പാടിം ഘുംവൊൻ പളയ്താനാ മ്ഹജ്യാ ജിവിതാന്ത് മ്ഹജ്യാ വാണ്ട്യാക് ആയില്ലെ അവ്കാസ് ഹാംവെ ബര്യാൻ വാപാർല്യാത് മ്ഹൺചി വ്ഹഡ് തൃപ്തി മ്ഹാകാ ആസാ” മ്ഹണാലൊ ദൊ| ജ്യോ ലോബൊ, കുൽശേകർ.
ദൊ| ലോബൊ, മംഗ്ളാരാ, 14 വെർ, സാം. ലുവിസ് പരിഗണിത് വിശ്വവിദ്യാലയാച്യാ കൊങ്ക്ണി സംസ്ഥ്യാച്യാ മയ്ന്യാള്യാ ബൊൽകാംവ് കാര്യാവളിന്ത് ഉലയ്താലൊ.
“ഹാംവ് മട്വൊ ദെകുൻ ൽഹാൻ ആസ്താനാ മ്ഹാകാ ശാസ്ത്രി മ്ഹൺ ചിഡായ്താലെ. ജൈ ജവാൻ – ജൈ കിസാൻ നാരൊ ദില്ല്യാ ശാസ്ത്രിചേർ മ്ഹാകാ വർതൊ അഭിമാൻ ആസ്ലൊ. താച്യാ അകാലിക് മർണാച്യാ മിസ്തെരാൻ ഖന്തീസ്ട് ജാല്യാം പയ്കിം ഹാംവ്യീ എക്ലൊം. ആനി ഹ്യാച് കാരണാക് ലാഗൊൻ, വിദേശാംഗ് ഖാത്യാന്ത് ദെശാഭായ്ല്യാ സെവെചൊ അവ്കാസ് മ്ഹജ്യാ വാണ്ട്യാക് യെതാനാ, ലണ്ഡൻ തസലൊ ജാഗൊ സൊഡ്ന് ഹാംവെ താശ്കെണ്ട് വിഞ്ച്ലൊ. 2004 വ്യാ വർസാ ശാസ്ത്രിചി ജൽമാശതാബ്ദി ആസാ മ്ഹൺ മ്ഹാകാ ഖബർ ആസ്ലി ആനി ഹൊ അവ്കാസ് താശ്കെണ്ടാന്ത് ആസ്താനാ ഹാംവെ ബര്യാൻ വാപാർലൊ. ശാസ്ത്രിച്യാ നാംവാർ ഏക് വസ്തുസംഗ്രഹാലയ്, ഉദ്യാൻ ആനി തോ മരൺ പാവ്ലെല്യാ താശ്കെണ്ടാന്ത് ഭാരതീയ് സാംസ്കൃതിക് കേന്ദ്ര് താച്യാ നാംവാർ ബദ്ലിലെം. ഹെം മ്ഹജ്യാ ജിവിതാന്ത്ലെം വ്ഹഡ് സാധൻ മ്ഹൺ ഹാംവ് ലെക്താം”
“വ്ഹഡ്ലെ മനിസ് അശെച് വ്ഹഡ്ലെ ജായ്നാന്ത്, താഞ്ചെഥംയ് ഥൊഡെ വിശേസ് ഗൂൺ ആസ്താത്” മ്ഹൺ രാജീവ് ഗാന്ദിചൊ ഉഡാസ് കാഡുൻ ലോബൊൻ – തീൻ മൂർതി ഭവനാന്ത് എകാ കാര്യക്രമാന്ത് വിദേശി വിദ്യാർഥിം ലാഗിം ഉലയില്ല്യാ, തവൾ ദെശാചൊ പ്രദാനി ജാവ്നാസ്ലെല്യാ രാജീവ് ഗാന്ദിൻ, കാര്യക്രമാന്ത് വിദേശി വിദ്യാർഥിംനി ദില്ലെം തൊണ്ഡ്പാശി ദൂർ ആയ്കൊൻ, താഞ്ച്യാ കല്യാണാ ഖാതിർ കശെം ക്രം ഘെത്ലെം മ്ഹള്ളെ വിശ്യാന്ത് സങ്ക്ഷിപ്ത് വിവർ ദിലൊ.
സാംഗാതാച് മൊരിശിയസ് മേയർ ഡി ക്രൂജ് മ്ഹൺ കള്ള്യാ ഉപ്രാന്ത് പ്ലാജാ ഥിയെടരാന്ത് കാര്യക്രം മാണ്ഡുൻ ഹാഡുങ്ക് താചെം ‘നാം’ കശെം ‘ഹാം’ ജാവ്ന് ബദ്ലിലെം, പിട്ടാസി ആനി വിദേശി ദ്വേശി മ്ഹൺ സമാജെന്ത് ജെരാൽ അഭിപ്രായ് ആസ്ലെല്യാ ഗൊദ്രേജ് കംപ്ണെച്യാ മ്ഹാലകാ ഥാവ്ന് സാംസ്കൃതിക് കാര്യക്രമാങ്ക് മാത് നയ്, വിദേശി വിദ്യാർഥിഞ്ച്യാ ശിക്പാക് സയ്ത് കശി കുമക് മെൾചെപരിം കെലെം – ഹെ വിശ്യാന്ത് മാർമിക് ഗജാലിഞ്ചിം ദൃശ്ടാന്താം ദീവ്ന് ലഗ്ബഗ് ഏക് വോർ ദൊ| ലോബൊൻ, ബൊൽകാംവ് അർധ്യാ വൊരാച്യാ ഉലവ്പാചൊ സംപ്രദായ് മൊഡുൻ, കൊണാക്ച് ഉബ്ഗൊൺ യേനാശെം ആപുർബായെചെം ഉലവ്പ് സാദർ കെലെം.
‘ബൊൽകാംവ്’ കാര്യാവളിചെം പരികൽപൻ ആനി സുങ്കാൺ സാംബാളുൻ ആസ്ച്യാ എച്ചെം, പെർനാൽ ഹാച്യാ കൊങ്കണി കാവ്യെം : രുപാം ആനി രൂപകാം ബുകാക് 2025 വ്യാ വർസാചൊ രാഷ്ട്രീയ് പാംവ്ഡ്യാച്യൊ പ്രതിഷ്ഠിത് സാഹിത്യ അകാദെമി പുരസ്കാർ ഫാവൊ ജാല്ല്യാ സുവാള്യാർ ബൊൽകാംവ് പംഗഡ്, കൊങ്ക്ണി സംസ്ഥൊ, സാം. ലുവിസ് പരിഗണിത് വിശ്വവിദ്യാലയ് തർഫെൻ മാൽഘഡൊ സാന്ദൊ ശ്രീ ആലൻ സി. എ. പിരേരാ ആനി ഉലവ്പി ജ്യോ ലോബൊ ഹാണി ശൊൽ ആനി ഫുലാം ഝെലൊ ദീവ്ന് മാൻ കെലൊ. ഹ്യാ വെളിം അഭിനന്ദനാചിം ഉത്രാം ഉലയില്ല്യാ ശ്രീ ആലൻ സി. എ. പിരേരാ ഹാണി “…കൊങ്കണി സാഹിത്യാചെ ചരിത്രെന്ത് സാഹിത്യ് വിമർശാക് രാശ്ട്രീയ് മട്ടാർ പ്രശസ്തി മെൾല്ലി ഹിച് പയ്ലെ പാവ്ടിം. തി കീർത് വിമർശക് എച്ചെം പെർനാലാക് ഫാവൊ ജാതാ. പെർനാൽ തസല്യാ ൽഹാൻ ഗാംവാന്ത് ഉബ്ജാല്ലെം ഹെം കിടാൾ കർനാടകാന്ത് ഉജ്വാഡ് ഫാങ്കവ്ന് ആസാ-തെം ദേശ് തശെം അന്തരാശ്ട്രീയ് മട്ടാർ ഉജ്വാഡ് ഫാങ്കവ്ചി ദിവ്ടി ജാവ്ന് പർജളൊന്ദി…” മ്ഹൺ ബരെം മാഗ്ലെം. ഹ്യാ വെളിം ആപ്ല്യാ കൊങ്ക്ണി സർകസ് ബുകാക് കർനാടക കൊങ്കണി സാഹിത്യ അകാഡെമി ഥാവ്ന് ലേഖനാം വിഭാഗാന്ത് ഉത്തീം പുസ്തക് പുരസ്കാർ ആപ്ണായില്ല്യാ ബൊൽകാംവ് സാന്ദൊ രോശു, ബജ്പെ ഹാകാ ഫുലാം തുരൊ ദീവ്ന് ദൊ| ജ്യോ ലോബൊൻ ബൊൽകാംവ് പംഗ്ഡാ തർഫെൻ മാൻ കെലൊ.
ബൊൽകാംവ് കാര്യാവളിചൊ മുകെൽ സലഹാദാർ ദൊ| ആല്വിൻ ഡെസാ ഹാണി അഡിയൊ സന്ദേശാ മുകാന്ത്ര് ബൊൽകാംവ് രൂവാരി എച്ചെമാക് ബരെം മാഗ്ലെം.
സാം. ലുവിസ് പരിഗണിത് വിശ്വവിദ്യാലയാചൊ പ്രാധ്യാപക് മനോജ് ഫെർനാന്ദ് ഹാണെ കാര്യെം ചലവ്ന് വെലെം ആനി എച്ചെമാച്യാ സാഹിത്യാചി സങ്ക്ഷിപ്ത് ഒളക് ദിലി.
കൊങ്ക്ണി സംസ്ഥ്യാചൊ കാര്യക്രം സഞ്ചാലക് പിണ്ടൊ വാമഞ്ജൂർ ഹാണി ജ്യോ ലോബൊക് യെവ്കാർ മാഗ്ലൊ, സഹായകി വനിതാ ഹിണെ സഹകാർ ദിലൊ.
കാര്യവൾ സുർവാത്ചെ പയ്ലെം പാട്ല്യാ ദിസാംനി സംസാരി പയ്ണ് സംപവ്ന് സർഗിം രാജാക് ഗെല്ല്യാ സാം. ലുവിസ് ശിക്പാ സംസ്ഥ്യാഞ്ചൊം രെക്ടർ ബാ| മെല്വിൻ ജോസെഫ് പിണ്ടൊ ഹാഞ്ചൊ ഉഡാസ് കാഡുൻ, മിനുടാചെം മാവ്ന് സാംബാളുൻ, താങ്കാ ബൊൽകാംവ് പംഗ്ഡാ തർഫെൻ ശാന്തി മാഗ്ലി.
ബൊൽകാംവ് കാര്യാവളിക് ഹാജർ ജാല്ല്യാ സർവ് സാന്ദ്യാങ്ക് മൊഗാചി കാണിക് ജാവ്ന് ജ്യോ ലോബൊ ഹാണി കർനാടക കൊങ്കണി സാഹിത്യ അകാഡെമിൻ ഫായ്സ് കെല്ലൊ താഞ്ച്യാ ആത്മകഥനാചൊ ബൂക് ” ഏക് ജിവിത്: അവ്കാസ് അപരിമിത്” ഹസ്താക്ശർ കരുൻ ദിലൊ.
കാര്യാവളിക് പ്യാലെസ്തീനി കവി, പത്ർകർത് നജ്വാൻ ഡാർവിശ് ആനി ബെംഗ്ളുരാന്ത് എഫ്.കെ.സി.എ. തശെം ഹെർ സംഘടനാഞ്ചൊം രൂവാരി ആനി പ്രമുക് സമാജിക് മുകെലി ശ്രീ ചാർൽസ് ഗോമ്സ്, ശിർവാം, രൊനാൽഡ് ഒലിവെരാ പഡുകോണെ ആനി ഹെർ മാനെസ്ത് ഹാജർ ആസ്ലെ.
