ವಿಮರ್ಶಾ ಲೇಖನ್: ಕೊಂಕ್ಣಿ ನಾಟಕ್ ಆದಿಂ ಆನಿ ಆತಾಂ: ಎಡ್ಡಿ ಸಿಕೇರಿಚ್ಯಾ ‘ನವ್-ರಂಗ್ ನಾಟಕಾಂ’ ಪುಸ್ತಕಾಚೊ ವಿಮರ್ಸೊ

ಮೆಲ್ವಿನ್‌ ಎಸ್. ಪಿಂಟೊ

Scopus Author ID: 57189887469

https://orcid.org/0000-0001-8797-1288

ಪ್ರಸ್ತಾವನ್ 

ಕೊಂಕ್ಣಿ ನಾಟಕ್ ಶೆತ್ ಪ್ರಸ್ತುತ್ ಕಶೆಂ ಆಸಾ ಮ್ಹಣ್ ಪಳೆಂವ್ಕ್‌ ಗೆಲ್ಯಾರ್ ಭರ್ಶಿಕ್ ಭೊಗ್ಣಾಂ ಉದೆಂವ್ಚಿಂ ಸಹಜ್. ಗೊಂಯಾಂತ್ ಆಜೂನ್ ತಿಯಾತ್ರ್ ನಾಟಕ್ ಪ್ರಾಕಾರ್ ಲೊಕಾಮೊಗಾಳ್ ಜಾವ್ನ್ ಉರ‍್ಲಾ ಆನಿ ತ್ಯಾ ಪ್ರಕಾರ್ ಕಾಂಯ್ ಪ್ರದರ್ಶನಾಂ ಚಾಲು ಆಸಾತ್. ಪುಣ್ ಮಂಗ್ಳುರಿ ಕೊಂಕ್ಣಿ ಭೊಂವೊರಾಂತ್ ಕೊಂಕ್ಣಿ ನಾಟಕ್ ಪ್ರಾಕಾರ್ ಅಸ್ಕತ್ ಜಾವ್ನ್ ಯೆತಾಗಾಯ್ ಮ್ಹಳ್ಳೆ ದುಬಾವ್ ಖಂಡಿತ್ ಜಾತಾತ್. ತಶೆಂ ಮ್ಹಣ್ ನಾಟಕ್ ಪ್ರದರ್ಶನಾಂ ಚಲಾನಾಂತ್ ಮ್ಹಣ್ ನ್ಹಯ್. ಥಂಯ್ ಹಾಂಗಾ ಜರೂರ್ ನಾಟಕ್ ವೆದಿರ್ ಯೆತಾತ್. ಕೊಂಕ್ಣಿ ನಾಟಕ್ ಸಭಾ ಕಿತ್ಲೆಶಾಗೀ ವರ್ಸಾಂ ಥಾವ್ನ್ ವಾರ್ಷಿಕ್ ನಾಟಕ್ ಸ್ಪರ್ಧೊ ಚಲೊವ್ನ್ ಆಸಾ ಆನಿ ತ್ಯಾ ಸ್ಪರ್ಧ್ಯಾಕ್ ಯೆಂವ್ಚೆ ನಾಟಕ್ ಬೋವ್‍ಚ್ ಥೊಡೆ ತರೀ ಇನಾಮಾಂ ದಿಂವ್ಚ್ಯಾಕ್ ಖಂಡಿತ್ ಕಾಂಯ್ ಥೊಡೆಂ ಮಟ್ಟ್ ಆಸ್‍ಲ್ಲೆಚ್ ಮ್ಹಣ್ ಖಂಡಿತ್ ಸಾಂಗ್ಯೆತ್.