“Amcho pitriprodan somaz zaunason somazant romblelim pitriprodan va dadlo kendrit sid’dhantam, dadle ani bailam modlo sombondh ani sthanman niyontronn dourche khatir vaprtat. Dexi-i sid’dhantam, loingik sid’dhantam, toxench razoki-i sid’dhantam bailank dadleakhal dourchim mholl’llem ruzu kortat. Pitriprodan sid’dhantam striyanchea sarvozonik ani khasgi xetamni kudd, loingikota ani sontan utpot’ti niyontronnar dourcheak upeg kortat. Striechi sobhai choddomvchem khatir vaporchem nogyi vyoktitv, loingikota ani folladikponnacher dhoniponn vyoktkorchea somprodayam marifat striyechem svatontr niyontronn korchim sadhonam zaun kam’ kortat. Hem hor nagorikotenchea somskritayentlean ani pillgeanthaun ghoddon ailam. Striyanchea sadea jivitak hi ek oddkoll tori striyo sovalamvinne heo chaliregro pallun aileant. Striechea kuddicher toxench tinne kazora vellim kullara thaun nheson yemvchea nogancheryi tika odhikar asana. Apnnak hor ritin niyontronnar dourunk pollemvchea dadlea prodhan somaje virodh sukx ritin dakomvchem protibhottonch ʼKomrabandʼ ani ʼMomataʼ kanniecho tirl” oxem mhonnali konkonni lekhoki, xikpa togone Pro| Dr| Zeeta Lobo. Ti novembor 9ver Sam Luvis porigonnit vixvvidealoyachea konkonni somsthean mhoineavar cholomvchea bolkamv kareant aplea komraband ani momata kanniecher vixlexonnatmok uloup ditali.
Tea uprant logbog 20 minuttam somvad chol’lo. Sumar 30 sahitimni hantum vantto ghetlo.
Kareachea surver Sam luvis kolez (svait’t) hacho registrar Dr| Alwyn D’sa hannim bolkamv nottpeadd ugtavun poili proti Pro| Dr| Zeeta Lobo hika diun gourou pattoilo. Uprant hazor zal’lea sorvank he nott peadd vanttle.
Kofi –fhollara songim karyem aker zalem.
