ಬಂದಡೆಂತ್ಲೊ ಮೋಗ್, ವಳ್ವಳೆ ಆನಿ ಘಟಾಯ್: ಅರ್ಥ್ ಆನಿ ಆಕಾಂತಾಚ್ಯೆ ಆಟೊಲ್ಗೆಂತ್ ಖಡಾಪಾಚಿ ‘ದೆವಾಚ್ಯೆಕುರ್ಪೆನ್’ ಶಿಂಕಳ್

Richard Rego

ಸಾರಾಂಶ್:

ಪ್ರಸ್ತುತ್ ಲೇಖನ್ ವಿ.ಜೆ.ಪಿ. ಸಲ್ಡಾನ್ಹಾಚ್ಯಾ (‘ಖಡಾಪ್’) ‘ದೆವಾಚ್ಯೆ ಕುರ್ಪೆನ್’ (1962-1975) ಮ್ಹಳ್ಳ್ಯಾ ಸಾತ್ ಚಾರಿತ್ರಿಕ್ ಕಾದಂಬರಿ ಶಿಂಕ್ಳೆಚೆಂ ಗುಂಡಾಯೆನ್ ವಿಶ್ಲೇಷಣ್ ಕರ‍್ತಾ. ಹಿ ಶಿಂಕಳ್ 18ವ್ಯಾ ಶೆಕ್ಡ್ಯಾಚ್ಯೆ ಆಕೇರಿಕ್ ಟಿಪ್ಪು ಸುಲ್ತಾನಾನ್ ಕೆನರಾ ಕ್ರಿಸ್ತಾಂವ್ ಕುಟ್ಮಾಚಿ ಕೆಲ್ಲ್ಯೆ ವೀದ್‌-ವಾವ್ಳೆಕ್ ಆನಿ ವಳ್ವಳ್ಯಾಂಕ್ ಜಿವಂತ್ ಹಾಡ್ತಾ. ಕ್ರೀಸ್ತೀ ಸಮುದಾಯಾಚ್ಯಾ ನಷ್ಟಾಕ್ ಆನಿ ಬಂದಡೆಕ್ ಆನಿ ತ್ಯಾ ಮಾರಿಫಾತ್ ತಾಂಚ್ಯಾ ಆಕಾಂತಾಕ್ (Captivity-Trauma) ಚಾರಿತ್ರಿಕ್ ಸಾಕ್ಷಿ ದಿತಾ. ಕರಾವಳೆಚ್ಯಾ ಕ್ರೀಸ್ತೀ ಸಮುದಾಯಾಚ್ಯಾ ಇತಿಹಾಸಿಕ್ ಉಗ್ಡಾಸಾಂತ್ ಪುರ್ವೊನ್ ಗೆಲ್ಲ್ಯಾ ಧೆದೆಸ್ಪರಾಯೆಚ್ಯಾ ಹ್ಯಾ ಘಡಿತಾಕ್ ಖಡಾಪಾಚಿ ಚಾರಿತ್ರಿಕ್ ಕಾಣಿಂಯೆ ಶಿಂಕಳ್, ಆಯ್ಚೆ ಜಿಣ್ಯೆ-ಲಗ್ತಿ ವಳ್ವಳ್ಯಾಂಚೆ ದೇವ್-ಶಾಸ್ತಿರ್ ಕಶೆಂ ಬಾಂದುನ್ ಹಾಡ್ತಾ ಮ್ಹಣ್ ವರವ್ನ್ ಪಳೆತಾ.

ಸಾಯ್ಕಾಯಾಟ್ರಿಸ್ಟ್ ವಿಕ್ಟರ್ ಫ್ರಾಂಕಲಾಚಿ ಲೋಗೊಥೆರಪಿ (Logotherapy) ಆನಿ ಕ್ಯಾಥಿ ಕರೂತಾಚಿ ಆಕಾಂತಾಚಿ ತಾವಿಲ್ (Trauma Hermeneutics) ಸಿದ್ಧಾಂತಾಚೆ ಆಟೊಲ್ಗೆ ಮಧೆಂ ಖಡಾಪಾಚ್ಯೊ ಹ್ಯೊ ಕಾಣಿಂಯೊ ಚಾಳುನ್ ಪಳೆಲ್ಯಾತ್. ಕರೂತಾಚೆಂ ‘ತಡವಿಲ್ಲಿ ಸಾಕ್ಸ್’ (Belated Witnessing) ತೆಂತುಪಣ್ ಕಶೆಂ ದೆವಾಚ್ಯೆ ಕುರ್ಪೆನ್ ಶಿಂಕಳ್ ಬಾಂದುನ್ ಹಾಡ್ಚ್ಯಾಂತ್ ತಡವಾಚೊ ವೇಳ್ (temporal delay) ಆನಿ ಕ್ರೀಸ್ತೀ ಸಮುದಾಯಾಚೊ ‘ನಾಪ್ಣಾಯಿಲ್ಲೊ ಅನ್ಭೋಗ್‌ಚೊ‌ (unclaimed experience) ಹಾಂಚ್ಯೆ ಮಧೆಂ ಕೂಕ್ ಲಿಪಾ ಖೆಳ್ತಾ ಮ್ಹಣ್ ಲೇಖನ್ ಸ್ಪಷ್ಟ್ ಕರ‍್ತಾ. ಕಾದಂಬರಿಯೆಂನಿ ಪಿಂತ್ರಾಯಿಲ್ಲ್ಯಾ ಬಂದಡ್ ಆನಿ ನಷ್ಟಾ ಮಧೆಂಯೀ, ಫ್ರಾಂಕಲಾಚ್ಯಾ ‘ಅರ್ಥಾ ಪಾಸುನ್ ನಿಚೆವಾ’ ಸಿದ್ಧಾಂತಾ ಮಾರಿಫಾತ್, ಕ್ರಿಸ್ತಾಂವ್ ಪಾತ್ರಾಂಕ್ ಸೊಡ್ವಣೆಚೊ ‘ಅರ್ಥ್’ (Meaning) ಆನಿ ಘಟಾಯ್ (Resilience) ಕಶೆಂ ಮೆಳ್ತಾ ಮ್ಹಣ್ ಲೇಖನ್ ಮುಖೆಲ್ ತರ‍್ಕ್ ಮಾಂಡ್ತಾ. ಶೆವಟಿಂ, ಕೆನರಾ ಕ್ರಿಸ್ತಾಂವಾಂಚ್ಯಾ ಇತಿಹಾಸಿಕ್ ಆನಿ ಸಾಂಸ್ಕೃತಿಕ್ ಉಗ್ಡಾಸಾಂ ಮಧೆಂ, ಖಡಾಪಾಚೊ ಮೋಗ್, ಭಾವಾಡ್ತ್ ಆನಿ ಸಾಹಿತ್ಯಿಕ್ ರೊವೊಂದ್, ಸಮಾಜೆಕ್ ಎಕ್ವಟಾಂವ್ಚೊ ಅರ್ಥ್ ಕಶೆಂ ಬಾಂದುನ್ ಹಾಡ್ತಾ ತೆಂ ಹೆಂ ಲೇಖನ್ ಚರ‍್ಚಾ ಕರ‍್ತಾ.

ಸಾರ್ ಸಬ್ದ್:

ಖಡಾಪ್/ವಿ.ಜೆ.ಪಿ., ಚಾರಿತ್ರಿಕ್ ಕಾದಂಬರಿ, ದೆವಾಚ್ಯೆ ಕುರ್ಪೆನ್ ಕಾದಂಬರಿ ಶಿಂಕಳ್, ಕೆನರಾ ಕ್ರಿಸ್ತಾಂವಾಂಚಿ ಬಂದಡ್, ಟಿಪ್ಪು