ಕರಾವಳಿ ಕರ್ನಾಟಕಾಚ್ಯಾ ಭಾಸ್ ಆನಿ ಛಾಪ್ಯಾಕ್ ಕ್ರಿಸ್ತಾಂವ್ ಮಿಶನರಿಂಚಿಂ ದೆಣ್ಗಿಂ

ಮೆಲ್ವಿನ್ ಎಸ್. ಪಿಂಟೊ

ತರ್ಜಣ್: ಡೆಲ್ವಿಟಾ ವೇಗಸ್

ಸಾರ್ ಸಬ್ದ್: ಮಿಶನರಿ, ಕರ್ನಾಟಕಾಂತ್ ಛಾಪ್ಖಾನೊ, ಮಂಗಳೂರು ಸಮಾಚಾರ, ಕರಾವಳಿ ಕರ್ನಾಟಕಾಚ್ಯೊ ಭಾಸೊ

ಸಾರಾಂಶ್

ಭಾರತಾಚೊ ಪಯ್ಲೊ ಛಾಪ್ಖಾನೊ ವಿದೇಶಿ ಜೆಜ್ವಿತ್ ಮಿಶನರಿಂನಿ 1556ವ್ಯಾ ವರ್ಸಾ ಗೊಂಯಾಂತ್ ಸುರ್ವಾತ್ಲೊ. ವಿದೇಶಿ ಮಿಶನರಿ ಕ್ರಿಸ್ತಾಂವ್ ಧರ್ಮ್ ಪ್ರಸಾರ್ ಕರುಂಕ್ ಭಾರತಾಕ್ ಆಯಿಲ್ಲೆ ಮ್ಹಳ್ಳೆಂ ಸರ್ವಾಂಕ್‍ಯಿ ಕಳಿತ್ ಆಸ್ಚಿ ಖರಿ ಗಜಾಲ್ ಜಾಲ್ಯಾರೀ ಭಾರತಾಚ್ಯಾ ಪ್ರಾದೇಶಿಕ್ ಭಾಶೆಂಕ್ ಆನಿ ಭಾರತಾಂತ್ ಛಾಪ್ಖಾನ್ಯಾಚ್ಯಾ ಉದರ್ಗತೆಕ್ ಹ್ಯಾ ಮಿಶನರಿಂನಿ ದಿಲ್ಲಿ ದೆಣ್ಗಿ ವಿಶೇಸ್. ಕರಾವಳಿ ಕರ್ನಾಟಕಾಂತ್ ‘ಮಂಗಳೂರು ಸಮಾಚಾರ’ ಮ್ಹಳ್ಳೆಂ ಕನ್ನಡಾಚೆಂ ಪಯ್ಲೆಂ ಪತ್ರ್ ಸುರ್ವಾತ್ ಕರುಂಕ್ ಕ್ರಿಸ್ತಾಂವ್ ಮಿಶನರಿ ಕಾರಣ್. 1843ವ್ಯಾ ವರ್ಸಾ ಜರ್ಮನಿಚ್ಯಾ ಬಾಸೆಲ್ ಮಿಶನರಿಂನಿ ಹೆಂ ಪತ್ರ್ ಸುರ್ವಾತ್ಲೆಂ. ವಾಸ್ತವಿಕ್ ಜಾವ್ನ್ ಸಬಾರ್ ಸುರ್ವಿಲಿಂ ಪುಸ್ತಕಾಂ, ದಿಸಾಳೆಂ ಆನಿ ನೆಮಾಳಿಂ ಛಾಪುಂಕ್ ಮಂಗ್ಳುರ್ಚ್ಯಾ ಬಾಸೆಲ್ ಮಿಷನ್ ಛಾಪ್ಖಾನ್ಯಾಚೊ ಮೊಟೊ ಆಧಾರ್ ಆಸಾ. ಕರಾವಳಿ ಕರ್ನಾಟಕಾಂತ್ ಭಾಸ್ ಆನಿ ಪತ್ರಿಕಾ ಶೆತಾಂತ್ ಕ್ರಿಸ್ತಾಂವ್ ಮಿಶನರಿಂಚಿ ದೆಣ್ಗಿ ಮಹತ್ವಾಚಿ. ಚಾರಿತ್ರಿಕ್ ಆಧಾರಾರ್ ಸಾಂಗ್ಚೆಂ ತರ್ ಪಾಟ್ಲ್ಯಾ ಶತಮಾನಾಚ್ಯೆ ಸುರ್ವೆರ್ ವಿದೇಶಿ ಮಿಶನರಿಂನಿ ಘಾಲ್ಲ್ಯಾ ಬಲಿಶ್ಟ್ ಬುನ್ಯಾದಿಚೊ ಫಳ್ ಜಾವ್ನ್ ಆನಿ ಉಪ್ರಾಂತ್ ತಾಂಚೆ ಉತ್ತರಾದಿಕಾರಿ ಜಾಲ್ಲ್ಯಾ ಧಾರ್ಮಿಕಾಂನಿ ಮುಕಾರುನ್ ವ್ಹೆಲ್ಲ್ಯಾ ಹ್ಯಾ ವಾವ್ರಾ ವರ್ವಿಂ ಕರಾವಳಿಚ್ಯಾ ಭಾಸಾಂಚೆಂ ಆನಿ ಪತ್ರಿಕೋದ್ಯಮ್ ಶೆತಾಚಿ ವಾಡಾವಳ್ ಜಾಲಿ. ಹ್ಯಾ ಲೇಖನಾಂತ್, ಐತಿಹಾಸಿಕ್ ವಿಧಾನ್ ವಾಪಾರ್ನ್ ಕನ್ನಡ, ತುಳು ಆನಿ ಕೊಂಕಣಿ ಭಾಸಾಂಕ್ ಕ್ರಿಸ್ತಾಂವ್ ಮಿಶನರಿಂಚಿ ದೆಣ್ಗಿ ಸೊಧುನ್, ತಾಂಚೊ ಆನಿ ಕರಾವಳಿಂತ್ ನಿರ್ಮಾಣ್ ಜಾಲ್ಲ್ಯಾ ಛಾಪ್ಖಾನ್ಯಾಚೊ ವಿವರ್ ದಿಲಾ. ಉಪ್ರಾಂತ್ಲ್ಯಾ ದಶಕಾಂನಿ ಭಾಸ್ ಆನಿ ಛಾಪ್ಯಾಚ್ಯಾ ವಿಕಾಸಾಚೆರ್ ಆನಿ ಹಾಂಚ್ಯಾ ವಾಡಾವಳೆಚ್ಯಾ ಪ್ರಸ್ತುತ್ ಪರಿಗತಿಚೆರ್ ಮಿಶನಾರಿಂಚ್ಯಾ ದೆಣ್ಗೆಂಚೊ ಪ್ರಭಾವ್ ದುಸ್ರ್ಯಾ ಹಂತಾಚ್ಯಾ ಮುಳಾಂ ಮಾರಿಫಾತ್ ವಿಶ್ಲೇಷಣ್ ಕರ್ಚೆಂ ಪ್ರೇತನ್ ಕೆಲಾಂ.