केंद्र साहित्य अकाडेमी आनी सां. लुवीस परिगणीत विद्यापीठचो कोंकणी संस्थो हांच्या जोड आसऱ्याखाल कोंकणी कवी लुवीस मसकरेन्हस हाच्या साहित्याचेर ʻसाहित्य मंचʼ काऱ्यें १६ फेभ्रेर २०२४ वेर सां. लुवीस परिगणीत विद्यापीठ हाच्या राबर्ट सिकवेरा सलांत मांडून हाडल्लें.
सां. लुवीस परिगणीत विद्यापीठाचो रेजिसट्रार दो. आलवीन डेʼसा, नामणेचो कोंकणी कवी, साहित्य अकाडेमिच्या कोंकणी सलहा समितिचो निमंत्रक मानेसत मेलवीन रोड्रिगस, साहित्य अकाडेमी कोंकणी सलहागार समितिचो वांगडी श्री हेनरी मेंडोन्सा (एच. एम. पेर्नाल), कोंकणी संस्थ्याचो दिरेक्तोर दो. फा. मेलवीन पिंटो आनी कोंकणी संस्थ्याचो काऱ्यें संयोजक श्री जोकीम पिंटो वेदीर आसल्ल्ले.
दो. आलवीन डे’सा हाणीं जम्ल्ल्यांक बरो येवकार मागोन काऱ्याचो दिसटावो दिलो. साहित्य मंचाचे मुखेल ध्येय कितें म्हळ्ळेविशिंय ताणी माहेत दिली.
श्री हेनरी मेंडोन्सा हाणीं येदोळच साहित्य अकाडेमीन आयोजीत केल्ल्या काऱ्याविशीं आनी मुकल्या दिसांनी चलवंक आसच्या काऱ्या विशिंय माहेत दिली.
ह्या काऱ्यावेळार श्री लुवीस मसकरेन्हस हाचें जिवीत आनी साहित्य कृतियांचेर चार प्रपत्रां मंडन जालीं. फामाद लेखक तशेंच कर्नाटक कोंकणी साहित्य अकाडेमी प्रशसती विजेत श्री डोलफी कास्सिया हाणीं `लुवीस मसकरेन्हस हाचें जीवीत आनी कृतियो’ श्री मेलवीन रोड्रिगस हाणीं `लुवीस मसकरेन्हस हाच्या कवितेंनी छंद’, `राकणो’हप्त्याळ्याचो आदलो संपादक फा. फ्रान्सीस रोड्रिगस हाणीं ‘संपादक जावन लुवीस मसकरेन्हस’तशेंच फामाद नाटक्कार दो. फा. अलवीन सेरावो हांणी `नाटक्कार जावन लुवीस मसकरेन्हस’म्हळ्ळ्या विषयांचेर प्रबंध मंडन केले. दो. फा. मेलवीन एस. पिंटो सभा चलयणार जावनासल्ले.
श्री मर्वीन सिकवेरा हाणे काऱ्यें चलयलें. श्री फ्रांकलीन कासटेलिनो आनी पंगडान ध्येय गीत गायलें. कू| डेलवीट वेगस हिणे सभा चलयणाराची परिचय वाचली. श्री जोकीम पिंटो हाणे धन्यवाद पाटयले.
