ಕರ್ನಾಟಕಾಂತ್ಲ್ಯಾ ಕಾನಡಿ ಲಿಪಿಯೆಂತ್ಲ್ಯಾ ಕೊಂಕಣಿ ಸಾಹಿತ್ಯಾಚೆರ್ ಏಕ್ ಸುಕ್ಣ್ಯಾ ನದರ್

ಜೋಕಿಮ್ ಪಿಂಟೊ

ಸಾರ್ ಸಬ್ದ್: ಅಸ್ಮಿತಾಯ್, ಸಾರಸ್ವತ್ ಬ್ರಾಹ್ಮಣ್, ಛಾಪೊ, ದರ್ಜೊ, ಪುರ್ವಿಲೆಂ ಸಾಹಿತ್ಯ್, ಭಾಂಗ್ರಾಳೊ ಕಾಳ್

ಸಾರಾಂಶ್

ಕೊಂಕಣಿ ಉಲಯ್ತಲ್ಯಾಂ ಮಧೆಂ ಮಂಗ್ಳುರಿ ಕೊಂಕಣಿ ಸಮುದಾಯ್ ಭೋವ್ ವ್ಹಡ್ ನ್ಹಯ್ ತರೀ, ಕೊಂಕಣಿ ಆನಿ ತಾಚ್ಯಾ 42 ಬೊಲಿಂತ್ಲ್ಯಾ ಒಟ್ಟು ಸಾಹಿತ್ಯಾಕ್ ತುಲನ್ ಕೆಲ್ಯಾರ್, ಮಂಗ್ಳುರಿ ಕಾನಡಿ ಲಿಪಿಯೆಂತ್ಲ್ಯಾ ಕೊಂಕಣಿ ಸಾಹಿತ್ಯಾಚೊ ಗಾತ್ರ್ ಕಾಂಯ್ ಲ್ಹಾನ್ ನ್ಹಯ್. ಮಂಗ್ಳುರಿ ಕೊಂಕಣಿ ಕ್ರಿಸ್ತಾಂವಾಂಚೆ ಮ್ಹಾಲ್ಗಡೆ, ಗೊಂಯಾಕ್ ಕೊಂಕಣಿ ಹಾಡ್ನ್ ಆಯಿಲ್ಲೆ ಸಾರಸ್ವತ್, ವೇದಿಕ್ ಕಾಳಾಚೆ ಆನಿ ತವಳ್ ಥಾವ್ನ್‍ಂಚ್ ಶಿಕ್ಪಿ, ಜಾಣಾರಿ ಜಾವ್ನಾಸ್‍ಲ್ಲೆ ತರೀ, ಕೊಂಕಣಿ ಉಪ್ರಾಂತ್ ಉದೆಲ್ಲ್ಯಾ ಮರಾಠಿಂತ್ ಪಿಕಯಿಲ್ಲೆಂ ತಿತ್ಲೆಂ ಸಾಹಿತಿಕ್ ಬೆಳೆಂ ಕೊಂಕಣಿಂತ್ ಪಿಕಂವ್ಕ್ ಸಕ್ಲೆನಾಂತ್. ಪುಣ್ ಮಂಗ್ಳುರಾಕ್ ಪಾವ್‍ಲ್ಲ್ಯಾ ಹ್ಯಾಚ್ ಲೊಕಾನ್ ರಚ್‍ಲ್ಲ್ಯಾ ಸಾಹಿತ್ಯಾಚೆಂ ಮಟ್ಟ್ ತುಕುನ್ ಪಳೆಯ್ನಾಸ್ತಾಂ, ಒಟ್ಟು ಸಾಹಿತ್ಯಾಚೆಂ ಮಾಪ್ ಪಳೆಯ್ಲೆಂ ತರ್ ಕೊಂಕಣಿ ಮಾಯೆಚೆಂ ಸಾಹಿತ್ಯ್ ಭಂಡಾರ್ ಭರೊನ್ ವೊಮ್ತೊಂಚೆಂ ದಿಸ್ತಾ. ಹೆಂ ಲೇಖನ್ ಕಾನಡಿ ಲಿಪಿಯೆಂತ್ಲ್ಯಾ ಕೊಂಕಣಿ ಸಾಹಿತ್ಯಾಂತ್ಲ್ಯೊ ಮಟ್ವ್ಯೊ ಕಾಣಿಯೊ, ಕಾದಂಬರಿ ಆನಿ ಕವಿತಾ ಶೆತಾಂತ್ ಯೆದೊಳ್ ಜಾಲ್ಲ್ಯಾ ವಾವ್ರಾಚೆರ್ ಏಕ್ ಸುಕ್ಣ್ಯಾ ನದರ್ ಮಾರ್ತಾ.