ʻʻआमी शीदा सांगुंक जायनातल्लें साहित्यद्वारीं सांगोन आमचेंच प्रतिभटन कऱ्येतʼʼ अशें म्हणालो नामणेचो मटव्यो काण्येंगार मेलवीन पिंटो नीरुडे. तो सप्तेंबर ७वेर सां लुवीस कोलेज कोंकणी संस्थ्याच्या ʻबोल्कांवʼ म्हयन्याळ्या बसकेच्या पयल्या बसकेरथावन ʻमटव्यो काणियो आनी हांवʼ म्हळ्ळ्या विषयाचेर उलयतालो.
ʻआरुंधती रोय हिची दुस्री कादंबरी The ministry of utmost happniess हांतूं ती गोध्रा विशीं उलयता, प्रसतूत राजकीय परिगते विशीं उलयता, काश्मीरा विशीं उलयता… पूण हें सर्व साहित्याच्या वर्तुलांत येता. चाफ्रानीय हें प्रेतन ताच्या नाटकांनी, कवितेंनी, बर्पूर केलां. दलीत साहित्यांतीय आमी हें पळेतांव, ब्ल्याक लिटरेचरांतीय आमी हें पळेतांव. आयच्या संदर्भार साहित्य बोव गर्जेचें म्हण म्हाका भग्ता. कित्याक आज व्यक्ती चड आनी चड संकीर्ण जाल्यात देकून व्यक्ती स्पूर्ती जांवचें उणें जावन्ं्च येता. त्या स्थितेंत बहुशा साहित्याक ती जवाब्दारी चड आसा. कितें आमी शीदा सांगुंक असाद्य गी, तें आमी साहित्या द्वारीं इनडै्रेकट जावन सांग्येत कोण्णा…ʼ अशें म्हणालो. तो आपल्यो मटव्यो काणियो तीन कालेतिच्यो जावनासोन पयलें आपणाचो स्वअनभोगच काण्यो जाल्यात तर, दुस्रें हेरांच्या जिण्येंत आपणें पळेल्लें आनी तिस्रें आपणें आपल्याच भेसाक विमर्शात्मक रितीं पळेवन लिकल्ल्यो काणियो- म्हण वांटे कर्न लगबग ४० मिनुटां आपल्या साहित्याविशीं उलयलो. त्या उपरांत लगबग ४० मिनुटां संवाद चल्लो. सुमार ३५ साहितिंनी हांतूं वांटो घेतलो.
काऱ्याच्या सुर्वेर सां लुवीस परिगणीत विश्वविद्यालयाचो वैस चान्सलर दो. फा. प्रवीण मार्टीस हांणी आबोल्याच्या झडा मुळाक उदाक वोतचे मारिफात ʻबोल्कांवʼ म्हयन्याळ्या बसकेचें उग्तावण केलें. ह्या वेळार कोंकणी संस्थ्याचो निर्देशक दो. फा. मेलवीन पिंटो, सां लुवीस कोलेज (स्वायत्त) हाचो कुलपती दो. आलवीन डेʼसा, ʻबोल्कांवʼ बसकेचो संचालक, किटाळ जाळिजाग्याचो संपादक हेच.एम. पेर्नाल आनी सां लुवीस परिगणीत विश्वविद्यालय कोंकणी संस्थ्याचो काऱ्यें संयोजक जोकीम पिंटो वेदीर आसल्ले.
ʻबोल्कांवʼ उग्तावण कर्न आपलो संदेश दिल्ल्या दो. फा. प्रवीण मार्टीस हांणी ʻ १४४ वर्सां आदीं सां लुवीस कोलेजिच्या सुर्वातेथावन कोंकणी भाशेक आनी भाशेच्या विवीध चटुवटिकेंक प्रेरण-प्रोत्साह दिल्ले जेज्वीत याजक अजून कोंकणी भाशेक त्येच मापान प्रोत्साह दिते आसात. ʻबोल्कांवʼ म्हयन्याळ्या बसके मारिफात साहितिंक आनी तांच्या साहित्याक लागशिल्यान ओळकोंक, भोगुंक एक आवकास मेळता. हांगासर चल्चो संवाद कोंकणी भाशेच्या उदर्गतेक प्रेरक जांवदीʼ अशें म्हणालो.
काऱ्याच्या सुर्वेर ʻबोल्कांवʼ म्हयन्याळ्या बसकेचो संचालक हेच. एम. पेर्नाळान काऱ्याच्या काऱ्य विदानाविशीं सविसतार माहेत दिली.
दुस्री ʻबोल्कांव बसका अक्तोबराचे १२ तारिकेर सकाळीं धा वरार चल्तली. ह्या काऱ्यांत सां लुवीस कोलेज (स्वायत्त) हाचो कुलपती दो. आलवीन डेʼसा ʻसाहित्य आनी विमार्सोʼ विशीं उलयतलो.
