರ್ಯಾ ವದ್ರ್ಯಾಂಚ್ಯಾ ಕಾಳಾರ್, ಆನಿ ಫೇಕ್ ನಿವ್ಸ್ ವಾತಾವರಣಾಂತ್ ಆಮಿ ಅಸಲೊ ಸಂಸೊಧ್ ಕರಿನಾಂವ್ ತರ್ ನಿಜಾಕೀ ಫಟ್ವೊನ್ ಪಡ್ತೆಲ್ಯಾಂವ್ ಮಾತ್ರ್ ನ್ಹಯ್ ತ್ಯೆ ವರ್ವಿಂ ಹೆರಾಂಕ್ ತಿತ್ಲೆಂಚ್ ವಾಯ್ಟ್ ಕರ್ತಲ್ಯಾಂವ್. ಇತ್ಲೆಂ ಮಾತ್ರ್ ನ್ಹಯ್ ಆಸ್ತಾಂ, ಹರ್ ಏಕ್ ಸಂಸೊಧ್, ಜಾಂವ್ ತೊ ಲ್ಹಾನ್ ವಾ ವ್ಹಡ್, ಹರ್ ಎಕಾ ಕಾಮಾಕ್ ಏಕ್ ವೃತ್ತಿಪರತಾ ಆನಿ ಜಡಾಯ್ ಹಾಡ್ನ್ ದಿತಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಮುಕಾರುನ್, ಸಂಸೊಧಾದ್ವಾರಿಂ ಹರ್ ಏಕ್ ವ್ಯಕ್ತಿ ಪ್ರಾಮಾಣಿಕ್ ರಿತಿಂ ವ್ಯಕ್ತಿನಿಷ್ಟ್ (subjective)  ಜಾಯ್ನಾಸ್ತಾಂ ವಸ್ತುನಿಷ್ಟ್ (objective)  ಜಾಂವ್ಚೆಂ ಖಂಡಿತ್ ಸಾಧ್ಯ್.

ಭಾಶೆ ಆನಿ ಸಂಸ್ಕೃತೆ ಸಂದರ್ಭಾರ್ ಸಂಸೊಧ್ ಚಡಿತ್ ಗರ್ಜೆಚೊ ಕಿತ್ಯಾಕ್‍ಗೀ ಮ್ಹಳ್ಯಾರ್ ಹ್ಯೆ ದ್ವಾರಿಂ ಮಾತ್ರ್ ಭಾಸ್ ಆನಿ ಸಂಸ್ಕೃತೆಚಿ ಆಧುನಿಕ್ ಗರ್ಜ್ ಕಿತೆಂ ಆನಿ ಕಸಲ್ಯಾ ಪ್ರೇತನಾಂ ದ್ವಾರಿಂ ಭಾಸ್ ಆನಿ ಸಂಸ್ಕೃತಿ ಆನಿಕೀ ಚಡಿತ್ ಫಳಾಭರಿತ್ ಕರುನ್ ಮುಕ್ಲ್ಯೆ ಪಿಳ್ಗೆಕ್ ವರ್ಗಾವಣ್ ಕರ್ಯೆತ್ ಇತ್ಯಾದಿ ಸಂಸೊಧಾ ಮಾರಿಫಾತ್ ಮಾತ್ರ್ ಸಮ್ಜೊಂಕ್ ಸಾಧ್ಯ್. ಕೊಂಕಣಿಚ್ಯಾ ಸಂದರ್ಭಿಂ ಹೆಂ ಆನಿಕೀ ಚಡಿತ್ ಗರ್ಜೆಚೆಂ, ಕಿತ್ಯಾಕ್ ಕೊಂಕಣಿಕ್ ಹೆರ್ ಥೊಡ್ಯಾ ಪ್ರಮುಕ್ ಭಾಶೆಂಕ್ ಆಸ್ಚೆ ತಸಲಿ ಅನ್ಕೂಲತಾ ನಾ. ತಶೆಂ ಜಾಲ್ಲ್ಯಾನ್ ಕೊಂಕಣಿ ಭಾಶೆಚಿ ವಾಡಾವಳ್ ಜಾಯ್ಜೆ ತರ್, ತ್ಯಾ ಪ್ರಕಾರ್ ಸಾಹಿತ್ಯ್ ರಚನ್ ಜಾಯ್ಜೆ ಮಾತ್ರ್ ನ್ಹಯ್ ಸಂಸೊಧ್‍ಯೀ ಜಾಯ್ಜೆ. ನಿರಾಶೆಚಿ ಸಂಗತ್ ಮ್ಹಳ್ಯಾರ್ ಕೊಂಕ್ಣೆಂತ್ ಅಸಲ್ಯಾ ಸಂಕೀರ್ಣ್ ಸಂಸೊಧ್ ಕಾರ್ಯಾಚಿ ಕೃಷಿ ಮಸ್ತು ಉಣಿ ಆಸಾ. ತಿ ಭರ್ತಿ ಕರ್ಚೆಂ ಕಾಂಯ್ ಥೊಡೆಂ ಕಾಮ್ ‘ಅಮರ್ ಕೊಂಕಣಿ’ ಜರ್ನಲ್ ಕರುನ್‍ಂಚ್ ಆಸಾ ಮ್ಹಣ್ಚಿ ತೃಪ್ತಿ ಆಮ್ಚಿ.

ಪ್ರಸ್ತುತ್ ಅಂಕ್ಯಾಂತ್ ವಿವಿಧ್ ವಿಶಯಾಂಚೆರ್ ಸಾದರ್ ಕೆಲ್ಲಿಂ ತೀನ್ ಸಂಸೊಧ್ ಲೇಖನಾಂ ಆನಿ ಏಕ್ ಪುಸ್ತಕ್ ವಿಮರ್ಸೊ ಆಸಾ. ಕಾನಡಿ ಲಿಪಿಂತ್ಲ್ಯಾ ಕೊಂಕಣಿ ಸಾಹಿತ್ಯಾಚೆರ್ ಝಳಕ್ ಮಾರ್ಚೆಂ ಏಕ್ ಲೇಖನ್ ಕಾನಡಿ ಲಿಪಿಂತ್ಲ್ಯಾ ಭರ್ಪೂರ್ ಸಾಹಿತ್ಯಾಕ್ ಎಕೊಡೆಂ ಪಳೆವ್ನ್ ತೆಂ ವಿಕಸಿತ್ ಜಾಲ್ಲೊ ಇತಿಹಾಸ್ ಅವಲೋಕನ್ ಕರ್ತಾ. ಕೊಂಕಣಿಚ್ಯಾ ಫುಡಾರಾ ವಿಶಿಂ ಚಿಂತಪ್ ಆಟಂವ್ಚೆಂ ಲೇಖನ್ ನವಿಂ ಚಿಂತ್ಪಾಂ ಕೊಂಕಣಿ ಲೊಕಾ ಮುಕಾರ್ ದವರ್ನ್ ತ್ಯೆ ದಿಶಿಂ ಕೊಂಕಣಿಚ್ಯಾ ಫುಡಾರಾಕ್ ನವಿ ದಿಶಾ ಕಶಿ ಹಾಡ್ಯೆತ್ ಮ್ಹಳ್ಳೊ ತರ್ಕ್ ಕರ್ತಾ. ಕರಾವಳೆಂತ್ಲ್ಯಾ ಭಾಶೆಂಕ್ ಆನಿ ಪತ್ರಿಕೋದ್ಯಮಾಕ್ ಮಿಶನರಿಂನಿ ದಿಲ್ಲಿ ದೆಣ್ಗಿ ವಿವರಾಂವ್ಚೆಂ ಲೇಖನ್, ಮಿಶನರಿಂಚಿ ಮೂಳ್‍ಭೂತ್ ಆಸಕ್ತ್ ಲೊಕಾಕ್ ಕನ್ವಡ್ತರ್ ಕರ್ಚೆ ಆಸ್‍ಲ್ಲಿ ತರೀ, ಹಾಂಗಾಚ್ಯಾ ತುಳು, ಕೊಂಕಣಿ ಭಾಶೆಂಚೆರ್ ತಾಂಕಾಂ ವಿಶೇಸ್ ಆಸಕ್ತ್ ಆಸ್‍ಲ್ಲಿ ತೆಂ ಸಂಸೊಧಾ ದ್ವಾರಿಂ ನೆರಾಯ್ತಾ. ‘ಅಮರ್ ಕೊಂಕಣಿ’ ಜರ್ನಲಾಕ್ ಚಡಿತ್ ಸಂಸೊದ್‍ಕಾರಾಂಚಿ ಗರ್ಜ್ ಆಸಾ. ಸಾಂ. ಲುವಿಸ್ ಕೊಂಕಣಿ ಸಂಸ್ಥ್ಯಾನ್ ಚಲವ್ನ್ ವರ್ಚ್ಯಾ ಪದ್ಯುತ್ತರ್ ಡಿಪ್ಲೊಮಾ ಕೊರ್ಸಾಂತ್ ಏಕ್ ಪೇಪರ್ ಸಂಸೊಧಾಚೆಂಚ್ ಆಸೊನ್, ಸಂಸೊಧಾಚೆಂ ಕಾಮ್ ಕಶೆಂ ಕರ್ಚೆಂ ಮ್ಹಳ್ಳೆಂ ಶಿಕ್ಚೆಂ ಖಂಡಿತ್ ಸಾಧ್ಯ್. ಕೊಂಕಣಿಂತ್ ಆನಿಕೀ ಚಡಿತ್ ಸಂಸೊಧ್‍ಕಾರ್ ಉದೆವ್ನ್ ಯೆಂವ್ದಿತ್, ಹಿಚ್ ಆಮ್ಚಿ ಆಶಾ.