रोजरी वाणिज्य आनी कला महाविद्यालय नावेलीं, साश्ट आनी कोंकणी भाशा मंडळ मडगांव हांच्या जोडपालवान वेर्स लोकगितां: कोंकणीची गिरेस्त संस्कृती ह्या विशयाचेर २०२४ फेबरेर ३ एका दिसाचो राष्ट्रीय परिसंवाद आयोजीत केल्लो.
परिसंवादाक बाय शारुफा फेर्नांडीस आनी बाब एविसन गोमस आमच्या विद्यार्थ्यांनी मागण्याचे रितींतल्यान सुरवात केली. उपरांत आमच्या महाविद्यालयाचे प्राचार्य प्रो. हॅलीक बरेर्टो हाणीं सभाघरांत हाजीर आशिल्ल्या सगळ्या मानेसतांक आनी विद्यार्थ्यांक येवकार दिल्लो. कार्यावळीचो प्रत्यक्षपणान आरंभ करपा खातीर काजाराचे येर्स म्हणपाक वापरपी तंत्राचो – दांत्यांत तांदूळ घालून सुरवात केली. परिसंवादाचें प्रस्तावीक उलोवप ह्या परिसंवादाचे संयोजक फा. रोमन रोड्रिगीस हाणें केले. कोंकणी भाशा मंडळाचे अध्यक्ष आनी परिसंवादाचे जोड संयोजक ह्या नात्यान श्रीमती अन्वेषा सिंगबाळ हिणें आपलें उलोवप केले. फा. मॅल्वीन पिंटो हाणें आयच्या परिसंवादाचे बीजभाशण केलें. कोंकणी विभागाचे मुखेली ह्या नात्यान डॉ. डेनीस वाज हाणें उकतावण सुवाळ्याचें उपकाराचें उलोवप केले. उपरांत बीज भाशण करपी फा. मॅल्वीन पिंटो आनी कोंकणी भाशा मंडळाचे अध्यक्ष श्रीमती अन्वेषा सिंगबाळ हांकां यादस्तीकां दिल्लीं. उकतावण सुवाळ्याचें सुत्रसंचालन बाय प्रतिक्षा सांगांवकार हाणें केलें.
च्या जाल्या उपरांत परिसंवादाचें पयलें सत्र जालें, ह्या सत्रांत डॉ. पांडुरंग फळदेसाय अध्यक्ष म्हण लाबिल्ले. ह्या सत्रांत, मंगळूर वेर्सांची वाटचाल ह्या विशयाचेर श्री. ज्योकीं पिंटो हाणें अभ्यास करून प्रपत्र तयार केलें जाल्यार बाय डेल्वीटा वियेगस हिणें तो सादर केलो. सत्रांतलें दुसरें प्रपत्र श्रीमती माया मोरजकार हिणें गोंयच्या वेर्सींची वाटचाल ह्या माथाळ्या खाला अभ्यासपुर्ण प्रपत्र मांडलें. वेर्सांतल्यान घडिल्ली समाजीक अभिव्यक्ती ह्या विशयाचेर फा. रोमन रोड्रिगीत हाणें सत्रांतलें तिसरें प्रपत्र मांडलें. सगळे प्रपत्र मांडल्या उपरांत सत्राचे अध्यकशान प्रपत्रांचो साराशं केलो आनी उपरांत प्रस्ना खातीर माची उकती केली. सभाघरांत आशिल्ल्यांच्या प्रस्नांच्यो जापो दिल्ल्या उपरांत बाय कल्पिता हाणें सत्रांत वांटो घेतिल्ल्यांचे उपकार मानले. सत्रांत वांटो घेतिल्ल्या मानेस्तांक यादस्तीकां दिलीं.
काजाराची रीत आनी येर्सांचें सादरीकरण ह्या दुसऱ्या सत्रांत मंगळूरच्या पंगडान आनी गोंयच्या पंगडान येर्सांचें सादरीकरण केलें. ह्या सत्रांत डॉ. ग्लॅनीस मॅंडोन्सा हिणें आपलें मनोगत व्यक्त केलें. परिसंवादाक लग्नाचे रितीचेर चड करून वेर्स गांवपाच्या वेळार आसिल्लें स्वरूप प्रत्यक्षपणान दाखयलें. बाय वायलट फेर्नांडीस हाणें ह्या सत्राचें सुत्रसंचालन केलें.
वेर्स लोकगितां: कोंकणीची गिरेस्त संस्कृती ह्या एका दिसाच्या परिसंवादाच्या समारोप सुवाळ्याक प्रो. हॅलीक बरेर्टो हाणें येवकाराचें उलोवप केलें. महाविद्यालयाचे प्रशास्क ह्या नात्यान फा. गाब्रियल कुतिन्हो हाणें आपले विचार मांडले. सहाय्यक प्राध्यापक श्रीमती आशा गांवकार हिणें सगळ्यांचे उपकार मानले आनी एका दिसाचो राष्ट्रीय परिसंवादाक पुरणविराम लायलो.
