“सागोळी मनश्याकुळान आदारल्ली पयली वृत्ती, फकत शेतांत घोळचें मात्र सागोळी न्हय, सागोळेक लागोन रूपीत जाल्ली मनश्या संसकृतीय सागोळेचो एक वांटो. जेदनां आमी ही वृत्ती सांडली, ताका लागोन सागोळेक संबंध जाल्ले सब्द, संसकृती नास जावंक लागली. हाका लागोन भासयी असकत जाली” – अशें म्हणालो कोंकणी, कानडी, तुळू त्रिभाशा लेखक वल्ली बोळा.
तो सां लुवीस परिगणीत विश्व विद्यालयाच्या कोंकणी संस्थ्यान म्हयन्यावार चलंवच्या ʻबोल्कांवʼ साहितीक संवाद काऱ्यावेळार ʻसागोळी आनी साहित्यʼ म्हळ्ळ्या विषयाचेर उलयतालो.
लगबग ४५ मिनुटां ताणे सागोळी आनी साहित्याक पूरक जाल्ल्यो संग्ती आनी ताका संबंदीत ताच्या जिण्येंतलीं घडितां विवरिलीं.
संवादा वेळार लेखक, कोंकणी संस्थ्याचो दिरेक्तोर मेलवीन पिंटो, नीरुडेन वल्ली बोळाच्या उत्तीम उलवपाक उल्लासून ʻजेदनां आमच्या कोंकणी कथोलीक समुदायान कृशी सांडलिगी तवळथावन आमच्या सुत्तुरांतल्या हेर समुदायांसंगीं आसल्लो मोगा-मायपासाचो बांदयी उणो जायित्त आयलो. सागोळी एका रितीन सर्व’धर्म समन्वयाक पूरक जाताली. आज करावळेंत मतीयता वाडल्या तर, हांगाचो लोक सागोळे थावन पयस गेल्लेंयी एक कारण जावंक पुरोʼ अशें तांणी अभिपराय व्यक्त केली.
लेखक चारल्स लोबो हांणी मानेसत वल्ली बोळाक साग्वळेक संबंदीत कळीत असचे जायते सब्द श्हेरांतल्या बरवप्यांक कळीत नांत देकून चित्रां सवें ह्या सब्दांचो बूक फायस करुंक सलहा दिली. दो| विल्ली डीʼसिलवान ʻसागोळी संबंदीत सब्द/उत्रां गांवाथावन गांवाक बदलातात म्हळ्ळेंय गुमानांत दवरिजेʼ म्हळें.
काऱ्याच्या सुर्वेर मेलवीन पिंटो नीरुडेन गुलोब दीवन वल्ली बोळाक स्वागत मागलो. ʻबोल्कांवʼ काऱ्याक्रमाची फुडकाय घेतल्लो लेखक एच्चेम पेर्नाळान धन्यवाद अर्पिले.
मे मयन्याचें बोल्कांव काऱ्यें आयतारा 4 तारिकेर, सकाळिंच्या 9.30 व्हरांचेर चा-फळहारा सांगाता सुरू जावन 10.00 थावन 11.00 पासून चल्तालें.
