वोवियांचेर विचार सातें मांय‍पणाचें आचरण : कवी मेलवीन रोड्रिगस

By

“आदीं वोवियो घडच्यो आनी गांवच्यो आस‍ल्ल्यो बायलांनी देकून वोवियांचेर मांडून हाड‍ल्लें हें विचार सातें मांय‍पणाचें आचरण. ह्या विचार सात्या मारिफात सां लुवीस कोलेज कोंकणी संस्थो आमच्या चलियांक, आमच्या स्त्रियांक, आमच्या मांयांक मान कर्ता अशें म्हाका भोग्ता” म्हणालो केंद्र साहित्य अकाडेमी कोंकणी सलहागार समितिचो निमंत्रक श्री मेलवीन रोड्रिगस. एपरील २० तारिकेर एरीक मथायस सभांगणांत सां लुवीस कोलेज (स्वायत्त) कोंकणी संस्थ्यान युजिसी स्ट्रैड स्कीमा खाल कोंकणी लग्ना साहित्याचेर मांडून हाड‍ल्लें एका दिसाचें राश्ट्र मट्टाचें विचार सातें उग्तावण कर्न तो उलयतालो.

‘आमच्या बायलांनी काजारा सोभाणां वेळार, दांत्यांनी तांदूळ दोळटाना, कुजनांतलो वावर कर्ताना, मात्र न्हय भुर्ग्यांक पाळन्यांत धलयताना, लाट्याचें उदक वोडताना आनी प्रत्येक करून माग वोळताना वोवियो घडच्यो आस‍ल्ल्यो. अशें घडलेल्या वोवियांनी भेसोराच्या कामाविशीं, असुखी लग्नाविशीं, कामुकी तशें अत्त्याचारी घोवाविशीं दुरां आसतालीं. एके कुशीन भक्तिचो गिरोप आस‍ल्लो तर अन्येक कुशीन पुरूष प्रधान समाजिचेर व्यंग आसतालें. स्त्रीयांक आपले स्त्रीपणाचे विवीद विचार व्यक्त करुंक तवळच्या काळार वोवियोच परिणाम‍कारी हातेर जावंक पाव‍ल्ल्यो. असल्ये जान‍पद साहित्याचेर चड आनी चड संसोद चलाजे. वोवियांनी उण्यार उणें हजराच्याकी चड विशिषठ सब्द आसात. ताचोच एक सब्द-कोश फायस करिजे’ अशें म्हणालो तो.

ह्या विचार सात्याचे प्रायोजक युजिसी-स्ट्रैड स्कीम हाचो संचालक दो| आलवीन डे’सा उलवन – युजिसी स्ट्रैड स्कीमा मारिफात स्थळीय संसकøतिचें अध्ययन चल्ता. सां लुवीस कोलेजीन येदोळ असलीं १४ संसोद येवजणां हातीं घेतल्यांत. असलीं अध्ययनां निजायकी भोव गर्जेचीं’ अशें म्हणालो.

उग्तावण काऱ्याचो अध्यक्ष जावन हाजर आसललो सां लुवीस कोलेजिचो प्रांशुपाल दो| (फा|) प्रवीण मार्टीस जे.स. उलवन ‘एका काळार समुदायाक लागीं हाडललें, समुदाय बादून हाडलेलें हें तोंडी साहित्य, ह्यो वोवियो वा गाणीं कोंकणी लोकाच्या संसकøतेचो एक वांटो जावनासतां, ताचीं नकलां करिनाये, बगार हें साहित्य ताचो मूळ उद्देश होगडायनासतां आमच्या संसकøतिचो एक वांटो जावन कशें उरवन घेव्येत आनी तितल्याच वैभवीक रितीन मुकल्या पिळगेक कशें हतांतर कऱ्येत म्हळ्ळेविशीं आयच्या युवजणांनी प्रायोगीक रितीन चिंतिजे आनी ते दिशेन वावराक लागाजे’ म्हण उलो दिलो.

काऱ्याच्या सुर्वेर कोंकणी संघच्या विद्यार्थिंनी कोंकणी ध्येय गीत गायलें. कोंकणी संस्थ्याचो दिरेक्तोर दो| (फा|) मेलवीन पिंटो जे.स. हाणे स्वागत केलो. सां लुवीस कोलेज विद्यार्थीन कू| दिया मसकरेन्हस हिणे काऱ्ये चलयलें. कोंकणी विभागाची मुकेली श्रीमती फ्लोरा कासतेलिनोन धन्यवाद समर्पिले. साहित्य अकाडेमी डेल्ली हाच्या कोंकणी सलहागार समितिचो निमंत्रक जावन नेमक जाल्लो पयलो मंगळूर‍गार श्री मेलवीन रोड्रिगसाक ह्या काऱ्यावेळार शाल पांगूर्न सन्मान केलो.

उग्तावण काऱ्यें संप्तच मंगळुर्च्या तेगां आनी गोंयच्या एका संपन्मूळ वेक्तीन कोंकणी कथोलीक, जिएस‍बी तशेंच कुडमी समुदायांतल्या लग्ना गितांचेर प्रबंद मंडन केले. गोंय नवेलीम हांगाच्या रोजरी कोलेज आफ कोमर्स आनी आट्र्स हाचो प्राद्यापक फा| रोमन रोड्रिगस हाणीं ‘पुर्वजांच्या गांवांत पर्की जाल्ल्यो वोवियो’ म्हळ्ळ्या विषयाचेर प्रबंद मंडन केलो. मंगळुर्च्या नळंदा शाळेची निवृत्त शिक्षकी श्रीमती चंद्रिका मल्य हिणे ‘जिएस‍बी होव्यांची चरित्रा आनी तांची प्रामुख्यता’ म्हळ्ळ्या विषयाचेर, पुत्तूर सां फिलोमिना कोलेजिंतल्या समाज शासत्र विभागाचो निवृत्त मुकेली फ्रो| जे. बी. सिकवेरा हाणें ‘मंगळुरी कोंकणी क्रिसतांवांच्या काजारांनी वोवियो – आदीं आनी आतां’ आनी मंगळुरांतली वकील श्रीमती प्रतिमा एस.आर. हिणे ‘कुडमी काजारांनी आळवोन येंवचीं लग्ना-गाणीं’ म्हळ्ळ्या विशीं प्रबंद मंडन केले.

दोनपरा उपरांतल्या काऱ्याक्रमांत श्रीमती फिलोमिना डी’सोजा आनी पंगड कुमटा हाणीं उत्तर कन्नडाचीं कथोलीक लग्नागितां सादर केलीं. कुत्तार कृषणकोडी हांगाच्या श्रीमती कल्याणी आनी सांगात्यांनी कुडमी लग्ना गाणीं, श्रीमती हिलडा मोरस आनी सांगाती बोंदेल हाणीं मंगळुरी कथोलीक काजारांतल्यो वोवियो आनी वेर्स तशेंच श्रीमती चंद्रिका मल्य आनी सांगाती मंगळूर हाणीं जिएस‍बी समुदायांतल्यो वोव्यो प्रसतूत केल्यो.

काऱ्यक्रमाच्या निमाणे दो| (फा|) मेलवीन पिंटो जे.स. हाणे संपणेचे श्हरे दिले. काऱ्यें संयोजक श्री जोकीम पिंटो हाणे धन्यवाद समर्पण केलें.

ह्या विचार सात्यांत मंगळुरांतल्या विवीद कोलेजिथावन १३०च्याकी चडीत विद्यार्थिंनी, थोड्या विंचणार साहितिंनी आनी भास आनी संसकøतिच्या संसोदकांनी वांटो घेतलो.

 

Leave a Comment

Your email address will not be published.

You may also like

Latest Posts

post-image
Prose

केरळांतुले कोंकणी साहित्यांतु जीवचरित्रां आनी आत्मचरित्रां

जीवचरित्रां आनी आत्मचरित्रां म्हळ्यार खंचेय भाषेचे साहित्यांतु आसूका जालेले सुप्रधान दोनि साहित्यप्रकार. … Continue reading केरळांतुले...
Read More