कविता ट्रसटान ह्याच २०२३ अगोसत ६ तारिकेर मंगळुर्च्या विश्व कोंकणी केंद्रांत मांडून हाडल्लो कविता तशें कथा सादरीकरणाचो अपरूप प्रयोग ’साद सैमाचो’ हाजर आसल्ल्या रसिकांक भुलोवंक तशें खुशी दीवंक पावलो. कोंकणी भास आनी संसकृती प्रतिषठानाच्या सहयोगान मांडून हाडल्ले ह्ये काऱ्यावळिंत गोंयच्या ढायी आखार पंगडान सैमाक संबंध जाल्ल्यो हिंदी आनी कोंकणी कविता तशेंच एक कोंकणी कथा सादर केली.
केदारनाथ सिंगाची ’बाघ’, सलील चतुर्वेदिची ’कहां गयी ओ नदी की धार’ आनी जासिंता केर्के ट्टाची ’नदी, पहाड और बजार’ – हिंदी कविता वाचल्यो तर, ममता वेरलेकराच्यो ’गुपीत’ आनी ’ फोंडकुलां’ तशेंच प्रकाश परियेंकाराच्यो ’पाणी आतां देंवता’ आनी ’ही रानकाणी’ कविता लोकांक चिंतुंक करुंक लागल्यो. ज्ञानपीठ पुरसकार जोडपी कथाकार दामोदर मावजो हांची कथा ’भुर्गीं मुगेलीं तीं’ कांय जणांच्या दोळ्यांनी दुकां हाडुंक सकली. ह्यो कविता आनी कथा डो. रमिता गुरव, डो. मनीषा खोराटे आनी ममता वेरलेकार हांणी सादर केल्यो. तांच्या सादर्पणाच्या पयलें आर्ती दास आनी नियती पत्रे हांणी कथेच्या तशें कवितेच्ये पाठभुंयचो गर्जेचो विवर दिलो आनी कविंची तशें कथाकाराची वळख दिली.
एका वोराच्या ह्या सादर्पणा नंतर कांय हाजर आसल्ल्या रसिकांनी तांची भोगणां उग्तायलीं.
कविता ट्रसटाचो ट्रसटी विलियम पायस हाणे सुर्वातेर ढायी आखार हांची वळख करून दीवन सर्वांक येवकार दिलो तर, निमाणें ट्रसटी वितोरी कार्कळ हाणे उपकार आटयले. कोंकणी भास आनी संसकृती प्रतिषठानाचो मुकेल अधिकारी गुरू बाळिगान ढायी आखार पंगडाच्या सर्वांक पुसतकां दीवन मान केलो.
ह्याच संदर्भार साहित्य अकाडेमी, नवी डेल्लीन कविता ट्रसटाच्या सहयोगाखाल ’लोक: विवीध स्वर’ म्हळ्ळें लोकवे द काऱ्यें मांडून हाडल्लें. नव सिद्दी कला तंडान सुनील सिद्दिच्या मुकेल्पणाखाल डमाम, फुगडी, जाकय आनी शिगमो खेळांचें सादर्पण जालें. सुनील सिद्धीन हऱ्येका प्रकाराचो विवर दिलो.
साहित्य अकाडेमिच्या कोंकणी भास सल्हागार समितिचो वांगडी एच्चेम पेर्नाळान स्वागत केलो तर, आन्येक वांगडी स्टेनी बेळान उपकार आटयले. सल्हागार समितिचो निमंत्रक मेलवीन रोड्रिगसान सर्वांक भेटवसत दीवन मान केलो.
वर्दी आनी तस्वीऱ्यो: kavitaa.com