ಕೊಂಕ್ಣಿ ಲಗ್ನಾ ಸಾಹಿತ್ಯ್: ಏಕ್ ಪಠ್ಯ್ ಅವಲೋಕನ್

ಮೆಲ್ವಿನ್ ಎಸ್. ಪಿಂಟೊ

ಸಾರ್ ಸಬ್ದ್: ವೇರ್ಸ್, ಕಥೊಲಿಕ್, ಕುಡ್ಮಿ, ಜಿಎಸ್‍ಬಿ, ಪಠ್ಯ್ ಅವಲೋಕನ್

ಸಾರಾಂಶ್

ಕೊಂಕ್ಣಿ ಲಗ್ನಾ ಸಾಹಿತ್ಯ್ ಕೊಂಕ್ಣಿ ಲೋಕ್‍ವೇದ್ ಪ್ರಾಕಾರಾಚೆಂ ಏಕ್ ಅಪೂರ್ವ್ ಸಾಹಿತ್ಯ್. ಧರ್ಮಾಕ್ ಉತ್ರೊನ್, ಕೊಂಕ್ಣಿ ಸಂಸ್ಕೃತೆಚ್ಯಾ ಮಾಂತಾರ್ ಆಜೂನ್ ಕೊಂಕ್ಣೆಚೆಂ ಖಾಶೆಲೆಂ ಲೋಕ್‍ವೇದ್ ಹ್ಯಾ ಪ್ರಾಕಾರಾಂತ್ ಪಳೆವ್ಯೆತ್. ಕಥೊಲಿಕ್, ಕುಡ್ಮಿ ಆನಿ ಜಿಎಸ್‍ಬಿ ಕೊಂಕ್ಣಿ ಲಗ್ನಾ ಸಾಹಿತ್ಯಾಚೆಂ ಪಠ್ಯ್ ಅವಲೋಕನ್ ಕರ್ತಾನಾ, ಹ್ಯಾ ಲೋಕ್‍ವೇದಾಚೆಂ ಮೂಳ್ ಸಾಮಾನ್ಯ್ ಮ್ಹಳ್ಳೆಂ ಕಳೊನ್ ಯೆತಾ ಮಾತ್ರ್ ನ್ಹಯ್ ಸಬಾರ್ ಸಂಗ್ತಿ ಎಕಾಮೆಕಾ ತಾಳ್ ಪಡ್ಚೆಂ ದಿಸೊನ್ ಯೆತಾ. ವೇರ್ಸ್ ಮ್ಹಣ್ಚ್ಯಾ ಲಗ್ನಾ ಸಾಹಿತ್ಯಾಚೆಂ ಪಠ್ಯ್ ಅವಲೋಕನ್ ಕರ್ನ್ ಹ್ಯಾ ತಿನೀ ಸಮುದಾಯಾಂನಿ ಆಜೂನ್ ಪಾಳುನ್ ಆಯಿಲ್ಲ್ಯೊ ಸಾಂಸ್ಕೃತಿಕ್ ರಿತಿ ರಿವಾಜಿ ಹಾಂಗಾ ತಜ್ವೀಜ್ ಕೆಲ್ಯಾತ್. ಚಡ್ತಾವ್ ಸ್ತ್ರಿಯಾಂನಿ ರಚ್‍ಲ್ಲೆಂ ಹೆಂ ಲಗ್ನಾ ಸಾಹಿತ್ಯ್, ಪುರುಷ್ ಪ್ರಧಾನ್ ಸಾಮಾಜಿಕ್ ವ್ಯವಸ್ಥೆಚ್ಯಾ ಸಂಸ್ಕೃತೆ ಪರಿಧಿ ಭಾಯ್ರ್ ವಚೊಂಕ್ ನಾ ತೆಂ ಹಾಂಗಾ ಗುಮಾನಾಕ್ ಯೆಂವ್ಚೊ ವಿಚಾರ್.