ಚರಿತ್ರಾ ಆನಿ ಸಾಹಿತ್ಯ್: ವಿಜೆಪಿಚ್ಯಾ ಕಾದಂಬರಿಂನಿ ಸಾಹಿತ್ಯ್ ಕಿತ್ಲೆಂ, ಚರಿತ್ರಾ ಕಿತ್ಲಿ?

Melwyn S. Pinto

Scopus Author ID: 57189887469
https://orcid.org/0000-0001-8797-1288

(ವಿಜೆಪಿಚ್ಯಾ ಜಲ್ಮ್ ಶತಾಬ್ದಿ ಸಂದರ್ಭಿಂ ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ಸಾಂ ಲುವಿಸ್ ಯುನಿವರ್ಸಿಟಿಂತ್ ಮಾಂಡುನ್ ಹಾಡ್‌ಲ್ಲ್ಯಾ ಚಕ್ರ್ ಸತ್ರೆಂತ್ ಮಂಡನ್ ಕೆಲ್ಲೊ ದಿಕ್ಸೂಚಿ ಪ್ರಬಂಧ್)

ವಿಜೆಪಿಚ್ಯಾ ಸಾಹಿತ್ಯಾ ವಿಶಿಂ ಆಮಿ ಭಾಸಾಭಾಸ್ ಕರ‍್ತಾನಾ ಮತಿಂತ್ ದವರಿಜೆ ಜಾಲ್ಲ್ಯೊ ಸಂಗ್ತಿ ಮ್ಹಳ್ಯಾರ್, ತೊ ಏಕ್ ಕ್ರಿಯಾಶೀಲ್, ಸಾಹಿತಿಕ್ ವ್ಯಕ್ತಿ; ಚರಿತ್ರೆಗಾರ್ ನ್ಹಯ್. ಆಮಿ ತಾಕಾ ಚರಿತ್ರೆಚೊ ಸೊದ್ ವಾವ್ರಾಡಿ ಮ್ಹಳ್ಳೆಬರಿ ಪಳೆಂವ್ಕ್ ಸಾಧ್ಯ್ ನಾ. ದುಸ್ರ್ಯಾನ್, ವಿಜೆಪಿಚೊ ಧ್ಯೇಯ್ ಆನಿ ಉದ್ದೇಶ್ ತಾಕಾ ಸ್ಪಷ್ಟ್ ಆಸ್‍ಲ್ಲೆ – ಆಪ್ಲ್ಯಾ ಸಮುದಾಯಾಕ್ ತಿಚ್ಯಾ ಚಾರಿತ್ರಿಕ್ ಆಟೆವಿಟ್ಯಾವಿಶಿಂ ಸಾಹಿತಿಕ್ ರಿತಿಂ ಜಾಣ್ಕಾರಿ ದಿಂವ್ಚಿ. ತಿಸ್ರ್ಯಾನ್, ತಾಚೊ ಉದ್ದೇಶ್ ಸಾಹಿತ್ಯ್ ರಚ್ಚೆಂ ಶಿವಾಯ್ ಅಕೆಡೆಮಿಕ್ ಜಾಣ್ವಾಯ್ ದಿಂವ್ಚಿ ನ್ಹಯ್ ಆಸ್‍ಲ್ಲೊ. ತಶೆಂ ಆಸ್ತಾಂ, ಆಜ್ ಆಮಿ ತಾಚೆಂ ಸಾಹಿತ್ಯ್ ವಾಚ್ತಾನಾ, ತಾಣೆಂ ತೆಂ ಸಾಹಿತ್ಯ್ ರಚ್‍ಲ್ಲೊ ಕಾಳ್ ಆನಿ ಪಾಟ್‍ಭುಂಯ್ ಕಾಂಯ್ ಥೊಡಿ ಅರ್ಥ್ ಕರ‍್ನ್ ಘೆಂವ್ಚಿ ಗರ್ಜ್ ಆಸಾ. ಅಶೆಂ ಜಾತಾನಾ ಮಾತ್ರ್ ತಾಚ್ಯಾ ಸಾಹಿತ್ಯಾ ವಿಶಿಂ, ತಾಚ್ಯಾ ಚರಿತೆಚ್ಯಾ ದಿಷ್ಟಿಕೊನಾ ವಿಶಿಂ ಆಮ್ಕಾಂ ಉದೆಂವ್ಚಿ ಚೂಕ್ ಸಮ್ಜಣಿ ಪರಿಹಾರ್ ಜಾಯ್ತ್. ತ್ಯೆ ದಿಶಿಂ ಜೊಕ್ತೆಂ ಪ್ರೇತನ್ ಹ್ಯಾ ಚರ್ಚಾ ಸತ್ರಾಂತ್ ಜಾಂವ್ದಿ ಮ್ಹಣ್ ಆಶೆತಾಂ.