‘कोंकणी माध्यम’ – वेबिनार शिंकळ
२०२० अगोसत मयन्याच्या १, ८ आनी १५ तारिकेर सां लुवीस कोलेज कोंकणी संस्थो आनी कोंकणी विभाग तशेंच पदव्युत्तर कोंकणी अध्ययन विभाग, विश्व्विद्यालय सांजे कोलेज हांणी संगीं मेळोन ‘कोंकणी माध्यम’ – वेबिनार शिंकळ मांडून हाडल्ली. ह्या शिंकळेची पयली वेबिनार `कोंकणी छाप्या माध्यमाची प्रसतूत परिगत आनी कोंकणी साहित्य रचणेथंय ताचो परिणाम (साहित्याची quantity उणी जायत्गी?)’ म्हळ्ळ्या विषयाचेर चल्ली. वेबिनाराचे सुर्वेर सां. लुवीस कोलेजिचो प्रांशुपाल मा| दो| प्रवीण मार्टीस हांणी उग्तावण संदेश दिलो.
ह्या वेबिनाराचो संपन्मूळ वेक्ती जावनासलेल्या मा| दो| मेलवीन पिंटो नीरुडे हांणी छाप्या माध्यमाचो इतिहास मटव्यान विवरून छाप्या माध्यमाची प्रसतूत परिगत कशी आसा म्हळ्ळेविशीं, आतां प्रसाराचेर आसच्या पत्रांच्या थोड्या संपादकाथावन येकटांय केल्ली अबिपराय आयकोवप्यासंगीं वांटून घेतली. सामान्य जावन सर्व संपादकांनी कोंकणी पत्रांक वाचप्यांचो बरोच पाटिंबो आसा. पूण कोंकणी पत्रिकोद्यमिंनी लोकालागीं पावोन म्हणजे घरां घरांनी वचोन पत्रांक वर्गणी जमंवचे मारिफात पत्रांचो विक्रो वाडयजे पडता म्हळ्ळी अबिपराय उचारली तर, मित्र, झेलो तशेंच कुरोव पत्राचो माजी संपादक मानेसत डोलफी कास्सिया हाणे वाचप्यां थावन आतांय कोंकणी पत्रांक बरोच पाटिंबो आसा देकून आपलें कादंबरी सरणी म्हयन्याळें `कुरोव’ वेगिंच परत सुर्वात्तां’ म्हळ्ळेंय दो| मेलवीन पिंटोन कळयलें. कोविडा उपरांत सगळ्या संसारार छाप्या माध्यमाची परिगत बदल्ल्या आनी हाचो परिणाम कोंकणी छाप्या माध्यमाचेऱ्यी पडला, तरी अजून चडचो कोंकणी वाचपी छाप्या माध्यमाक पाट कर्न वचोना, हांगासर पत्रां मदें स्पर्धोयी ना, जायरातांचो बर्गोळ्यी ना. तरी कोंकणी पत्रिकोध्यम सलीसायेचें न्हंय. हांगासर वृत्तिपरÀ अनबोगदार संपादकांची गर्ज आसा. तशेंच पत्रिकोध्यमिंनी वाचप्यांक तशेंच बर्प्यांक रच्चें प्रेतन करिजे म्हळ्ळी अभिपराय तांणी उचारली.
त्या उपरांत उलयिल्लो कवी, पत्र्कर्त मानेसत विल्सन कटील हाणेंय कोंकणेंत अनबोगदार संपादकांचें उणेंपण जरूर असा. हे दिशेन पत्रांच्या संपादकांनी गुमान दीवन बरें वाचप दीवंक प्रेतन केल्यार कोंकणी पत्रांनी वाचप्यांक सोधून वेच्या बदलाक वाचपीच कोंकणी पत्रांक सोधून वचोन वर्गणी बांदचे दीस कोंकणी पत्रिकोध्यमांत उदेतीत म्हळ्ळी अबिपराय उचारली.
सां लुवीस कोलेज कोंकणी विभागाची शिक्षकी श्रीमती फ्लोरा कासतेलिनोन ही वेबिनार चलवन व्हेली. सां लुवीस कोंकणी संघाचो काऱ्यदर्शी श्री एल्सन डिसोजान धन्यवाद अर्पिले.
कोंकणी माध्यमाची दुस्री वेबिनार `कोंकणी छाप्या माध्यमाक पऱ्याय जावन वाडोन येंवचें डिजिटल माध्यम आनी कोंकणी साहित्याच्या गुणमट्टाचेर ताचो परिणाम (साहित्याची quality उणी जायत्गी?)’ म्हळ्ळ्या विषयाचेर आगोसताचे ८ तारिकेर चल्ली. वेबिनाराचे सुर्वेर विश्व कोंकणी केंद्र हाचो स्थापक मानेसत बसती वामन शेणय हांणी उग्तावण संदेश दिलो.
ह्या वेबिनाराचो संपन्मूळ वेक्ती जावन आयिल्लो किटाळ जाळिजाग्याचो संपादक, विमर्शक मानेसत एम. एम. पेर्नाल हांणी उलवन – कोंकणेंत डिजिटल माध्यम आनी छापो हाचे मदें कायिंच फरक ना. हांगासर डिजिटल माध्यम छाप्या माध्यमाक पऱ्याय न्हंय बगार दोनी एकामेकाक पूरक जावनासात. छाप्यांत फायस जाल्लेंच जाळिजाग्यांनी जाता, वा जाळिजाग्यांनी फायस जाल्लें उपरांत छाप्यांत येता. तशें जाल्ल्यान ह्या दोनांतल्या साहित्याचें गुणमट्ट समासम आसा शिवाय कोंकणी डिजिटल माध्यमांत फायस जांवच्या साहित्याचें गुणमट्ट उणे जावंक ना’ म्हळ्ळी अबिपाय उचारली. दुस्रो संपन्मूळ वेक्ती केंद्रीय साहित्य अकाडेमी प्रश्ती विजेत कवी, कविता जाळिजाग्याचो संपादक मानेसत मेलवीन रोड्रिगस उलवन – डिजिटल माध्यम म्हळ्यार फकत जाळिजागे मात्र न्हंय बगार फेसबूक, वाटस्याप, युट्यूब, इन्स्टाग्राम आनी हेर सर्व सामाजीक माध्यमांय आसात पूण कोंकणेंत ह्यो वेदी चडताव जावन वापार जावनांत. कोंकणी डिजिटल माध्यमांनी आज भाशेचें, साहित्याचें मुळावें गिन्यान नातलेल्यांनिंयी बरंवचें/फायस कर्चें आसा जाल्लान हांगासर भाशेच्यो चुकी चडोन्ंच आसात. हाका खाडूं घाल्चें भोव चड गर्जेचें’ अशें अबिपराय उचारली.
हो वेबिनार कोंकणी संस्थ्याचो दिरेक्तोर मा| दो| मेलवीन पिंटो हांणी च¯व्न व्हेलो. कोंकणी संघाची सांदो कू| जेनिशा दीपिका लुवीस हिणे धन्यवाद अर्पिले.
तिस्री वेबिनार आगोसताचे १५ तारिकेर चल्ली. वेबिनाराचे सुर्वेर पदव्युत्तर कोंकणी अध्ययन विभाग, विश्व्विद्यालय सांजे कोलेज हाचो संयोजक दो| देवदास पै हांणी उग्तावण संदेश दिलो.
`कोवीड-१९ वेळार मुकेल व्हाळ्यांतलें उद्वेगावपी दृश्य माध्यम आनी लोकाक पांवचे मारिफात माध्यम शेतांत बदलावण हाडल्लें कोंकणी दृश्य माध्यम’ म्हळ्ळ्या विषयाचेर चल्लेल्या ह्या वेबिनाराचो संपन्मूळ वेक्ती जावन आयिल्लो केनरा कम्यूनिकेशन्स हाचो निर्धेशक मा| बा| रिचर्ड डिसोजा हांणी मुखेल व्हाळ्यांतला दृश्य माध्यमांनी कोविडा वेळार लोकाच्या मतिंत उबजायिल्लें भें, टिआर्पी खातीर दृश्य माध्यमाचे विपरीत ‘ब्रेकिंग निवस’ दिंवची कालेती आनी त्या मारिफात टिवी वीक्षकांथंय दृश्य माध्यमाचेर उबजाल्लो कांटाळो, ह्या मदें कोंकणेंत कोंकणेचें म्हळ्ळें दृश्य माध्यम ना जाल्यारी भोव चड कोंकणी काऱ्यक्रमां दिंवच्या `दायजिवलर्ड २४x७’ टिवी च्यानलान कोविडाच्या संदिगद कळार लोकाक शिक्षीत कर्चे संगीं ताच्या गर्जांक पांवचे मरिफात दृश्य माध्यमांत हाडलेल्या बदलावणे विशीं उलवप दिलें. दुस्रो संपन्मूळ वेक्ती मानेसत वाल्टर नंदळिकेच्या गयर हाज्रेखाल हाजर जाल्लो साहिती तशेंच दायजिवरल्ड जाळिजाग्याचो सहसंपादक मानेसत स्ट्यानी बेळा हाणे दायजिवरल्ड टिवीन कोविडा वेळार केल्ल्या वावराविशीं सविसतार माहेत दिली. ही वेबिनार कोंकणी संस्थ्याचो दिरेक्तोर मा| दो| मेलवीन पिंटो हांणी चलवन व्हेली. कोंकणी संघाथावन पर्गट जांवच्या `पर्जळ’ पत्राची संपादकी कू| जोसलीन मरीना डिसोजा हिणे धन्यवाद अर्पिले.
ह्या तिनी वेबिनाराक सां लुवीस कोलेज, विश्व्विद्यालय सांजे कोलेज तशेंच हेर कोलेजिच्या ५६ विद्यार्थिंनी आनी हेर कोंकणी मोगिंनी वांटो घेतल्लो. ही वेबिनार शिंखळ आतां युट्यूबाचेर पळेवंक हें https://www.youtube.com/playlist?list=PLd7ihu-yLOfJjR4t1VmTRKGgbyk4YY1RQ
लिंक वापारा.
