“സാഗൊളി മൻശ്യാകുളാൻ ആദാർ‌ല്ലി പയ്ലി വൃത്തി, ഫകത്‌ ശെതാന്ത്‌ ഘൊൾചെം മാത്ര്‌ സാഗൊളി ൻഹയ്, സാഗൊളെക്‌ ലാഗൊൻ രൂപിത്‌ ജാല്ലി മൻശ്യാ സംസ്കൃതിയ്‌ സാഗൊളെചൊ ഏക് വാണ്ടൊ. ജെദ്നാം ആമി ഹി വൃത്തി സാണ്ഡ്ലി, താകാ ലാഗൊൻ സാഗൊളെക്‌ സംബന്ധ്‌ ജാല്ലെ സബ്ദ്, സംസ്കൃതി നാസ്‌ ജാംവ്ക് ലാഗ്ലി. ഹാകാ ലാഗൊൻ ഭാസ്‌യി അസ്കത്‌ ജാലി” – അശെം മ്ഹണാലൊ കൊങ്കണി, കാനഡി, തുളു ത്രിഭാശാ ലേഖക്‌ വല്ലി ബോളാ.
തൊ സാം ലുവിസ്‌ പരിഗണിത്‌ വിശ്വ്‌ വിദ്യാലയാച്യാ കൊങ്കണി സംസ്ഥ്യാൻ മ്ഹയ്ന്യാവാർ ചലംവ്ച്യാ ʻബൊൽകാംവ്ʼ സാഹിതിക്‌ സംവാദ് കാര്യാവെളാർ ʻസാഗൊളി ആനി സാഹിത്യ്ʼ മ്ഹള്ള്യാ വിഷയാചെർ ഉലയ്താലൊ.
ലഗ്ബഗ്‌ 45 മിനുടാം താണെ സാഗൊളി ആനി സാഹിത്യാക് പൂരക് ജാല്ല്യൊ സംഗ്തി ആനി താകാ സംബന്ദിത് താച്യാ ജിണ്യെന്ത്ലിം ഘഡിതാം വിവരിലിം.
സംവാദാ വെളാർ ലേഖക്‌, കൊങ്കണി സംസ്ഥ്യാചൊ ദിരെക്തൊർ മെല്വിൻ പിണ്ടൊ, നീരുഡെൻ വല്ലി ബോളാച്യാ ഉത്തീം ഉലവ്പാക്‌ ഉല്ലാസുൻ ʻജെദ്നാം ആമ്ച്യാ കൊങ്കണി കഥൊലിക്‌ സമുദായാൻ കൃശി സാണ്ഡ്ലിഗീ തവൾ‌ഥാവ്ന്‌ ആമ്ച്യാ സുത്തുരാന്ത്ല്യാ ഹെർ സമുദായാംസംഗിം ആസ്‌ല്ലൊ മൊഗാ-മായ്പാസാചൊ ബാന്ദ്‌യി ഉണൊ ജായിത്ത്‌ ആയ്ലൊ. സാഗൊളി എകാ രിതിൻ സർവ്’ധർം സമന്വയാക് പൂരക് ജാതാലി. ആജ് കരാവളെന്ത് മതീയതാ വാഡ്ല്യാ തർ, ഹാംഗാചൊ ലോക് സാഗൊളെ ഥാവ്ന് പയ്സ് ഗെല്ലെംയീ ഏക് കാരൺ ജാംവ്ക് പുരൊʼ അശെം താംണി അഭിപ്രായ് വ്യക്ത് കെലി.
ലേഖക്‌ ചാർൽസ്‌ ലോബൊ ഹാംണി മാനെസ്ത്‌ വല്ലി ബോളാക് സാഗ്വളെക്‌ സംബന്ദിത് കളിത്‌ അസ്ചെ ജായ്തെ സബ്ദ് ശ്ഹെരാന്ത്ല്യാ ബരവ്പ്യാങ്ക്‌ കളിത്‌ നാന്ത്‌ ദെകുൻ ചിത്രാം സവെം ഹ്യാ സബ്ദാഞ്ചൊ ബൂക്‌ ഫായ്സ്‌ കരുങ്ക്‌ സലഹാ ദിലി. ദൊ| വില്ലി ഡിʼസില്വാൻ ʻസാഗൊളി സംബന്ദിത് സബ്ദ്/ഉത്രാം ഗാംവാഥാവ്ന്‌ ഗാംവാക്‌ ബദ്ലാതാത്‌ മ്ഹള്ളെംയ്‌ ഗുമാനാന്ത്‌ ദവരിജെʼ മ്ഹളെം.
കാര്യാച്യാ സുർവെർ മെല്വിൻ പിണ്ടൊ നീരുഡെൻ ഗുലൊബ്‌ ദീവ്ന്‌ വല്ലി ബോളാക് സ്വാഗത്‌ മാഗ്ലൊ. ʻബൊൽകാംവ്ʼ കാര്യാക്രമാചി ഫുഡ്കായ്‌ ഘെത്‌ല്ലൊ ലേഖക്‌ എച്ചെം പെർനാളാൻ ധന്യവാദ്‌ അർപിലെ.
മേ മയ്ന്യാചെം ബൊൽകാംവ് കാര്യെം ആയ്താരാ 4 താരികെർ, സകാളിഞ്ച്യാ 9.30 വ്ഹരാഞ്ചെർ ചാ-ഫൾഹാരാ സാംഗാതാ സുരു ജാവ്ന് 10.00 ഥാവ്ന് 11.00 പാസുൻ ചൽതാലെം.
