ಸತಾಚೊ ಸೊಧ್ ಆನಿ ಸತಾಚ್ಯಾ ಸ್ಥಾಪನಾ ಮಧೆಂ ಸಂಸೊಧ್

ಮೆಲ್ವಿನ್ ಎಸ್. ಪಿಂಟೊ, ಜೆ.ಸ

Scopus Author ID: 57189887469 
https://orcid.org/0000-0001-8797-1288

ಕನ್ನಡಾಚೊ ವಿಮರ್ಶಕ್, ಸಂಸೊಧ್‍ಕಾರ್ ಆನಿ ತುಮಕೂರು ವಿಶ್ವವಿದ್ಯಾಲಯಾಚ್ಯಾ ಕನ್ನಡ ವಿಭಾಗಾಚೊ ಪ್ರೊಫೆಸರ್ ಡಾ| ನಿತ್ಯಾನಂದ ಶೆಟ್ಟಿನ್ ಆಯ್ಲೆವಾರ್ ಲಿಕ್‍ಲ್ಲೆಂ ಪುಸ್ತಕ್ ಮಾರ್ಗಾನ್ವೇಷಣೆ: ಸಾಹಿತ್ಯ ಸಂಶೋಧನೆಯ ರೀತಿ ನೀತಿ. ಹ್ಯಾ ಪುಸ್ತಕಾಂತ್ ಸಂಸೊಧಾವಿಶಿಂ ತಾಣೆಂ ಸಾಂಗ್ಚೊ ಏಕ್ ಪ್ರಮುಕ್ ವಿಚಾರ್ ಅಸೊ ಆಸಾ. ದೋನ್ ರಿತಿಂಚೆ ಸಂಸೊಧ್ ಸಾಧ್ಯ್ ಆಸಾತ್: ಪಯ್ಲೊ ಸತಾಚೆಂ ಸ್ಥಾಪನ್ (ಸತ್ಯ ಸ್ಥಾಪನೆ) ಕರ್ಚೊ ವಯ್ವಾಟಿ ‘ಸಂಸೊಧ್’ ಆನಿ ದುಸ್ರೊ ಸತಾಚೊ ಸೊಧ್ (ಸತ್ಯ ಶೋಧನೆ) ಕರ್ಚೊ ವಸ್ತುನಿಷ್ಟ್ ಸಂಸೊಧ್. ಹ್ಯಾ ದೊನಾಂ ಮಧೆಂ ವಿಶೇಸ್ ಫರಕ್ ಆಸಾ. ಸತಾಚೆಂ ಸ್ಥಾಪನ್ ಕರ್ಚೆಂ ಬೋವ್ ಸಲೀಸ್. ಮ್ಹಜ್ಯೆಲಾಗಿಂ ಥೊಡಿಂ ಪೂರ್ವ್‍ಪೀಡಿತ್ ಕಲ್ಪನಾಂ ಆಸಾತ್. ಸಮಾಜ್ಯೆ ವಿಶಿಂ, ಹೆರ್ ಜಾತಿ ಧರ್ಮಾ ವಿಶಿಂ, ವಾ ಮ್ಹಾಕಾ ಜಾಯ್ನಾತ್‍ಲ್ಲ್ಯಾಂವಿಶಿಂ ಮ್ಹಜ್ಯೊ ಥೊಡ್ಯೊ ಪಾತ್ಯೆಣ್ಯೊ ಆಸಾತ್ ತರ್, ತ್ಯೊ ಪಾತ್ಯೆಣ್ಯೊ ಸಾಬೀತ್ ಕರುಂಕ್ ಹಾಂವ್ ಆಮ್ಕೆಂಚ್ ಏಕ್ ವಿಧಾನ್ ಹಾತಿಂ ಘೆತಾಂ ಆನಿ ಮ್ಹಜ್ಯೊ ಪಾತ್ಯೆಣ್ಯೊ ಕಶ್ಯೊ ಪುಣೀ ಸ್ಥಾಪನ್ ಕರ್ತಾಂ. ಪುಣ್ ತೆಂಚ್ ಸತಾಚೊ ಸೊಧ್ ಕಷ್ಟಾಂಚೆಂ ಕಾಮ್. ತಾಕಾ ಮುಳಾನ್ ಖಂಯ್ಚ್ಯಾ ಪುಣೀ ಥಿಯರಿಚೊ (ತತ್ವ್) ಆಧಾರ್ ಜಾಯ್ಚೆ. ಮಾತ್ರ್ ನ್ಹಯ್, ಹಾಂವೆಂ ಪಾತ್ಯೆವ್ನ್ ಆಯಿಲ್ಲಿಂ ಥೊಡಿಂ ಥೊಡಿಂ ‘ಸತಾಂ’, ಧೋರಣಾಂ ಹಾಂವೆಂ ಹ್ಯೆ ಪ್ರಕ್ರಿಯೆಂತ್ ಸಾಂಡಿಜೆ ಪಡ್ತಾತ್ ಆನಿ ಮ್ಹಜ್ಯಾ ಸತಾಚ್ಯಾ ಸೊದಾಚ್ಯಾ ಸಂದರ್ಭಿಂ ಉಬಿಂ ಜಾಲ್ಲಿಂ ಸಂಸೊದಾಚಿಂ ಸತಾಂ ಹಾಂವೆಂ ಒಪುನ್ ಘೆಜೆ ಪಡ್ತಾತ್.

ಆಜ್ ಭಾರತಾಂತ್ ಆನಿ ಇತರ್ ದೆಶಾಂನಿ ಸಯ್ತ್ ಸಂಸೊಧ್ ಮ್ಹಳ್ಳ್ಯೆ ವಿಶಿಂ ಅಸಲೊಚ್ ಗೊಂದೊಳ್ ಉಟೊನ್ ದಿಸ್ತಾ. ಚಡ್ ಕರ್ನ್ ಸತಾಚೆಂ ಸೊಧ್ ಕರ್ಚೆ ಸಂಸೊಧ್‍ಕಾರ್ ಆಸಾತ್ ತರೀ, ಆಜ್ ಕಾಲ್ ಸತ್ ಸ್ಥಾಪನ್ ಕರ್ಚೆ ಸಂಸೊಧ್‍ಕಾರ್ ಚಡಿತ್ ಉದೆವ್ನ್ ಯೆಂವ್ಚೆ ದಿಸ್ತಾತ್. ದಾಖ್ಲ್ಯಾಕ್ ರೈಟಿಸ್ಟ್ ಸಂಸೊಧ್‍ಕಾರ್ ಆರ್ಯನ್ ಕುಳಿ ಭಾರತಾಂತ್‍ಚ್ ಉಬ್ಜಾಲ್ಲಿ, ತಿ ಭಾಯ್ರ್ ಥಾವ್ನ್ ಯೆಂವ್ಕ್ ನಾ ಮ್ಹಳ್ಳೆಂ ಅಖಂಡ್ ಪಾತ್ಯೆತಾತ್. ಸರ್ವ್ ಪುರಾವೆ, ಆನಿ ಉಂಚ್ಲೆ ಚಾರಿತ್ರಿಕ್ ಆನಿ ಮಾನವ್‍ಶಾಸ್ತ್ರೀಯ್ ಸಂಸೊಧ್ ಹೆಂ ಸತ್ ನ್ಹಯ್ ಮ್ಹಣ್ ಸಾಂಗ್ತಾತ್ ತರೀ, ಆರ್ಯನ್ ಕುಳಿ ಭಾಯ್ರ್ ಥಾವ್ನ್ ಆಯಿಲ್ಲಿ ಮ್ಹಣ್ ಒಪ್ಲ್ಯಾರ್ ಲುಕ್ಸಾಣ್ ಚಡ್ ಆಸಾ ಮ್ಹಣ್ ಮತೀಯ್ ರೈಟಿಸ್ಟ್ ಪಂಗ್ಡಾಂಕ್ ಸುಸ್ತಾಲಾಂ. ದೆಕುನ್, ಆರ್ಯನ್ ಕುಳಿ ಭಾರತಾಂತ್‍ಚ್ ಉಬ್ಜಾಲ್ಲಿ ಮ್ಹಣ್ ಸಾಬೀತ್ ಕೆಲ್ಯಾರ್ ತಾಂಕಾಂ ಚಡಿತ್ ಫಾಯ್ದೊ ಆಸಾ. ಅಶೆಂ ಹೊ ದೇಶ್ ಹಿಂದ್ವಾಂಚೊ, ತೆ ಹಾಂಗಾಚೆ ಹಕ್ಕಾಚೆ ಮನಿಸ್; ಮುಸ್ಲಿಮ್ ಆನಿ ಕ್ರಿಸ್ತಾಂವ್ ಭಾಯ್ರ್ ಥಾವ್ನ್ ಆಯಿಲ್ಲೆ ಆಸ್ತಾಂ ತಾಂಕಾಂ ಹಾಂಗಾಚೆಂ ಹಕ್ಕ್ ನಾ ಮ್ಹಣ್ ಕಿತೆಂ ತೆ ಪಾತ್ಯೆವ್ನ್ ಆನಿ ಚಲೊನ್ ಆಯ್ಲ್ಯಾತ್, ತೆಂ ಮುಂದರುನ್ ವ್ಹರುಂಕ್ ಅಸಲೊ ಏಕ್ ಮತೀಯ್ ವಾದ್ ತಾಂಕಾಂ ವ್ಹಡ್ ಉಪ್ಕಾರಾಕ್ ಪಡ್ತಾ. ತಶೆಂ ಆಜ್ ಅಸಲೆ ಚರಿತ್ರೆಗಾರ್ ಭಾರತಾಂತ್ ಧಾರಾಳ್ ಮಾಪಾನ್ ಉಬ್ಜೊನ್‍ಂಚ್ ಆಸಾತ್. ತಿತ್ಲೆಂ ಮಾತ್ರ್ ನ್ಹಯ್, ಆರ್ಯನ್ ಕುಳಿ ಭಾರತಾಂತ್‍ಚ್ ಉಬ್ಜಾಲ್ಲಿ ಮ್ಹಣ್ ಆಪ್ಲ್ಯಾ `ಸಂಸೊಧಾ’ ದ್ವಾರಿಂ ಪಾಸಾರ್ಚೆ ವಿದ್ವಾಂಸ್ ಉಣೆಂ ನಾಂತ್.

ಥೊಡೆ ಪಾವ್ಟಿಂ ಆಮಿ ಸಬಾರ್ ತೆಂಪಾ ಥಾವ್ನ್ ವಿವಿಧ್ ಕಾರಣಾಂಕ್ ಲಾಗೊನ್ ಪಾತ್ಯೆವ್ನ್ ಆಯಿಲ್ಲಿಂ ‘ಸತಾಂ’ ನಿಜಾಕೀ ಸೊಧ್ ಕರ್ನ್ ದಾಕವ್ಯೆತ್‍ಗೀ ಮ್ಹಣ್ ಆಮಿ ಪಳಯ್ಚೆ ಪಡ್ತಾ. ಫಕತ್ ಸತ್ ಸೊಧ್ ಕೆಲ್ಯಾರ್ ಮಾತ್ರ್ ಹ್ಯಾ ಸತಾ ಪಾಟ್ಲ್ಯಾನ್ ವಚ್ಯೆತ್ ಶಿವಾಯ್ ಸತ್ ಸ್ಥಾಪಿತ್ ಕರ್ಚ್ಯೆ ಪ್ರಕ್ರಿಯೆಂತ್ ನ್ಹಯ್. ದಾಖ್ಲ್ಯಾಕ್ ಆದಿಂ ಮಾಗಾ ಥಾವ್ನ್ ಚಡ್ ಕರ್ನ್ ಕೊಂಕಣಿ ಸಮಾಜೆಂತ್ ಗುಂಡಾಯೆನ್ ರೊಂಬ್‍ಲ್ಲಿ ಏಕ್ ಪಾತ್ಯೆಣಿ ಮ್ಹಳ್ಯಾರ್, ಸೊಳಾವ್ಯಾ ಸತ್ರಾವ್ಯಾ ಶತಮಾನಾಂತ್ ಗೊಂಯಾಂತ್ ಪೊಡ್ತುಗಿಜಾಂನಿ ಚಾಲ್ತೆರ್ ಹಾಡ್‍ಲ್ಲ್ಯಾ ಇಂಕ್ವಿಜಿಸಾಂವಾಕ್ (inquisition) ಲಾಗೊನ್ ಜಿಎಸ್‍ಬಿ ತಶೆಂ ಹೆರ್ ಹಿಂದು ಲೊಕಾನ್ ಗೋಂಯ್ ಸಾಂಡ್ಲೆಂ ಮ್ಹಳ್ಳೆಂ. ಜಾಯ್ತೊ ಕೊಂಕ್ಣಿ ಕ್ರಿಸ್ತಾಂವ್ ಲೋಕ್‍ಯಿ ಆಪ್ಲ್ಯಾ ಪುರ್ವಜಾಂನಿ ಗೊಂಯಾಂ ಥಾವ್ನ್ ಪೊಳಾಪಳ್ ಘೆಂವ್ಕ್ ಹೆಂ ಕಾನೂನ್‍ಂಚ್ ಕಾರಣ್ ಮ್ಹಣ್ ಆಜೂನ್ ಪಾತ್ಯೆತಾ. ಪುಣ್ ಸತಾಚೆಂ ಸೊಧ್ ಕರ್ನ್ ವೆತಾನಾ ವೆಗ್ಳೊಚ್ ವಿಚಾರ್ ಝಳ್ಕಾತಾ.

ಹೆಂ ಕಾನೂನ್ ಪುಡ್ತುಗೆಜಾಂನಿ ಫಕತ್ ತಾಂಚ್ಯಾ ಆಡಳ್ತ್ಯಾಖಾಲ್ ಆಸ್ಲೆಲ್ಯಾ ಪರ್ನ್ಯಾ ಗೊಯಾಂತ್ (ತೀಸ್‍ವಾಡಿ, ಬಾರ್ದೆಸ್ ಆನಿ ಸಾಸ್ಟಿ ತಾಲೂಕಾಂನಿ) ನವಿ ಸಾಮಾಜಿಕ್ ವೆವಸ್ಥಾ ಆಸಾ ಕರುಂಕ್ ಧರ್ಮಾಚ್ಯಾ ಆಧಾರಾನ್ ರಚ್‍ಲ್ಲೆಂ ರಾಜಕೀಯ್ ಹಾತೆರ್ ಜಾವ್ನಾಸ್‍ಲ್ಲೆಂ. ಹ್ಯಾ ಕಾನೂನಾಕ್ ಸ್ವತಾಚೆ ಮ್ಹಳ್ಳೆ ನೇಮ್ ಆನಿ ಕಾಯ್ದೆ ಆಸ್‍ಲ್ಲೆ. ಪಾಶ್ಚಿಮಾತ್ಯ್ ಕ್ರಿಸ್ತಾಂವ್ ಧರ್ಮಾಚ್ಯಾ ಸ್ವರೂಪಾಕ್ ವಿರೊಧ್ ವೆಚ್ಯಾ ಸರ್ವ್ ಆಚರಣಾಂಚೆರ್ ಹ್ಯೆ ವೆವಸ್ಥೆನ್ ಖಾಡುಂ ಘಾಲೆಂ ಜಾಲ್ಲ್ಯಾನ್ ನವ್ಯಾನ್ ಕನ್ವೆಡ್ತರ್ ಜಾಲ್ಲ್ಯಾ ಕ್ರಿಸ್ತಾಂವಾಂನಿ ತಾಂಚ್ಯಾ ಪುರ್ವಿಲ್ಯಾ ಧರ್ಮಾಚಿಂ ಆಚರಣಾಂ, ತಶೆಂಚ್ ಹ್ಯಾ ಪ್ರದೇಶಾಂತ್ಲ್ಯಾ ಅಕ್ರಿಸ್ತಾಂವಾಂನಿ ಉಗ್ತ್ಯಾನ್ ಕರ್ಚಿಂ ತಾಂಚ್ಯಾ ಧರ್ಮಾಚಿಂ ಆಚರಣಾಂ ಸಾಂಡಿಜೆ ಪಡ್ಲಿಂ. ತರೀ ತವಳ್ಚ್ಯೆ ಸಮಾಜೆಂತ್ಲ್ಯಾ ಉಂಚ್ಲ್ಯಾ ವರ್ಗಾನ್, ವಿಶೇಸ್ ಕರ್ನ್ ಕ್ರಿಸ್ತಾಂವ್ ಬಾಮುಣ್, ಸಾರಸ್ವತ್ ಬಾಮುಣ್ ಆನಿ ಚಾಡ್ಡ್ಯಾಂನಿ ಆಪ್ಲ್ಯಾ ಸಮಾಜಿಕ್, ಆರ್ಥಿಕ್ ತಶೆಂ ರಾಜಕೀಯ್ ಲಾಭಾಖಾತಿರ್ ಹಾಕಾ ಪಾಟಿಂಬೊ ದಿಲೊ.

ಕೊಂಕಣಿ ಲೋಕ್ ಗೊಂಯಾಂ ಥಾವ್ನ್ ಪೊಳಾಪೊಳ್ ಘೆಂವ್ಕ್ ಇಂಕ್ವಿಜಿಸಾಂವ್ ಮಾತ್ರ್ ಕಾರಣ್ ನ್ಹಯ್ ತೆಂ ಸಬಾರ್ ಸಂಸೊಧ್ ಆಮ್ಕಾಂ ದಾಕವ್ನ್ ದಿತಾತ್. ತಶೆಂ ಪಳೆಂವ್ಕ್ ಗೆಲ್ಯಾರ್, ಇಂಕ್ವಿಜಿಸಾಂವ್ ಯೆಂವ್ಚ್ಯೆ ಪಯ್ಲೆಂಚ್ ಸಬಾರ್ಸೊ ಕೊಂಕಣಿ ಲೋಕ್ ವಿವಿಧ್ ಕಾರಣಾಂಕ್ ಲಾಗೊನ್ ಗೊಂಯಾಂ ಥಾವ್ನ್ ದೆಶಾಂತರ್ ಗೆಲ್ಲೊ ಆಸಾ. ಇಂಕ್ವಿಜಿಸಾಂವಾಚ್ಯಾ ಕಾಳಾರ್‍ಯಿ ಪುಡ್ತುಗೆಜಾಂಚ್ಯಾ ಆಡಳ್ತ್ಯಾಖಾಲ್ ಆಸ್ಲೆಲ್ಯಾ ಪ್ರದೇಶಾಂ ಭಾಯ್ಲೊ ಕೊಂಕಣಿ ಲೋಕ್ ಆಪ್ಲೊ ವ್ಯಾಪಾರ್ ವಾಡಂವ್ಕ್, ಸಾಗ್ವಳೆಕ್ ಬರೊ ಜಾಗೊ ಸೊಧುನ್, ಉಂಚ್ಲ್ಯಾ ಕಾಮಾಂಚ್ಯಾ ಸೊಧ್ನೆರ್, ದುಕೊಳಾಕ್ ಲಾಗೊನ್, 1553, 1570, 1682ಂತ್ ಆಯಿಲ್ಲ್ಯಾ ಮಾರೆಕಾರ್ ಪಿಡೆಕ್ ಲಾಗೊನ್, ತಶೆಂಚ್ ಮರಾಠ, ಮುಗಲ್ ಆನಿ ಬಿಜಾಪುರ್ ಅದಿಲ್‍ಶಾಹಿ ರಾಜ್ವಟ್ಕೆಂನಿ ಗೊಂಯಾಂ ವಯ್ರ್ ತವಳ್ ತವಳ್ ಘಾಲುನ್ ಆಸ್ಲೆಲ್ಯಾ ದಾಡಿಕ್ ಲಾಗೊನ್ ಜಮ್ಯಾ ಜಮ್ಯಾಂನಿ ಗೊಂಯ್ ಸಾಂಡುನ್ ಭಾರತಾಚ್ಯಾ ಹೆರ್ ರಾಜ್ಯಾಂಕ್ ಜಾಗ್ಯಾಂತರ್ ಜಾಲಾ.

ಇಂಕ್ವಿಜಿಸಾಂವಾಂ ದ್ವಾರಿಂ ಹಜಾರೊಂ ಲೊಕಾಕ್ ಜಿವೆಶಿಂ ಮಾರ್ಲೆಂ, ಅಶೆಂ ಏಕ್ ಚಿಂತಪ್‍ಯೀ ಚಾಲ್ತೆರ್ ಆಸಾ. ಆಲನ್ ಮಚಾದೊ ಹಾಣೆಂ ಬರಯಿಲ್ಲೆಂ ಸಂಸೊಧ್  ಪುಸ್ತಕ್, Goan inquisition: Facts, fiction, factoids, ಹಾಚ್ಯೆ ಪ್ರಕಾರ್, ಕ್ರಿ.ಶ. 1640 ಥಾವ್ನ್ 1773 ಪರ್ಯಾಂತ್ ಗೊಂಯಾಂತ್ ಜಾಲ್ಲ್ಯಾ ಇಂಕ್ವಿಜಿಸಾಂವಾಚ್ಯೆ ಝಡ್ತೆಂತ್ 8,075 ಲೊಕಾಂಚಿ ಝಡ್ತಿ ಜಾಲಿ. ಹಾಂತುಂ ಫಕತ್ 204 ಲೊಕಾಕ್ ಮಾತ್ರ್ ಮರ್ಣಾಚಿ ಶಿಕ್ಷಾ ಫಾವೊ ಜಾಲಿ. ತಶೆಂ ಮ್ಹಳ್ಯಾರ್ ಸುಮಾರ್ 285 ವರ್ಸಾಂನಿ ಇಂಕ್ವಿಜಿಸಾಂವಾಕ್ ಬಲಿ ಜಾಲ್ಲೆ ಮನಿಸ್ 204. ಫಕತ್ ಇತ್ಲೆ ಇಂಕ್ವಿಜಿಸಾಂವಾಕ್ ಬಲಿ ಜಾಲೆ ದೆಕುನ್ ಇಂಕ್ವಿಜಿಸಾಂವ್ ವ್ಹಡ್ ಇಜಾ ನ್ಹಯ್ ಆಸ್‍ಲ್ಲಿ ಮ್ಹಳ್ಳೊ ವಾದ್ ಹೊ ನ್ಹಯ್. ಖಂಡಿತ್ ಇಂಕ್ವಿಜಿಸಾಂವ್ ಏಕ್ ಮನ್ಶಾ ವಿರೋಧಿ ಆನಿ ಧರ್ಮಾ ವಿಶಿಂ ಕಾಂಟಾಳೊ ಹಾಡ್ಚೆ ತಸಲೆಂ ಕಾನೂನ್. ತಶೆಂ ಮ್ಹಣ್ ಇಂಕ್ವಿಜಿಸಾಂವಾನ್ ಗೊಂಯ್ಚೆಂ ಸತ್ಯನಾಸ್ ಕೆಲೆಂ ಮ್ಹಳ್ಳೊ ಉಲ್ಟೊ ವಾದ್‍ಯೀ ಸಾರ್ಕೊ ನ್ಹಯ್. ಅಶೆಂ ಸತ್ ಸ್ಥಾಪಿತ್ ಕರ್ಚೆಂ ಸೊಡ್ನ್ ಸತಾಚೊ ಸೊಧ್ ಕೆಲ್ಲ್ಯಾನ್ ಸಮಾಜೆಚೆಂ ಬರೆಂ ಜಾತಾ ಆನಿ ಆಮ್ಚೆ ಥಂಯ್ ಆಸ್‍ಲ್ಲಿಂ ಚೂಕ್ ಚಿಂತ್ಪಾಂ ಸಾರ್ಕಿಂ ಕರ್ಚೆಂ ಸಾಧ್ಯ್ ಜಾತಾ.

ಚಾರಿತ್ರಿಕ್ ಸತಾಂಚೊ ದಾಖ್ಲೊ ಕರ್ತಾನಾಂಯೀ ಚಡಿತ್ ಜಾಗ್ರುತ್ಕಾಯ್ ಸಾಂಬಾಳಿನಾ ತರ್, ಚರಿತ್ರೆಕಾರಾಚಿಂ ಥೊಡಿಂ ಥೊಡಿಂ ಧೋರಣಾಂ ಚರಿತ್ರೆಚ್ಯಾ ದಸ್ತಾವೆಜಾಂತ್ ದಾಖಲ್ ಜಾವ್ನ್ ಫುಡಾರಾಂತ್ ಚಡಿತ್ ಸಂಕಷ್ಟಾಂಕ್ ಕಾರಣ್ ಜಾಂವ್ಚಿ ಸಾಧ್ಯತಾ ಆಸಾ. ತಸಲಿ ಜಾಗ್ರುತ್ಕಾಯ್ ಹರ್ ಎಕಾ ಸಂಸೊಧ್‍ಕಾರಾಕ್ ಮಾತ್ರ್ ನ್ಹಯ್ ಇತರ್ ಲೇಖಕಾಂಕ್‍ಯೀ ಆಸಾಜೆ ಜಾಲ್ಲಿ ಗರ್ಜ್ ಆಸಾ. ನಾ ತರ್, ಮುಕ್ಲ್ಯೆ ಪಿಳ್ಗೆಕ್ ಆಮಿ ಅಥ್ವೆಂಚ್ ಸಾಹಿತ್ಯ್ ಹಾತಾಂತರ್ ಕರ್ನ್ ಅನ್ಯಾಯ್ ಆದಾರ್ಚ್ಯಾ ರಿಸ್ಕೆರ್ ಪಡ್ತಾಂವ್. ಏಕ್ ದಾಖ್ಲೊ ದಿಂವ್ಚೊ ತರ್, ಕ್ರಿಸ್ತಾಂವ್ ವೊವ್ಯೊ ವೇರ್ಸ್ ದಾಖ್ಲೊ ಕರ್ತಾನಾ ಲೇಖಕಾಂನಿ ಸಬಾರ್ ಚುಕಿ ಕೆಲ್ಲ್ಯೊ ದಿಷ್ಟಿಕ್ ಪಡ್ತಾತ್. ಜಾಂವ್ಕ್ ವೊವಿಯೊ ವೇರ್ಸ್ ಜಾನಪದ್ ಪ್ರಾಕಾರ್ ಆನಿ ತೊಂಡಿ ಸಾಹಿತ್ಯ್. ಸಬಾರ್ ಪಾವ್ಟಿಂ ಎಕ್ಲ್ಯಾ ಥಾವ್ನ್ ಎಕ್ಲ್ಯಾಕ್ ವೆತಾನಾ ಕಾಳ್ ಪಾಶಾರ್ ಜಾಲ್ಲೆಬರಿಚ್ ಕಾಂಯ್ ಥೊಡೊ ಬದ್ಲಾವ್ ವಾ ನವೊ ಅರ್ಥ್ ಉಬ್ಜೊಂಚೊ ಸಹಜ್. ಹೆಂ ಸರ್ವ್ ಎಕ್ಯೆ ಪರಿಧೆ ಭಿತರ್ ಒಪುನ್ ಘೆವ್ಯೆತ್. ತರಿಪುಣ್ ಹೆಂ ವೆಗ್ಳ್ಯಾಚ್ ಸ್ಥರಾಕ್ ವೆತಾನಾ ಮಾತ್ಸೊ ಗೊಂದೊಳ್ ಉಬ್ಜೊಂಚೊ ಸಹಜ್. ದಾಖ್ಲ್ಯಾಕ್ ಆದಿಂ ಮುದಿ ಶಿಂವ್ತಾನಾ ಗಾಂವ್ಚೊ ಆಸ್‍ಲ್ಲೊ ಏಕ್ ಕೊಂಕಣಿ ವೇರ್ಸ್ ಜಾವ್ನಾಸಾ ‘ಬಾಗ್ಲಾರ್ ಕಿತ್ಯಾಕ್ ಉಬೊ ಹೊರೆತಾ’. ಹಾಂಗಾಸರ್ ‘ನಷ್ಟ್ ಜಾಯ್ತ್ ತುಕಾ’ ವಾ ‘ನಷ್ಟ್ ಜಾಯ್ತ್ ಮ್ಹಾಕಾ’ ಮ್ಹಳ್ಳ್ಯೆವಿಶಿಂ ಗೊಂದೊಳ್ ಆಸಾ. ಎಕಾದವೆಳಾ ಹೊ ವೇರ್ಸ್ ಹೊಕ್ಲೆಚ್ಯಾ ದಿಷ್ಟಿಕೊನಾ ದ್ವಾರಿಂ ಗಾಯ್ಲಾ ತರ್, ಕಾಂಯ್ಚ್ ಗೊಂದೊಳ್ ಉಬ್ಜೊಂಚಿ ಸಾಧ್ಯತಾ ನಾ. ಪುಣ್ ಥೊಡ್ಯಾ ಲೇಖಕಾಂನಿ ಹ್ಯೆ ವಿಶಿಂ ಚತ್ರಾಯ್ ಕರಿನಾಸ್ತಾಂ, ಫಕತ್ ಕಿತೆಂ ಆಯ್ಕಾಲಾಂ ತೆಂಚ್ ದಾಖ್ಲೊ ಕೆಲಾ. ಹೆಂ ದಾಖಲ್ ಕೆಲ್ಲ್ಯಾ ‘ಸಾಂಬಾರ್ಡೊ’ ಲೇಖಕ್ ಜೋನ್ ಬಾಪ್ತಿಸ್ತ್ ಲೋಬೊಕ್ ಆಸ್‍ಲ್ಲಿ ಸ್ಪಷ್ಟತಾ ಇತರ್ ಆಧುನಿಕ್ ಲೇಖಕಾಂಕ್ ನಾ ಮ್ಹಳ್ಳೆಂ ಸುಸ್ತಾತಾ. ಆಯ್ಕಾಲ್ಲೆಂ ಕಾಂಯ್ ಇಲ್ಲೆಂ ತಜ್ವೀಜ್ ಕರ್ನ್ ತಾಚೆಂ ಮಾತ್ಸೆಂ ಪಠ್ಯ್ ಅವಲೋಕನ್ (textual analysis)

ಕರ್ಚ್ಯೆ ಥಂಯ್ ಸತಾಚೆಂ ಸೊಧ್ ಕರ್ಚಿ ಪ್ರಕ್ರಿಯಾ ಆಮ್ಕಾಂ ಆಧಾರ್ ಜಾತಾ.

ಇತ್ಲೆಂ ಮ್ಹಳ್ಯಾ ಉಪ್ರಾಂತ್ ಸತಾಚೆಂ ಸೊಧ್ ಕರ್ಚೆಂ ಕಾಮ್ ಧಾದೊಸ್ಕಾಯೆಚೆಂ ಮ್ಹಣ್ ನ್ಹಯ್. ಥೊಡೆ ಪಾವ್ಟಿಂ ಸತಾಚೆಂ ಸೊಧ್ ಕೆಲ್ಲ್ಯಾ ವ್ಯಕ್ತಿಕ್ ಉಗ್ಡಾಪೆಂ ಜಾಲ್ಲ್ಯಾ ಸತಾ ದ್ವಾರಿಂ ನಿಜಾಕೀ ದೂಖ್ ಭೊಗಾತ್, ಕಾಂಟಾಳೊ ಉಬ್ಜಾತ್ ಆನಿ ತೊ/ತಿ ಧೆದೆಸ್ಪೊರ್ ಜಾಯ್ತ್. ದೆಕುನ್‍ಂಚ್ ಹ್ಯಾ ಸಂಸಾರಾಂತ್ಲ್ಯೊ ಥೊಡ್ಯೊ ಥೊಡ್ಯೊ ಪ್ರಭಾವಿತ್ ಸಕ್ತ್ಯೊ ಸತಾಚೆಂ ಸೊಧ್ ಕರುಂಕ್ ಸೊಡಿನಾಂತ್. ವಿಶೇಸ್ ಕರ್ನ್ ಸರ್ಕಾರ್ ಆಪ್ಣಾಕ್ ಋಣಾತ್ಮಕ್ ರಿತಿಂ ದಾಕಂವ್ಚೆಂ ಸತ್ ಲಿಪಂವ್ಚೆಂ ಹರ್ ಪ್ರೇತನ್ ಕರ್ತಾ. ಪುಣ್ ಹರ್‍ಎಕ್ ಜವಾಬ್ದಾರೆಚ್ಯಾ ಸಂಸೊಧಾಕಾಕ್ ಸತಾಕ್ ಸಾಕ್ಸ್ ದಿಂವ್ಚಿ ವಿಶೇಸ್ ಜವಾಬ್ದಾರಿ ಆಸಾ. ಹೆಂ ತಾಕಾ ಸಾಧ್ಯ್ ನಾ ತರ್, ತಾಣೆಂ ತೆಂ ಕಾಮ್ ಸೊಡ್ನ್ ದುಸ್ರಿ ಕಸಲಿಯೀ ವ್ಯಾಪ್ತ್ ಧರ್ಚಿ ಸೂಕ್ತ್. ಸತಾಚೆಂ ಸೊಧ್ ಕರ್ಚೆಂ ಏಕ್ ವಯ್ವಾಟ್ ವಾ ಬಿಸ್ನೆಸ್ ಕರುಂಕ್ ಜಾಯ್ನಾ. ತೆಂ ಕಾಮ್ ಏಕ್ ಮಿಸಾಂವ್ (mission) ಮಿಸಾಂವ್ ಕಾಮಾಂತ್ ವಯ್ವಾಟಾಚೊ ದಿಷ್ಟಿಕೋನ್ ನಾ. ಥಂಯ್ ಆಸಾ ಫಕತ್ ಸಮಾಜೆಚೆಂ ಸ್ವಾಸ್ಥ್ಯ್ ಬರೆಂ ಕರ್ಚೊ ಉದ್ದೇಶ್.

ಪ್ರಸ್ತುತ್ ಅಂಕ್ಯಾಂತ್ ವಿವಿಧ್ ಕಾಲೆತಿಚಿಂ ಚಾರ್ ಸಂಸೊಧ್ ಲೇಖನಾಂ ತುಮ್ಕಾಂ ವಾಚುಂಕ್ ಮೆಳ್ತಾತ್. ಹಿಂ ಚಾರ್‍ಯೀ ಲೇಖನಾಂ ಚಡ್ ಕರ್ನ್ ಸತಾಚೆಂ ಸೊಧ್ ಕರ್ತಾತ್ ಮಾತ್ರ್ ನ್ಹಯ್ ಜಾಣ್ವಾಯ್ ಚಡಯ್ತಾತ್. ರಾಮಾಯಣ ಭಾರತಾಚೆಂ ಏಕ್ ವರ್ತೆಂ ಪುರಾಣ್. ಪುಣ್ ಭಾರತಾಂತ್ ಶೆಂಭರಾಂನಿ ವ್ಯಕ್ತಿಂನಿ ಬರಯಿಲ್ಲಿಂ ರಾಮಾಯಣ ಮೆಳ್ತಾತ್. ವಿವಿಧ್ ಲೇಖಕಾಂನಿ ತಾಂಚ್ಯಾ ತಾಂಚ್ಯಾ ಸಂದರ್ಭಾಕ್ ಆನಿ ಉದ್ದೇಶಾಕ್ ಸರಿ ಜಾವ್ನ್ ಮೂಳ್ ಚಿಂತ್ಪಾಕ್ ಕಸಲೆಂಯೀ ಆಯ್ಬ್ ಹಾಡಿನಾಸ್ತಾಂ ರಾಮಾಯಣ ಲಿಕ್ಲಾಂ. ತಶೆಂ ಮ್ಹಣ್ ಏಕ್ ಮಾತ್ರ್ ರಾಮಾಯಣ ಅಧಿಕೃತ್ ಮ್ಹಣ್ ಒಪುನ್ ಘೆಂವ್ಕ್ ಜಾಯ್ನಾ. ತರಿಕೀ ದುರದೃಷ್ಟವಶಾತ್, ಆಜ್ ತಸಲೆಂ ಏಕ್ ಪ್ರೇತನ್ ಭಾರತಾಂತ್ ಚಲೊನ್ ಆಸಾ. ಕೊಂಕ್ಣೆಂತ್‍ಯೀ ಸೊಳಾವ್ಯಾ ಶೆಕ್ಡ್ಯಾಂತ್ ರಾಮಾಯಣ ಆಸ್‍ಲ್ಲೆಂ ಮ್ಹಳ್ಳೆಂ ಸತ್ ನಿಜಾಕೀ ವಿಜ್ಮಿತ್ ಹಾಡ್ಚ್ಯೆ ತಸಲೆಂ. ಹ್ಯಾ ರಾಮಾಯಣಾಚಿ ಪುರ್ತಿ ಪ್ರತಿ ಉಪಲಬ್ದ್ ನಾ ತರೀ, ಮೆಳ್‍ಲ್ಲೆ ಅವಸ್ವರ್ ತಜ್ವೀಜ್ ಕರ್ತಾನಾ ವಾಲ್ಮೀಕಿ ರಾಮಾಯಣಾಕ್ ಆನಿ ಹ್ಯಾ ಕೊಂಕ್ಣೆಚ್ಯಾ ರಾಮಾಯಣಾಕ್ ಸಬಾರ್ ಮಹತ್ವಾಚೆ ವ್ಯತ್ಯಾಸ್ ಆಸಾತ್ ಮ್ಹಳ್ಳೆಂ ಹಾಂಗಾಚ್ಯಾ ಲೇಖಕಾನ್ ದಾಕವ್ನ್ ದಿಲಾಂ.

ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ, ಮಹಾಬಳೇಶ್ವರ್ ಸೈಲ್ ಏಕ್ ವ್ಹಡ್ ನಾಂವ್. ತಾಣೆಂ ಸುರ್ವೆರ್ ಮರಾಟಿಂತ್ ಬರಂವ್ಕ್ ಸುರು ಕೆಲ್ಲೆಂ ತರೀ, ಕ್ರಮೇಣ್ ಆಪ್ಲಿ ಮಾಂಯ್‍ಭಾಸ್ ಕೊಂಕ್ಣೆಂತ್ ಲಿಕುಂಕ್ ಸುರು ಕೆಲೆಂ. ಕೊಂಕ್ಣೆಕ್ ಲಾಬ್‍ಲ್ಲಿ ಏಕ್ ಮಾತ್ರ್ ಸರಸ್ವತಿ ಸಮ್ಮಾನ್ ಪ್ರಶಸ್ತಿ ಸೈಲಾಕ್ ಮೆಳ್ಳ್ಯಾ ಮ್ಹಳ್ಳೆಂ  ಹಾಂಗಾಸರ್ ಗುಮಾನ್ ದೀಜಯ್ ಜಾಲ್ಲೊ ವಿಷಯ್. ತಾಚ್ಯಾ ಸಾಹಿತ್ಯಾ ವಿಷಿಂ ನಿಷ್ಕರ್ಷ್ ಕೆಲ್ಲೆಂ ಏಕ್ ಲೇಖನ್‍ಯೀ ಹ್ಯಾ ಅಂಕ್ಯಾಂತ್ ಆಸಾ. ಸುಶಾಂತ್ ನಾಯ್ಕ್ ಹಾಚೆಂ ಪುಸ್ತಕ್ `ಕಥಾಮಂಥನ್’ ವಯ್ರ್ ಕೆಲ್ಲೊ ಏಕ್ ವಿಮರ್ಸೊಯೀ ಹ್ಯಾ ಅಂಕ್ಯಾಂತ್ ಆಸಾ.

ಜಿಎಸ್‍ಬಿ ಕೊಂಕಣಿ ಸಮುದಾಯ್ ಕೊಂಕ್ಣೆಚೊ ಏಕ್ ವ್ಹಡ್ ಸಮುದಾಯ್. ಪುಣ್ ತ್ಯಾ ಸಮುದಾಯಾ ಭಿತರ್ ಇತರ್ ವಿವಿಂಗಡ್ ಸಮುದಾಯ್ ಆಸೊನ್ ತಾಂಚಿ ಸಂಸ್ಕೃತಿ, ಆಚಾರ್ ವಿಚಾರ್ ವೆವೆಗ್ಳೆ ಆಸಾತ್. ಭಾಲಾವಲೀಕರ್ ಪಂಗಡ್ ಜಿಎಸ್‍ಬಿ ಸಮುದಾಯಾ ಭಿತರ್ಲೊ ಏಕ್ ಪ್ರಮುಕ್ ಪಂಗಡ್ ಆಸೊನ್ ವಿಶೇಸ್ ಸಂಸ್ಕೃತಿ ಪಾಳ್ನ್ ಆಯ್ಲಾ. ತ್ಯಾ ಸಮುದಾಯಾಂಚ್ಯಾ ಧಾರ್ಮಿಕ್ ಆನಿ ಸಾಂಸ್ಕೃತಿಕ್ ಆಚಾರ್ ವಿಚಾರಾಂಚೆರ್ ಝಳಕ್ ಘಾಲ್ಚೆಂ ಆನ್ಯೇಕ್ ಲೇಖನ್ ಆಸಾ.

ತಶೆಂಚ್ ಕೊಂಕಣಿ ಲಗ್ನಾ ಸಾಹಿತ್ಯಾಕ್ ಲಗ್ತಿ ಆನ್ಯೇಕ್ ಲೇಖನ್‍ಯೀ ಆಸಾ. ಹ್ಯೆ ಶಿಂಕ್ಳೆಂತ್ ಪಾಟ್ಲ್ಯಾ ದೋನ್ ವರ್ಸಾಂನಿ ಹೆಂ ತಿಸ್ರೆಂ ಲೇಖನ್ ಆಸೊನ್, ಕೊಂಕಣಿ ಲಗ್ನಾ ಸಾಹಿತ್ಯ್ ಅರ್ಥ್ ಕರ್ನ್, ತ್ಯಾ ಪ್ರಕಾರ್ ಚಡಿತ್ ಆಟೊವಾಕ್ ಹಿ ಲೇಖನಾ ಶಿಂಕಳ್ ಆಧಾರ್ ಜಾತಲಿ ಮ್ಹಳ್ಳೊ ಆಮ್ಚೊ ಭರ್ವಸೊ.