जुलाय पयल्ये तारिकेर मंगळुर्च्या मिलाग्रीस कोलेजिंत `भास आनी धर्म: संशोधन आनी परस्पर संबंध’ ह्या विशयाचेर `भाशा संगम २०२३’ राषट्रीय मट्टाचो मेळावो मांडून हाडल्लो . मंगळूर दियेसेजिचो बिस्प अ| मा| दो| पीटर पौल सलडान्हा हाणीं हाचें उग्तावण केलें. मिलाग्रीस कोलेजिचो भाशे-विभाग, ऐक्युएसी, एम्ऐ्सिएए हाणीं मंगळूर क्रीसती विद्यापिठाच्या सहयोगान हें काऱ्यें मांडून हाडल्लें .
चिंत्पी, जेएन्युचो निवृत्त प्राध्यापक पुरुषोत्तम बिलिमळे काऱ्याचो मुखेल सयरो जावन हाजर आसोन प्रासतावीक उलवप दिलें. काऱ्याच्ये सुर्वेर मिलाग्रीस कोलेजिचो प्रांशुपाल मा| बा| मैकल सांतुमयोरान येवकार मागलो. मंगळूर क्रीसती विद्यापिठाचो अध्यक्ष दो| (फा|) ऐवन डी’सोजान धन्यवाद अर्पिले. तीसऱ्या वर्साचो बी.कोम. विद्यार्थी जोसटेन विन्सेंट डी’सोजान काऱ्यें चलयलें. ह्या काऱ्याक परिसंवादाची निमंत्रकी कू| क्यारल फेर्नांडीस, MICAA हाची अध्यक्षीण कू| रियान्ना डी’कुन्हा हाजर आसल्लीं .
वेदी काऱ्या उपरांत चल्लेल्या परिसंवादांत सिद्धकट्टे सर्कारी कोलेजिचो प्रांशुपाल दो| अजक्कळ गिरीश भट हाणें `धर्मदोंदिगे कन्नड मत्तू तुळू भाषेगळ मुखामुखी’ विशयाचेर, रिशिवनाचो दिरेक्तोर दो| फा| रुडोलफ आर. पिंटो हाणीं `Impact of Konkani & Latin in Religion’, मंगळूर सर्कारी कोलेजिच्या हिंदी विभागाची मुखेली दो| सूम टी. दोड्डण्णवर हिणें `धार्मीक आचरण मे हिंदी का उपयोग’ म्हळ्ळ्या विषयाचेर प्रबंधां मंडन केलीं.
परिसंवादाच्या निमाणें मिलाग्रीस कोलेजिचो करेस्पोंडेंट फा| बोनवेंचर नज्रेत हाणीं समारोप भाषण केलें.
अधिवेशनांत दोनश्यांवयर प्रतिनिधिंनी भाग घेतलो.
