कोंकणी लेखक संघ कर्नाटक हांची वारषीक जेराल जमात तशेंच डा. एडवर्ड नज्रेत हांच्या साहीत पयणाचो भांगारोत्सव आचरण

सपटेंबर १५ वेर आयतारा सकाळीं १० वरांचेर कोंकणी लेखक संघ कर्नाटक हाची वारषीक जेराल सभा संदेश सभासलांत जम्ली. मिलाग्रीस कोलेजिचो प्रिन्सिपाल मा. बा. मैकल सांतुमायोर हाणीं अध्यक्ष्पण घेतल्लें. कर्नाटक कोंकणी साहित्य अकाडेमी अध्यक्ष श्री स्ट्यानी अलवारीस मुखेल सयरे जावन हाजर आसल्ले. सवें के.एल.एस. सुंकाण समितिचो   संचालक मानेसत रिचर्ड मोरस, सुंकाण समितिचे  सांदे श्री डोलफी लोबो,  डा. एडवर्ड नज्रेत, श्री हेनरी मसकरेन्हस वेदीर आसल्ले. श्री रिचर्ड मोरस हाणीं वारषीक लेकपाक (आडीट केल्लें) मंडन केलें. त्या नंतर कोंकणी साहिती श्रीमती फ्लावीय अलबुकर्क हिचो, सोमालियाच्या वारीस डिरी हिणें बरयलली आपली जीवन चरित्रा “The Desert Flower” हाचें कोंकणी तर्जण पुसतक “रेगिस्थानांतलें फूल” श्रीमती फ्लावीय अलबुकर्काची आवय  श्रीमती रीटा तोरस हिणें वेदीर आसल्ल्या मानाच्या सयऱ्यांसवें उग्तावण केलें. लेखकिचे पूत केलवीन आनी वियान वेदीर आसल्ले.  साहिती दोतोर जोयेर नोरोन्हान पुसतकाची परिचय दिली.  काऱ्यावेळीं श्री स्ट्यानी अलवारीस हांका सन्मान केलो. तशेंच अकाडेमी सांदे  श्री रोनी क्रासता, श्री नवीन लोबो, श्रीमती सपना क्रासता हांकां गौरव अर्पिलो. सैंट अलोशियस कोलेजिथावन कोंकणी पी.जी. डिपलोमांत चवतें rank आपणायलेल्या के.एल.एस. सांदो श्रीमती प्रीत मिरांदाक मान केलो. श्री स्ट्यानी अलवारिसान सर्वां सांगाता मेळून कोंकणेचो वावर कऱ्यां म्हण उलो दिलो.

काऱ्यक्रमाचो फुडलो वांटो जावन, डा. एडवर्ड नज्रेतान साहित्य पयणाचीं पन्नास वर्सां संपंवच्या वग्ता, ताका सन्मान आसाकेल्लो. मालघडो साहिती श्री डोलफी कास्सियान डो. एडवर्डाची व्यक्तिगत परिचय दिली. तशेंच लवी गंजिमठ हिणें ताच्या पन्नास वर्सांच्या साहित्याच्या पाटभुंयचेर  “डा. नज्रेताच्यो मटव्यो काणियो आनी समाजीक स्थित्यंतराचें चित्रण” ह्या विषयाचेर उलवप चलयलें. आशें सविसतारायेन डो. नज्रेताच्या साहीत देणगेची झळक आनी वळक दिली.

के.एल.एस. सुंकाण समिती सांद्यांसवें वेदीर आसल्ल्या मानाच्या सयऱ्यांनी डो. नज्रेताक शेलो, फुलां, फळां, झेलो अर्पून मान केलो. ताची पतीण डो. नेल्ली नज्रेत तशेंच कुटमादारां ह्या वग्ता वेदीर हाजर आसल्लीं. सन्मान स्वीकार केल्ल्या डा. एडवर्ड नज्रेतान, आपल्या साहीत सेवेक तेंको दिल्ल्या सर्व पत्रांच्या संपादकांचो, साहितिंचो, याजकांचो, कुटमादारांचो तशेंच वाचप्यांचो उपकार आटयलो.  अध्यक्ष स्थान घेतल्ल्या मा.बा.मैकल सांतुमायोर हाणीं पन्नास वर्सांच्या साहीत सेवेक डा. एडवर्ड नज्रेताक बरें मागच्येसवें कोंकणेच्या सेवेंत के.एल.एस.न कर्च्या वावराक शाभासकी पाटयली. के.एल.एस. सलहा समितिचो सांदो   श्री एडमंड नोरोन्हान धन्यवाद पाटयले. सुंकाण समिती सांदो श्री हेनरी मसकरेन्हसान काऱ्यें चलयलें. कोंकणी साहिती, पत्रांचे संपादक, हितैशी आनी कोंकणेचे आनी डो. नज्रेताचे अभिमानी हाजर आसल्ले. सहभोजनासवें काऱ्यक्रम संपलें.