Mongllur vixv videaloi odhyoin pitth, Besentt vimons kolez zan’pod samskritik songh hanchea zodd asreakhal ‘Uniting Voices’ mholl’llem konkonni, tullu, moloyalom’ ani beari bhaxecher eka disachem vichar’satem march 21ver chol’lem. Hem vichar satem mongllur vixv’videalachea vannijy vibhagacho ddin Pro| EShwar hannem divo pettoun ugtailem. To aplea uloupant – ‘aichea hea kallar bhovo chodd gorjechea toxench prostut zaunaschea ‘Uniting Voices’ mhonnje ‘ekvott haddche talle’ vixoyacher ho porisomvad manddun hadd’l’leak tumkam porbim pattoitam. Konkonni odhyoino pitth osolim karyokromam manddun haddte asa. Mongllur vixv videaloyakhal aschea vividh bhaxenchea pittham poiki konknni odhyoin pitth bhovo’ch bolixtt. Hangasor don korodd rupeancho korpos fondd asa. Vorsak logbog 14lak vadd mellchea hea fonddathaun kitlim-i karyim manddun haddyeta. Fokot sukt drixttikon ani ichchhasoktichi gorz asa. Dr| Jayavanth Nayak hea dixen ut’tim’ riticho vaur korta’ mhonnalo. Mukarun tannem ‘konkonni somudayachea samajik orthik porigote vixim odhyoin choloije. Tea vorvim sorkarak hea somudayak gorjek poddchim yeuzonnam manddun haddunk solis zata. Konkonni bhaxent unchlea somsodhak ut’tezon dije. Hea marifat konkonni bhas bollvont zata” mhonnalo.
Diksuchi bhaxonn dil’lo vixv konkonni kendracho odhyokx C. A. Nandagopal uloun -‘pradexik bhaxenchea urounneak tea bhaxentlea togoneamni sangata mellon bhaxechea vaddaullivixim krom’ ghemvchem gorjechem’ mhonnalo. Hea vellar tannem vixv konkonni kendran konknnechea vaddaullek hatim ghet’l’lea kamamvixim sovistar mahet dili.
Karea vellim mukel soiro zaun WNES hacho odhyokx Mannela Annappa Naik, somstheachi sonchaloki toxench WNES hachi upadhyokxinn Dr| Manjula K. T., besentt somstheacho addolltedar Dr| Rajashekar Hebbar, principal Dr| Praveen Kumar K. C. Vedir hazor as’l’le.
Bahubhaxi vichar sateant somponmull vekti zaun hazor as’l’le Payyannur Ramesh Pai hannim moloyalom’ bhaxevixim, xri Gokuldas Prabhu konkonni bhaxevixim, Abubakkar Sidhiq beari bhaxevixim ani Dr| Madhava M. K. Tullubhaxevixim videarthim songim somvad choloilo. Dr| Devdas Pai B. hannim hem vichar satem choloun vhelem konkonni odhyoin pitthache odhikari, sande, vividh kolejiche xikxok toxench videarthi hea vichar sateak hazor as’l’lim.
Karyem somyozok Dr| Jayavanth Nayak hannim prastavik uloup dilem. Videarthin Pranamya hinnem karyem choloilem. Konkonni songhochea videarthimni prarthon git gailem. Zan’pod samskritik songhachi sonchaloki Pro. Jyaneshwari hinne dhonyovad pattoilem. Sohosonchalok Dr| Parashurama Malloge, Pro| Anupama Ballige ani pro Maya Kudva hanni sohokar dilo.
