सां लुवीस कोलेज (स्वायत्त) मंगळूर हाच्या चवदाव्या पद्वे संभ्रमा वेळार कोंकणी पदव्युत्तर डिपलोमांत पयलें ऱ्यांक आपणायिल्ल्या २४व्या ब्याचाच्या चंद्रकला के. हिका प्रमाण पत्र, भांगारा पदक आनी नगदेन इनाम दीवन मान केलो. चवतें स्थान आपणायिल्ल्या श्रीमती प्रीता लिनेट पिरेरा हिका प्रमान पत्र दीवन मान केलो. दुस्रें स्थान आर्थर पिरेरा, ओमजूर आनी तिस्रें स्थान फ्लोयड किरण मोरास निर्काण हाणीं आपणायिल्लें.
चंद्रकला के. हिणे ʻदक्षीण कन्नड जिल्लेचे भालावलीकार/राजापूर सारस्वत समुदाय आणी तंचे प्रचलीत संसकारʼ, आर्थन पिरेरा ओमजूर हाणे ʻमांड सोभाण, कोंकणी भास आनी संसकृतीʼ फ्लोयड किरण मोरास हाणे ʻकाणियांगार वल्ली वग्गच्या विंचणार काणियांनी प्रकृतीʼ आनी प्रीता लिनेट पिरेरा हिणे ʻकोंकणी कथोलीक काजारां आदीं आनी आतां – एक चारित्रीक अध्ययनʼ म्हळ्ळ्या विषयांचेर संसोध प्रबंध बरयिल्ले.
२०२४, जुलाय १३ वेर कोलेजिच्या लोयोला सभासालांत चल्लेल्या ह्या पद्वे संभ्रमांत पद्वी, पदव्युत्तर तशेंच पदव्युत्तर डिपलोमाच्या ओट्टू १७२५ विद्यार्थिंक प्रमाण पत्रां वांटलीं. हांतल्या ७९ विद्यार्थिंक ऱ्यांकां आनी २० विद्यार्थिंक विशेस इनामां दीवन मान केलो.
पद्वे संभ्रमाचो मुखेल सयरो जावन हाजर आसल्लो आल इंडिया कौन्सील फोर टेक्निकल एज्युकेशन (AICTE) हाचे अध्यक्ष प्रो| टी. जी. सीताराम हांणी आपल्या उलवपांत ʻकृत्रीम वा कृतक बुद्वंत्कायेच्या (AI) ह्या काळार जयत जोडिजे तर विद्यार्थिंनी निरंतर शिकची आनी कुशेलाय आपणांवची गरज आसा. हो एक परिवर्तनशील संवसार. शिकपा वेवसता बदलत आसा. विद्यार्थ्यांनी ह्या वेवस्थेक ओळसोन घेंवची गरज आसा. हाका लागोन विद्यार्थिंनी निरंतर सवालां विचार्न्च आसाजे. सोफ्ट स्किल्स, तंत्रगिन्यानाचें एकीकरण, वयक्तीक शिकप हांचेर भर दीजे. शिकप केदनांच संपाना. विद्यार्थिंनी कुशेलाय वाडवन घेंवची देशाच्या यशस्वेक दिंवचो पाटिंबो जसोʼ म्हण म्हळें.
संभ्रमावेळार कर्नाटक प्रांत जेज्वीत व्हडील (प्रोविनशियल) फा| डायनिसियस वाज एसजे, मंगळूर जेज्वीत एज्युकेशनल सोसायटी (एम’जेईएस) हाचो रेकटर बा| मेलवीन जोसेफ पिंटो एसजे हाजर आसल्ले. सां लुवीस परिगणीत विश्व्विद्यालयाचो ऊप कुलपती दो| फा. प्रवीण विजय मार्टीस हांणी बरो येवकार मागलो तर कुलसचीव दो| आलवीन डेʼसा हांणी ऱ्यांक घेतल्ल्यांचीं नांवां वाचून सांगलीं. आडळत्या मंडळिचे सांदे, विवीद विभागाचे डीन, शिक्षकां, शिक्षकेतर शिब्बंदी हाजर आसल्लीं. पद्वे संभ्रमाचो संयोजक दो| रेजी जान हाणे धन्यवाद पाटयले. दो| मोना मेंडोन्सा, मनोज फेर्नांडीस आनी आलिटा डेʼसा हांणी काऱ्यें चलयलें.
पदव्युत्तर कोंकणी डिपलोमाचो मटव्यान विवर:
कोर्साची आवदी : दोन वर्सां. (हऱ्येका वर्साच्या एपरील म्हयन्याथावन नवें ब्याच सुर्वात्ता)
शिकपा विषय : पयल्या वर्सा : कोंकणी भाशेचो इतिहास, कोंकणी गद्य, कोंकणी कोंकणी नाटक, कोंकणी कविता, कोंकणी कोंकणी पत्र्गावरिका
दूसऱ्या वर्सा : कोंकणी लोकवेोद, कोंकणी व्याकरण, डिजिटल माद्यमांत कोंकणी भास. दूसऱ्या वर्साच्या आखेरीक विद्यार्थिंनी संसोध प्रबंद बरवंक आसतलो. संगीं पांच दिसांच्यो संपर्क / ओनलाियन क्लासी: (नैसर्गीक भास संसकरण (NLP) आनी मशीन लर्निंगांत कोंकणिचो वापार, कोंकणी दृश्य (सिनेमा, टिवी) माध्यमांविशीं माहेत तशेंच समाजीक संपर्क माद्यमांनी कोंकणिचो वापार-हाचेर अनबोगदाकरां थावन माहेत.
प्रवेश आनी शुल्क: १८ वर्सां वयल्या आनी कनिश्ट पियुसी पास जाल्ल्या कोणेंय ह्या डिपलोमाक भर्ती जाव्येत. डिपलोमाक भर्ती जावंक आशेतेल्या अऱ्ह विद्यार्थिंनी कोंकणी संस्थ्याच्या ९४८१५२७३९४ वा ०८२४-२००७३९४ नंबरांक संपर्क कर्चो. कोर्साचो शुल्क : रू. ४,७००/- (GST सवें) पावीत करिजे. या कोंकणी संस्थ्याच्या दफ्तराक भेट दीवन अर्जी घाल्येता.
विद्यार्थिवेतन: कोंकणी शिकोंक मन आसच्या दुबळ्या विद्यार्थिंक विद्यार्थिवेतन सवलाताय आसा. हे विशीं चडीत विवराक कोंकणी संस्थ्याच्या दप्तराचो संपर्क कर्चो.
२६व्या ब्याचाक प्रवेश घेवंक निमाणी तारीक ३०, जुलाय २०२४.
