मंगळूर: “कोंकणी भासेक भारताचे संविधानांत मान्यताय मेळून तीस वरसां हुपलीं आनी एक संपूर्ण नवी पिळीगा आयज उबो राबल्या. ह्या पर्व कालाचेर कन्नड, मलयाळम, रोमी याने पर्शियन लिपींचो आधार नाशें नवी पिळ्गेन केवल दिवनागरींत कोंकणी वाचुंक आनी बरोवुंक तांक घेवुंक जाय. बोलियो वेग वेगळ्यो आसतात आनी ताका ताचें स्वताचें शोभितकाय आसता पूण पाठ्य पुस्तकां एक लिपियेर शिक्षणिक रूपाचेर निर्माण करूंक जाय तेन्ना मात्र संसारांत कोंकणीक एक भास म्हळ्ळी मान्यताय मेळता” अशें म्हणु कर्नाटक कोंकणी पाठ्य पुस्तक सुधारणा स्मितिचो अध्यक्ष आनी विश्व कोंकणी केंद्राचो विश्वस्थ, कोंकणी लेखक मंगळूरच्या प्रो. डा. कस्तुरी मोहन पै हांनी कोंकणी मान्यताय दिवसाचे सुवळ्यांत उलौ दिलो. देवनागरी लिपियेंत कोंकणी शिक्षण चालू आसच्या कर्नाटकाच्या तीन थटवर्ती जिल्यांच्या मंगळूर, गंगोळ्ळी, कुमटा आनी कारवारच्या शाळेंत ३०० विद्यार्थियांक तानीं ह्या सुसंदर्भाचेर विश्व कोंकणी केंद्राच्या तर्पेन शिश्यवेतन वांटलें. श्रीमती उषा मोहन पै आनी श्री एम.आर. कामत हानीं शाळा ब्याग, कोंकणी बरपाचे पुस्तकां वांटलीं. मंगळूरांत श्री वेंकटरमण देवुळाच्या विश्वस्त सतीश प्रभु, कोंकणी भाषा मंडळाचो अध्यक्ष वसंत राव, नामनेचो कोंकणी चारोळी साहिती रेमंड डी’कुन्हा, आद्ले अध्यक्ष वेंकटेश भाळीगा, खजांची सुरेश शेणै उपस्थित आशिल्ले. गंगोळ्ळेंत शाला प्रमुख गणेश कामत आनी सदाशिव नायक, कुमटांत शाळेचो गौरव सचिव मुरळिधर प्रभु आनी कारवारांत शाळेचो मुखैल सिक्षक अशोक राणे उपस्थित आशिल्ले. कोंकणी शिक्षिकां ऐश्वर्य भट्ट, गंगोळ्ळी नमिता, रेश्मा, रम्या चित्ताल, कुमटांत गौरिश भंडारी आनी कारवारांत वैशाली नायक हानीं कार्यावळीयो चलयल्यो.
