ಅಮರ್ ಕೊಂಕಣಿ’ ಷಣ್ಮಾಸಿಕ್ ಜರ್ನಲಾಕ್ ಆಯ್ಲೆವಾರ್ ಸಂದೇಶ ಪ್ರಶಸ್ತಿ

ಬಾ| ದೊ| ಮೆಲ್ವಿನ್ ಪಿಂಟೊ, ಜೆ.ಸ.

Scopus Author ID: 57189887469 
https://orcid.org/0000-0001-8797-1288

ಕೊಂಕ್ಣೆಕ್ ದುಸ್ರಿ ಜ್ಞಾನಪೀಠ್ ಪ್ರಶಸ್ತಿ ಮೆಳ್‍ಲ್ಲಿ ಖಬರ್ ಖಂಡಿತ್ ಹರ್‍ಏಕ್ ಕೊಂಕ್ಣಿ ಸಹೃದಯಿಕ್ ಧಾದೊಸ್ಕಾಯೆಚಿ. ರವೀಂದ್ರ ಕೇಳೇಕರಾ ಉಪ್ರಾಂತ್ 2021 ವರ್ಸಾಚಿ ಪ್ರಶಸ್ತಿ ಕೊಂಕ್ಣೆಚ್ಯಾ ದಾಮೋದರ್ ಮಾವ್ಜೊಕ್ ಲಾಬ್ಲಿ. ರಾಷ್ಟ್ರೀಯ್ ಮಟ್ಟಾರ್ ಕೊಂಕ್ಣಿ, ಭಾಶೆ ಆನಿ ಸಾಹಿತ್ಯಾ ಲಗ್ತಿ ಏಕ್ ಗಿರೇಸ್ತ್ ಭಾಸ್ ತೆಂ ಹ್ಯಾ ದ್ವಾರಿಂ ಜಾಹೀರ್ ಜಾಲಾಂ ಖಂಡಿತ್. ಮಾವ್ಜೊಚೆಂ ಸಾಹಿತ್ಯ್ ಕೊಂಕ್ಣಿ ಲೊಕಾ ಮೆರೆನ್ ಪಾವೊನ್ ತೆಂ ತಾಣಿಂ ವಾಚ್ಚ್ಯಾಬರಿ ಜಾಯ್ತ್ ತರ್ ಮಾತ್ರ್ ಹ್ಯಾ ಪ್ರಶಸ್ತೆಕ್ ಚಡಿತ್ ಗವ್ರವ್ ಲಾಬ್ತಲೊ, ಅಶೆಂ ಹಾಂವ್ ಲೆಕ್ತಾಂ.

‘ಅಮರ್ ಕೊಂಕಣಿ’ ಷಣ್ಮಾಸಿಕ್ ಜರ್ನಲಾಕ್ ಆಯ್ಲೆವಾರ್ ಸಂದೇಶ ಪ್ರಶಸ್ತಿ ಮೆಳ್ಳಿ. ಹಿ ನಿಜಾಕೀ ಏಕ್ ಸಂತೊಸಾಚಿ ಗಜಾಲ್. ಎಕಾ ಕೊಂಕಣಿ ಪತ್ರಾನ್, ತೆಂಯೀ ಸಂಶೋಧನಾತ್ಮಕ್ ಪತ್ರಾನ್ ಕರ್ಚ್ಯಾ ಬರ್ಯಾ ವಾವ್ರಾಕ್ ಮೆಳ್‍ಲ್ಲೊ ಪುರಸ್ಕಾರ್ ಹೊ. ಹ್ಯಾ ಪ್ರಶಸ್ತೆ ದ್ವಾರಿಂ ಆಮ್ಚಿ ಆನಿ ಹ್ಯಾ ಪತ್ರಾಚಿ ಜವಾಬ್ದಾರಿ ತಿತ್ಲಿಚ್ ವಾಡ್ಲ್ಯಾ ಮ್ಹಣ್ ಹಾಂವ್ ಲೆಕ್ತಾಂ. ಹೆಂ ಪತ್ರ್ ಸಂಶೋಧನಾ ಲಗ್ತಿ ಆನಿಕೀ ಚಡಿತ್ ಗಿರೇಸ್ತ್ ಕರ್ಚೆಂ ಆಮ್ಚೆಂ ಪ್ರೇತನ್ ಸದಾಂಚ್ ಜ್ಯಾರಿ ಆಸ್ತಲೆಂ. ತ್ಯೆ ದಿಶಿಂ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತೆ ವಿಶಿಂ ಹುಸ್ಕೊ ಆಸ್ಚ್ಯಾ ಸರ್ವ್ ಕೊಂಕ್ಣಿ ಲೊಕಾಂಚೊ ಪಾಟಿಂಬೊ ಆಮ್ಕಾಂ ಗರ್ಜೆಚೊ.

ಹ್ಯಾ ಅಂಕ್ಯಾಂತ್ ಮೌಲ್ಯಭರಿತ್ ಚಾರ್ ಲೇಖನಾಂ ತುಮ್ಮಾಂ ವಾಚುಂಕ್ ಮೆಳ್ತಾತ್. ತಾಂತುಂ ದೋನ್ ಲೇಖನಾಂ ಗೊಂಯ್ ಕೊಂಕ್ಣಿ ಆನಿ ಸಂಸ್ಕೃತೆ ವಿಶಿಂ ಆಸಾತ್. ಗೊಂಯಾಂತ್ ಕೊಂಕ್ಣೆಚಿ ಸ್ಥಿತಿಗತ್ ಆನಿ ಭಾಶೆ ರಾಜಕೀಯಾ ವಿಶಿಂ ಜಪಾನಾ ಥಾವ್ನ್ ಹಾಂಗಾ ಆಯಿಲ್ಲ್ಯಾ ಎಕಾ ಸಂಶೋಧಕಿನ್ ತಜ್ವೀಜ್ ಕರ್ನ್ ಬರಯಿಲ್ಲ್ಯಾ ಲೇಖನಾಚೊ ಕೊಂಕ್ಣಿ ತರ್ಜುಮೊ ಹ್ಯಾ ಅಂಕ್ಯಾಂತ್ ಆಸಾ. ಹೆಂ ಲೇಖನ್ ಸುಮಾರ್ ವೀಸ್ ವರ್ಸಾಂ ಆದಿಂ ಬರಯಿಲ್ಲೆಂ ತರೀ ಆಜಿಕೀ ತೆಂ ಪ್ರಸ್ತುತ್, ಕಿತ್ಯಾಕ್ ಪರಿಗತ್ ವಿಶೇಸ್ ಕಾಂಯ್ ಬದ್ಲೊಂಕ್ ನಾ.

ಬಾಕಿಬಾಬ್ ಬೋರ್ಕಾರಾಚ್ಯಾ ಕವಿತೆಚೊ ವಿಮರ್ಸೊ ಕರ್ನ್ ಬರಯಿಲ್ಲೆಂ ಆನ್ಯೇಕ್ ಲೇಖನ್ ಹ್ಯಾ ಅಂಕ್ಯಾಂತ್ ಫಾಯ್ಸ್ ಜಾಲಾಂ. ಬಾಕಿಬಾಬ್ ಮರಾಠಿ ಆನಿ ಕೊಂಕ್ಣಿ ದೊನೀ ಭಾಶೆಂತ್ ಬರಯಿಲ್ಲೊ ಫಾಂಕಿವಂತ್ ಲೇಕಕ್. ಕೊಂಕ್ಣೆಂತ್ ತಾಣೆಂ ಬರಯಿಲ್ಲಿಂ ಕವಿತಾ ತಾಂಚ್ಯಾ ಸಂವೇದನ್ ಆನಿ ಭಾಶೆ ಗಿರೆಸ್ತ್‍ಕಾಯೆ ನಿಮ್ತಿಂ ಉಂಚ್ಲ್ಯಾ ಪಾಂವ್ಡ್ಯಾರ್ ಉರ್ತಾತ್. ಬಾಕಿಬಾಬ್ ಖಂಡಿತ್ ಕೊಂಕ್ಣೆಚಿ ಆಸ್ತ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ.

ಚಪ್ಡೇಕಾರ್ ಸಮುದಾಯಾಚ್ಯಾ ಗೋಂದೋಳು ಸಂಪ್ರದಾಯಾ ವಿಶಿಂ ಲಿಕ್‍ಲ್ಲೆಂ ಏಕ್ ಲೇಖನ್‍ಯೀ ಹ್ಯಾ ಅಂಕ್ಯಾಂತ್ ಆಸಾ. ಕೊಂಕ್ಣೆಂತ್ ಸುಮಾರ್ ಚಾಳೀಸ್ ಆನಿ ದೋನ್ ಸಮುದಾಯ್ ಆಸಾತ್ ಆನಿ ವಿವಿಧ್ ಸಮುದಾಯಾಂತ್ಲೆ ಆಚಾರ್ ವಿಚಾರ್ ಸಂಶೋಧಾಕ್ ಪಾಂವ್ಚ್ಯೆ ತಸಲೆ. ಪುಣ್ ಸರ್ವ್ ಸಮುದಾಯಾಂಕ್ ಪಾವೊನ್ ಸಂಸೊಧ್ ಕರ್ಚೆಂ ತಿತ್ಲೆಂ ಸಲೀಸ್ ನ್ಹಯ್ ತರೀ, ಕಾಂಯ್ ಥೊಡೆಂ ಪ್ರೇತನ್ ಆರಂಬ್ ಜಾಲಾಂ ತೆಂ ಬಂದ್ ಪಡೊಂಕ್ ನಜೊ, ಅಶೆಂ ಆಮ್ಚೆಂ ಚಿಂತಪ್.

ಕೊಂಕ್ಣೆಂತ್ಲ್ಯಾ ತೀನ್ ಸಮುದಾಯಾಂಚ್ಯಾ ಲಗ್ನಾ ಸಂಪ್ರದಾಯಾಂತ್ ಆಸ್ಚ್ಯಾ ತಾಳ್ ಪಡ್ಚ್ಯಾ ಸಂಗ್ತೆಂ ವಿಶಿಂ ತಯಾರ್ ಜಾಲ್ಲೆಂ ಆನ್ಯೇಕ್ ಸಂಸೊಧ್ ಲೇಖನ್‍ಯೀ ಹಾಂಗಾ ಫಾಯ್ಸ್ ಜಾಲಾಂ. ಕೊಂಕ್ಣೆಂತ್ ಸಬಾರ್ ಸಮುದಾಯ್ ಆಸಾತ್ ತರೀ, ಚಡ್ತಾವ್ ತಾಂಚೆಂ ಮೂಳ್ ಎಕ್‍ಚ್ ಜಾವ್ನಾಸ್‍ಲ್ಲೆಂ ತೆಂ ಆಮಿ ನೆಗಾರ್ ಕರುಂಕ್ ಜಾಯ್ನಾ. ತಶೆಂ ಜಾಲ್ಲ್ಯಾನ್ ಹ್ಯಾ ಸರ್ವ್ ಸಮುದಾಯಾಂ ಮಧೆಂ ಸಂಸ್ಕೃತಿ ಆನಿ ಆಚಾರ್ ವಿಚಾರಾ ವಿಶಿಂ ಸಬಾರ್ ತಾಳ್ ಪಡ್ಚೆ ವಿಷಯ್ ಖಂಡಿತ್ ಆಸಾತ್. ಲಗ್ನಾ ತಸಲ್ಯಾ ಸಾಂಸ್ಕೃತಿಕ್ ಆಚರಣಾ ಸಂದರ್ಬಿಂ ಹೆಂ ಆಮಿ ಪಾರ್ಕಿಯೆತ್ ತೆಂ ಹೆಂ ಲೇಖನ್ ಸಾಂಗ್ತಾ.

‘ಅಮರ್ ಕೊಂಕಣಿ’ಕ್ ಕೇಂದ್ರ್ ಸರ್ಕಾರಾ ಥಾವ್ನ್ ಮಾನ್ಯತಾ ಮೆಳ್ಚೆಂ ಕಾಮ್ ನಿಮಾಣ್ಯಾ ಹಂತಾರ್ ಆಸಾ. ಅಶೆಂ ಹೆಂ ಪತ್ರ್ ಸಂಸೊದಾ ಲಗ್ತಿ ಆನಿಕೀ ಚಡಿತ್ ಉಂಚಾಯೆಕ್ ಉಬಾರುಂಕ್ ಸಾಧ್ಯ್ ಜಾತಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ.