Kovita ttrosttan heach 2023 ogost 6 tariker mongllurchea vixvo konkonni kendrant manddun haddol’lo kovita toxem kotha sadorikoronnacho oprup proyog ’sad soimacho’ hazor asol’lea rosikank bhulounko toxem khuxi diunko paulo. Konkonni bhas ani somskriti protixtthanachea sohoyogan manddun haddol’le hye kareavollint gõychea ddhayi akhar pongddan soimak sombondh zal’leo hindi ani konkonni kovita toxench ek konkonni kotha sador keli.
Kedarnath singachi ’bagh’, solil choturvedichi ’koham goyi o nodi ki dhar’ ani zasinta kerke tt’ttachi ’nodi, pohadd our bozar’ – hindi kovita vachleo tor, momota verlekoracheo ’gupit’ ani ’ fonddkulam’ toxench prokax porienkaracheo ’panni atam demvta’ ani ’hi rankanni’ kovita lokank chintunk korunk lagleo. Goneanpitth puroskar zoddpi kothakar damodor mauzo hanchi kotha ’bhurgim mugelim tim’ kaim zonnanchea dolleamni dukam haddunk sokli. Heo kovita ani kotha ddo. Romita gurou, ddo. Monixa khoratte ani momota verlekar hamnni sador keleo. Tanchea sadorponnachea poilem arti das ani niyoti potre hamnni kothechea toxem kovitechye patthbhumycho gorjecho vivor dilo ani kovinchi toxem kothakarachi vollokh dili.
Eka vorachea hea sadorponna nontor kaim hazor asol’lea rosikamni tanchi bhognnam ugtailim.
Kovita ttrosttacho ttrostti viliyom’ pais hanne survater ddhayi akhar hanchi vollokh korun diun sorvank yeukar dilo tor, nimannem ttrostti vitori karkoll hanne upkar attoile. Konkonni bhas ani somskriti protixtthanacho mukel odhikari guru balligan ddhayi akhar pongddachea sorvank pustokam diun man kelo.
Heach sondorbhar sahityo okaddemi, novi ddel’lin kovita ttrosttachea sohoyogakhal ’lok: vividh svor’ mholl’llem lokve d karyem manddun haddol’lem. Novo sid’di kola tonddan sunil sid’dichea mukelponnakhal ddomam’, fugddi, zakoi ani xigmo khellanchem sadorponn zalem. Sunil sid’dhin horyeka prokaracho vivor dilo.
Sahityo okaddemichea konkonni bhas solhagar somiticho vangddi echchem’ pernallan svagot kelo tor, anyek vangddi stteni bellan upkar attoile. Solhagar somiticho nimontrok melvin roddrigosan sorvank bhettvost diun man kelo.
Vordi ani tosvireo: kavitaa.com
