“आमचो पितृपरदान समाज जावनासोन समाजांत रोंबलेलीं पितृपरदान वा दादलो केंद्रीत सिद्धांतां, दादले आनी बायलां मदलो संबंध आनी स्थान्मान नियंत्रण दवर्चे खातीर वापर्तात. देशीय सिद्धांतां, लैंगीक सिद्धांतां, तशेंच राजकीय सिद्धांतां बायलांक दादल्याखाल दवर्चीं म्हळ्ळें रुजू कर्तात. पितृपरदान सिद्धांतां स्त्रीयांच्या सार्वजनीक आनी खासगी शेतांनी कूड, लैंगिकता आनी संतान उत्पत्ती नियंत्रणार दवर्च्याक उपेग कर्तात. स्त्रियेची सोभाय चडंवचें खातीर वापर्चें नग्यी व्यक्तित्व, लैंगिकता आनी फळादिकपणाचेर धनिपण व्यक्त्कर्च्या संपरदायां मारिफात स्त्रीयेचें स्वातंत्र नियंत्रण कर्चीं साधनां जावन काम कर्तात. हें हर नागरीकतेंच्या संसकृतायेंतल्यान आनी पिळग्यांथावन घडोन आयलां. स्त्रीयांच्या साद्या जिविताक ही एक अडकळ तरी स्त्रीयो सवालांविणे ह्यो चालिरेग्रो पाळून आयल्यांत. स्त्रियेच्या कुडिचेर तशेंच तिणे काजरा वेळीं कुळारा थावन न्हेसोन येंवच्या नगांचेऱ्यी तिका अधिकार आसाना. आपणाक हर रितीन नियंत्रणार दवरुंक पळेंवच्या दादल्या प्रधान समाजे विरोध सूक्ष रितीन दाकंवचें प्रतिभटनच ʼकम्राबांदʼ आनी ʼममाताʼ काणियेचो तीरल” अशें म्हणाली कोंकणी लेखकी, शिकपा तज्ञ प्रो| दो| झीटा लोबो. ती नवेंबर ९वेर सां लुवीस परिगणीत विश्वविद्यालयाच्या कोंकणी संस्थ्यान म्हयन्यावार चलंवच्या बोल्कांव काऱ्यांत आपल्या कम्राबांद आनी ममाता काणियेचेर विशलेषणात्मक उलोवप दिताली.
त्या उपरांत लगबग २० मिनुटां संवाद चल्लो. सुमार ३० साहितिंनी हांतूं वांटो घेतलो.
काऱ्याच्या सुर्वेर सां लुवीस कोलेज (स्वायत्त) हाचो रेजिसट्रार दो| आलवीन डेसा हाणीं बोल्कांव नोटप्याड उग्तावून पयली प्रती प्रो| दो| झीटा लोबो हिका दीवन गौरव पाटयलो. उपरांत हाजर जाल्ल्या सर्वांक हे नोट प्याड वांटले.
कोफी –फ्हळारा संगीं काऱ्यें आकेर जालें.
