ಎಡ್ವಿನ್ ಆನಿ ಎಡ್ವಿನಾಚೆಂ ಸಾಹಿತ್ಯ್

ಮೆಲ್ವಿನ್ ಎಸ್. ಪಿಂಟೊ

Scopus Author ID: 57189887469
https://orcid.org/0000-0001-8797-1288

ಆಧುನಿಕ್ ಡಿಜಿಟಲ್ ಆನಿ ಕೊರ್ಪೊರೇಟ್ ಸಂಸಾರಾಂತ್ ಸಾಹಿತ್ಯಾಚಿ ಗರ್ಜ್ ಆಸಾಗೀ? ವಾ ಸಾಹಿತ್ಯ್ ಪ್ರಸ್ತುತ್‌ಗೀ ಮ್ಹಳ್ಳೆಂ ಸವಾಲ್ ಖಂಡಿತ್ ಚಾಲ್ತೆರ್ ಆಸಾ. ಶಾಳಾಂನಿ ಆನಿ ಕೊಲೆಜಿಂನಿ ಪಳೆಯ್ಲ್ಯಾರ್ ಸಾಹಿತ್ಯ್ ವಿಷಯಾಂಕ್ ಆಸಕ್ತ್ ಆಸೊನ್ ವಿಂಚ್ಚಿಂ ವಿದ್ಯಾರ್ಥಿಂ ಚಡ್ ಮೆಳಾನಾಂತ್. ನಾ ಮ್ಹಣ್ಚ್ಯಾಕ್ ಇಂಗ್ಲಿಷ್ ಭಾಸ್ ಪದ್ಯುತ್ತರ್ ಶಿಕೊಂಕ್ ಕಾಂಯ್ ಥೊಡಿಂ ಭುರ್ಗಿಂ ಯೆತಾತ್. ಪುಣ್ ತಾಂತ್ಲಿಂ ಕೊಣ್‌ಯೀ ಸಾಹಿತ್ಯಾಚ್ಯಾ ಮೊಗಾನ್ ಯೆಂವ್ಚಿಂ ಮ್ಹಣ್ಚ್ಯಾಕ್‌ಯೀ, ಎಂ.ಎ. ಕರ್‍ನ್ ಉಪ್ರಾಂತ್ ಇಸ್ಕೊಲಾಂನಿ ವಾ ಕೊಲೊಜಿಂನಿ ಟೀಚರ್ ಜಾವ್ನ್ ಕಾಮ್ ಮೆಳ್ತಾ ಮ್ಹಳ್ಳ್ಯಾ ಭರ್ವಶ್ಯಾನ್ ಯೆಂವ್ಚಿಂಚ್ ಚಡ್. ಖಂಯ್ಚ್ಯಾ ಕೊಲೆಜಿಂನಿ ಆಜ್ ಪಳೆಲ್ಯಾರ್‌ಯೀ ಬಿಸ್ನೆಸ್, ಕಂಪ್ಯೂಟರ್ ಆನಿ ಕೊಮರ್ಸಾ ತಸಲ್ಯಾ ವಿಷಯಾಂಕ್ ಖಾಯ್ಸ್ ಚಡ್. ತಶೆಂ ತರ್, ಆಧುನಿಕ್ ಸಂಸಾರಾಂತ್ ಭಾಶೆ ಸಾಹಿತ್ಯಾಕ್, ವಾ ಜನಪದ್ ಸಾಹಿತ್ಯಾಕ್ ಚಡಿತ್ ಮೋಲ್ ನಾ ಮ್ಹಣ್ ಜಾಲೆಂ.

ಪುಣ್ ಹಕೀಗತ್ ಹಿ ಕೀ, ಆಯ್ಚ್ಯಾ ಕೊರ್ಪೊರೆಟ್ ಸಂಸಾರಾಂತ್ ವ್ಯಕ್ತಿ ಯಾಂತ್ರಿಕ್ ಜಿಣಿ ಜಿಯೆವ್ನ್ ಯಂತ್ರಾಂಬರಿ ಜಾತಾನಾ ತಾಕಾ ಕಾಂಯ್ ಸುಶೆಗ್ ದಿಂವ್ಚೊ ಸಂಗೀತ್ ವಾ ಸಾಹಿತ್ಯ್ ಲಗ್ತಿ ಕಲೆನ್ ಶಿವಾಯ್ ತಾಣೆಂ ಚೊಡ್ಚ್ಯಾ ಪಯ್ಶಾಂನಿ ನ್ಹಯ್. ಎಕಾ ವರ್ದೆ ಪರ್ಮಾಣೆ, ಸಾಟ್ ಆನಿ ದೋನ್ ಪ್ರತಿಶತ್ ಕೊರ್ಪೊರೆಟ್ ವ್ಯಕ್ತಿ ಆಜ್ ಕಾಮಾ ಲಗ್ತಿ ದಬಾವ್ ಪಿಡೆಕ್ (stress) ಬಲಿ ಜಾವ್ನ್ ಆಪ್ಲಿ ಭಲಾಯ್ಕಿ ಭಿಗ್ಡಾವ್ನ್ ಆಸಾತ್ (Workplace stress, n.d.). ಆಜ್ ಚಡ್ತಾವ್ ವಿದ್ಯಾ ಸಂಸ್ಥೆ ವಿದ್ಯಾರ್ಥಿಂಕ್ ಕಾಮಾಂ ಮೆಳೊಂಕ್ ಸಹಕಾರ್ ದಿಲ್ಲ್ಯೆ ತಿತ್ಲೆಂ ತಾಣಿಂ ಸಮಾಜೆಂತ್ ಕಶೆಂ ಬರೆ ನಾಗರಿಕ್ ಜಾವ್ನ್ ಜಿಯೆಜೆ ಮ್ಹಳ್ಳ್ಯೆ ವಿಶಿಂ ಚಡಿತ್ ಗುಮಾನ್ ದಿತಾತ್‌ಗೀ ಮ್ಹಳ್ಳ್ಯೆವಿಶಿಂ ದುಬಾವ್ ಉಟ್ತಾತ್.

ಅಸಲ್ಯಾ ಪರಿಗತೆಂತ್ ದೆವಾಧಿನ್ ಎಡ್ವಿನ್ ಜೆ. ಎಫ್. ಡಿ’ಸೋಜಾಚೆಂ ಕೊಂಕ್ಣಿ ಸಾಹಿತ್ಯ್ ಆನಿ ತ್ಯಾ ಸಾಹಿತ್ಯಾನ್ ವಾಚ್ಪ್ಯಾಂಕ್ ಖಾಸ್ ಕರ್‍ನ್, ಆನಿ ಒಟ್ಟಾರೆ ಸಮಾಜೆಚ್ಯಾ ದೆಣ್ಗೆಕ್ ಕಸಲಿ ದೆಣ್ಗಿ ದಿಲ್ಯಾ ಮ್ಹಳ್ಳ್ಯಾಚೊ ವಿಚಾರ್ ಆಟಾಪ್ಚ್ಯಾ ಸಂಸೊಧ್ ಲೇಖನಾಂಚೊ ಹೊ ವಿಶೇಸ್ ಅಂಕೊ ಆಮಿ ಭಾಯ್ರ್ ಹಾಡ್ನ್ ಆಸಾಂವ್. ಎಡ್ವಿನಾನ್ ಬರಯಿಲ್ಲೆಂ ಒಟ್ಟಾರೆ ಸಾಹಿತ್ಯ್ ಕಾಂಯ್ ಉಣೆಂ ಮ್ಹಳ್ಯಾರ್‌ಯೀ ತೀಸ್ ಪಾಂತ್ತೀಸ್ ಹಜಾರ್ ಪಾನಾಂಕ್ ಮಿಕ್ವಾತ್. ಕೊಂಕ್ಣೆಂತ್ ತಿತ್ಲೆಂ ವಿಶಾಲ್ ಬರಪ್ ಆನಿ ಕೊಣೆಂಯೀ ಕೆಲಾಂ ಮ್ಹಣ್ ಪಾತ್ಯೆಂವ್ಚೆಂ ಕಷ್ಟ್. ಹ್ಯಾ ಅಂಕ್ಯಾಚ್ಯಾ ಲೇಖಕಾಂನಿ ವಿವರಾಂವ್ಚ್ಯೆ ಬರಿ, ಎಡ್ವಿನಾಚ್ಯಾ ಸಾಹಿತ್ಯಾಂತ್ ಫಕತ್ ವಿಶಾಲಾತಾಯ್ ಮಾತ್ರ್ ನ್ಹಯ್ ಚಿಂತ್ಪಾಚಿ ಕ್ರಿಯಾಶೀಲತಾ ಆನಿ ಭಾಶೆಚಿ ವಿವಿಧತಾಯ್ ಆನಿ ಪ್ರಯೋಗ್‌ಶೀಲತಾ ಆಸ್‌ಲ್ಲಿ ಆಸಾ. ತಾಚ್ಯಾ ಬರ್ಪಾಂನಿ ತೊಚ್ (ಎಡ್ವಿನ್) ದಿಸ್ತಾ ಮ್ಹಳ್ಳೊ ‘ಆರೋಪ್ಯೀ ಆಸಾ ವಾ ತಾಚ್ಯಾ ಬರ್ಪಾಂನಿ ಹರ್ ಏಕ್ ಪಾತ್ರ್ ಎಕಾಚ್ ರಿತಿಂ ಉಲಯ್ತಾತ್ ಮ್ಹಳ್ಳೊ ಶಿಣ್‌ಯೀ ಆಸಾ. ಹೆಂ ಕಿತ್ಲೆಂ ಸತ್ ಮ್ಹಳ್ಳೆಂ ಸೊದ್ ಕರುಂಕ್ ಕಾಂಯ್ ಅವ್ವಲ್ ಪಠ್ಯ್ ಅವಲೋಕನ್ ಕರ್‍ಚೆಂ ಪಡಾತ್. ಪುಣ್ ಬರ್ಪಾಚೆಂ ವಿಶೇಸ್ ದೆಣೆಂ ನಾಸ್ತಾಂ ಕೊಣೆಂಯೀ ಎಡ್ವಿನಾಬರಿ ಬರಂವ್ಕ್ ಜಾಯ್ನಾ ಮ್ಹಳ್ಳೆಂ ನಕ್ಕಿ ಸಾಂಗ್ಯೆತ್. ತಶೆಂ ಪಳೆಂವ್ಕ್ ಗೆಲ್ಯಾರ್ ಬರ್ಪಾಚೆಂ ದೆಣೆಂ ಆಸ್ಚೆ ಮನಿಸ್ ಸಬಾರ್ ಮೆಳ್ತಿತ್ ಕೊಂಕ್ಣೆಂತ್. ಪುಣ್ ಎಡ್ವಿನಾಬರಿ ಕಷ್ಟ್ ಕಾಡ್ನ್, ಸೊಸ್ಣಿಕಾಯೆನ್ ಬರಂವ್ಚಿ ಸಕತ್ ಸಗ್ಳ್ಯಾಂಕ್ ಆಸಾತ್ ಮ್ಹಣ್ ಒಪ್ಚೆಂ ಕಷ್ಟಾಂಚೆಂ. ತ್ಯಾ ಖಾತಿರ್‌ಚ್ ಎಡ್ವಿನ್ ಕೊಂಕ್ಣೆಚ್ಯಾ ಸಂದರ್ಭಾಕ್ ಪ್ರಮುಖ್ ಜಾತಾ.

ಫ್ರೆಂಚ್ ತತ್ವ್ ಶಾಸ್ತ್ರಿ ಆನಿ ಲೇಖಕ್ ರೊಲಂಡ್ ಬಾರ್ತ್ಸ್ ಮ್ಹಣ್ತಾ, ಏಕ್ ಲೇಖಕ್ ಆಪ್ಲೆಂ ಬರಪ್ ಸಂಪಯ್ಲ್ಯಾ ಉಪ್ರಾಂತ್ ಆಪ್ಲ್ಯಾ ಬರ್ಪಾಕ್ ಮೊರ್‍ತಾ. ಮ್ಹಳ್ಯಾರ್, ಏಕ್ ಬರಪ್ ಆಕೇರ್ ಜಾಲ್ಲೆಂಚ್ ತೆಂ ಬರಪ್ ವಾಚ್ಪ್ಯಾಚಿ ಆಸ್ತ್ ಜಾತಾ ಆನಿ ತೆಂ ತಜ್ವೀಜ್ ಕರ್‍ಚೆಂ ಹಕ್ಕ್ ವಾಚ್ಪ್ಯಾಕ್ ಆಸಾ. ಎಡ್ವಿನಾಚ್ಯಾ ಸಾಹಿತ್ಯಾ ಸಂದರ್ಭಿಂ ಹೆಂ ಆಮಿ ಒಪುನ್ ಘೆವ್ಯೆತ್‌ಗೀ? ನಿಜಾಕೀ ತಾಚ್ಯಾ ಸಾಹಿತ್ಯಾಂತ್ಲೊ ಲೇಖಕ್ ಆಪ್ಲ್ಯಾ ಬರ್ಪಾಂಕ್, ಕಾಣಿಯಾಂಕ್, ಕಾದಂಬರಿಂಕ್ ಮೆಲ್ಲೊಗೀ, ವಾ ಆಜೂನ್ ತೊ ಜಿವಂತ್‌ಚ್ ಆಸ್‌ಲ್ಲೊ? ತಾಚ್ಯಾ ಕಾದಂಬರಿಂನಿ ತೊಚ್ ಝಳ್ಕಾತಾ ತರ್, ಆನಿ ಹರ್ ಪಾತ್ರಾಂನಿ ಉಲಂವ್ಚಿ ಶೈಲಿ ಏಕ್ ಸಾರ್ಕಿ ತರ್ ಬಹುಷ ವಾಚ್ಪ್ಯಾಕ್ ಸಾಹಿತ್ಯ್ ಆನಿ ತ್ಯಾ ಸಾಹಿತ್ಯಾಚ್ಯಾ ರಚ್ನಾರಾಕ್ ವಿಂಗಡ್ ಕರ್‍ಚೆಂ ಮಾತ್ಸೆಂ ಕಷ್ಟಾಂಚೆಂ ಜಾಯ್ತ್. ತರಿಪುಣ್ ಎಡ್ವಿನಾನ್ ಆಪ್ಲ್ಯಾ ಕೃತಿಯಾಂನಿ ಬಾಂದುನ್ ಹಾಡ್‌ಲ್ಲಿಂ ಹ್ಯಾ ಮಂಗ್ಳುರಿ ವಾ ಗಲ್ಫಾಚಿ ಪಾಟ್ ಭುಂಯ್ ವಾಚ್ಪ್ಯಾನ್ ಖಂಡಿತ್ ರಿಲೇಟ್ ಕರುಂಕ್ ಸಲೀಸ್ ಮ್ಹಳ್ಳೆಂ ಗುಮಾನಾಕ್ ಯೆಂವ್ಚ್ಯೆ ತಸಲೆಂ.

ಆನ್ಯೇಕ್ ವಿಷಯ್ ಹಾಂಗಾ ಉಲ್ಲೇಖ್ ಕರ್‍ಚೊ ಗರ್ಜ್. ಎಡ್ವಿನಾಚೆಂ ಶಿಕಪ್ ಸರ್ವ್ ಜಾಲ್ಲೆಂ ಇಂಗ್ಲಿಷ್ ಮಾಧ್ಯಮಾಂತ್. ಘರಾ ತೊ ಕೊಂಕ್ಣಿ ಉಲಯ್ತಾಲೊ ಖರೆಂ. ತಶೆಂ ಮ್ಹಣ್ ಕೊಂಕ್ಣೆಚ್ಯಾಕೀ ಚಡ್ ತಾಣೆಂ ಇಂಗ್ಲಿಷ್ ವಾಚ್‌ಲ್ಲೆಂ. ತರಿಕೀ ತಾಣೆಂ ಕೊಂಕ್ಣೆಂತ್‌ಚ್ ಬರಂವ್ಕ್ ಸುರು ಕೆಲೆಂ. ಜಾಯ್ ತರ್ ತಾಕಾ ಇಂಗ್ಲಿಷ್ ಭಾಷೆಂತ್ ಬರವ್ಯೆತೆಂ ಆಸ್‌ಲ್ಲೆಂ. ಆನಿ ಅಶೆಂ ತೊ ಸಂಸಾರ್‌ಭರ್ ಆನಿಕೀ ಫಾಮಾದ್ ಜಾತೊ. ಕಿತ್ಯಾ ಖಾತಿರ್ ತಾಣೆಂ ಕೊಂಕ್ಣೆಂತ್‌ಚ್ ಬರಂವ್ಕ್ ಚಿಂತ್ಲೆಂ ಮ್ಹಳ್ಳ್ಯೆವಿಶಿಂ ನಕ್ಕಿ ಜಾಪ್ ನಾ. ಪುಣ್ ಆಪ್ಲ್ಯಾ ಮಾಂಯ್ ಭಾಶೆಂತ್ ಬರಂವ್ಚ್ಯಾಂತ್ ಆಸ್ಚೆಂ ತೆಂ ಖಾಸ್‌ಪಣ್ ಆನಿ ಸ್ವಾತಂತ್ರ್ಯ್ ಜೊಡುನ್ ಘೆತ್‌ಲ್ಲ್ಯೆ ಭಾಷೆಂತ್ ಮೆಳೊಂಕ್ ಸಾಧ್ಯ್ ನಾ ಮ್ಹಣ್ ತಾಣೆಂ ಲೆಕ್‌ಲ್ಲೆಂ ಆಸ್ಯೆತ್. ಹಾಂಗಾ ಕನ್ನಡಾಚೊ ರಾಷ್ಟ್ರ್‌ಕವಿ ಕುವೆಂಪು ಉಗ್ಡಾಸಾಕ್ ಯೆತಾ. ತೊ ಇಂಗ್ಲಿಷಾಚೊ ಪ್ರೊಫೆಸರ್ ಜಾವ್ನ್ ಆಸ್‌ಲ್ಲೊ. ಸುರ್ವೆರ್ ತಾಣೆಂಯೀ ಇಂಗ್ಲಿಷಾಂತ್ ಕವಿತಾ ಲಿಕುಂಕ್ ಆರಂಭ್ ಕೆಲ್ಲೆಂ. ತಾಚೊ ಪಯ್ಲೊ ಕವಿತಾ ಸಂಗ್ರಹ್ ಜಾವ್ನಾಸ್‌ಲ್ಲೊ ‘Beginner’s Muse’. ಪುಣ್ ಇಂಗ್ಲಿಷ್ ಕವಿ ಜೇಮ್ಸ್ ಹೆನ್ರಿ ಕಸಿನ್ಸ್ ಹಾಕಾ ಮೆಳೊನ್ ಹೊ ಕವಿತಾ ಸಂಗ್ರಹ್ ದಿಂವ್ಚೆಂ ಭಾಗ್ ಕುವೆಂಪುಕ್ ಮೆಳ್ತಾನಾ, ತಾಣೆಂ ಕುವೆಂಪುಕ್ ಸಾಂಗ್ಲೆಂ ತುಜ್ಯಾ ಮಾಂಯ್‌ಭಾಷೆಂತ್‌ಚ್ ಬರಯ್. ಅಶೆಂ ಕುವೆಂಪು ಕನ್ನಡಾಚೊ ಖ್ಯಾತ್ ಕವಿ ಜಾಲೊ.

ಎಡ್ವಿನಾಕ್ ಅಶೆಂ ಕೊಣೆಂ ತರೀ ಸಾಂಗ್‌ಲ್ಲ್ಯೆ ವಿಶಿಂ ಖಂಯ್ಸರ್‌ಯೀ ಉಲ್ಲೇಖ್ ನಾ. ಪುಣ್ ಕೊಂಕ್ಣಿ ಸೊಡ್ನ್ ಹೆರ್ ಭಾಷೆಂತ್ ತಾಣೆಂ ಬರಂವ್ಕ್ ಸುರು ಕೆಲ್ಲೆಂ ತರ್ ಇತ್ಲೆಂ ವಿಸ್ತಾರ್ ಸಾಹಿತ್ಯ್ ತೊ ಲಿಕುಂಕ್ ಸಕ್ತೊಗೀ ಮ್ಹಳ್ಳೆಂ ಸವಾಲ್‌ಯೀ ಉದೆತೆಂ. ಎಡ್ವಿನಾನ್ ಬರಂವ್ಕ್ ಆರಂಭ್ ಕೆಲ್ಲ್ಯಾ ದಿಸಾಂನಿ ಕೊಂಕ್ಣೆಂತ್ ಖಂಡಿತ್ ಬರೆಂ ಸಾಹಿತ್ಯ್ ಯೆತಾಲೆಂ. ಜೊಸಾ, ಎಟ್ಯೆಲ್, ಖಡಾಪ್ ತಸಲ್ಯಾಂಚೆಂ ಪುಷ್ಕಳ್ ಸಾಹಿತ್ಯ್ ಆಸ್‌ಲ್ಲೆಂ. ಹೆಂ ಸಾಹಿತ್ಯ್ ನಿಜಾಕೀ ಮಹತ್ವಾಚೆಂ ತರೀ ಎಕಾ ಸಮಾಜಿಕ್ ವರ್ತುಲಾಚ್ಯಾ ಭಿತರ್‍ಲೆಂ ಮ್ಹಳ್ಳೆಂ ಆಮಿ ಸಮ್ಜಾಜಯ್. ಎಡ್ವಿನಾನ್ ಕೊಂಕ್ಣಿ ಸಾಹಿತ್ಯಾಕ್ ಆನ್ಯೇಕ್ ಆಯಾಮ್ ದಿಲೊ. ತಾಚಿಚ್ ಮ್ಹಳ್ಳಿ ಖಾಶೆಲಿ ಶೈಲಿ ನ್ಹಯ್ ಆಸ್ತಾಂ, ಕೊಂಕ್ಣೆಚಿ ವ್ಯಾಪ್ತ್ ಚಡಿತ್ ವಿಸ್ತಾರ್ ಕರ್‍ಚೆಂ ಪ್ರೇತನ್ ಕೆಲೆಂ. ಅಶೆಂ ಫಕತ್ ಮಂಗ್ಳುರ್ ಪರಿಸರ್ ನ್ಹಯ್ ಆಸ್ತಾಂ, ಗಲ್ಫ್ ಮಾತ್ರ್ ನ್ಹಯ್ ಗಲ್ಫಾಚ್ಯಾ ಝುಜಾಚ್ಯಾ ಸಂದರ್ಭಾರ್ ಅಮೇರಿಕಾನ್ ಖೆಳ್ಚ್ಯಾ ರಾಜಕೀಯಾಚೆಂ, ಭಾರತಾಚ್ಯಾ ವಿದೇಶಿ ಸಂಬಂಧಾಚಿ ಕಾಂಯ್ ತರೀ ಜಾಣ್ಕಾರಿಯೀ ಆಪ್ಲ್ಯಾ ಕಾದಂಬರಿಂನಿ ಆನಿ ಬರ್ಪಾಂನಿ ದಿಂವ್ಚೆಂ ಪ್ರೇತನ್ ಕರ್‍ನ್ ಕೊಂಕ್ಣೆಕ್ ಆನಿಕೀ ಚಡಿತ್ ವಿಸ್ತಾರಾಯ್ ಹಾಡ್ಲಿ. ಹ್ಯಾ ಸರ್ವಾಚ್ಯಾ ಮಧೆಂ ಎಡ್ವಿನಾನ್ ಇಂಗ್ಲಿಷ್ ಕಾದಂಬರಿ ಕೊಪಿ ಕರ್‍ನ್ ಬರಯ್ಲಾಂ ಮ್ಹಳ್ಳೊ ಏಕ್ ಆರೋಪ್‌ಯೀ ಉಟ್ಲೊ. ಹೆಂ ಕಿತ್ಲೆಂ ನಕ್ಕಿ ಮ್ಹಳ್ಳೆಂ ಸಂಸೊಧ್ ಕರ್‍ನ್ ಕೊಣೆಂಯೀ ಎದೊಳ್ ಲಿಖ್‌ಲ್ಲೆಂ ನಾ. ಆಸಾ ತರ್ ಫಕತ್ ಭೆಷ್ಟೆಂಚ್ ಮಂಗ್ಳುರಿ ಲೊಕಾಕ್ ಸಹಜ್ ಜಾಲ್ಲ್ಯೊ ಖಬ್ರೊ ಮಾತ್ರ್. ತಶೆಂ ಮ್ಹಣ್ ತಾಚೆರ್ ಇಂಗ್ಲಿಷ್ ಕಾದಂಬರಿಂಚೊ, ವಿಶೇಸ್ ಕರ್‍ನ್ ಆಯಿನ್ ರಾಂಡಾಚೊ ಪ್ರಭಾವ್ ಖಂಡಿತ್ ಆಸ್‌ಲ್ಲೊ. ತೆಂ ತಾಣೆಂಯೀ ಒಪುನ್ ಘೆತ್ಲಾಂ. ಪುಣ್ ಸರ್ವ್ ರ್‍ಯಾಂಡಾಚೆಂಚ್ ವಾ ಆನಿ ಕೊಣಾಚೆಂಗೀ ಕೊಪಿ ಕರ್‍ನ್ ಬರಯ್ತಾಲೊ ಮ್ಹಣ್ ಬಿಲ್ಲೊ ಘಾಲ್ಚೊ ಆಮಿ ತಾಕಾ ಕರ್‍ಚೊ ವ್ಹಡ್ ಅನ್ಯಾಯ್ ಜಾವ್ನಾಸಾ. ಹಾಂಗಾ ಕುವೆಂಪುನ್ ಆಪ್ಲ್ಯಾ ವಿರೋಧಿಂಕ್ ಮ್ಹಳ್ಳೆಂ ಉತರ್ ಉಗ್ಡಾಸಾಕ್ ಹಾಡ್ಯೆತ್: ‘ನಾನೇರಿದ ಎತ್ತರಕೆ ನೀನೇರಬಲ್ಲೆಯಾ?’ (ಹಾಂವ್ ಚಡ್ಲಾಂ ತಿತ್ಲ್ಯಾ ಉಬಾರಾಯೆಕ್ ತುಂ ಚಡೊಂಕ್ ಸಕ್ಶಿಗೀ).

ತಿತ್ಲೆಂ ಮ್ಹಳ್ಯಾ ಉಪ್ರಾಂತ್, ಎಡ್ವಿನಾಚಿ ಸಾಹಿತ್ಯ್ ಶೈಲಿ ಕೊಂಕ್ಣೆಚ್ಯಾ ಸಂದರ್ಭಾಕ್ ಅತ್ವಿಚ್ ಆನಿ ‘ಪರ್ಕಿ ಕಶಿ ಆಸ್‌ಲ್ಲಿ ಮ್ಹಳ್ಳೊ ವಾದ್‌ಯೀ ಆಸಾ. ಅಶೆಂ ತಾಚೆಂ ಸಾಹಿತ್ಯ್ ‘ಸಾದ್ಯಾ ವಾಚ್ಪ್ಯಾಂಕ್ ಜಿರವ್ನ್ ಘೆಂವ್ಕ್ ಕಷ್ಟ್ ಜಾತಾಲೆಂ ಮ್ಹಳ್ಳೆಂ ಉತರ್‌ಯೀ ಆಯ್ಕೊಂಕ್ ಮೆಳ್ತಾ. ಹೆಂ ಎಕಾ ದಿಷ್ಟಿನ್ ಸತ್ ಜಾಂವ್ಕ್‌ಯೀ ಪುರೊ. ತಶೆಂ ಮ್ಹಣ್ ಎಕಾ ಭಾಷೆಚಿ ಸಾಹಿತ್ಯ್ ಶೈಲಿ ಅಶಿಚ್ ಆಸಾಜೆ ಮ್ಹಳ್ಳೆಂ ರೇಗ್ರ್ ಕಾಂಯ್ ನಾ. ಆನಿ ಸಾದ್ಯಾ ವಾಚ್ಪ್ಯಾಂಕ್ ಜಿರವ್ನ್ ಘೆಂವ್ಕ್ ಸಾಧ್ಯ್ ನಾ ಮ್ಹಳ್ಳೊ ವಾದ್‌ಯೀ ಪೊಕ್ಳೊ. ಕಿತ್ಯಾಕ್ ಏಕ್ ಸಾಹಿತಿ ಆಪ್ಲ್ಯಾ ಸಾಹಿತ್ಯಾ ಬರಾಬರ್ ಆಪ್ಲೊಚ್ ಮ್ಹಳ್ಳೊ ಏಕ್ ವಾಚ್ಪ್ಯಾ ವರ್ಗ್ ರಚ್ತಾ. ಸಂಸಾರಾಂತ್ಲ್ಯಾ ಕಿತ್ಲ್ಯಾ ವ್ಹಡ್ಲ್ಯಾ ಸಾಹಿತಿಕೀ ಸರ್ವ್ ಸಹೃದಯಿ ಮೆಚ್ವಾತಾತ್ ಮ್ಹಣ್ ಕಾಂಯ್ ನಾ. ಸರ್ವಾಂನಿ ಆಪ್ಣಾಚೆಂ ಸಾಹಿತ್ಯ್ ವಾಚಿಜೆ ಮ್ಹಳ್ಳಿ ಆಶಾ ಎಕಾ ಲೇಖಕಾಕ್ ಆಸ್ಚಿ ಸಹಜ್. ಪುಣ್ ತಸಲಿ ಆಶಾ ರಾಜಾಂವಿಕ್ ನ್ಹಯ್. ಪುಣ್ ಬರೆಂ ಸಾಹಿತ್ಯ್ ಕಾಂಯ್ ಥೊಡ್ಯಾ ದಿಸಾಂಕ್ ಮಾತ್ರ್ ಸೀಮಿತ್ ನ್ಹಯ್. ಥೊಡೆ ಪಾವ್ಟಿಂ ಥೊಡ್ಯಾಂ ಲೇಖಕಾಂಚೆಂ ಸಾಹಿತ್ಯ್ ತಾಂಚ್ಯಾ ಮರ್ಣಾ ಉಪ್ರಾಂತ್ ಚಡಿತ್ ಲೊಕಾಮೊಗಾಳ್ ಜಾಲ್ಲೆ ದಾಖ್ಲೆಯೀ ಆಸಾತ್. ಸಾಹಿತಿ ಅಮರ್ ಉರಾನಾ ಜಾಂವ್ಕ್ ಪುರೊ. ಪುಣ್ ತಾಣೆಂ ರಚ್ಲಾಂ ತೆಂ ವಿಶಿಷ್ಟ್ ಸಾಹಿತ್ಯ್ ಅಮರ್ ಉರ್‍ತಾ ಆನಿ ಸಾರ್ವ್‌ಕಾಲಿಕ್ ಜಾಂವ್ಕ್ ಸಕ್ತಾ.

ಆಮಿ ಹೊ ವಿಶೇಸ್ ಅಂಕೊ ಕಾಡುಂಕ್ ಯೋಜನ್ ಕೆಲ್ಲೆಂ ನ್ಹಯ್ ಎಡ್ವಿನಾನ್ ಕೊಂಕ್ಣೆಕ್ ದಿಲ್ಲ್ಯೆ ದೆಣ್ಗೆಚೆಂ ರೂಣ್ ಫಾರಿಕ್ ಕರುಂಕ್ (ತೆಂ ಆಮ್ಚ್ಯಾನ್ ಜಾಂವ್ಚೆಂನಾ), ಪುಣ್ ತಾಚ್ಯಾಕೀ ಚಡ್ ಕರ್‍ನ್ ಜಾತಾ ತಿತ್ಲೆಂ ತಾಚೆಂ ಸಾಹಿತ್ಯ್ ಅವಲೋಕನ್ ಕರ್‍ನ್ ತಾಚ್ಯಾ ಸಾಹಿತ್ಯಾಚೊ ಸಂಭ್ರಮ್ ಕರ್‍ಚ್ಯಾಕ್. ಪುಣ್ ತಸಲೆಂ ಕಾಮ್ ‘ಅಮರ್ ಕೊಂಕ್ಣಿ’ಚ್ಯಾ ಎಕಾ ಅಂಕ್ಯಾ ಮಾರಿಫಾತ್ ಜಾಲಂ, ಆನಿ ಜಾಯ್ತ್ ಮ್ಹಳ್ಳಿ ಭ್ರಮಿದ್ ಆಮ್ಕಾಂ ನಾ. ಹ್ಯಾ ಅಂಕ್ಯಾಂತ್ಲ್ಯಾ ಪಾಂಚ್ ಪ್ರಮುಖ್ ಸಂಸೊಧ್ ಲೇಖನಾಂ ದ್ವಾರಿಂ ಎಡ್ವಿನಾಚ್ಯಾ ಒಟ್ಟಾರೆ ಸಾಹಿತ್ಯಾಕ್ ಮಾತ್ಸೆಂ ಆಪಡ್ನ್ ತಾಂತ್ಲೆಂ ಥೊಡೆಂ ಚಾಕ್ಚೆಂ ಪ್ರೇತನ್ ಮಾತ್ರ್ ಜಾಲಾಂ ಮ್ಹಣ್ ಭೊಗ್ತಾ. ಖಂಯ್ಚ್ಯಾಯೀ ಇತರ್ ಸಾಹಿತಿಕ್ ಭಾಷೆಂತ್ ಜಾಲ್ಲೆಂ ತರ್, ಎಡ್ವಿನಾನ್ ಲಿಕ್‌ಲ್ಲ್ಯಾ ತಸಲೆಂ ಸಾಹಿತ್ಯ್ ವಿವಿಧ್ ರಿತಿಂನಿ ಅವಲೋಕನ್ ಜಾತೆಂ ಆಸ್ತೆಂ ಮಾತ್ರ್ ನ್ಹಯ್ ಚಡಿತ್ ಭಾಸಾಂನಿ ಪಾವಂವ್ಚೆಂ ಕಾಮ್‌ಯೀ ಚಲ್ತೆಂ ಆಸ್ತೆಂ ಕೊಣ್ಣಾ. ಕೊಂಕ್ಣೆಚ್ಯಾ ಸಂದರ್ಭಿಂ ಹೆಂ ಕಷ್ಟಾಂಚೆಂ ಮ್ಹಣ್ ಆಮಿ ಒಪುನ್ ಘೆಜಯ್. ಪುಣ್ ಎಡ್ವಿನಾಚೆಂ ಸಾಹಿತ್ಯ್ ಆನಿಕೀ ಚಡಿತ್ ರಿತಿಂ ಅವಲೋಕನಾಕ್, ವಿಮರ್ಷಾಕ್ ಒಳಗ್ ಜಾಯ್ಜಯ್ ತರ್, ತೆಂ ವಾಚುನ್, ಜಿರವ್ನ್ ಘೆವ್ನ್ ತ್ಯಾ ಪ್ರಕಾರ್ ತರ್ಕ್ ಕರ್‍ಚೊ ವಾಚ್ಪ್ಯಾಂಚೊ ವರ್ಗ್‌ಯೀ ಜಾಯ್ಜಯ್ ಪಡ್ತಾ. ತಾಚ್ಯಾ ಸಾಹಿತ್ಯಾಚೆರ್ ಕಾಂಯ್ ಥೊಡೆ ಪಿಎಚ್.ಡಿ ಸಂಸೊಧ್‌ಯೀ ಚಲ್ಲೆ ತರ್, ತಾಚ್ಯಾ ಸಾಹಿತ್ಯಾಚೆಂ ಅವಲೋಕನ್ ಅಕೆಡೆಮಿಕ್ ಪಾಂವ್ಡ್ಯಾರ್ ಚಡಿತ್ ರಿತಿಂ ಮಹತ್ವಾಚೆಂ ಜಾತಲೆಂ.

ಆಧಾರಾವಳ್

Workplace stress: Are you experiencing workplace stress? (n.d.). The American Institute of Stress. https://www.stress.org/workplace-stress

मेलवीन एस. पिंटो

Scopus Author ID
https://orcid.org/0000-0001-8797-1288

आधुनीक डिजिटल आनी कोरपोरेट संसारांत साहित्याची गर्ज आसागी? वा साहित्य प्रसतूतगी म्हळ्ळें सवाल खंडीत चालतेर आसा. शाळांनी आनी कोलेजिंनी पळेयल्यार साहित्य विषयांक आसक्त आसोन विंच्चीं विद्यारथीं चड मेळानांत. ना म्हणच्याक इंगलीष भास पद्युत्तर शिकोंक कांय थोडीं भुरगीं येतात. पूण तांतलीं कोणयी साहित्याच्या मोगान येंवचीं म्हणच्याकयी, एं.ए. कर्न उपरांत इसकोलांनी वा कोलोजिंनी टीचर जावन काम मेळता म्हळ्ळ्या भरवश्यान येंवचिंच चड. खंयच्या कोलेजिंनी आज पळेल्यारयी बिसनेस, कंप्यूटर आनी कोमर्सा तसल्या विषयांक खायस चड. तशें तर, आधुनीक संसारांत भाशे साहित्याक, वा जनपद साहित्याक चडीत मोल ना म्हण जालें.

पूण हकीगत ही की, आयच्या कोरपोरेट संसारांत व्यक्ती यांत्रीक जिणी जियेवन यंत्रांबरी जाताना ताका कांय सुशेग दिंवचो संगीत वा साहित्य लगती कलेन शिवाय ताणें चोडच्या पयशांनी न्हय. एका वरदे परमाणे, साट आनी दोन प्रतिशत कोरपोरेट व्यक्ती आज कामा लगती दबाव पिडेक (stress) बली जावन आपली भलायकी भिगडावन आसात (Workplace stress, n.d.). आज चडताव विद्या संसथे विद्यारथिंक कामां मेळोंक सहकार दिल्ल्ये तितलें ताणीं समाजेंत कशें बरे नागरीक जावन जियेजे म्हळ्ळ्ये विशीं चडीत गुमान दितातगी म्हळ्ळ्येविशीं दुबाव उटतात.

असल्या परिगतेंत देवाधीन एडवीन जे. एफ. डी’सोजाचें कोंकणी साहित्य आनी त्या साहित्यान वाचप्यांक खास कर्न, आनी ओट्टारे समाजेच्या देणगेक कसली देणगी दिल्या म्हळ्ळ्याचो विचार आटापच्या संसोध लेखनांचो हो विशेस अंको आमी भायर हाडन आसांव. एडविनान बरयिल्लें ओट्टारे साहित्य कांय उणें म्हळ्यारयी तीस पांत्तीस हजार पानांक मिकवात. कोंकणेंत तितलें विशाल बरप आनी कोणेंयी केलां म्हण पात्येंवचें कष्ट. ह्या अंक्याच्या लेखकांनी विवरांवच्ये बरी, एडविनाच्या साहित्यांत फकत विशालाताय मात्र न्हय चिंतपाची क्रियाशीलता आनी भाशेची विविधताय आनी प्रयोगशीलता आसल्ली आसा. ताच्या बरपांनी तोच (एडवीन) दिसता म्हळ्ळो ‘आरोप’यी आसा वा ताच्या बरपांनी हर एक पात्र एकाच रितीं उलयतात म्हळ्ळो शीणयी आसा. हें कितलें सत म्हळ्ळें सोद करुंक कांय अव्वल पठ्य अवलोकन करचें पडात. पूण बरपाचें विशेस देणें नासतां कोणेंयी एडविनाबरी बरवंक जायना म्हळ्ळें नक्की सांग्येत. तशें पळेवंक गेलयार बरपाचें देणें आसचे मनीस सबार मेळतीत कोंकणेंत. पूण एडविनाबरी कष्ट काडन, सोसणिकायेन बरंवची सकत सगळ्यांक आसात म्हण ओपचें कषटांचें. त्या खातीरच एडवीन कोंकणेच्या संदरभाक प्रमूख जाता.

फ्रेंच तत्व शासत्री आनी लेखक रोलंड बारत्स म्हणता, एक लेखक आपलें बरप संपयल्या उपरांत आपल्या बर्पाक मोरता. म्हळ्यार, एक बरप आकेर जाल्लेंच तें बरप वाचप्याची आसत जाता आनी तें तज्वीज करचें हक्क वाचप्याक आसा. एडविनाच्या साहित्या संदरभीं हें आमी ओपून घेवयेतगी? निजाकी ताच्या साहित्यांतलो लेखक आपल्या बरपांक, काणियांक, कादंबरिंक मेल्लोगी, वा आजून तो जिवंतच आसल्लो? ताच्या कादंबरिंनी तोच झळकाता तर, आनी हर पात्रांनी उलंवची शैली एक सारकी तर बहूष वाचप्याक साहित्य आनी त्या साहित्याच्या रचनाराक विंगड करचें मात्सें कष्टांचें जायत. तरिपूण एडविनान आपल्या कृतियांनी बांदून हाडल्लीं ह्या मंगळुरी वा गलफाची पाट भुंय वाचप्यान खंडीत रिलेट करुंक सलीस म्हळ्ळें गुमानाक येंवच्ये तसलें.

आन्येक विषय हांगा उल्लेख करचो गर्ज. एडविनाचें शिकप सर्व जाल्लें इंगलीष माध्यमांत. घरा तो कोंकणी उलयतालो खरें. तशें म्हण कोंकणेच्याकी चड ताणें इंगलीष वाचल्लें. तरिकी ताणें कोंकणेंतच बरवंक सुरू केलें. जाय तर ताका इंगलीष भाषेंत बरवयेतें आसल्लें. आनी अशें तो संसारभर आनिकी फामाद जातो. कित्या खातीर ताणें कोंकणेंतच बरवंक चिंतलें म्हळ्ळ्येविशीं नक्की जाप ना. पूण आपल्या मांय भाशेंत बरंवच्यांत आसचें तें खासपण आनी स्वातंतऱ्य जोडून घेतल्ल्ये भाषेंत मेळोंक साध्य ना म्हण ताणें लेकल्लें आस्येत. हांगा कन्नडाचो राष्ट्रकवी कुवेंपू उगडासाक येता. तो इंगलिषाचो प्रोफेसर जावन आसल्लो. सुरवेर ताणेंयी इंगलिषांत कविता लिकुंक आरंभ केल्लें. ताचो पयलो कविता संग्रह जावनासल्लो ‘Beginner’s Muse’. पूण इंगलीष कवी जेम्स हेनरी कसिन्स हाका मेळोन हो कविता संग्रह दिंवचें भाग कुवेंपूक मेळताना, ताणें कुवेंपूक सांगलें तुज्या मांयभाषेंतच बरय. अशें कुवेंपू कन्नडाचो ख्यात कवी जालो.

एडविनाक अशें कोणें तरी सांगल्ल्ये विशीं खंयसरयी उल्लेख ना. पूण कोंकणी सोडन हेर भाषेंत ताणें बरवंक सुरू केल्लें तर इतलें विसतार साहित्य तो लिकुंक सकतोगी म्हळ्ळें सवालयी उदेतें. एडविनान बरवंक आरंभ केल्ल्या दिसांनी कोंकणेंत खंडीत बरें साहित्य येतालें. जोसा, एट्येल, खडाप तसल्यांचें पुषकळ साहित्य आसल्लें. हें साहित्य निजाकी महत्वाचें तरी एका समाजीक वरतुलाच्या भितरलें म्हळ्ळें आमी समजाजय. एडविनान कोंकणी साहित्याक आन्येक आयाम दिलो. ताचीच म्हळ्ळी खाशेली शैली न्हय आसतां, कोंकणेची व्याप्त चडीत विसतार करचें प्रेतन केलें. अशें फकत मंगळूर परिसर न्हय आसतां, गलफ मात्र न्हय गलफाच्या झुजाच्या संदरभार अमेरिकान खेळच्या राजकीयाचें, भारताच्या विदेशी संबंधाची कांय तरी जाणकारियी आपल्या कादंबरिंनी आनी बरपांनी दिंवचें प्रेतन कर्न कोंकणेक आनिकी चडीत विसताराय हाडली. ह्या सरवांच्या मधें एडविनान इंगलीष कादंबरी कोपी कर्न बरयलां म्हळ्ळो एक आरोपयी उटलो. हें कितलें नक्की म्हळ्ळें संसोध कर्न कोणेंयी एदोळ लीखल्लें ना. आसा तर फकत भेषटेंच मंगळुरी लोकाक सहज जाल्ल्यो खबरो मात्र. तशें म्हण ताचेर इंगलीष कादंबरिंचो, विशेस कर्न आयिन रांडाचो प्रभाव खंडीत आसल्लो. तें ताणेंयी ओपून घेतलां. पूण सर्व रयांडाचेंच वा आनी कोणाचेंगी कोपी कर्न बरयतालो म्हण बिल्लो घाल्चो आमी ताका कर्चो व्हड अन्याय जावनासा. हांगा कुवेंपून आपल्या विरोधिंक म्हळ्ळें उतर उगडासाक हाडयेड्येत: ‘नानेरीद एत्तरके नीनेरबल्लेया?’ (हांव चडलां तितल्या उबारायेक तूं चडोंक सक्षिगी).

तितलें म्हळ्या उपरांत, एडविनाची साहित्य शैली कोंकणेच्या संदरभाक अतवीच आनी ‘परकी’ कशी आसल्ली म्हळ्ळो वादयी आसा. अशें ताचें साहित्य ‘साद्या’ वाचप्यांक जिरवन घेवंक कषट जातालें म्हळ्ळें उतरयी आयकोंक मेळता. हें एका दिषटीन सत जावंकयी पुरो. तशें म्हण एका भाषेची साहित्य शैली अशीच आसाजे म्हळ्ळें रेग्र कांय ना. आनी साद्या वाचप्यांक जिरवन घेवंक साध्य ना म्हळ्ळो वादयी पोकळो. कित्याक एक साहिती आपल्या साहित्या बराबर आपलोच म्हळ्ळो एक वाचप्या वर्ग रचता. संसारांतल्या कितल्या व्हडल्या साहितिकी सर्व सहृदयी मेचवातात म्हण कांय ना. सरवांनी आपणाचें साहित्य वाचिजे म्हळ्ळी आशा एका लेखकाक आसची सहज. पूण तसली आशा राजांवीक न्हय. पूण बरें साहित्य कांय थोड्या दिसांक मात्र सीमीत न्हय. थोडे पावटीं थोड्यां लेखकांचें साहित्य तांच्या मर्णा उपरांत चडीत लोकामोगाळ जाल्ले दाखलेयी आसात. साहिती अमर उराना जावंक पुरो. पूण ताणें रचलां तें विशिषट साहित्य अमर उर्ता आनी सार्वकालीक जावंक सक्ता.

आमी हो विशेस अंको काडुंक योजन केल्लें न्हय एडविनान कोंकणेक दिल्ल्ये देणगेचें रूण फारीक करुंक (तें आमच्यान जांवचेंना), पूण ताच्याकी चड कर्न जाता तितलें ताचें साहित्य अवलोकन कर्न ताच्या साहित्याचो संभ्रम करच्याक. पूण तसलें काम ‘अमर कोंकणी’च्या एका अंक्या मारिफात जालां, आनी जायत म्हळ्ळी भ्रमीद आमकां ना. ह्या अंक्यांतल्या पांच प्रमूख संसोध लेखनां द्वारीं एडविनाच्या ओट्टारे साहित्याक मात्सें आपडन तांतलें थोडें चाकचें प्रेतन मात्र जालां म्हण भोग्ता. खंयच्यायी इतर साहितीक भाषेंत जाल्लें तर, एडविनान लीकल्ल्या तसलें साहित्य विवीध रितिंनी अवलोकन जातें आसतें मात्र न्हय चडीत भासांनी पावंवचें कामयी चल्तें आसतें कोण्णा. कोंकणेच्या संदरभीं हें कषटांचें म्हण आमी ओपून घेजय. पूण एडविनाचें साहित्य आनिकी चडीत रितीं अवलोकनाक, विमरषाक ओळग जायजय तर, तें वाचून, जिरवन घेवन त्या प्रकार तर्क करचो वाचप्यांचो वर्गयी जायजय पडता. ताच्या साहित्याचेर कांय थोडे पिएच.डी संसोधयी चल्ले तर, ताच्या साहित्याचें अवलोकन अकेडेमीक पांवड्यार चडीत रितीं महत्वाचें जातलें.

आधारावळ

Workplace stress: Are you experiencing workplace stress? (n.d.). The American Institute of Stress. https://www.stress.org/workplace-stress