Kala Niketan gõy, majorda Fr Agnel College of Arts & Commerce hanchea fuddarponnakhal ʻ Kala, somskriti ani sahiteantlean konknni somazacho ekvottʼ mholl’llea vixoyacher don disancho raxttri-i mott’ttacho porisomvad gõychea Fr Agnel Colleg’t ogost 19 ani 20ver chol’lo.
Hea raxttri-i porisomvadachi survat paromparik prarthon git ani nachadvarim zali. Hea gitant gõychea somudayanchea sombondhachea som’milonacho sar asl’lo. Gõychea Michael Jude Graciasn rochʼl’lem hem git, St Aloysius College (Autonomous) Mongllur hangachea videarthimni gailem. Heach kolejichi videarthin ku. Remona Pereira hinne hea gitak bhorotonattyom’ nachachem prodorxon dilem.
Rajeant, gõya bhair, ani videxamni konkonni mollar vavurpi namnechea konkonni vyoktink kareavellar konkonni puroskar bhettoile. ʻKonkonni Rotnʼ puroskar Fr. Manuel Gomes ani Sandesh Prabhudesai hankam favo zalo. ʻKonkonni Bhuxonnʼ puroskar mongllurʼchea Smt. Flora Castelino ani `Goan Outreach Association, Mumbai’ hankam bhettoile. Dubaichea James Mendonca ani Kuwaitʼchea Domingos Araujo hankam ‘Konkonni Vibhuxonn’ puroskar dilo.
Mukhel soiro zaun hazor asʼl’le gõyche adle mukhyomontri Digamber Kamat hamnni aplea uloupant ʻamchi auy bhas samballpachi ani prochar korpachi goroz asa ani fokot amchi auy bhas konknnich amkam gõykaranchi vollokh divonk xoktaʼ oxem sanglem. Monglluri konkonni somazak, gõycho pramannik manddo xikoun gõychi somskritai gõychea goddi bhair vhorpa khatir ani fador ognel koleji vangdda hat melloun gõy, moharaxttr, kornattok, chonddigoddh ani kerollachea logbog 200 yuvozonnank eka mantakhal sangata haddunk kel’lea pretonak Kala Niketan Gõy haka ul’las pattoun, fuddarachea tanchea vaurant soglleank mozot ani adar divpachi axvason tamnni dili.
Ugtaunn kareachea nimanne vevegllea mhavidealoyantlea videartheank posttor ani kovita vachon spordo manddun haddʼl’lo. Nimanne soireamni konkonni kovita vachon kelem. Kovita spordeachea vhoroinnaram torfen famad lekhok, nattokist, sirialancho direktor toxem daijivorldd ddott kom’ hacho mukhel soho-sompadok manest Stany Bela hanne kovitevixim margdorxok uloup dilem.
Dusrea disa poilea sortant ʻKonkonni monisʼ mholl’llea osmitayekhal konkonni somudayacho ekvott (Fr. Onasis D’Cruz), tiatra marifat konknni somazacho ekvott (Dr. Glennis Mendonca), dusrea sortant kala ani somskriti marifat konkonni somudayacho ekvott (Dr. Pandurang Phaldesai) sahitea marifat konknni somudayacho ekvott (Fr. Jason Pinto), nimannea sortant ʻekvott vaddomvcheant prayogikotaʼ mholl’llea vixoyacher konkonni bhaxa monddollachi odhyokxinn Anvesha Singbal, dolgado konkonni okaddemicho odhyokx Celso Dias ani mongllurchea St Agnes Collegicho pradheapok Pro. Elson D’Souza hamnni probondh monddon kele. He porisomvad , Dr. (Fr.) Luis Gomes, Pro. Ramrao Wagh, Dr. Purnanand Chari hamnni choloun vheleo.
Kareachea akherik Tanvi Kamat Bambolokar, Vincy Quadros, Fr. Myron Barreto (Gõy) ani Remona Evette Pereira (Monglluru) hankam raxttri-i pamvddear manyotai mellil’lea sondorbhim hanchea konknnentlea yogdana khatir man kelo.
