A review of HM Pernal’s poetry anthology Zonel: ನವೋದಯ್, ನವ್ಯ್ ಉತ್ರೊನ್ ಪ್ರಗತಿಶೀಲ್ ಧೋರಣಾ ತೆವ್ಶಿಂ: ಎಚ್ಚೆಮಾಚ್ಯಾ ಜನೆಲ್ ಕವಿತಾ ಸಂಗ್ರಹಾಚೊ ವಿಮರ್ಸೊ

Melwyn S. Pinto

This review essay does a critical appraisal of the recent poetry anthology Zonel by H.M. Pernal. The essay argues that while HM’s poetry has evolved over the years, his metaphoric acumen has faded largely due to a conscious decision to write what he claims to ‘dark’ poetry. While dark poetry has its place, it needs to emerge naturally from the overwhelming emotions of the poet and not out of compulsion. Some poems in the anthology do bear witness to dark developments around the world and the country. However, the poet has explored a different poetic terrain that can leave the readers of his earlier poetry much disappointed.

ಕೊಂಕ್ಣಿ ಕಾವ್ಯೆಂ, ವಿಶೇಸ್ ಕರ‍್ನ್ ಕಾನಡಿ ಲಿಪಿಂತ್ಲೆಂ ಕೊಂಕ್ಣಿ ಕಾವ್ಯೆಂ, ಅಸ್ಕತ್ ಜಾವ್ನ್ ಯೆಂವ್ಚ್ಯಾ ವಕ್ತಾ, ಜನೆಲ್ ತಸಲೆ ಕಾವ್ಯಾ ಸಂಗ್ರಹ್ ಕೊಂಕ್ಣಿ ಕಾವ್ಯಾಕ್ ಚಡಿತ್ ಹುರುಪ್ ದೀಂವ್ಕ್ ಸಕ್ತಾತ್. ಹ್ಯಾ ಜಮ್ಯಾಂತ್ಲಿಂ ದೋನ್ ತೀನ್ ಕವಿತಾಂ, ಜಾಂವ್ಕ್ ಆದ್ಲ್ಯಾ ಸಂಗ್ರಹಾಂನಿ ಪ್ರಕಟ್ ಜಾಲ್ಯಾಂತ್ ತರೀ ಹ್ಯಾ ಅಂಕ್ಯಾಕ್ ತಿಂ ಕಾಂಯ್ ಪರ್ಕಿಂ ಮ್ಹಣ್ ಭಗಾನಾಂತ್. ಕಾವ್ಯಾಚಿ ಸಕತ್‌ಚ್ ತಸಲಿ. ಬರೆಂ ಕಾವ್ಯ್ ಸದಾಂ ಸಕಾಳಿಕ್. ಕೊಂಕ್ಣೆಂತ್ ನವೆಸಾಂವ್ ಹಾಡ್‌ಲ್ಲ್ಯಾ ಥೊಡ್ಯಾಚ್ ಕವಿಂ ಪಯ್ಕಿ ಎಚ್ಚೆಮ್ ಎಕ್ಲೊ ಮ್ಹಳ್ಳೆಂ ಕಾವ್ಯಾ ಪ್ರೇಮಿಂನಿ ಮಾಂದುನ್ ಘೆಜೆ ಜಾಲ್ಲಿ ಗಜಾಲ್. ತರಿಪುಣ್, ಜನೆಲ್ ಸಂಗ್ರಹಾಂತ್ ಎಚ್ಚೆಮ್ ಮ್ಹಳ್ಳ್ಯಾ ಖಾಸ್ ಕವಿನ್ ಆಪುಣ್ ‘ಡಾರ್ಕ್’ ಕಾವ್ಯೆಂ ಬರಯ್ತಾಂ ಮ್ಹಣ್ ಆಪ್ಣಾಚೆರ್‌ಚ್ ಬಂದಡ್ ಘಾಲ್ಯಾಗೀ ಮ್ಹಳ್ಳೆಂ ಚಿಂತಾಪ್ ಕವಿತಾ ಪ್ರೇಮಿಂಕ್ ಯೇತ್ ತರ್ ನವಾಲ್ ನಾ. ಸಂಸಾರ್ ಸಗ್ಳೊ ಅಸೂಕ್ಶ್ಮ್ ಜಾವ್ನ್ ಸರ್ವಾಂನಿ ಎಕಾಮೆಕಾ ದುಬಾವಾನ್‌ಚ್ ಪಳೆಂವ್ಚ್ಯಾ ಸಂದಿಗ್ಥ್ ಪರಿಗತೆಂತ್ ಆಜ್ ಕಾವ್ಯ್ ಪ್ರಾಕಾರ್ ಇತರ್ ಪ್ರಾಕಾರಾಂ ತಿತ್ಲೊಚ್ ವಾ ಚಡಿತ್ ಗರ್ಜೆಚೊ ತೆಂ ಹರ್ ಸಹೃದಯಿನ್ ಮಾಂದುನ್ ಘೆಜೆ ಜಾಲ್ಲೊ ವಿಚಾರ್. ಎಚ್ಚೆಮಾ ತಸಲ್ಯಾ ಕವಿಂನಿ ಹೆಂ ಖಂಡಿತ್ ಮಾಂದುನ್ ಘೆತ್ಲಾಂ ತೆಂ ಜನೆಲ್ ಸಂಗ್ರಹಾ ಥಾವ್ನ್ ಕಳಿತ್ ಜಾತಾ. ತರಿಪುಣ್ ಸ್ವಭಾವಿಕ್ ಕಾವ್ಯಾಕ್ ಕಸಲಿಚ್ ಬಂದಡ್ ನಾಕಾ ಮ್ಹಳ್ಳೆಂ ಹರ್ ಕವಿಂನಿ ಸಮ್ಜೊನ್ ಘೆತ್ಲೆಂ ತರ್ ಕೊಂಕ್ಣಿ ಕಾವ್ಯಾಚೆಂ ಆನಿಕೀ ಚಡಿತ್ ಬರೆಂ ಜಾತೆಲೆಂ. ಹರ್ ಎಕಾ ಕವಿಚೊ, ಲೇಕಕಾಚೊ ಏಕ್ ‘magnum opus’ ವಾ ಅತಿ ಶ್ರೇಷ್ಟ್ ಪುಸ್ತಕ್ ಮ್ಹಣ್ ಆಸ್ತಾ. ಎಚ್ಚೆಮಾನ್ ತಾಚೊ ಕವಿತೆಚೊ magnum opus ಎದೊಳ್‌ಚ್ ಬರವ್ನ್ ಕಾಡ್ಲಾಗೀ ವಾ ಆನಿಕೀ ಯೇಂವ್ಕ್ ಬಾಕಿ ಉರ‍್ಲಾಗೀ ಕಳಿತ್ ನಾ. ಪುಣ್ ಜನೆಲ್ ತಾಚೊ ಕವಿತೆಚೊ magnum opus ಅಸೊ ಮ್ಹಾಕಾ ದಿಸಾನಾ.